Home တၢ်ကစီၣ် ခီဖျိတၢ်ခးလိာ်သးကဲထီၣ်ဒံးလၢလ့က့ၣ်ကိာ်ဒီးကီးတရံးဟီၣ်က၀ီၤပူၤအဃိ ၦၤဃ့ၢ်မှံဟးဖျိးတဖၣ်က့ၤအိၣ်လၢအဒူသ၀ီတဘူၣ်ဒံး၀ဲ

ခီဖျိတၢ်ခးလိာ်သးကဲထီၣ်ဒံးလၢလ့က့ၣ်ကိာ်ဒီးကီးတရံးဟီၣ်က၀ီၤပူၤအဃိ ၦၤဃ့ၢ်မှံဟးဖျိးတဖၣ်က့ၤအိၣ်လၢအဒူသ၀ီတဘူၣ်ဒံး၀ဲ

341
0

လါဖ့ၤဘြူၤအါရံၤ ၁၁ သီႇ ၂၀၂၂ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ်(သုးက့ ၆) လ့က့ၣ်ကိာ်ဒီးကီးတရံးဟီၣ်က၀ီၤတဖၣ်အပူၤ တုၤလၢခဲအံၤတစုခီဖျိပယီၤသုးဒီးဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်တဖၣ်အဘၢၣ်စၢၤတၢ်ခးလိာ်သးကဲထီၣ်ဒံး၀ဲအဃိ ၦၤဃ့ၢ်မှံဟးဖျိးတဖၣ်က့ၤအိၣ်လၢအဒူသ၀ီတဘူၣ်ဒံး၀ဲဘၣ်အဂ့ၢ်န့ၣ် လီၢ်က၀ီၤတၢ်ကစီၣ်စံး၀ဲအသိးသ့ၣ်ညါဘၣ်န့ၣ်လီၤႉ

ခီဖျိတၢ်ခးလိာ်သးကဲထီၣ်ဒံးအဃိ ၦၤဃ့ၢ်မှံဟးဖျိးတဖၣ်ကက့ၤအိၣ်လၢလ့က့ၣ်ကိာ်ဟီၣ်က၀ီၤအဒူသ၀ီပူၤအဂီၢ်က့ၤ၀ဲတဘူၣ်ဒံးဘၣ်အသိး လၢကီးတရံးတကပၤန့ၣ်သ၀ီဖိတနီၤက့ၤအိၣ်လၢအဒူသ၀ီန့ၣ် ထံၣ်၀ဲလၢပယီၤသုးတဖၣ်မၤဟးဂီၤအဟံၣ်ဟံးန့ၢ်၀ဲတၢ်ဖိတၢ်လံၤတဖၣ်အဃိ သဂၢၢ်ဘၣ်၀ဲဒီးတၢ်အိၣ်တၢ်ဆိးတၢ်ကီတၢ်ခဲသ့ၣ်တဖၣ်အဂ့ၢ်န့ၣ် လီၢ်က၀ီၤၦၤဃ့ၢ်မှံဟးဖျိးတဖၣ်စံး၀ဲအသိး သ့ၣ်ညါဘၣ်န့ၣ်လီၤႉ

“မ့မ့ၢ်လၢလ့က့ၣ်ကိာ်တကပၤန့ၣ်ၦၤဃ့ၢ်မှံဟးဖျိးတဖၣ်က့ၤတဘူၣ်ဒံးဘၣ်ႉ ဖဲအပူၤကွံာ်ခံသီန့ၣ်ကျိဖးဒိၣ်လူၢ်အံၤခးလီၤနါစိၤကျိဖးဒိၣ်တစှၤန့ၢ်အထံၣ်(၁၀)ဘၣ််ႉလၢက၀ီၤဒ့(၃)ယ့ၤစဲၣ်ကိၤတကပၤန့ၣ်စ့ၢ်ကီးခးလီၤ၀ဲဒီးကျိဖိလီၤႉ တမ့ၢ်လၢတၢ်ဒုးကဲထီၣ်ဘၣ်ႇအ၀ဲသ့ၣ်ခးလီၤတၢ်လၢက၀ီၤဒ့ပူၤလီၤႉ မ့မ့ၢ်(KNLA)တကပၤန့ၣ်ခးတၢ်တအိၣ်ဘၣ်”အဂ့ၢ်န့ၣ် လ့က့ၣ်ကိာ်ၦၤဃ့ၢ်မှံဟးဖျိးတဂၤစံးဘၣ်ခ့ၣ်အဲးစံၣ်န့ၣ်လီၤႉ

လၢန့ၣ်အမဲာ်ညါဖဲလါဖ့ၤဘြူၤအါရံၤ ၉ သီ ဂီၤခီအဆၢကတီၢ် လၢကီးတရံး-ကၠဲၣ်ဒိၤကျဲမုၢ် ကၠၤအ့-တကံၤသ၀ီကျဲတကပၤန့ၣ် ခီဖျိပယီၤသုးဟဲထီၣ်တလၢတၢ်လီၢ်အဃိခံခီခံကပၤတၢ်ခးလိာ်သးကဲထီၣ်ဒီး ဖဲန့ၣ်ခီဖျိပယီၤသုးခးကျိဖးဒိၣ်အဃိ လီၢ်က၀ီၤဖိအဟံၣ်ဟးဂီၤကွံာ်တဖျၢၣ်ဒီးဆၣ်ဖိကီၢ်ဖိလၢတၢ်ဘုၣ်ဃာ်၀ဲလၢဟံၣ်တဖၣ်သံဘၣ်ဒိဘၣ်ထံးအိၣ်၀ဲဒၣ်န့ၣ်လီၤႉ တၢ်ခးလိာ်သးကဲထီၣ်၀ံၤအလီၢ်ခံခီဖျိပယီၤသုးတဖၣ်မၤအါထီၣ်အနီၣ်ဂံၢ်ဟဲတုၤ၀ဲအဃိ လီၢ်က၀ီၤဖိတဖၣ်ဘၣ်ဟးစံၣ်ပလဲာ်သးအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

ဖဲအပူၤကွံာ်လါယနူၤအါရံၤအတီၢ်ပူၤ ခီဖျိတၢ်ဒုးကဲထီၣ်လၢမၠိၣ်ဟီသ၀ီႇအီးဖးဖးဒိၣ်သ၀ီတကပၤအဃိ လီၢ်က၀ီၤဖိလၢအဘၣ်ဃ့ၢ်မှံဟးဖျိးတဖၣ်အံၤကက့ၤအိၣ်လၢအဒူသ၀ီပူၤက့ၤ၀ဲအကတီၢ် ထံၣ်၀ဲလၢပယီၤသုးနုာ်လီၤမၤဟးဂီၤအဟံၣ်အဃီဟံန့ၢ်အ၀ဲသ့ၣ်တၢ်ဖိတၢ်လံၤတဖၣ်အဃိ လၢကဘၣ်အီၣ်ဘၣ်အီအဂီၢ်ထံၣ်ဘၣ်၀ဲတၢ်ကီတၢ်ခဲအဂ့ၢ်န့ၣ် မၠိၣ်ဟီသ၀ီဖိလၢအက့ၤအိၣ်လၢသ၀ီပူၤတဖၣ်စံး၀ဲန့ၣ်လီၤႉ

“လၢကီးတရံးတကပၤန့ၣ်ပယီၤသုးအိၣ်၀ဲဖဲဖၤခါကိသ၀ီတကပၤန့ၣ်လီၤႉ မ့၀ံၤဖဲနံၣ်ထီၣ်သီပျီဒီးယ့ၤလဲၤကိတကပၤန့ၣ်ကျိဖးဒိၣ်ကရူၢ်တဖၣ်အိၣ်ဖဲန့ၣ်အဖၢမုၢ်ဒံးလီၤႉ လၢအီးဖးဖးဒိၣ်ႇကီးနွဲၣ်ႇမၠိၣ်ဟီႇယၤသ့ၣ်ကိသ၀ီတကပၤန့ၣ်ၦၤဃ့ၢ်မှံဟးဖျိးတဖၣ်ဟဲက့ၤတုၤလၢအဟံၣ်န့ၣ် ထံၣ်၀ဲလၢပယီၤသုးအံၤမၤဟးဂီၤအဟံၣ်ဟံးန့ၢ်ကွံာ်အ၀ဲသ့ၣ်တၢ်ဖိတၢ်လံၤသ့ၣ်တဖၣ်အဃိ ၦၤဃ့ၢ်မှံဟးဖျိးသ့ၣ်တဖၣ်ထံၣ်ဘၣ်၀ဲတၢ်ကီတၢ်ခဲႇကျီၢ်ပနၢ်လၢအပျၢ်လီၤဃာ်၀ဲတဖၣ်နါက့ဟးကွၢ်ဃု၀ဲတဘူၣ်ဒံးဘၣ်် ပျံၤ၀ဲလၢမ့တိနိၣ်ပယီၤသုးန့ၣ်တၢ်ကဖီၣ်ပီၣ်တၣ်ႇမၤဒၢၣ်ႇကဖီၣ်အ၀ဲသ့ၣ်လီၤႉ”အဂ့ၢ်န့ၣ် မၠိၣ်ဟီသ၀ီဖိတဂၤစံး၀ဲန့ၣ်လီၤႉ

လၢခ့ၣ်အဲၣ်ယူၣ်(သုးက့ ၆)မၠၣ်၀တံၣ်ႇလ့က့ၣ်ကိာ်ႇ၀ီၤလ့ၤကျဲတကပၤန့ၣ် ဟီၣ်က၀ီၤပယီၤသုးသုးကျိၤတဖၣ်အိၣ်ဆီလီၤအသးဒံးဒီး ကီးတရံး-ကၠဲၣ်ဒိၤကျဲတုၤလၢကၠၤအ့စ့ၣ်ကၠံန့ၣ် ဒ်သိးပယီၤသုးအံၤနုာ်လီၤဒိၣ်စိ၀ဲဟီၣ်က၀ီၤအံၤကန့ၢ်အဂီၢ်န့ၣ် ခီဖျိမၤအါထီၣ်အဂံၢ်ဘါဟူးဂဲၤအါထီၣ်၀ဲအဃိ သုးတၢ်ဖ့ၣ်စၢဟဲအိၣ်ထီၣ်၀ဲလၢဟီၣ်က၀ီၤ(KNLA)သုးရ့ၣ်(၂၇)သုးပာ်ဖှိၣ်တဖၣ်အဘၢၣ်စၢၤအဂ့ၢ်န့ၣ် လီၢ်က၀ီၤတၢ်ကစီၣ်စံး၀ဲအသိးသ့ၣ်ညါဘၣ်န့ၣ်လီၤႉ

ဒူပျာ်ယာ်ကီၢ်ရ့ၣ် လ့က့ၣ်ကိာ်ဒီးကီးတရံးဟီၣ်က၀ီၤဃုာ်ဒီး မုၢ်တြီၢ်ကီၢ်ရ့ၣ်ႇဒူသထူၣ်ကီၢ်ရ့ၣ်ႇချၢၣ်လွံၢ်ထူၣ်ကီၢ်ရ့ၣ်ဒီးဘျံးဒ၀ဲကီၢ်ရ့ၣ်တဖၣ်အပူၤ ခီဖျိပယီၤသုးဒီးသုးခိးကီၢ်ဆၢ(BGF)သုးပာ်ဖှိၣ်တဖၣ်မၤ၀ဲဒုးယၤတၢ်ဟူးတၢ်ဂဲၤဒီးခးလီၤနါစိၤကျိဖးဒိၣ်တဖၣ်အဃိ ခ့ၣ်အဲၣ်ယူၣ်ကီၢ်သူလ့ၤဟီၣ်က၀ီၤအပူၤလီၢ်က၀ီၤကမျၢၢ်(၇၀၀၀၀)ဘျဲၣ်ဘၣ်ပာ်တ့ၢ်ကွံာ်အတၢ်အိၣ်တၢ်ဆိးလီၢ်ကျဲဒီးဘၣ်ဃ့ၢ်မှံဟးဖျိး၀ဲအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲဖဲတလါအံၤလါဖ့ၤဘြူၤအါရံၤ ၈ သီအနံၤန့ၣ်လီၤႉ