Home တၢ်ကစီၣ် ကညီကူၣ်သ့ဆဲးလၤ၀ဲၤကျိၤကၠိတဖၣ် တနံၣ်အံၤကၠိဖိဟဲအါထီၣ်လၢအကထိ

ကညီကူၣ်သ့ဆဲးလၤ၀ဲၤကျိၤကၠိတဖၣ် တနံၣ်အံၤကၠိဖိဟဲအါထီၣ်လၢအကထိ

818
0

လါယူၤ ၂၅ သီႇ ၂၀၂၁ နံၣ်ႇ ခ့ၣ်အဲးစံၣ်

ခ့ၣ်အဲၣ်ယူၣ်=ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤအပူၤ ကညီကူၣ်သ့ဆဲးလၤ၀ဲၤကျိၤ(KECD)တၢ်ပၢအဖီာ်လာ်ကၠိတဖၣ် တနံၣ်အံၤ(၂၀၂၁=၂၀၂၂)တၢ်သိၣ်လိနံၣ်အပူၤ ကၠိဖိနီၣ်ဂံၢ်ဟဲအါထီၣ်လၢအကထိအဂ့ၢ်န့ၣ် သ့ၣ်ညါဘၣ်န့ၣ်လီၤႉ

တကီၢ်ခါခီဖျိထံရူၢ်ကီၢ်သဲးတၢ်အိၣ်သးအဃိ ကၠိဖိမိၢ်ပၢ်တနီၤခီဖျိလဲၤပာ်က့ၤ အဒံၣ်အဖိ ကၠိလၢ (KECD)စုဒုၣ်တီၤအဖီလာ်အဃိ ကၠိဖိနီၣ်ဂံၢ်ဟဲအါထီၣ်၀ဲလီၤဒီး တကီၢ်ခါခဲအံၤကၠိဖိနီၣ်ဂံၢ်ခဲ လၢာ်အိၣ်၀ဲ(၅ႇ၀၀၀)ဘျဲၣ်အဂ့ၢ်န့ၣ် ကညီကူၣ်သ့ဆဲးလၤ၀ဲၤကျိၤ(KECD)လီၢ်ခၢၣ်သး နဲၣ်ရွဲၣ် စီၤလီၤအဲၣ်မူ စံးဘၣ်ခ့ၣ်အဲးစံၣ်န့ၣ်လီၤႉ

အ၀ဲစံး၀ဲလၢ“ခီဖျိကၠိဖိဟဲအါထီၣ်အဃိ တၢ်လိၣ်ဘၣ်တဖၣ်ဟဲအါထီၣ်စ့ၢ်လီၤႇ မ့မ့ၢ်ကၠိသရၣ်/မုၣ်ခီဒုအိၣ်လီၤႉ ဘၣ်ဆၣ်ကၠိတနီၤန့ၣ်ခီဖျိကၠိဖိနီၣ်ဂံၢ်အါအဃိ တဘၣ်လိာ်အသးဒီးကၠိသရၣ်/မုၣ်အနီၣ်ဂံၢ်ဘၣ်ႉ ခီဖျိ ကၠိက့ၤအိးထီၣ်ဖဲတနွံအံၤဒံးလီၤအဃိ တၢ်လၢအလိၣ်တဖၣ်ပကဘၣ်ဟးထၢစရီဒံးလီၤႉ ဒ်န့ၣ်မးပမၤၦဲၤကသ့လီၤ”အဂ့ၢ်န့ၣ် စံး၀ဲန့ၣ်လီၤႉ

ခီဖျိကၠိဖိနီၣ်ဂံၢ်ဟါအါထီၣ်အဃိ ကၠိဟံၣ်ဒွဲ(ဘီဒၢၣ်)တဖၣ်ႇကၠိတၢ်ဖိတၢ်လံၤတဖၣ်ဒီး တၢ်သိၣ်လိတၢ်ဖိတၢ်လံၤတဖၣ်စ့ၢ်ကီးတကူတလၢ၀ဲဘၣ်အမဲာ်ညါ ခီဖျိမ့ၢ်စ့ၢ်ကီးခိ၀ံၣ်အဆၢကတီၢ်အဃိ လၢတၢ်ကဒီသဒၢကၠိတၢ်အိၣ်ဆူၣ်အိၣ်ချ›တကပၤစ့ၢ်ကီးတၢ်လိၣ်အိၣ်၀ဲအဂ့ၢ်န့ၣ် စီၤလီၤအဲၣ်မူ စံးအါထီၣ်၀ဲန့ၣ်လီၤႉ

ပူယ့သ၀ီ နီၢ်ကစၢ်ဒူသ၀ီတီၤထီကၠိ ကၠိခိၣ် စီၤဂ့ၤဒိၣ် စံး၀ဲ“ပအိးထီၣ်ကၠိဘျီန့ၣ်ၦၤဟဲ ပာ်ကၠိဖိဟဲအါထီၣ်ဒီဒူၣ်ညါလီၤႉ တတူၢ်လိာ်ဘၣ်ဒီးတသ့ဘၣ်ႉ ပဆိမိၣ်ပာ်လၢပကပာ်ပကၠိ တုၤလၢတီၤခၢၣ်သးအပတီၢ်လီၤႉ ဘၣ်ဆၣ်ကၠိလၢအကဘၣ်ထီၣ်တီၤထီတဖၣ် ခီဖျိထံရူၢ်ကီၢ် သဲးတၢ်အိၣ်သးဒီးတၢ်ဆါတၢ်အိၣ်သးအဃိ ဟးပာ်၀ဲအလီၢ်တအိၣ်ဘၣ်ဒီး ပအိးထီထီၣ်က့ၤ တီၤထီအပတီၢ်လီၤမီၤနီၤႉ ကၠိအိးထီၣ်ဘျီ ၦၤလၢအအိၣ်လၢတၢ်လီၢ်အဂၤတဖၣ်ဟဲ ထီၣ်ဘျီဘၣ်တူၢ်၀ဲလီၤ”အဂ့ၢ်န့ၣ် စံး၀ဲန့ၣ်လီၤႉ

တၢ်အိးထီၣ်ကၠိဒ်အံၤန့ၣ် တမ့ၢ်လၢတူၢ်လိာ်၀ဲသုးမီၤစိရိၤဘၣ်အသိး တမ့ၢ်ထီဒါဒီကလုာ်ဃူဖိးပဒိၣ် NUG ဒီး သရၣ်/မုၣ်လၢအဟူးဂဲၤလၢ CDM အပူၤတဖၣ်ဘၣ်န့ၣ်လီၤႉ လၢပဟီၣ်က၀ီၤအပူၤ ပမၤလၢပစၢၤသွဲၣ်ဖိဒံဖိသၣ်တဖၣ်အတၢ်အိၣ်မူခါဆူညါအဂီၢ်လီၤအဂ့ၢ်န့ၣ် KECD လီၢ်ခၢၣ်သး နဲၣ်ရွဲၣ် စီၤလီၤအဲၣ်မူစံး၀ဲန့ၣ်လီၤႉ

ဒ်ကညီကူၣ်သ့ဆဲးလၤ၀ဲၤကျိၤ(KECD)၂၀၂၀=၂၀၂၁ တၢ်သိၣ်နံၣ်တၢ်မၤနီၣ်စရီအသိး ဂံၢ်ခီၣ်ထံးကၠိလၢအအိၣ်လၢခ့ၣ်အဲၣ်ယူၣ်တၢ်ပၢအဟီၣ်က၀ီၤ KECD တၢ်ပၢအဖီလာ်တဖၣ် ပာ်ဖှိၣ်ခဲလၢာ်အိၣ်၀ဲ(၁ႇ၃၆၁)ဖျၢၣ်ဒီး ခီလ့းတီၤထီတလၢကၠိအိၣ်၀ဲ(၅)ဖျၢၣ်ဒီး သရၣ်/သရၣ်မုၣ်အနီၣ်ဂံၢ်ခဲလၢာ်အိၣ်၀ဲ(၃ႇ၉၀၀)ဂၤဒီး ကၠိဖိခဲလၢာ်အိၣ်၀ဲတကလီၢ်(၁၀၀ႇ၀၀၀)ဘျဲၣ်န့ၣ်လီၤႉ