၉၇ သုးရ့ၣ်ခးလီၤကျိဖးဒိၣ်လၢတၢ်ဒုးကဲထီၣ်အလီၢ်လီၤတဲာ်ပိၢ်ဖးထီၣ်လၢ၀့ၢ်ပူၤအဃိ ကမျၢၢ်သံ(၁)ဂၤႇဘၣ်ဒိ(၂)ဂၤ

လါအီးကထိဘၢၣ် ၂၁ သီႇ ၂၀၂၂ နံၣ်ႇ ခ့ၣ်အဲးစံၣ်

ဖဲတဂီၤညါအံၤလၢကညီကီၢ်စဲၣ် ကီးတရံး၀့ၢ်မုၢ်နုာ်(ခန့မူၤ)က၀ီၤဒ့တကပၤန့ၣ် တၢ်ဒုးကဲထီၣ်၀ဲလၢပယီၤသုးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်အဘၢၣ်စၢၤအဃိ ပယီၤသုး(၉၇)သုးရ့ၣ်ခးလီၤမီထးချံလီၤတဲာ်ပိၢ်ဖးထီၣ်လၢ၀့ၢ်ပူၤက၀ီၤဒ့တဖၣ်ပူၤအဃိကမျၢၢ်သံ(၁)ဂၤဒီးဘၣ်ဒိ၀ဲ(၂)ဂၤအသိးဘၣ်ဟးဂီၤ၀ဲသီခါဖၠၣ်စ့ၢ်ကီးအဂ့ၢ်န့ၣ်သ့ၣ်ညါဘၣ်န့ၣ်လီၤႉ

ဖဲတနံၤအံၤလါအီးကထိဘၢၣ် ၂၁ သီ ဂီၤခီ ၇း၃၀ ဃၣ်ဃၣ်အဆၢကတီၢ်န့ၣ် ပယီၤသုးဒီး(KNLA)သုးပာ်ဖှိၣ်အဘၢၣ်စၢၤ တၢ်ခးလိာ်သးကဲထီၣ်၀ဲဖဲကီးတရံး(ခန့မူၤ) က၀ီၤဒ့(၃) ပယီၤသုးတၢ်သမံသမိးလီၢ်ကီၢ်ရ့ၣ်ပၢၤကီၢ်၀ဲၤဒၢး‚ ပၢပြး၀ဲၤဒၢးလီၢ်ခံတကပၤဒီး ခီဖျိပယီၤသုး(၉၇)သုးရ့ၣ်က့ၤခးလီၤမီထးကျိဖးဒိၣ်လီၤတဲာ်ပိၢ်ဖးထီၣ်လၢ၀့ၢ်ပူၤ ဖီကရၢၢ်ကျးအခိၣ်အဃၢၤအဃိ ကမျၢၢ်သံ(၁)ဂၤႇဘၣ်ဒိ(၂)ဂၤဒီးသီခါဖၠၣ်ႇဟံၣ်ဟးဂူာ်ဟးဂီၤ၀ဲတနီၤအဂ့ၢ်န့ၣ် ကမျၢၢ်လၢအိၣ်ကီးတရံး၀့ၢ်ပူၤတဂၤ စံး၀ဲန့ၣ်လီၤႉ

အ၀ဲစံး၀ဲလၢ“စးထီၣ်လၢဂီၤခီန့ၣ်ပစးထီၣ်နၢ်ဟူကျိဖိသီၣ်ႉပနၢ်ဟူၦၤတဲလၢတၢ်ခးလိာ်သးကဲထီၣ်လၢ(ခန့မူၤ)တကပၤန့ၣ်မီၤနီၤႉမ့၀ံၤ(၉၇)သုးရ့ၣ်ခးလီၤကျိဖးဒိၣ်ႉလီၤတဲာ်ဘူးဘူးလီၤအဃိဟံၣ်ဟူးဘၣ်မးအသးညါႉပယီၤသုးခးလီၤကျိဖးဒိၣ်လီၤတဲာ်ပိၢ်ဖး(၃)ဖျၢၣ် လီၤတဲာ်လၢၦၤတီၢ်(golf)လီၢ်ဖီကရၢၢ်ကျဲန့ၣ် က၀ီၤဒ့ဖိသံ(၁)ဂၤႇဘၣ်ဒိ(၂)ဂၤႉ လီၤတဲာ်လၢသီခါဖၠၣ်တၢ်သူၣ်ထီၣ်တကပၤနါက့ဟးဂီၤခဲလၢာ်လီၤႉဘၣ်၀ဲဒၣ်က၀ီၤဒ့ပူၤဟံၣ်တနီၤစ့ၢ်ႉတၢ်ဒုးကဲထီၣ်အဖၢမုၢ်လီၤႉၦၤတဲလၢၦၤနုာ်လီၤခးလၢ၀့ၢ်ပူၤလံ”အဂ့ၢ်န့ၣ်စံး၀ဲန့ၣ်လီၤႉ

စးထီၣ်ဖဲလါအီးကထိဘၢၣ် ၁၉ သီအနံၤန့ၣ် လၢခ့ၣ်အဲၣ်ယူၣ်(သုးက့ ၆)ဟီၣ်က၀ီၤ ကီးတရံး–မၠၣ်၀တံၣ်အ့ရှါကျဲသီ တီၢ်နီၢ် ခၠီဖျါတကပၤန့ၣ်တၢ်ဒုးကဲထီၣ်၀ဲလၢ ပယီၤသုးႇသုးခိးကီၢ်ဆၢ(BGF)သုးပာ်ဖှိၣ်ဒီး (KNLA)သုးပာ်ဖှိၣ်တဖၣ်အဘၢၣ်စၢၤန့ၣ်လီၤႉ

ခီဖျိတၢ်ဒုးကဲထီၣ်အဃိတၢ်ကးတံၢ်ကွံာ်အ့ရှါကျဲတၢ်ဟးထီၣ်က့ၤလီၤန့ၢ်(၃)သီ၀ံၤဖဲတနံၤအံၤဂီၤခီအဆၢကတီၢ်န့ၣ်တၢ်ဒုးဆဲးကဲထီၣ်၀ဲလၢကီးတရံး၀့ၢ်သုးမီၤစိရိၤအ၀ဲၤကျိၤဘၣ်ထွဲ၀ဲၤဒၢးႇပၢၤကီၢ်ႇပၢၤကီၢ်ဃိာ်ဒီးပယီၤသုးတၢ်သမံသမိးတြဲၤလၢအိၣ်က၀ီၤဒ့(၇)တကပၤအဂ့ၢ်န့ၣ်သ့ၣ်ညါဘၣ်န့ၣ်လီၤႉ

ဒ်ပဒိးန့ၢ်ဘၣ်တၢ်ကစီၣ်တၢ်အိၣ်သးလၢလီၢ်ခံကတၢၢ်အသိးန့ၣ်ကတီၢ်ခဲအံၤလၢ(ကန့မူၤ)က၀ီၤဒ့တကပၤန့ၣ် ပယီၤသုးကဘီယူၤစးထီၣ်ဟဲခးလီၤတၢ်လံအဂ့ၢ်န့ၣ်လီၢ်က၀ီၤဖိတဖၣ်စံး၀ဲန့ၣ်လီၤႉ