လါယနူၤအါရံၤ ၃၁ သီႇ ၂၀၂၃ နံၣ်ႇ ခ့ၣ်အဲးစံၣ်
ဖဲလါယနူၤအါရံၤ ၃၀ သီအနံၤ လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤ တၢ်လီၢ်တတီၤအပူၤန့ၣ် ကညီဆူၣ်ချ့မၤစၢၤ၀ဲၤကျိၤ- KDHW (၁၀)၀ီတ၀ီ တၢ်ပျၢ်ကသံၣ်တၢ်သိၣ်လိမူးအပူၤန့ၣ် ၦၤဖျိထီၣ်၀ဲ(၂၅)ဂၤန့ၣ်လီၤႉ
လၢကညီဟီၣ်က၀ီၤအပူၤဒ်သိးတၢ်ဟ့ၣ်ဆူၣ်ချ့တၢ်ဖံးတၢ်မၤကသ့အဂီၢ်တၢ်အိးထီၣ်၀ဲတၢ်သိၣ်လိအံၤဒီး ဖဲန့ၣ်(CDM)ကသံၣ်သရၣ်/မုၣ်တဖၣ်ဟ့ၣ်စၢၤ၀ဲတၢ်သိၣ်လိအံၤန့ၣ်လီၤႉ တၢ်သိၣ်လိဘျီ၀ဲအံၤ ၦၤဟဲထီၣ်မၤလိတၢ်အိၣ်၀ဲဒၣ်(၂၅)ဂၤဒီး ဖဲလါယနူၤအါရံၤ ၃၀ သီအနံၤန့ၣ် တၢ်မၤ၀ဲတၢ်ပျၢ်တၢ်သိၣ်လိမူး အံၤန့ၣ်လီၤ
နီၢ်ကပီၤ၀ါလၢအဟဲထီၣ်ကသံၣ်တၢ်သိၣ်လိအံၤစံး၀ဲ“ယသးလၢအဲၣ်ဒိးမၤစၢၤက့ၤကမျၢၢ်အိၣ်အဃိယသးဆူၣ်လၢကသံၣ်တၢ်သ့တၢ်ဘၣ်ဒီးယဟဲထီၣ်၀ဲကၠိအံၤလီၤမီၤနီၤႉခါဆူညါစ့ၢ်ကီးဒ်တၢ်သ့အိၣ်ဒီးယၤအသိးယကဆဲးထီၣ်ကၠိႇဆဲးမၤလိတၢ်မီၤနီၤႉမ့၀ံၤယတိာ်ဃာ်လၢယကက့ၤကွၢ်ထွဲကဒါက့ၤကမျၢၢ်သ့ၣ်လၢအဂ့ၤကတၢၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
ၦၤလၢအဖျိထီၣ်ဂံၢ်ခီၣ်ထံးကသံၣ်တၢ်သိၣ်လိသ့ၣ်တဖၣ်အံၤတၢ်နီၤဖးလီၤ၀ဲအပတီၢ်သၢပတီၢ်လၢအမ့ၢ်(Anatomy)ႇ(Physiology)ႇ(Disease)အံၤဒီး ကဘၣ်က့ၤလီၤကဒါ(Practical)အလါတဆံ၀ံၤ ကဘၣ်ဟံးထီၣ်ဖီၣ်ထီၣ်မၤက့ၤတၢ်လၢတၢ်ဆါဟံၣ်ဘၣ်ထွဲသ့ၣ်တဖၣ်အဂ့ၢ်န့ၣ်ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ
တၢ်ပျၢ်တၢ်သိၣ်လိမူးဘျီ၀ဲအံၤအပူၤန့ၣ်(KDHW)၀ဲၤကျိၣ်ခိၣ် ပဒိၣ်စီၤဒဲမိခ့ၤႇ (ခ့ၣ်အဲၣ်ယူၣ်)နဲၣ်ရွဲၣ်သဃဲၤ–၁ ပဒိၣ်စီၤဆၢၦဲၤဒီး ဒီကလုာ်ဃူဖိး(NUG)ပဒိၣ် ဆူၣ်ချ့၀ဲၤကျိၤၦၤဘၣ်မူဘၣ်ဒါတကးဒံးဘၣ်အမဲာ်ညါ တၢ်သိၣ်လိၦၤဘၣ်မူဘၣ်ဒါတဖၣ်ဟဲထီၣ်၀ဲဒၣ်န့ၣ်လီၤႉ
စီၤကီၢ်ဂ့ၤဒိၣ်လၢအစံၣ်လီၤတၢ်သိၣ်လိအံၤစ့ၢ်ကီးစံး၀ဲ“လၢပၦၤတ၀ၢအပူၤန့ၣ်ပထံၣ်ဘၣ်လၢတၢ်ဟ့ၣ်ဆူၣ်ချ့ပီညါအိၣ်စှၤဒံးမီၤနီၤႉယအဲၣ်ဒိးက့ၤမၤစၢၤတၢ်သ့ၣ်တဖၣ်အံၤႉယဖျိထီၣ်ခဲအံၤယသးခုဒိၣ်မးႉယမၤလၢၦဲၤယမိယပါအတၢ်အဲၣ်ဒိးန့ၢ်လံႉခါဆူညါအဂီၢ်စ့ၢ်ကီးလၢၦၤကမျၢၢ်အဂီၢ်ႇပခိၣ်ပဃၢၤအဂီၢ်န့ၣ်ဒ်တၢ်သ့အိၣ်ဒီးယၤအသိးယကဖံးမၤဟ့ၣ်လီၤယသးလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
ဖဲအပူၤကွံာ်(၂၀၂၂)လါအီးကထိဘၢၣ် ၁ သီအခါစ့ၢ်ကီး ကညီဆူၣ်ချ့မၤစၢၤ၀ဲၤကျိၤ- KDHW (၈)၀ီတ၀ီ ဒီး(၉)၀ီတ၀ီ တၢ်ပျၢ်ကသံၣ်တၢ်သိၣ်လိမူးလၢတၢ်ကီၢ်ကၠီၣ်တဲၣ်–ကီၢ်ပယီၤကီၢ်ဆၢတၢ်လီၢ်တတီၤဒီး ဖဲန့ၣ်ၦၤစံၣ်လီၤတၢ်သိၣ်လိအိၣ်၀ဲ(၄၁)ဂၤန့ၣ်လီၤႉ
