လါယူၤ ၁၉ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁) သထူၣ်,ဘံလ့,ကၠဲးထိၣ်ဒီးဖၣ်အၣ်ကီၢ်ဆၣ်ဟီၣ်ကဝီၤအပူၤ လါမ့ၤတလါအတီၢ်ပူၤ တၢ်ဒုးကဲထီၣ်ဝဲဒိၣ်ဒိၣ်မုၢ်မုၢ်လၢပယီၤသုးဒီး(KNLA)သုးပၥ်ဖှိၣ်အဘၢၣ်စၢၤဝံၤလီၢ်ခံ ပယီၤသုးအံၤသူဝဲကဘီယူၤ,က့ၤခးလီၤ ကဒါကျိဖးဒိၣ်အဃိ ကမျၢၢ် ဃုၥ်ဒီးပှၤဃ့ၢ်တၢ်ဒုးဖိသံဘၣ်ဒိဘၣ်ထံးဝဲ(၅)ဂၤအဂ့ၢ်န့ၣ် ကီၢ်ရ့ၣ်တလါတဘျီတၢ်မၤနီၣ်စရီပူၤ အသိး သ့ၣ်ညါဘၣ် န့ၣ်လီၤ.
ဒ်လံၥ်တၢ်မၤနီၣ်စရီပူၤအိၣ်ဝဲအသိးန့ၣ် ဘံလ့ကီၢ်ဆၣ်အပူၤ သုးမီၤစိရိၤအံၤသူဝဲ(jet fighter)ကဘီယူၤဒီးဒြိတစှၤန့ၢ်ဝဲ(၆)ဘျီ ညါန့ၣ် လီၤ.အဃိဖဲလါမ့ၤ ၁၂ သီအနံၤ လၢမဲးဘီခံသဝီပူၤ ခီဖျိကဘီယူၤလဲၤတ့ၢ်လီၤဝဲပီၣ်(၃၀၀)မ့ၣ်ပိၢ် ၂ ဖျၢၣ်အဃိ ပှၤဃ့ၢ်တၢ်ဒုးဖိနီၢ်ဘၤဘူၤ(၁၉)နံၣ်အံၤ သံဝဲဒီးလၢန့ၣ်အမဲၥ်ညါကမျၢၢ်လၢအဂၤဘၣ်ဒိဘၣ်ထံး(၄)ဂၤအကျါပၣ်ဃုၥ်ဝဲ ဖိသၣ်(၄)နံၣ် တဂၤန့ၣ်လီၤ.
ဒ်န့ၣ်အသိးကဘီယူၤလဲၤခးလီၤတၢ်ဘျီဝဲအံၤ မဲးဘီခံသဝီပူၤဟံၣ်ဟးဂီၤဝဲ(၈)ဖျၢၣ်ဒီး တကးဒံးဘၣ်ခီဖျိလၢကဘီယူၤဒီးဒြိ, ကျိဖးဒိၣ်အံၤအဃိ ကမျၢၢ်သိလ့ၣ်ဟးဂီၤဘၣ်ဒိဘၣ်ထံးဝဲ(၃)ခိၣ်အသိး ထိးသံစ့ၢ်ကီးဝဲ(၆)ဒုအဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါလၢတလါအံၤအတီၢ်ပူၤစ့ၢ်ကီး တၢ်ဒုးစဲးပြဲး,တၢ်ဘၣ်သဂၢၢ်ခးလိၥ်သးဒီးတၢ်ခိးထုး,တၢ်လဲၤခးစိကျိဒိၣ်, တၢ်လဲၤ တ့ၢ်လီၤဝဲဒြိလၢပယီၤသုးအသုးကလၢၤဃုၥ်ဒီးအဝဲသ့ၣ်စုတီၤဖီလၥ်ဘူးဒးကညီသုးမုဒိၣ်(DKBA)အိၣ်တၢ်လီၢ် ပၥ်ဖှိၣ်ကဲထီၣ်ဝဲ (၂၄)ဘျီအဃိ ပယီၤသုးပၥ်ဖှိၣ်တကပၤသံဝဲ(၂၁)ဂၤဒီးဘၣ်ဒိဘၣ်ထံးဝဲ(၅)ဂၤန့ၣ်လီၤ. ဘၣ်ဆၣ်လၢတၢ်ဒုးဘျီဝဲအံၤ မ့မ့ၢ်လၢ (KNLA)သုးပၥ်ဖှိၣ်တကပၤန့ၣ်သံတအိၣ် ဘၣ်ဒိဝဲ(၂)ဂၤန့ၣ်လီၤ.
တကးဒံးဘၣ်လၢတၢ်ကဲထီၣ်သးဒ်အံၤအဖီခိၣ်ပယီၤသုးသံဘၣ်ဒိဘၣ်ထံးအမဲၥ်ညါ ပယီၤသုအသိလ့ၣ်ဟးဂီၤဝဲ(၂)ခိၣ်ဒီး တၢ်ပၢၢ်ဆၢသုးကရူၢ်မၤန့ၢ်ဝဲ(MA-1) ၅ ခိၣ်, (MA-3) ၃ ခိၣ် ဒီး စဲးကတိၤတၢ်(၁)ဖျၢၣ်အဂ့ၢ်န့ၣ် ခ့ၣ်အဲၣ်ယူၣ် စံးဝဲန့ၣ်လီၤ.
(သုးက့ ၁)ဟီၣ်ကဝီၤအပူၤ ဖဲအပူၤကွံၥ်လါအ့ဖြ့ၣ်တလါအတီၢ်ပူၤန့ၣ်စ့ၢ်ကီး ပယီၤသုးဒီး(KNLA)သုးပၥ်ဖှိၣ်အဘၢၣ်စၢၤ တၢ်ဒုး ကဲထီၣ်ဝဲ(၂၅)ဘျီဒီး ဖဲန့ၣ်ပယီၤသုးတကပၤသံဝဲ(၂၅)ဂၤ,ဘၣ်ဒိ(၂၄)ဂၤအသိး ခီဖျိလၢအဝဲသ့ၣ်ကဘီယူၤ ကျိဖးဒိၣ်,ဒြိ အံၤ အဃိ စ့ၢ်ကီး ကမျၢၢ်သံဘၣ်ဒိဘၣ်ထံးဝဲ(၁၁)ဂၤဒီး ဟံၣ်,တၢ်ဘူၣ်တၢ်ဘါတၢ်သူၣ်ထီၣ်အူအီၣ်ဟးဂီၤ လီၤကရဲဝဲအဖျၢၣ် (၇၀)ဘျဲၣ် ကဲထီၣ်ဒံးဝဲန့ၣ်လီၤ.
