လါယနူၤအါရံၤ ၃၁ သီႇ ၂၀၂၃ နံၣ်ႇ ခ့ၣ်အဲးစံၣ်
လၢကညီကီၢ်စဲၣ် ကြုၢ်တု၀့ၢ်ခိၣ်၀့ၢ်ဃၢၤ တၢ်ဒုးကဲထီၣ်လၢပယီၤသုးဒီးကီၢ်သူလ့ၤသုးမုၢ်ဒိၣ်(KTLA)အဘၢၣ်စၢၤအခါန့ၣ် တၢ်မုာ်တၢ်ခုၣ်ကီၣ်ကး(KNU/KNLA-PC)နုာ်လီၤပၣ်ဃုာ်ဒုးစၢၤပယီၤသုးတၢ်တအိၣ်၀ဲဘၣ်အဂ့ၢ်န့ၣ် ထုးထီၣ်ပာ်ဖျါ၀ဲ ဖဲလါယနူၤအါရံၤ ၂၉ သီအနံၤန့ၣ်လီၤႉ
ဘၣ်ဃးဒီးတၢ်ကစီၣ်ရၤလီၤသးလၢတၢ်ဒုးကဲထီၣ်လၢကြုၢ်တု၀့ၢ်ခိၣ်၀့ၢ်ဃၢၤအခါန့ၣ်ပၣ်ဃုာ်၀ဲကညီတၢ်မုာ်တၢ်ခုၣ်ကီၣ်ကး(PC)တၢ်ဂ့ၢ်အံၤန့ၣ် (KNU/KNLA-PC)လီၢ်ခၢၣ်သးကမံးတံာ်မၤတၢ်အိၣ်ဖှိၣ်တခါ၀ံၤအလီၢ်ခံ ထုးထီၣ်ပာ်ဖျါ၀ဲလံာ်ဒ်အံၤန့ၣ်လီၤႉ
(KNU/KNLA-PC)ၦၤကတိၤတၢ်ပၢ သုးခိၣ်ဒိၣ်စိ စီၤကၠီၤညိၣ်စံး၀ဲလၢ“မ့မ့ၢ်လၢပတၢ်ဟူးတၢ်ဂဲၤပတၢ်ဖံးတၢ်မၤန့ၣ် လၢတၢ်ဒုးတၢ်ယၤပူၤပကလဲၤမၤသကိးတၢ်လၢၦၤတဂၤဂၤလီၤဆီဒၣ်တၢ်ဒုပတၢ်ရဲၣ်တၢ်ကျဲၤတအိၣ်ဘၣ်ႉမ့မ့ၢ်လၢပယီၤတခီပၤစ့ၢ်ကီးပမ့တဲတီတီန့ၣ်ဒုတၢ်ဆိမိၣ်မးတအိၣ်နီတဘျီဘၣ်ႉလၢကဒုးသကိးတၢ်မ့ၢ်ဂ့ၤႇလၢလီၢ်ခၢၣ်သးတၢ်ဆၢတဲာ်မ့ၢ်ဂ့ၤႇလၢလီၢ်ခၢၣ်သးတၢ်ရဲၣ်တၢ်ကျဲၤမ့ၢ်ဂ့ၤႇလၢတၢ်နဲၣ်လီၤတမံၤဂ့ၤတမံၤဂ့ၤန့ၣ်တအိၣ်ဘူဘၣ်နီတဘျီဘၣ်ႉတၢ်ကစီၣ်ဟးထီၣ်တခါအံၤဒုတမ့ၢ်တၢ်လၢအမ့ၢ်အတီဘၣ်ႇမ့ၢ်အလဲၤကမူၤကမၣ်လိာ်သးဖဲလဲၣ်ဒုပတသ့ၣ်ညါဘၣ်ႉဘၣ်ဆၣ်သနါက့လၢ(PC)တၢ်ကရၢကရိအဂီၢ်န့ၣ်ကမၤစၢၤပယီၤလၢကဒုးတၢ်ႇကဒုးၦၤတဂၤဂၤန့ၣ်တၢ်ရဲၣ်တၢ်ကျဲၤတၢ်နဲၣ်လီၤတၢ်သိၣ်လီၤသီလီၤႇတၢ်ဆၢတဲာ်ဒုတအိၣ်နီတဘျီဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
ဖဲအပူၤကွံာ်စှၤသီအခါလၢကြုၢ်တု၀့ၢ်ခိၣ်၀့ၢ်ဃၢၤန့ၣ်တၢ်ဒုးကဲထီၣ်၀ဲလၢပယီၤသုးခီၣ်ချ့သုးရ့ၣ်(ခမရ–၅၄၅)ဒီး သုးခိၣ်အဲၣ်စ့၀ါတီခိၣ်ရိၣ်မဲ(KTLA)သုးပာ်ဖှိၣ်အဘၢၣ်စၢၤအခါန့ၣ်တၢ်ထံၣ်လၢပယီၤသုးအထၢၣ်ပူၤန့ၣ်အိၣ်ဒီး(KNU/KNLA-PC)ဆ့ကၤတၢ်ပနီၣ်(uniform)ဒီး ဖဲန့ၣ်တၢ်ဂီၤမူရၤလီၤသးလၢကညီဖိကဒဲကဒဲယိးကဒါဘီ(သ့ၣ်စးဖီး) ၀ံၤအလီၢ်ခံ လံာ်တၢ်ပာ်ဖျါအံၤဟဲပၢၢ်ထီၣ်၀ဲန့ၣ်လီၤႉ
ထဲဒၣ်တၢ်ထံၣ်န့ၢ်ကရူၢ်ကရၢသုးဆ့ကၤတၢ်ပနီၣ်လိာ်ဘၢလိာ်ကွီၢ်လၢကလုာ်ကဒဲကဒဲက့ၤခးလိာ်ကဒါသးအံၤန့ၣ် လၢအ၀ဲသ့ၣ်တၢ်ကရၢကရိအဖီခိၣ်န့ၣ်မ့ၢ်တၢ်ဒုးထံၣ်ကမၣ်ကညီကမျၢၢ်ထံဖိကီၢ်ဖိတဖၣ်လီၤအဂ့ၢ်န့ၣ် (KNU/KNLA-PC) လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
ဘၣ်ဃးဒီးတၢ်ဂ့ၢ်အံၤခ့ၣ်အဲးစံၣ်–ကညီတၢ်ကစီၣ်၀ဲၤလီၢ်ခိၣ်သ့ၣ်ဆဲးကျိး၀ဲကီၢ်သူလ့ၤသုးမုၢ်ဒိၣ်(KTLA)ခိၣ်နၢ် ၦၤဘၣ်မူဘၣ်ဒါတဖၣ်ဘၣ်ဘၣ်တုၤလၢခဲအံၤဆဲးကျိးတန့ၢ်ဒံး၀ဲဘၣ်အသိးအ၀ဲသ့ၣ်တကပၤစ့ၢ်ကီးထုးထီၣ်ပာ်ဖျါ၀ဲ လီၤလီၤဆီဆီတအိၣ်ဒံး၀ဲဘၣ်န့ၣ်လီၤႉ
