လါစဲးပထ့ဘၢၣ် ၃ သီႇ ၂၀၂၁ နံၣ်ႇ ခ့ၣ်အဲးစံၣ်
ကညီကီၢ်စဲၣ် ကၠၤအ့စ့ၣ်ကၠံကီၢ်ဆၣ်အပူၤ ခီဖျိပယီၤသုးဒီးသုးခိးကီၢ် ဆၢ(BGF)တဖၣ်ဟဲက့ၤ နုာ်လီၤလၢကျ့းသ၀ီပူၤဒီး အိၣ်ဆိး၀ဲလၢသီခါဖၠၣ်ဒီးသ၀ီဖိအဟံၣ်တဖၣ်အဃိ လီၢ်က၀ီၤဖိတဖၣ်အိၣ်ဒီး တၢ်ဘၣ်ယိၣ်ဘၣ်ဘှီပျံၤတၢ်ဖုးတၢ်အဂ့ၢ်န့ၣ် သ၀ီဖိလၢတအဲၣ်ဒိးပာ်ဖျါအမံၤတဂၤ စံးဘၣ်ခ့ၣ်အဲးစံၣ်န့ၣ်လီၤႉ
ခီဖျိသုးမီၤစိရိၤအသုးဂံၢ်ဘါ(၁၀၀)ဃၣ်ဃၣ် ဟံးန့ၢ်တၢ်ဒီသဒၢအိၣ်ဆိး၀ဲလၢသီခါဖၠၣ်ဒီး သ၀ီဖိအဟံၣ်ႇ ကျးတဖၣ်အဃိ လီၢ်က၀ီၤဖိတနီၤပာ်တ့ၢ်ကွံာ်အဟံၣ်အဃီလဲၤအိၣ်၀ဲဒၣ်လၢအဘူးအတံၢ်အဟံၣ်အဂ့ၢ်န့ၣ် လီၢ်က၀ီၤတၢ်ကစီၣ်စံး၀ဲန့ၣ်လီၤႉ
ဖဲအပူၤကွံာ်(လါအီကူး ၂၁)သီအနံၤ သုးမီၤစိရိၤအသုးတဖၣ်ပာ်တ့ၢ်ကွံာ်အသုး ကလၢၤတဖျၢၣ်လၢကျ့းသ၀ီပူၤ၀ံၤအလီၢ်ခံ ကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA)သုးရ့ၣ်(၁၈)လဲၤမၤရှဲလဲကွံာ်၀ဲပယီၤသုးကလၢၤအံၤဒံးန့ၣ်လီၤႉ
ဘၣ်ဆၣ်ခီဖျိသုးမီၤစိရိၤအသုးတဖၣ်ကဟဲက့ၤဆ့ၣ်နီၤအိၣ်ကဒါက့ၤလၢအသုးကလၢၤအဃိ တၢ်ခးလိာ်သးဟဲကဲထီၣ်ဒီးလီၢ်က၀ီၤ(KNLA)ဖဲကီးသနီၣ်သ၀ီတဘျုးဘျီ၀ံၤအလီၢ်ခံ ပယီၤသုးနီၣ်ဂံၢ်အဂၤ(၂၀၀)ဃၣ်ဃၣ်ဟဲက့ၤတုၤ၀ဲဒၣ်လၢကျ့းသ၀ီပူၤလီၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ
လၢန့ၣ်အမဲာ်ညါဖဲလါစဲးပထ့ဘၢၣ် ၁ သီအနံၤ KNLA သုးရ့ၣ်(၁၈)ဒီးသုးမီၤစိရိၤအသုးတဖၣ်အဘၢၣ်စၢၤ တၢ်ခးလိာ်သးကဲထီၣ်ဒံး ၂ ဘျီဖဲပဲတြီဒူဒီးကျ့းသ၀ီအဘၢၣ်စၢၤမဲကျ့ၤထၣ်တၢ်လီၢ်ဒီး ဖဲန့ၣ်သုးမီၤစိရိၤတကပၤဘၣ်ဒိ ၃ ဂၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ
ဖဲန့ၣ်၀ံၤအလီၢ်ခံသုးမီၤစိရိၤအသုးဟဲက့ၤတုၤလၢပဲ-တီဒူသ၀ီဒီး အိၣ်ဆီလီၤအသးလၢသီခါဖၠၣ်ကရၢၢ်ပူၤအဃိ လီၢ်က၀ီၤဖိတဖၣ်ဘၣ်ယိၣ်ဘၣ်ဘှီပျံၤတၢ်ဖုးတၢ်ဒီး ကးတံၢ်ကွံာ်၀ဲအကျးသ့ၣ်တဖၣ်ဒီးသုးလီၢ်သုးကျဲအိၣ်၀ဲစ့ၢ်ကီးအဂ့ၢ်န့ၣ် လီၢ်က၀ီၤကမျၢၢ်တဖၣ်စံး၀ဲန့ၣ်လီၤႉ
တၢ်ခးလိာ်သးကဲထီၣ်၀ံၤအလီၢ်ခံ ဖဲလါစဲးပထ့ဘၢၣ် ၁ သီ ဟါခီအဆၢကတီၢ် ကၠဲးဒိ(BGF) သုးဂံၢ်ဘါအဂၤ(၁၀၀)ဃၣ်ဃၣ်ဟဲတုၤ၀ဲဒၣ်လၢကျ့းသ၀ီအပူၤန့ၣ်လီၤႉ ဒ်န့ၣ်အသိးသုးမီၤစိရိၤ အသုးဂံၢ်ဘါ(၁၀၀)ဘျဲၣ်အိၣ်၀ဲလၢပဲ-တီဒူသ၀ီဟဲထီၣ်တုၤ၀ဲဒၣ်လၢမဲၢ်ကသိၤသ၀ီဒီး သုးလၢအအိၣ်တ့ၢ်တဖၣ်ဆီလီၤအသးအိၣ်ဆိး၀ဲဒၣ်လၢကျ့းသ၀ီသီခါဖၠၣ်ႇသ၀ီဖိအဟံၣ်ဒီးသ၀ီဖိအကျးတဖၣ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ
တကီၢ်ခါခဲအံၤလၢကျ့းသ၀ီအပူၤန့ၣ် သုးမီၤစိရိၤအသုးတဖၣ်အိၣ်၀ဲ လၢသီခါဖၠၣ်ႇ သ၀ီဖိအဟံၣ်ဒီးအကျးတဖၣ်ဘၣ်ဆၣ် ကျးလၢအိၣ်သ၀ီပူၤ တနီၤက့ၤအိးထီၣ်ကဒါအိၣ်ဒီး တၢ်ဟးထီၣ်က့ၤလီၤဟူးဂဲၤအိၣ်၀ဲဘၣ်ဆၣ် လီၢ်က၀ီၤဖိတဖၣ်ဘၣ်ယိၣ်၀ဲလၢတၢ်ခးလိာ်သးကကဲထီၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
