Home တၢ်ကစီၣ် (သုးက့ ၁)ဟီၣ်က၀ီၤအပူၤတလါအတီၢ်ပူၤတၢ်ဒုးကဲထီၣ်(၄၁)၀ီအဂ့ၢ် KNU ထုးထီၣ်ပာ်ဖျါ

(သုးက့ ၁)ဟီၣ်က၀ီၤအပူၤတလါအတီၢ်ပူၤတၢ်ဒုးကဲထီၣ်(၄၁)၀ီအဂ့ၢ် KNU ထုးထီၣ်ပာ်ဖျါ

213
0

လါယူၤ ၂ သီႇ ၂၀၂၂ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤအပူၤ အပူၤကွံာ်လါမ့ၤတလါအတီၢ်ပူၤပယီၤသုးႇသုးခိးကီၢ်ဆၢ(BGF)ဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ႇကညီဒီကလုာ်ဂၢၤသးကရၢ(KNDO)သုးပာ်ဖှိၣ်တဖၣ်အဘၢၣ်စၢၤတၢ်ဒုးကဲထီၣ်ခဲလၢာ်(၄၁)ဘျီအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲဖဲတနံၤအံၤလါယူၤ ၂ သီအနံၤန့ၣ်လီၤႉ

လါမ့ၤတလါအတီၢ်ပူၤတၢ်ဒုးကဲထီၣ်(၄၁)ဘျီအပူၤန့ၣ်ပယီၤသုးတကပၤသံ(၇၁)ဂၤႇဘၣ်ဒိ(၅၃)ဂၤဒီးမၤဟးဂီၤကွံာ်ပယီၤသုးအသိလ့ၣ်(၅)ခိၣ်န့ၣ်လီၤႉဒ်န့ၣ်အသိးမ့မ့ၢ်(KNLA)သုးပာ်ဖှိၣ်တကပၤဘၣ်ဟ့ၣ်လီၤကွံာ်အသးသမူ(၂)ဂၤႇဘၣ်ဒိ(၁၁)ဂၤအဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ

လၢန့ၣ်အမဲာ်ညါခီဖျိပယီၤသုးကဘီယူၤဟဲခးလီၤတၢ်လၢခ့ၣ်အဲၣ်ယူၣ်(သုးက့ ၁)ဟီၣ်က၀ီၤအပူၤ(၂)ဘျီအဃိ မ့ၣ်အူအီၣ်ဟးဂီၤကွံာ်လီၢ်က၀ီၤကမျၢၢ်အဟံၣ်(၁၁)ဖျၢၣ်ဒီးခီဖျိပယီၤသုးခးလီၤကျိဖးဒိၣ်အဃိကမျၢၢ်သံ(၂)ဂၤႇဘၣ်ဒိ(၃)ဂၤအဂ့ၢ်န့ၣ် ခ့ၣ်အဲၣ်ယူၣ်စံး၀ဲန့ၣ်လီၤႉ

ဒ်န့ၣ်အသိးတၢ်လီၢ်လၢတၢ်ဒုးကဲထီၣ်အပူၤတဖၣ်န့ၣ်ပယီၤသုးဒီးသုးခိးကီၢ်ဆၢ(BGF)သုးပာ်ဖှိၣ်တဖၣ်လုၢ်သ့ၣ်ခါပတာ်မၤကမၣ်၀ဲၦၤဂ့ၢ်၀ီခွဲးယာ်လၢထံဖိကီၢ်ဖိကမျၢၢ်အဖီခိၣ်အိၣ်အသိးဟံးဆူၣ်၀ဲလီၢ်က၀ီၤကမျၢၢ်အစ့(၂၁ႇ၃၀၀ႇ၀၀၀)ကၠးဒီးဖီၣ်က့ၤကိးဆူၣ်၀ဲကမျၢၢ်(၂၄)ဂၤန့ၣ်လီၤႉတကးဒံးဘၣ်ဒွဲၣ်အူအီၣ်ကွံာ်လီၢ်က၀ီၤကမျၢၢ်အရီဘၢၣ်ကျီး(၃)ကျီးလၢအအိၣ်(၁၃)အ့ကၢၣ်အံၤစ့ၢ်ကီးအဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ

ဒ်န့ၣ်အသိးခးသံကွံာ်လီၢ်က၀ီၤကမျၢၢ်အကျီၢ်ပနၢ်(၈)ဒုဒီးမၤဟးဂီၤက့ၤစိာ်၀ဲကမျၢၢ်အတၢ်အီၣ်တၢ်အီတၢ်ဖိတၢ်လံၤတဖၣ်အသိး သုးခိးကီၢ်ဆၢ(BGF)နုာ်လီၤဖီၣ်လီၢ်က၀ီၤကမျၢၢ်လၢဒူသ၀ီပူၤအိၣ်လၢအကယၤညါဒီး ဖီၣ်တ့ၢ်၀ဲလၢသုးကလၢၤသူ၀ဲဒ်တၢ်ဒီသဒၢစုက၀ဲၤတခါအသိးအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ