Home တၢ်ကစီၣ် စွ့ၤကိၣ်ကိၤဟီၣ်က၀ီၤတၢ်ဒုးကဲထီၣ်၀ံၤလီၢ်ခံတၢ်မၤဃံးထီၣ်တၢ်ဘံၣ်တၢ်ဘၢလၢကျဲနု၁်လီၤဟးထီၣ်အလီၢ်တဖၣ်

စွ့ၤကိၣ်ကိၤဟီၣ်က၀ီၤတၢ်ဒုးကဲထီၣ်၀ံၤလီၢ်ခံတၢ်မၤဃံးထီၣ်တၢ်ဘံၣ်တၢ်ဘၢလၢကျဲနု၁်လီၤဟးထီၣ်အလီၢ်တဖၣ်

295
0
Photo: CJ

လါအ့ဖြ့ၣ် ၁၃ သီႇ ၂၀၂၃ နံၣ်ႇ ခ့ၣ်အဲးစံၣ်

လၢမၠၣ်၀တံၣ်ကလံၤစိး စွ့ၤကိၣ်ကိၤ၀့ၢ်သီကပၤ အပူၤကွံာ်စှၤသီအခါ တၢ်ဒုးကဲထီၣ်၀ဲလၢတၢ်ပၢၢ်ဆၢသုးပာ်ဖှိၣ်ဒီး ပယီၤသုးႇသုးခိးကီၢ်ဆၢ(BGF)သုးပာ်ဖှိၣ်အဘၢၣ်စၢၤဒီးဘၣ်ဆၣ်ခဲအံၤတၢ်ဒုးကဲထီၣ်တအိၣ်လၢၤ၀ဲဘၣ်ဆၣ် လၢစွ့ၤကိၣ်ကိၤဟီၣ်က၀ီၤကျဲနုာ်လီၤဟးထီၣ်န့ၣ်(BGF)ဆီလီၤတြဲၤမၤဃံးထီၣ်တၢ်ဘံၣ်တၢ်ဘၢဃံးဃီၣ်ဒီၣ်အဂ့ၢ်န့ၣ် ၦၤလၢအဟးထီၣ်က့ၤလီၤဖဲန့ၣ်တဖၣ်စံး၀ဲန့ၣ်လီၤႉ

တၢ်ဒုးကဲထီၣ်လၢစွ့ၤကိၣ်ကိၤလီၢ်က၀ီၤဒီးဒူသ၀ီလၢအိၣ်ဘူးတၢ်ခိၣ်တၢ်ဃၢၤဖဲန့ၣ်သ့ၣ်တဖၣ်၀ံၤလီၢ်ခံန့ၣ် ဘၣ်ယိၣ်၀ဲလၢတၢ်ဒုးကဆူၣ်ထီၣ်လၢစွ့ၤကိၣ်ကိၤလီၢ်က၀ီၤပူၤအဃိ(BGF)ဆီလီၤတြဲၤလၢကျဲနုာ်လီၤဟးထီၣ်အလီၢ်တဖၣ်ဒီးအိၣ်ခိးသမံသမိးတၢ်အဂ့ၢ်န့ၣ် ကမျၢၢ်လၢအဟးထီၣ်က့ၤလီၤဖဲန့ၣ်တဂၤ စံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“ကယဲၢ်မ့ၢ်ကစၢၢ်ခိၣ်န့ၣ်သုးအိၣ်ခဲလၢာ်လီၤႉဖဲတၢ်ကနုာ်လီၤစွ့ၤကိၣ်ကိၤန့ၣ်တၢ်ပံးဃာ်၀ဲဒီးတြဲၤကအိၣ်(၆)ဘ့ၣ်ညါႉတချုးတၢ်ဒုးကဲထီၣ်ဒံးဘၣ်န့ၣ်ၦၤတသမံသမိးတၢ်ဒ်အံၤညါဘၣ်ႉတချုးတုၤလၢ၀့ၢ်ပူၤဘၣ်န့ၣ်တြဲၤလၢအအိၣ်ခိးသမံသမိးတၢ်န့ၣ်ကအိၣ်လၢ(၅)ဘ့ၣ်ဒံးညါအိၣ်ခိးသမံသမိးတၢ်ႉမ့၀ံၤတြဲၤတၢ်လီၢ်ကိးတီၤဒဲးန့ၣ်တ့ထီၣ်၀ဲဒဲႇ ခူၣ်ဃာ်၀ဲတၢ်ပူၤႇ မၤထီၣ်ဃာ်၀ဲတၢ်သူၣ်ထီၣ်ဖးထီလၢကကွၢ်စိလီၤတၢ်အဂီၢ်မီၤနီၤႉ ဘၣ်မနုၤအဃိလဲၣ်န့ၣ်ဘၣ်ယိၣ်၀ဲလၢ တၢ်ဒုးကကဲထီၣ်လၢစွ့ၤကိၣ်ကိၤ၀့ၢ်ပူၤအဃိဒီသဒၢဆိ၀ဲဒ်န့ၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

လၢန့ၣ်အမဲာ်ညါစွ့ၤကိၣ်ကိၤ၀့ၢ်ပူၤန့ၣ်တၢ်ပျဲဟးထီၣ်က့ၤလီၤကမျၢၢ်လၢအဆၢကတီၢ်အသိး ကမျၢၢ်ဒီးသိလ့ၣ်လၢအဟးထီၣ်က့ၤလီၤတဖၣ်(BGF)သမံသမိး၀ဲမၣ်ပိၤတ့ၤဒီးဟံၣ်ခိၣ်စရီအဂ့ၢ်န့ၣ် ကမျၢၢ်လၢအဟးထီၣ်က့ၤလီၤတဖၣ်စံး၀ဲန့ၣ်လီၤႉ

ဒ်န့ၣ်အသိးစွ့ၤကိၣ်ကိၤလီၢ်က၀ီၤခီဖျိတၢ်ဒုးဂၢၢ်ထီၣ်လံအဃိကမျၢၢ်လၢအဃ့ၢ်ထီၣ်တဖၣ်က့ၤအိၣ်လၢအဟံၣ်အဃီလံဒီးခီဖျိတၢ်ဒုးကဲထီၣ်အဃိလီၢ်က၀ီၤ(က၀ီၤဒ့)တဖၣ်အပူၤဂံၢ်ခီၣ်ထံးတၢ်အီၣ်တၢ်အီအၦ့ၤဒိၣ်ထီၣ်၀ဲအဂ့ၢ်န့ၣ် သ၀ီဖိလၢအက့ၤအိၣ်လၢအဟံၣ်တဂၤ စံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“လၢညါခါဖဲက၀ီၤဒ့ပူၤအံၤဟုသးဃုတလီးတထၢၣ်န့ၣ်အၦ့ၤအိၣ်ထဲ(၂၇၀)ဘးလီၤႉ ဘၣ်ဆၣ်ခဲအံၤ အၦ့ၤအိၣ်လၢ(၃၅၀)ႇ(၄၀၀)လံႉလၢညါခါဆီဒံၣ်တဖျၢၣ်န့ၣ်(၅)ဘးခဲအံၤအိၣ်လၢ(၁၀)လံႉနဟးၦ့ၤဟုသးမးတန့ၢ်လၢၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

လၢစွ့ၤကိၣ်ကိၤလီၢ်က၀ီၤကျဲနုာ်လီၤဟးထီၣ်တဖၣ်န့ၣ်ပယီၤသုးႇသုးခိးကီၢ်ဆၢ(BGF)တဖၣ်ပာ်ဖှိၣ်ထီၣ်သး မၤအါထီၣ်၀ဲတၢ်ဘံၣ်တၢ်ဘၢအိၣ်ခိးသမံသမိးတၢ်ဘၣ်ဆၣ်မ့မ့ၢ်လၢမုၢ်နၤခီန့ၣ်တၢ်ဂဲၤကလံၣ်တါဒီးတၢ်တ့ထီၣ်ဘှီထီၣ်၀ဲ(မါတး)တၢ်ဂဲၤလိ၁်ကွဲထံလီၢ်တဖၣ်အဂ့ၢ်န့ၣ် လီၢ်က၀ီၤကမျၢၢ်စံး၀ဲအသိး သ့ၣ်ညါဘၣ်န့ၣ်လီၤႉ