လါအ့ဖြ့ၣ် ၂၀ သီ, ၂၀၂၅ နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဘံလ့ကီၢ်ဆၣ် ဃီဖိပျဲၢ်သ၀ီအပူၤ ဖဲမဟါအနံၤ ကဘီယူၤလဲၤ ခးလီၤတၢ်၀ံၤလီၢ်ခံ သ၀ီဖိဃုၥ်ဒီးဒူသ၀ီကမျၢၢ်လၢအိၣ်ဘူးဖဲန့ၣ်တဖၣ်အိၣ်လၢသ၀ီပူၤတဘူၣ်ဘၣ်ဟးစံၣ်မံ၀ဲလၢတၢ်ချၢအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဖဲမဟါလါအ့ဖြ့ၣ် ၁၉ သီ ဂီၤခီ ၁၁ နၣ်ရံၣ်ဘျဲၣ်အဆၢကတီၢ်န့ၣ် သုးမီၤစိရိၤအကဘီယူၤလဲၤတ့ၢ်လီၤ၀ဲမ့ၣ်ပိၢ်တဖျၢၣ်လၢ ဃီဖိပျဲၢ် သ၀ီပူၤ သီခါဖၠၣ်န့ၣ်အဃိ ဘၣ်သံ၀ဲနီၢ်မၣ်လၣ်မၠ့ၣ်(၆၉)နံၣ်, နီၢ်မၣ်၀ဲ(၆၀)နံၣ်သ့ၣ်တဖၣ်အံၤဒီး မ့မ့ၢ်တပွဲဖိ(၉)နံၣ်တပါအံၤ ခီဖျိအဘၣ်ဒိနးအခိၣ်နူၥ်ဖျိးထီၣ်အဃိဖဲပှၤလဲၤဆှၢတၢ်ဆါဟံၣ်အခါအသးသမူဟးထီၣ်ကွံၥ်၀ဲလၢကျဲပူၤအဂ့ၢ်န့ၣ်န့ၣ် သ့ၣ်ညါဘၣ်န့ၣ်လီၤ.
ဃီဖိပျဲၢ်သီခါလၢတၢ်ကဲထီၣ်သးခဲအံၤန့ၣ်တမ့ၢ်လၢတၢ်ပၢၢ်ဆၢကရူၢ်ကရၢလဲၤအိၣ်၀ဲတအိၣ်၀ဲဘၣ်ဒီးဒ်န့ၣ်အသိးသုးမီၤစိရိၤတဖုအံၤ မ့ကိးလီၤသးလၢဘူးဒးဖိဘၣ်ဆၣ်တပၥ်လုၢ်ပၥ်ပှ့ၤလၢၤတၢ်ဘူၣ်တၢ်ဘါဘၣ်အဂ့ၢ်န့ၣ် ဒူသထူၣ်ကီၢ်ရ့ၣ် နဲၣ်ရွဲၣ် ပှၤကတိၤတၢ်ပၢ ပဒိၣ်စီၤအ့နဲၤ စံး၀ဲန့ၣ်လီၤ.
အ၀ဲစံး၀ဲလၢ “ဒ်သိးပသ့ၣ်ညါဘၣ်ဃီဖိပျဲၢ်သီခါဖၠၣ်န့ၣ်ဘၣ်ဃးပှၤတၢ်ပၢၢ်ဆၢဖိလဲၤအိၣ်လဲၤဆိးဒုတအိၣ်နီတဘျီဘၣ်.အဃိသုး မီၤစိရိၤတဖုအံၤပမ့ဘၣ်ကွၢ်န့ၣ်အတပၥ်လုၢ်ပၥ်ပှ့ၤလၢၤတၢ်ဘူၣ်တၢ်ဘါလၢၤဘၣ်.တဲလီၤသးလၢဘူးဒးဖိဘၣ်ဆၣ်သီခါဖၠၣ်န့ၣ် လဲၤကွံၥ်လီၤ၀ဲဒီးကဘီယူၤအဃိအ၀ဲသ့ၣ်တဲတမၠိမၤတမၠိလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤန့ၣ်လီၤ.
တကးဒံးဘၣ်ကဘီယူၤဟဲခးလီၤတၢ်ဘျီ၀ဲအံၤတၢ်သံတၢ်ပှၢ်အိၣ်အမဲၥ်ညါ သီခါအူစ့(၂)ပါ,သီခါ(၁)ပါဒီး ကမျၢၢ် စီၤမီၤစွ့ၤ(၇၀)နံၣ်, စီၤမီၤကွၣ်(၆၂)နံၣ်ဒီး စီၤမီၤနူၤ(၃၆)နံၣ်သ့ၣ်တဖၣ်အံၤကျိဖးဒိၣ်အက့အခီဘၣ်အ၀ဲသ့ၣ်န့ၣ်လီၤ. ပှၤသ့ၣ်တဖၣ်အံၤအကျါ(၃)ဂၤန့ၣ် ကူစါယါဘျါဒံးအသးလၢတၢ်ဆါဟံၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးကဘီယူၤဟဲခးလီၤတၢ်၀ံၤလီၢ်ခံကမျၢၢ်လၢအိၣ်ဘူးဖဲန့ၣ်တဖၣ်ဃ့ၢ်ထီၣ်၀ဲဒီးတကီၢ်ခါခဲအံၤတၢ်ကစီၣ်ဟူထီၣ်လၢ ပယီၤသုးကဘီယူၤကဟဲခးလီၤကဒီးတၢ်တဘျီအဃိလီၢ်က၀ီၤကမျၢၢ်လၢအိၣ်ဘူးဖဲန့ၣ်တဖၣ်အါဒၣ်တက့ၢ်န့ၣ်အိၣ်လၢဟံၣ်အိၣ်လၢသ၀ီပူၤတဘူၣ်လၢၤဘၣ်ဟးစံၣ်မံ၀ဲလၢတၢ်ချၢအဂ့ၢ်န့ၣ် ပဒိၣ်စီၤအ့နဲၤ စံးအါထီၣ်၀ဲန့ၣ်လီၤ.
“တၢ်ကဲထီၣ်သး၀ံၤဘျီဒူသ၀ီလၢအိၣ်ဘူးဖဲအံၤတဖၣ်န့ၣ်အါဒၣ်တက့ၢ်န့ၣ်အစံၣ်မံလၢသ၀ီချၢ.,လဲၤစံၣ်အိၣ်လၢအစံၥ်အဒဲအကျီးပူၤ. လဲၤစံၣ်အိၣ်၀ဲလၢတၢ်ဘံၣ်တၢ်ဘၢအလီၢ်လီၤ”အဂ့ၢ်န့ၣ် စံး၀ဲန့ၣ်လီၤ.
ဃီဖိပျဲၢ်သ၀ီအံၤအပူၤကွံၥ်(၂၀၂၄)လါအ့ဖြ့ၣ် ၂၃ သီ မုၢ်နၤခီအဆၢကတီၢ်န့ၣ်စ့ၢ်ကီး တၢ်ဒုးတၢ်ယၤကဲထီၣ်တအိၣ် သုးမီၤစိရိၤ ကဘီယူၤပညိၣ် လဲၤတ့ၢ်လီၤ၀ဲပီၣ်(၅၀၀)မ့ၣ်ပိၢ် ၂ ဖျၢၣ်အဃိ ကၠိတၢ်သူၣ်ထီၣ်လီၤကရဲဟးဂီၤ၀ဲ(၃)ဖျၢၣ်ဒီး ကၠိအံၤစ့ၢ်ကီး တုၤလၢခဲအံၤတၢ်တက့ၤဘှီဂ့ၤထီၣ်ဒံး၀ဲဘၣ်ဒီးကၠိဖိသ့ၣ်တဖၣ်ဘၣ်ထီၣ်ဒံးကၠိလၢတၢ်ဘံၣ်တၢ်ဘၢလီၢ်အဖၢမုၢ်ဒံးန့ၣ်လီၤ.
