လၢၢ်ဒိၣ်စိကီၢ်ဆၣ်ပူၤၦၤဃ့ၢ်မှံဟးဖျိးဖိတနီၤက့ၤဆူအဟံၣ်အဃီႇတနီၤအိၣ်တ့ၢ်ဒံး၀ဲ

လါနိၣ်၀့ဘၢၣ် ၁၈ သီႇ ၂၀၂၁ နံၣ်ႇ ခ့ၣ်အဲးစံၣ်

ကညီဒီကလုာ်စၢဖှိၣ်ကရၢ-KNU သုးက့(၄)ဟီၣ်က၀ီၤ လၢၢ်ဒိၣ်စိကီၢ်ဆၣ်အပူၤ စးထီၣ်ဖဲတလါအံၤလါထီၣ်န့ၣ် ခီဖျိပယီၤသုးနုာ်လီၤဖီၣ်တၢ်လၢသ၀ီပူၤအဃိ လီၢ်က၀ီၤဒူဖိသ၀ီလၢအဃ့ၢ်အိၣ်ခူသူၣ်တဖၣ်တနီၤန့ၣ် ခဲအံၤက့ၤဆူအဒူသ၀ီလံအသိး ခီဖျိတၢ်ဘံၣ်တၢ်ဘၢအဃိတနီၤန့ၣ်တက့ၤဘၣ်လၢအဒူသ၀ီဒံးဘၣ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤၦၤဘၣ်မူဘၣ်ဒါအအိၣ်န့ၣ်လီၤႉ

သ့ကဒိႇမၠ့ခးဒံၣ်ႇထံနၢအုၣ်ဒီးဟၣ်မ့ကၠံသ၀ီ သ၀ီ(၄)ဖျၢၣ် လီၢ်က၀ီၤဖိအိၣ်၀ဲ(၅၀၀)ဘျဲၣ်အကျါ သ၀ီလၢအမ့ၢ်သ့ၣ်ကတိဒီးမၠ့ခးဒံၣ်သ၀ီခံဖျၢၣ်အံၤတက့ၤဘၣ်ဒံးလၢအဒူသ၀ီဒံးဘၣ်ဒီးမ့မ့ၢ်သ၀ီလၢအအိၣ်တ့ၢ်(၂)ဖျၢၣ်သ၀ီဖိတဖၣ် က့ၤဆူအဒူသ၀ီအတၢ်လီၢ်တၢ်ကျဲလံအဂ့ၢ်န့ၣ် ဟီၣ်က၀ီၤ KNU သုးခိၣ်တဂၤစံး၀ဲဒ်အံၤန့ၣ််လီၤႉ

အ၀ဲစံး၀ဲလၢ“လၢတၢ်အိၣ်သးအဖီခိၣ် တၢ်လီၤတံၢ်လီၤမံတအိၣ်ဒံးဘၣ်အဃိအ၀ဲသ့ၣ်က့ၤတဘူၣ်ဒံးဘၣ်မီၤနီၤႉ မ့ၢ်ပယီၤသုးတဖၣ်ကဟဲထီၣ်လၢသ၀ီပူၤဧါႇတဟဲထီၣ်ဘၣ်ဧါန့ၣ် ခီဖျိၦၤဟးထီၣ်က့ၤလီၤလၢသ၀ီပူၤတအိၣ်ဘၣ်အဃိ အ၀ဲသ့ၣ်က့ၤတဘူၣ်ဒံး၀ဲဘၣ်လီၤႉ အ၀ဲသ့ၣ်မ့က့ၤ လၢန့ၣ်တကပၤမ့နုာ်လီၤဖီၣ်ကဒီးတၢ်န့ၣ် အ၀ဲသ့ၣ်ပျံၤလၢကဘၣ်စံၣ်ကဒီးအသီတဘျီမီၤနီၤႉ အိၣ်တ့ၢ်ဒံးဖဲအံၤ(၈၆)ဂၤဒံးလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်ဖဲ မဟါကၢာ်လါနိၣ်၀့ဘၢၣ် ၁၇ သီအနံၤန့ၣ်လီၤႉ

တကီၢ်ခါခဲအံၤပယီၤသုးက့ၤကဒါလံဘၣ်ဆၣ် လီၢ်က၀ီၤသ၀ီဖိသ့ၣ်တဖၣ်လၢကက့ၤဆူအဒူသ၀ီအဂီၢ်ပျံၤဒံး၀ဲတၢ်ဒီး တကီၢ်ခါခဲအံၤလၢတၢ်အိၣ်တၢ်ဆိးတၢ်အီၣ်တၢ်အီအဂီၢ်ဘၣ်ဂီၢ်ဒံး၀ဲအဂ့ၢ်န့ၣ် သုးခိၣ်တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ

ဖဲအပူၤကွံာ်လါနိၣ်၀့ဘၢၣ် ၃ သီအနံၤ ပယီၤသုးလၢအလဲၤထီၣ်က့ၤလီၤဟူးဂဲၤဖဲသ့ကဒိဒီးဟၣ်မ့ကၠံသ၀ီအဘၢၣ်စၢၤတဖၣ်အံၤ ခီဖျိလီၢ်က၀ီၤတၢ်ဒီသဒၢကမျၢၢ်(PDF)သုးအိၣ်ခိးထုးအ၀ဲသ့ၣ်ဒီးမ့ၣ်ပိၢ်အဃိ ဖဲန့ၣ်ပယီၤသုးအၦၤသံဘၣ်ဒိဘၣ်ထံး၀ဲအါအါဂီၢ်ဂီၢ်န့ၣ်လီၤႉ ခီဖျိလၢတၢ်ဂ့ၢ်အံၤအဃိပယီၤသုးနုာ်လီၤဖီၣ်တၢ်လၢဒူသ၀ီပူၤအဖီခိၣ် သ၀ီၤ(၄)ဖျၢၣ်အံၤလီၢ်က၀ီၤဖိလၢအကယၤဘၣ်ဃ့ၢ်မှံဟးဖျိး၀ဲဒၣ်န့ၣ်လီၤႉ

လီၢ်က၀ီၤသ၀ီဖိ(၅၀၀)ဘျဲၣ်လၢအဘၣ်ဃ့ၢ်မှံဟးဖျိးသ့ၣ်တဖၣ်အံၤ ကမီၤသွ့(Ka Mow Thwe)ၦၤဂ့ၢ်၀ီတၢ်ကရၢကရိဆီၣ်ထွဲမၤစၢၤဃာ်၀ဲဒီး တကီၢ်ခါခဲအံၤအါဒၣ်တက့ၢ်န့ၣ်က့ၤကဒါဆူအဒူသ၀ီအတၢ်အိၣ်တၢ်ဆိးလီၢ်ကျဲလံန့ၣ်လီၤႉ

ဒ်န့ၣ်အသိးဖဲအပူၤကွံာ်စှၤသီအခါစ့ၢ်ကီး ခီဖျိပယီၤသုးနုာ်လီၤဟူးဂဲၤဟဲအါထီၣ်လၢခ့ၣ်အဲၣ်ယူၣ် သုးက့(၄)ဟီၣ်က၀ီၤပူၤအဃိ တၢ်ဒုးကဲထီၣ်၀ဲဒၣ်ဒီးဟီၣ်က၀ီၤဖီၣ်စုက၀ဲၤကရူၢ်တဖၣ်ဒီး ပယီၤသုးဖီၣ်၀ဲလီၢ်က၀ီၤသ၀ီဖိတနီၤအိၣ်၀ဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ