လါယူၤလံ ၆ သီႇ ၂၀၂၁ နံၣ်ႇ ခ့ၣ်အဲးစံၣ်
ကညီကီၣ်စဲၣ် မၠၣ်၀တံၣ်၀့ၢ်ပူၤ တုၤလၢတနံၤအံၤ(လါယူၤလံ ၆)သီအနံၤတစု ၦၤသံလၢခိ၀ံၣ်တၢ်ဆါဃိအိၣ်၀ဲ(၇)ဂၤႇ ၦၤဘၣ်ကူဘၣ်ဂာ်အိၣ်၀ဲ(၃၄၀)ဘျဲၣ်လံအဖီခိၣ် ကၠိတဖၣ်ဘၣ်တၢ်ကးတံၢ်ဃာ်၀ဲခံနွံဒီး တၢ်ကဘၣ်ကးတံၢ်ကျးတနီၤဒီးတၢ်မၤလီၢ်တနီၤအဂ့ၢ် ၦၤဘၣ်မူဘၣ်ဒါလၢအဘၣ်ထွဲတဖၣ်ထုးထီၣ်လံာ်ဟ့ၣ်ပလီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဖဲအပူၤကွံာ်စှၤသီအခါ မၠၣ်၀တံၣ်၀့ၢ် တၢ်ထံၣ်န့ၢ်ခိ၀ံၣ်တၢ်ဆါဃၢ်လၢ အထက(၁)ကၠိႇသီခါဖၠၣ်ကၠိ(ဘက)ဃုာ်ဒီး ကၠိသရၣ်/မုၣ်တဖၣ်တဖၣ်ဒီးကၠိဖိအအိၣ်တနီၤ၀ံၤအလီၢ်ခံ ခီဖျိလၢလီၢ်က၀ီၤကမျၢၢ်တဖၣ်အဘၢၣ်စၢၤတၢ်ပဲာ် ထံနီၤဖးအိၣ်ထီၣ်လၢကြၢးကးတံၢ်ကွံာ်ကၠိအိၣ်ထီၣ်အဃိ ကူၣ်သ့၀ဲၤကျိၤထုးထီၣ်ပာ်ဖျါ၀ဲလၢကၠိကဘၣ်ကး တံၢ်ခံနွံစးထီၣ်ဖဲတနံၤအံၤ(လါယူၤလံ ၆)သီ တုၤလၢ(လါယူၤလံ ၁၉)သီအနံၤန့ၣ်လီၤႉ
လၢန့ၣ်အမဲာ်ညါ စးထီၣ်ဖဲလါယူၤလံ ၂ သီအနံၤန့ၣ် တၢ်ဟ့ၣ်အခွဲးလၢကျးလၢအဆါတၢ်အီၣ်တၢ်အီတဖၣ်ဒီး ကျးလၢအဆါကသံၣ်ကသီတဖၣ် အိးထီၣ်သ့ဒ်တၢ်ဒီသဒၢခိ၀ံၣ်တၢ်ဆါ တၢ်သိၣ်တၢ်သီတၢ်ပာ်ပနီၣ်အသိးန့ၣ်လီၤႉ မ့မ့ၢ်ကျးလၢအဆါတၢ်ဖိတၢ်လံၤလၢအဂၤတဖၣ်ကဘၣ်ကးတံၢ်၀ဲဒီး ထံချီဆၢကျးႇမ့ၤကျးဒီးတၢ်အီၣ်တၢ်အီကျးတဖၣ် အီၣ်လၢကျးပူၤတန့ၢ်ဘၣ်ဒီးကဘၣ်က့ၤစိာ်အီၣ်လၢဟံၣ်လီၤန့ၣ် ကီၢ်ဆၣ်ပၢပြး၀ဲၤကျိၤ နဲၣ်လီၤဃာ်၀ဲတၢ်သိၣ်တၢ်သီန့ၣ်လီၤႉ
ဒ်န့ၣ်အသိး တၢ်ထုးထီၣ်ဒုးသ့ၣ်ညါ၀ဲလၢတၢ်ကဘၣ်ကးတံၢ်၀ဲတၢ်မၤအဂၤတဖၣ်လၢအမ့ၢ် တၢ်ဘံးတၢ်အိၣ်ဆူၣ်အိၣ်ချ့အလီၢ်ႇ KTV ကျးတၢ်မၤလီၢ်တဖၣ်စ့ၢ်ကီးန့ၣ်လီၤႉ ဘၣ်ဆၣ် ခီဖျိညၣ်တၢ်ဂဲၤလိာ်ကွဲတၢ်တၤကျိၣ်တၤစ့တနီၤဒီးကၣ်စံၣ်နိၣ်လီၢ်တနီၤအိးထီၣ်၀ဲတုၤလၢခဲအံၤတစုအဃိ လီၢ်က၀ီၤကမျၢၢ်တဖၣ်အဘၢၣ်စၢၤတၢ်ပဲာ်ထံနီၤဖးဟဲအိၣ်ထီၣ်၀ဲန့ၣ်လီၤႉ
ဖဲအပူၤကွံာ်(လါယူၤ ၂၁)သီ တုၤလၢဖဲမဟါ(လါယူၤလံ ၅)သီအနံၤ ခံနွံအတီၢ်ပူၤ တၢ်ထံၣ်န့ၢ်ၦၤအိၣ်ဒီးခိ၀ံၣ်တၢ်ဆါအိၣ်၀ဲ(၃၄၂)ဂၤဒီး တုၤလၢတနံၤအံၤ(လါယူၤလံ ၆)သီ ဂီၤခီတစု ၦၤသံလၢခိ၀ံၣ်တၢ်ဆါဃိအိၣ်၀ဲ(၇)ဂၤလံအဂ့ၢ်န့ၣ် သ့ၣ်ညါဘၣ်လၢမၠၣ်၀တံၣ်ကီၢ်ရ့ၣ်ဆူၣ်ချ›၀ဲၤကျိၤအအိၣ်န့ၣ်လီၤႉ
ၦၤဆါလၢတၢ်ပာ်ဂၢၢ်ပာ်ကျၢၤလၢအအိၣ်ဒီးခိ၀ံၣ်တၢ်ဆါသ့ၣ်တဖၣ် တၢ်ကူစါယါဘျါပာ်အ၀ဲသ့ၣ်လၢ(covid center)လၢတၢ်အိးထီၣ်၀ဲဖဲမဲၢ်ကနဲက၀ီၤဒ့သီ နီၣ်ဂံၢ်(၄)က၀ီၤဒ့ ကၠီၣ်လိကၠံႇစွ့ၣ်မၠၣ်၀တံၣ်ကျးလီၢ်တဖၣ်ဒီး မၠၣ်၀တံၣ်ကီၢ်ရ့ၣ်တၢ်ဆါဟံၣ်ႇသ့ၣ်ကါညံၣ်နီၣ်တၢ်သမံသမိးလီၢ်တဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဘၣ်ဆၣ် ခီဖျိၦၤဆါတဖၣ်ဘၣ်ဟ့ၣ်လီၤ၀ဲတၢ်အီၣ်ၦ့ၤတသီန့ၣ်(၃ႇ၅၀၀)ကၠးဒီး ဘၣ်ဟ့ၣ်လီၤစ့ၢ်ကီး၀ဲတၢ်သမံသမိးခိ၀ံၣ်ၦ့ၤတဘျီန့ၣ်လၢစ့ပယီၤ(၁၀ႇ၀၀၀)ကၠးအဃိ ၦၤလၢအတၢ်တအိၣ်တယၢၤဘၣ်တဖၣ်အဂီၢ်တၢ်ကီတၢ်ခဲအိၣ်၀ဲအသိး လၢတၢ်ကဒီသဒၢတၢ်ဆါအဂီၢ်ကဲထီၣ်စ့ၢ်ကီး၀ဲတၢ်နိးတၢ်ဘျးသ့၀ဲအဂ့ၢ်န့ၣ် ၦၤလၢအဟူးဂဲၤမၤတၢ်လၢတၢ်တိစၢၤမၤစၢၤၦၤဂ့ၢ်၀ီတဖၣ် စံး၀ဲန့ၣ်လီၤႉ
