လါနိၣ်ဝ့ဘၢၣ် ၃ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅) ဒွဲၣ်လိကီၢ်ဆၣ်အပူၤ ကတၢတံၥ်သုးကလၢၤလၢတၢ်ကဝီၤခးဝဲအံၤန့ၣ် ဖဲအပူၤကွံၥ် လါအီးကထိဘၢၣ် ၃၀ သီအနံၤ ကဘီယူၤလဲၤတ့ၢ်လီၤန့ၢ်ဝဲတၢ်အီၣ် တၢ်အီအဘိၣ်ကအိၣ်လၢအဘိၣ် (၈၀)ဃၣ်ဃၣ် ညါဒီးဖဲန့ၣ် (KNLA)တကပၤမၤန့ၢ်ဝဲအိၣ်အဂ့ၢ်န့ၣ် သ့ၣ်ညါဘၣ်လၢ ပှၤဘၣ်မူဘၣ်ဒါအအိၣ် န့ၣ်လီၤ.
ကတၢတံၥ်ဃုၥ်ဒီးသုးကလၢၤလၢအိၣ်(သုးက့ ၅)ဟီၣ်ကဝီၤပူၤတဖၣ် လၢကအီၣ်ကအီအဂီၢ်ခီဖျိတၢ်လဲၤထီၣ်ဆှၢဝဲတဖျိဘၣ်အဃိ တၢ်လဲၤတ့ၢ်လီၤဝဲတၢ်အီၣ်တၢ်အီဒ်အံၤအိၣ်ဝဲတလီၢ်လီၢ်အသိး အပူၤကွံၥ်တၢ်ဘိၣ်လၢတၢ်ဟဲတ့ၢ်လီၤဝဲတဖၣ်တၢ်မၤန့ၢ်ဝဲအိၣ်စ့ၢ်ကီး အဂ့ၢ်န့ၣ် (သုးက့ ၅)ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးဝဲန့ၣ်လီၤ.
“အဟဲတ့ၢ်လီၤတၢ်ဘိၣ်န့ၣ်ကအိၣ်ဖဲအဘိၣ်(၈၀)ခိၣ်ဃၢၤမီၤနီၤ.မ့ၢ်ကပၣ်ဃုၥ်ဒီးတၢ်စုကဝဲၤတၢ်ပီးတၢ်လီဧါဒုတဲတဘၣ်ဘၣ်.အပှၤအိၣ်ဖဲအံၤခီန့ၣ်ပှၤနီၣ်ဂံၢ်အိၣ်တစဲးဖိစ့ၢ်အဃိတၢ်ဘိၣ်တဖၣ်အံၤတမ့ၢ်တၢ်ထဲန့ၣ်ဘၣ်.ယဆိမိၣ်တၢ်အီၣ်တဖၣ်န့ၣ်ကအိၣ်ဝဲဟုသး,ညၣ်အုၣ်,အံသၣ်,မိၢ်ဂံၥ်သၣ်,ကျီၢ်ညၣ်ဒၢဃုၥ်ဒီးတၢ်အဂုၤအဂၤလၢအဝဲသ့ၣ်သူညီနုၢ်ဝဲတဖၣ်အိၣ်စ့ၢ်.လၢအတၢ်ဟဲတ့ၢ်လီၤတၢ်ဒ်အံၤပပှၤမၤန့ၢ်အိၣ်ခဲအံၤခဲအံၤလီၤတမ့ၢ်ထဲတၢ်တဘျီအံၤဘၣ်.အပူၤကွံၥ်ပှၤမၤန့ၢ်န့ၣ်တၢ်အီၣ်တၢ်အီအမဲၥ်ညါန့ၣ်ဘၣ်ဘျီဘျီပၣ်ဃုၥ်ဒီးကျိချံပှၥ်သၣ်,တဘျီတခီၣ်ပၣ်ဃုၥ်ဒီးသံးစ့ၢ်ကီးအိၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဘၣ်ဃးကဘီယူၤလဲၤတ့ၢ်လီၤတၢ်ဘိၣ်ဘျီဝဲအံၤ တၢ်ပၢၢ်ဆၢသုးကရူၢ်တကပၤမၤန့ၢ်ဝဲပှဲၤဘိၣ်လဲၣ်န့ၣ် မၤလီၤတံၢ်စရီတန့ၢ် ဒံးဘၣ်အဂ့ၢ်န့ၣ် ပှၤဘၣ်မူဘၣ်ဒါစံးဝဲန့ၣ်လီၤ.
ဒ်န့ၣ်အသိးပယီၤသုးလၢအိၣ်ကတၢတံၥ်သုးကလၢၤပူၤသ့ၣ်တဖၣ်အံၤခီဖျိတၢ်ကဝီၤအဝဲသ့ၣ်အဃိဟးထီၣ်ဟူးဂဲၤလၢတၢ်ချၢတအိၣ်ဝဲဘၣ်ဒီးသုးကလၢၤဝဲန့ၣ်အပူၤသုးဂံၢ်ဘါကအိၣ်လၢ(၃၀၀)ခိၣ်ဃၢၤညါအဃိ အစှၤကတၢၢ်တလါတဘျီန့ၣ် တၢ်ဟဲတ့ၢ်လီၤန့ၢ်ဝဲ တၢ်အီၣ်တၢ်အီအသိး တၢ်အီၣ်တၢ်အီလၢတၢ်ဟဲတ့ၢ်လီၤန့ၢ်ဝဲခဲအံၤတဖၣ်စ့ၢ်ကီးတမ့ၢ်လၢအဝဲသ့ၣ်အီၣ်ဝဲကတူၢ်ထဲန့ၣ်ဘၣ်အဂ့ၢ်န့ၣ် သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးအါထီၣ်ဝဲ န့ၣ်လီၤ.
ကတၢတံၥ်သုးကလၢၤလၢအိၣ်ဖၣ်ပူၣ်-ကမၤမိၢ်ကျဲအဘၢၣ်စၢၤအံၤ စးထီၣ်ဖဲတနံၣ်အံၤထီၣ်လါယနူၤအါရံၤအခါန့ၣ် (KNLA) သုးပၥ်ဖှိၣ်ထီၣ်မၤန့ၢ်ဝဲဝံၤန့ၣ် ပယီၤသုးလၢအိၣ်ဖဲန့ၣ်တဖၣ်က့ၤပၥ်ဖှိၣ်ထီၣ်က့ၤအသးလၢသုးခိးကီၢ်ဆၢ(BGF) ၁၀၁၃ သုးကလၢၤ လီၢ်လံၤ ဒီးခီၣ်ဒုးအသးဖဲန့ၣ်တုၤလၢခဲအံၤထီၣ်ဘးလၢအလါ(၁၀)ဃၣ်ဃၣ်လံန့ၣ်လီၤ.
ဒ်န့ၣ်အသိးလၢကဟဲလါဒံၣ်စ့ဘၢၣ်အံၤဒ်သိးကတၢတံၥ် ဒီး ဖၣ်ပူၣ်ဝ့ၢ်ဟီၣ်ကဝီၤပူၤ တၢ်ဃုထၢကကဲထီၣ်လိၣ်ထီၣ်ဖးထီၣ်အဂီၢ်န့ၣ် ပယီၤသုး ဟဲထီၣ်ဟူးဂဲၤမၤအါထီၣ်အဂံၢ်ဘါလၢကမၤမိၢ်ဟီၣ်ကဝီၤအခိၣ်အဃၢၤအါမးဒီး ဂုၥ်ကျဲးစၢးလဲၤထီၣ်ဝဲအဘျီတဖၣ်အဘျီ ဘၣ်ဆၣ် ခီဖျိတၢ်ခိးခးအဝဲသ့ၣ်လၢတၢ်ဒ့ၣ်စၢၤအဃိထီၣ်ဆူညါတန့ၢ်ဂုၤကဒါလီၢ်ခံအိၣ်ဒံးဝဲဖဲဝါဒူ (BGF)သုးကလၢၤတၢ်လီၢ်န့ၣ် အဂ့ၢ်န့ၣ် သ့ၣ်ညါဘၣ်န့ၣ်လီၤ.
တၢ်ဃုထၢအမဲၥ်ညါသုးမီၤစိရိၤအံၤလၢကထီၣ်မၤန့ၢ်က့ၤသုးက့ ၅ ဟီၣ်ကဝီၤ သုးကလၢၤလၢ(KNLA)သုးပၥ်ဖှိၣ် ထီၣ်န့ၢ်ဝဲ တဖၣ်အံၤအဂီၢ်န့ၣ် ဂုၥ်ကျဲးစၢးဆှၢအါထီၣ်ဝဲသုးဂံၢ်ဘါ သူဝဲဒၣ်ကျိဖးဒိၣ်,ဒြိ,ကဘီယူၤစ့ၢ်ကီးဟဲခးလီၤတၢ်အိၣ်ဝဲတလီၢ်လီၢ်န့ၣ်လီၤ.
