လါယနူၤအါရံၤ ၂၅ သီႇ ၂၀၂၂ နံၣ်ႇ ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ (သုးက့ ၅)မုၢ်တြီၢ်ကီၢ်ရ့ၣ်ဟီၣ်က၀ီၤအပူၤ ဖဲလါယနူၤအါရံၤ ၂၂ သီ တသီအတီၢ်ပူၤတၢ်ဒုးကဲထီၣ်၀ဲ(၆)ဘျီဒီး ဖဲန့ၣ်ပယီၤသုးမီၤစိရိၤအၦၤသံခဲလၢာ်(၈)ဂၤႇဘၣ်ဒိ(၇)ဂၤအဂ့ၢ်န့ၣ် ခ့ၣ်အဲၣ်ယူၣ်-မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲဖဲမဟါလါယနူၤအါရံၤ ၂၄ သီအနံၤန့ၣ်လီၤႉ
ဒ်မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲအသိးန့ၣ် ဖဲလါယနူၤအါရံၤ ၂၂ သီႇ ဂီၤခီ ၂ နၣ်ရံၣ်ဃၣ်ဃၣ်အဆၢကတီၢ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်-KNLA သုးရ့ၣ်(၁၀၂)သုးပာ်ဖှိၣ်တဖၣ်နုာ်လီၤခး၀ဲသုးခိးကီၢ်ဆၢ(BGF)ဖဲဃီ၀ါထၣ်တိၤဒီး ဖဲန့ၣ်ပယီၤသုးသံ၀ဲ(၂)ဂၤႇဘၣ်ဒိ(၂)ဂၤအဂ့ၢ်န့ၣ် ပာ်ဖျါ၀ဲန့ၣ်လီၤႉ
တကတီၢ်ဃီဖဲဂီၤခီ ၆း၃၀ အဆၢကတီၢ်စ့ၢ်ကီး (KNLA) သုးရ့ၣ်(၁၅)ဒီးသုးဒ့(၂)အၦၤတဖၣ်ပာ်ဖှိၣ်ထီၣ်သးဒီး နုာ်လီၤခး၀ဲပယီၤသုးမီၤစိရိၤလၢအအိၣ်ဖဲဖၣ်ပူၣ်ဟီၣ်က၀ီၤ ထူၣ်မီဒၢတိၤမဲၢ်ခံဒီး ဖဲန့ၣ်ပယီၤသုးအၦၤသံ၀ဲ(၁)ဂၤန့ၣ်လီၤႉ
တနံၤဃီ၀ဲန့ၣ်ဖဲဂီၤခီ ၁၀ နၣ်ရံၣ်ဃၣ်ဃၣ်အဆၢကတီၢ် နုာ်လီၤခးကဒီးပယီၤသုးမီၤစိရိၤလၢအအိၣ်ဖဲကၠူၣ်လူၢ်သုးကလၢၤတဘျီဒီး ဖဲန့ၣ်ပယီၤသုးမီၤစိရိၤအၦၤသံ(၁)ဂၤႇဘၣ်ဒိ၀ဲ(၄)ဂၤအဂ့ၢ်န့ၣ် ခ့ၣ်အဲၣ်ယူၣ်-မုၢ်တြီၢ်တၢ်ကစီၣ်ပာ်ဖျါ၀ဲန့ၣ်လီၤႉ
လၢန့ၣ်အမဲာ်ညါနုာ်လီၤခးကဒီး၀ဲပယီၤသုးမီၤစိရိၤလၢအအိၣ်ဖဲပကၠီၤဖီလူၢ် လၢၢ်မုၢ်ပျီဟီၣ်က၀ီၤတဘျီႇ ထံတကျိၣ်ကၠိတဘျီႇ၀ၣ်ပျာ်ခိၣ်တဘျီဒီး ဖဲန့ၣ်ပယီၤသုးမီၤစိရိၤအၦၤသံ၀ဲ(၄)ဂၤႇဘၣ်ဒိ(၁)ဂၤအဂ့ၢ်န့ၣ် ပာ်ဖျါ၀ဲန့ၣ်လီၤႉ
တကးဒံးဘၣ်ဖဲတနံၤဃီ၀ဲန့ၣ်လါယနူၤအါရံၤ ၂၂ သီအနံၤစ့ၢ်ကီး ခီဖျိ(BGF)ဒီးၦၤတီခိၣ်ရိၣ်မဲတၢ်ဘိၤလၣ်ကၠဲၤမၢအၦၤခးလီၤကျိဖးဒိၣ်(၁၀)ဖျၢၣ်ဆူသီဃဲာ်ထၣ်သ၀ီပူၤအဃိ လီၢ်က၀ီၤသ၀ီဖိတၢ်ဘၣ်ဒိဘၣ်ထံးတအိၣ်၀ဲဘၣ်ဆၣ်သနါက့ ခီဖျိသ၀ီဖိတဖၣ်ပျံၤတၢ်အဃိဟးထီၣ်လၢသ၀ီချၢတဘူၣ်လၢၤဘၣ်ဒီး ဘၣ်စံၣ်လီၤမံ၀ဲဒၣ်လၢတၢ်ပူၤအဂ့ၢ်န့ၣ် လီၢ်က၀ီၤတၢ်ကစီၣ်စံးဘၣ်ခ့ၣ်အဲၣ်ယူၣ်-မုၢ်တြီၢ်တၢ်ကစီၣ်န့ၣ်လီၤႉ
ဖဲအပူၤကွံာ်လါယနူၤအါရံၤ ၂၀ သီအနံၤစ့ၢ်ကီး ပယီၤသုးမီၤစိရိၤ(ခလရ-၃၄၁)လၢအအိၣ်ဆီလီၤသးဖဲဖၣ်ပူၣ်ဟီၣ်က၀ီၤ ၀့ၤလူၢ်၀ိၤဖၠၣ်ဒီးထူၣ်မီဒၢတိၤမဲၢ်ခံသ့ၣ်တဖၣ်အံၤ မၢဆူၣ်၀ဲထူၣ်မီဒၢသ၀ီဖိတဂၤလၢကဃိလီၤကွံာ်အဟံၣ်အဃိ သ၀ီဖိတဂၤအံၤဘၣ်ဃိလီၤကွံာ်အဟံၣ်ႇအကျးဆါအီၣ်တၢ်ဖိတၢ်လံၤအလီၢ်အမဲာ်ညါ ပယီၤသုးမီၤစိရိၤအံၤတဲပျံၤသ၀ီဖိတဖၣ်လၢဟံၣ်လၢအအိၣ်ဘူးဖဲထူၣ်မီဒၢတိၤမဲၢ်ခံတဖၣ် တဘၣ်မံလၢဟံၣ်နီတဂၤဘၣ်န့ၣ်လီၤႉ
ခီဖျိပယီၤသုးမီၤစိရိၤအၦၤတဖၣ်တဲပျံၤတဲဖုးလီၢ်က၀ီၤဒူဖိသ၀ီဖိတဖၣ်အဃိ ဟံၣ်ခိၣ်အဒူၣ်(၁၀)ဘျဲၣ်လၢအအိၣ်ဘူးဖဲန့ၣ်သ့ၣ်တဖၣ် ဘၣ်ဟးစံၣ်မံ၀ဲလၢၦၤအဂၤအဟံၣ်အဂ့ၢ်န့ၣ် မုၢ်တြီၢ်တၢ်ကစီၣ်စံး၀ဲန့ၣ်လီၤႉ
ပယီၤသုးဟံးန့ၢ်ကွံာ်တၢ်စိတၢ်ကမီၤ၀ံၤအလီၢ်ခံ အ၀ဲသ့ၣ်ဟူးဂဲၤမၤအါထီၣ်၀ဲသုးဂံၢ်ဘါအါအါဂီၢ်ဂီၢ် လၢခ့ၣ်အဲၣ်ယူၣ်သုးက့ကိးဘ့ၣ်ဒဲးအပူၤအသိး ခီဖျိပယီၤသုးမီၤစိရိၤအကဘီယူၤကွံာ်လီၤကျိဖးဒိၣ်ဒီး ခးလီၤစ့ၢ်ကီးကျိဖးဒိၣ်တဖၣ်ဆူလီၢ်က၀ီၤဒူသ၀ီတၢ်အိၣ်တၢ်ဆိးတၢ်ဖံးအီၣ်မၤအီၣ်လီၢ်ကျဲအဃိ လီၢ်က၀ီၤကမျၢၢ်သံဘၣ်ဒိဘၣ်ထံးအိၣ်၀ဲဒီးကမျၢၢ်အကလးဘၣ်ဃ့ၢ်မှံဟးဖျိး၀ဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
