လါအီးကထိဘၢၣ် ၅ သီႇ ၂၀၂၂ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၅)ဟီၣ်က၀ီၤအပူၤန့ၣ် လါစဲးပထ့ဘၢၣ်တလါအတီၢ်ပူၤ ပယီၤသုးႇသုးခိးကီၢ်ဆၢ(BGF)ဒီးဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)အဘၢၣ်စၢၤ တၢ်ဒုးကဲထီၣ်၀ဲအဘျီ(၁၀၀)ဘျဲၣ်ဒီးဖဲန့ၣ်ပယီၤသုးသံအကျါပၣ်ဃုာ်၀ဲသုးရ့ၣ်ခိၣ်တဖၣ်အဂ့ၢ်န့ၣ် ခ့ၣ်အဲၣ်ယူၣ်မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲအသိး သ့ၣ်ညါဘၣ်န့ၣ်လီၤႉ
လါစဲးပထ့ဘၢၣ်ထီၣ် ၁ သီတုၤလၢ ၃၀ သီအနံၤန့ၣ် ခံခီခံကပၤတၢ်ဒုးကဲထီၣ်၀ဲ(၁၂၉)ဘျီဒီး ဖဲန့ၣ်ပယီၤသုးသံ၀ဲ(၉၂)ဂၤႇဘၣ်ဒိ(၆၄)ဂၤန့ၣ်လီၤႉမ့မ့ၢ်(KNLA)တကပၤန့ၣ်ဘၣ်ဟ့ၣ်လီၤကွံာ်အသးသမူလၢထံကီၢ်ဒီးၦၤကလုာ်အဂီၢ်(၁)ဂၤဒီးဘၣ်ဒိ၀ဲ(၁၃)ဂၤအဂ့ၢ်န့ၣ် မုၢ်တြီၢ်တၢ်ကစီၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
လၢန့ၣ်အမဲာ်ညါပယီၤသုးသံတဖၣ်အကျါပၣ်ဃုာ်၀ဲသုးရ့ၣ်ခိၣ်(၂)ဂၤႇသုးခိၣ်ဖိ(၂)ဂၤဒီးမ့မ့ၢ်အဘၣ်ဒိတဖၣ်အကျါန့ၣ်ပၣ်ဃုာ်၀ဲသုးရ့ၣ်ခိၣ်(၁)ဂၤႇသုးရ့ၣ်ခိၣ်ခံ(၂)ဂၤဒီးတၢ်မၤဟးဂီၤသုးမီၤစိရိၤအသိလ့ၣ်(၄)ခိၣ်လၢအတီဆှၢတၢ်အီၣ်ဒီးကျိချံမျိာ်သၣ်တဖၣ်သိးတိၤဟးဂီၤ၀ဲ(၃)ဘိအဂ့ၢ်န့ၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
ဒ်န့ၣ်အသိးပယီၤသုးဒီး(BGF)ခးလီၤကျိဖးဒိၣ်(၄၁)ဖျၢၣ်ဆူဒူသ၀ီကမျၢၢ်တၢ်ဖံးအီၣ်မၤအီၣ်လီၢ်ကျဲဒီး ကဘီယူၤဟဲခးလီၤကျိဖးဒိၣ်အိၣ်၀ဲ(၅)ဖျၢၣ်အသိးပယီၤသုးဒီး(BGF)ခးသံကွံာ်တလးအီခိၣ်သ၀ီဖိစီၤဖိငိၤ(၄၀)နံၣ်အံၤစ့ၢ်ကီးအဂ့ၢ်န့ၣ် ခ့ၣ်အဲၣ်ယူၣ်မုၢ်တြီၢ်တၢ်ကစီၣ်စံး၀ဲန့ၣ်လီၤႉ
ဒ်န့ၣ်အသိး BGF(၁၀၁၄)သုးရ့ၣ်လၢအိၣ်ဆီလီၤသးဖဲဘုသိၣ်ကီၢ်ဆၣ်(၀ါဒူ)ကျဲလၢအဟံးကျဲတၢ်ဘံၣ်တၢ်ဘၢ အံၤတဖၣ်မၢဆူၣ်၀ဲဒၣ်လီၢ်က၀ီၤသ၀ီဖိတဖၣ်လၢကကျီန့ၢ်အ၀ဲသ့ၣ်လၢဖှ့ဖိပျိၢ်အကျီ(၁၀၀၀)အသိးမ့တကျီဘၣ်န့ၣ်တပျဲလဲၤသ၀ီဖိလၢတၢ်လီၢ်နီတတီၤလၢၤဘၣ်ဒီးကလဲၤဖံးအီၣ်မၤအီၣ်တၢ်အဂီၢ်စ့ၢ်ကီးကတြီ၀ဲဃံးဃံးအဂ့ၢ်န့ၣ်ပျီပူၤဂံၢ်ခီၣ်ထံးတၢ်ကစီၣ်စံးဘၣ်ခ့ၣ်အဲၣ်ယူၣ်မုၢ်တြီၢ်တၢ်ကစီၣ်န့ၣ်လီၤႉ
ကတီၢ်ခဲအံၤလၢခ့ၣ်အဲၣ်ယူၣ်(သုးက့ ၅) ကမၤမိၢ်ႇကတၢၢ်တံာ်ႇမဲၤ၀့ၤဟီၣ်က၀ီၤတဖၣ်အပူၤန့ၣ် တၢ်ဒုးကဲထီၣ်အါကတၢၢ်ဒီးဟီၣ်က၀ီၤဖဲန့ၣ်အပူၤတဖၣ်ပယီၤသုးခီၣ်သုးရ့ၣ်(ခလရ–၁၉)ႇ ခီၣ်ချ့သုးရ့ၣ်(ခမရ–၃၄၁)ႇ(ခမရ–၄၃၄)ႇ(ခမရ–၄၀၇)သုးရ့ၣ်တဖၣ်ဟူးဂဲၤ၀ဲတကးဒံးဘၣ်အမဲာ်ညါ သုးခိးကီၢ်ဆၢ(BGF)သုးခိၣ်မီၤလၣ်ကၠဲၤတီခိၣ်ရိၣ်မဲ(၁၀၁၃)သုးရ့ၣ်ဒီး(၁၀၁၄)သုးရ့ၣ်တဖၣ်စ့ၢ်ကီးဟူးဂဲၤ၀ဲအဂ့ၢ်န့ၣ်သ့ၣ်ညါဘၣ်လၢဟီၣ်က၀ီၤဂံၢ်ခီၣ်ထံးတၢ်ကစီၣ်အအိၣ်န့ၣ်လီၤႉ
