Home တၢ်ကစီၣ် သုးမီၤစိရိၤအသုးဒီး(KNLA)သုးက့ ၆ တၢ်ခးလိာ်သးကဲထီၣ်ဖဲကွ့ကလ့သ၀ီ

သုးမီၤစိရိၤအသုးဒီး(KNLA)သုးက့ ၆ တၢ်ခးလိာ်သးကဲထီၣ်ဖဲကွ့ကလ့သ၀ီ

882
0

လါအီကူး ၂၃ သီ၊ ၂၀၂၁ နံၣ်၊ ခ့ၣ်အဲးစံၣ်

ဖဲတနံၤအံၤလါအီကူး ၂၃ သီ မုၢ်ဃ့ၢ်လီၤ ၂ နၣ်ရံၣ်ဘျဲၣ်အဆၢကတီၢ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးက့ ၆ ဒီးသုးမီၤစိရိၤအသုးတဖၣ်အဘၢၣ်စၢၤ တၢ်ခးလိာ်သးကဲထီၣ်ဖဲကွ့ကလ့သ၀ီကပၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဖဲအပူၤကွံာ်လါအီကူး ၂၁ သီ ဂီၤခီအဆၢကတီၢ် သုးမီၤစိရိၤအသုးပာ်တ့ၢ်ကွံာ်အသုးကလၢၤဖဲကျ့းသ၀ီပူၤဒီး ဒ်သိးအ၀ဲသ့ၣ်ကဟဲက့ၤအိၣ်ဆိးကဒါလၢအသုးကလၢၤအဂီၢ် ဖဲအ၀ဲသ့ၣ်ဟဲက့ၤလၢကျဲအဆၢကတီၢ် ဘၣ်သဂၢၢ်ခးလိာ်သးဒီးလီၢ်က၀ီၤ(KNLA)အသုးတဖၣ်အဂ့ၢ်န့ၣ် လီၢ်က၀ီၤသ၀ီဖိတဖၣ်စံး၀ဲန့ၣ်လီၤႉ

“တၢ်ခးလိာ်သးကဲထီၣ်လၢကွ့ကလ့သ၀ီ လၢယၤအ့ခၠဲၣ်တကပၤလီၤႉ နၢ်ဟူကျိဖးဒိၣ်သီၣ် ၄ ထံၣ်လီၤႉ ကျိဖိဆံးနါက့ခး၀ဲလီၤႉ ကဲထီၣ်ကအိၣ်၀ဲအမံးနံး ၁၀ လီၤႉ ခဲအံၤပတုာ်လံႉ ၦၤခဲလၢာ်အိၣ်ဒီးတၢ်သူၣ်ကိၢ်သးဂီၤလီၤ”အဂ့ၢ်န့ၣ် လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤ စံး၀ဲန့ၣ်လီၤႉ

ကွ့ကလ့သ၀ီအံၤ မ့ၢ်သ၀ီတဖျၢၣ်လၢအိၣ်ဆီလီၤအသးဖဲကၠဲးဒိဒီးကီးတရံးကျဲမုၢ်အကပၤန့ၣ်လီၤႉ
တၢ်ခးလိာ််သးကဲထီၣ်၀ံၤအလီၢ်ခံ ခီဖျိပယီၤသုးလူၤဖီၣ်ပီၣ်တၣ်အိၣ်ထီၣ်အဃိ လီၢ်က၀ီၤဖိတဖၣ် ဘၣ်ဟးစံၣ်အိၣ်ခူသူၣ်၀ဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ