Home တၢ်ကစီၣ် KNLA လီၢ်ခၢၣ်ကသံၣ်၀ဲၤဒ့ဒုးအိၣ်ဖျဲၣ်ထီၣ်ကဒီးသုးကသံၣ်သရၣ်အဂၤ(၁၀၀)ဘျဲၣ်

KNLA လီၢ်ခၢၣ်ကသံၣ်၀ဲၤဒ့ဒုးအိၣ်ဖျဲၣ်ထီၣ်ကဒီးသုးကသံၣ်သရၣ်အဂၤ(၁၀၀)ဘျဲၣ်

256
0

လါယနူၤအါရံၤ ၁၁ သီ၊ ၂၀၂၂ နံၣ်၊ ခ့ၣ်အဲးစံၣ်

ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)လီၢ်ခၢၣ်သးကသံၣ်၀ဲၤဒ့အိးထီၣ်၀ဲ(၃၄)၀ီတ၀ီဂံၢ်ခီၣ်ထံးသုးကသံၣ်တၢ်မၤလိအံၤ ၦၤထီၣ်တၢ်မၤလိဖိအိၣ်၀ဲ(၁၁၆)ဂၤဒီး ဖဲမဟါလါယနူၤအါရံၤ ၁၀ သီအနံၤန့ၣ် တၢ်မၤ၀ဲဂံၢ်ခီၣ်ထံးသုးကသံၣ်တၢ်မၤလိကၠိပျၢ်တၢ်ရဲၣ်တၢ်ကျဲၤအမူးအံၤန့ၣ်လီၤႉ

ၦၤလၢအဟဲထီၣ်ဂံၢ်ခီၣ်ထံးသုးကသံၣ်တၢ်မၤလိတဖၣ် ကဘၣ်ဟဲ၀ဲလၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ သုးက့(၅)ဘ့ၣ်အခၢၣ်စးအမဲာ်ညါ သိၣ်မှံၤကရူၢ်လၢအဂၤဒီးတၢ်ကရၢကရိလၢအအိၣ်ဖဲကီၢ်ဆၢလၢအမၤတၢ်လၢဆူၣ်ချ့ ဟဲထီၣ်၀ဲတၢ်သိၣ်လိအံၤအိၣ်၀ဲ(၁၁၆)ဂၤဒီးတၢ်ပျၢ်တၢ်သိၣ်လိတၢ်ရဲၣ်တၢ်ကျဲၤမူးအံၤ ဘၣ်တၢ်မၤအီၤဖဲ(KNLA)သုး၀ဲၤလီၢ်ခိၣ်သ့ၣ်န့ၣ်လီၤႉ

ဂံၢ်ခီၣ်ထံးသုးကသံၣ်တၢ်မၤလိလၢတၢ်မၤလိ၀ဲယံၤ(၆)လါအတီၢ်ပူၤအံၤ တၢ်သိၣ်လိမၤဒိးန့ၢ်၀ဲဘၣ်ဃးဂံၢ်ခီၣ်ထံးသုးတၢ်သိၣ်လိဃုာ်ဒီးဂ့ၢ်ဂီၢ်အူတၢ်ကူစါယါဘျါႇတၢ်ဒုးအိၣ်ဖျဲၣ်ဖိႇဂံၢ်ခီၣ်ထံးတၢ်ကွဲးတၢ်ကါႇကမျၢၢ်တၢ်အိၣ်ဆူၣ်အိၣ်ချ့ႇတၢ်ကွၢ်ထွဲကူစါယါဘျါမဲာ်ချံဒီးတၢ်ဂ့ၢ်တၢ်ကျိၤလၢအဂၤသ့ၣ်တဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

တၢ်ပျၢ်ကွံာ်ဂံၢ်ခီၣ်ထံးသုးကသံၣ်တၢ်မၤလိတၢ်ရဲၣ်တၢ်ကျဲမူးဘျီ၀ဲအံၤအပူၤ ခ့ၣ်အဲၣ်ယူၣ်နဲၣ်ရွဲၣ် သဃဲၤ(၂)ပဒိၣ်စီၤလၣ်ထိႇ(KNLA)လီၢ်ခၢၣ်သးသုးဂ့ၢ်၀ီခိၣ်ကျၢၢ်သုးခိၣ်ကျၢၢ်ဖိမါရှါထူဂီၤႇ ဖၣ်အၣ်ကီၢ်ရ့ၣ်ခိၣ်ပဒိၣ်စီၤအီၤမီၤအ့ႇတၢ်သိၣ်လိမူဒါခိၣ်(KNLA)ကသံၣ်၀ဲၤဒ့ခိၣ် သုးခိၣ်ဒိၣ်စိနီၢ်စ့ဒ့ကဲႇ ကီၢ်ပယီၤဒံၣ်မိၣ်ကရဲၣ်တ့ၣ်ကၠိဖိသုးမုၢ်(ABSDF)ပၢဆှၢရဲၣ်ကျဲၤကရၢဖိစးလဲယီအီၤႇဒီကလုာ်ဃူဖိး(NUG)ပဒိၣ် ဆူၣ်ချ့၀ဲၤကျိၤကိတိာ်(၂)ဒီၣ်ကထၢၣ်တၤစွ့ၤပိၤႇကီၢ်ဆၢဆူၣ်ချ့ကရူၢ်ၦၤဘၣ်မူဘၣ်ဒါတနီၤဒီးတၢ်သိၣ်လိသရၣ်တဖၣ်စ့ၢ်ကီးဟဲထီၣ်၀ဲဒၣ်န့ၣ်လီၤႉ

ဂံၢ်ခီၣ်ထံးသုးကသံၣ်တၢ်မၤလိလၢတၢ်အိးထီၣ်၀ဲလၢအပူၤကွံာ်တဖၣ်စ့ၢ်ကီး ကညီဃုာ်ဒီးကလုာ်ဒူၣ်လၢအဂၤတဖၣ်ဟဲထီၣ်၀ဲတၢ်သိၣ်လိအံၤဘၣ်ဆၣ် တနံၣ်အံၤခီဖျိခိ၀ံၣ်တၢ်ဘၣ်ကူဘၣ်ဂာ်ဒီးသုးဟံးန့ၢ်ဆူၣ်တၢ်စိတၢ်ကမီၤကဲထီၣ်သးအဃိ တၢ်မၤလိဘျီ၀ဲအံၤအပူၤကလုာ်ဒူၣ်လၢအဂၤသ့ၣ်တဖၣ်တပၣ်ဃုာ်ဟဲထီၣ်၀ဲဘၣ်အဂ့ၢ်န့ၣ်သ့ၣ်ညါဘၣ်လၢၦၤဘၣ်မူဘၣ်ဒါအအိၣ်န့ၣ်လီၤႉ

ဒ်န့ၣ်အသိးဖဲအပူၤကွံာ်(၃၃)၀ီတ၀ီဂံၢ်ခီၣ်ထံးသုးကသံၣ်တၢ်မၤလိအခါစ့ၢ်ကီး တၢ်ဒုးအိၣ်ဖျဲၣ်ထီၣ်၀ဲကညီဒီးကလုာ်ဒူၣ်သိၣ်မှံၤကရူၢ်ကသံၣ်သရၣ်(၅၄)ဂၤဒီး တနံၣ်အံၤတၢ်ဒုးအိၣ်ဖျဲၣ်ထီၣ်အနီၣ်ဂံၢ်အါန့ၢ်အပူၤကွံာ်လၢညါတၢ်သိၣ်လိအခါဒံးအဂ့ၢ်န့ၣ် သ့ၣ်ညါဘၣ်န့ၣ်လီၤႉ