လါအ့ဖြ့ၣ် ၅ သီႇ ၂၀၂၃ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤအပူၤ လါမးရှးတလါအတီၢ်ပူၤ တၢ်ဒုးကဲထီၣ်၀ဲလၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဒီးပယီၤသုးအဘၢၣ်စၢၤအိၣ်၀ဲ(၁၉၀)ဘျီဒီး ပယီၤသုးတကပၤသံအါမးအဂ့ၢ်န့ၣ် ခ့ၣ်အဲၣ်ယူၣ် မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲဖဲလါအ့ဖြ့ၣ် ၃ သီ အနံၤန့ၣ်လီၤႉ
လါမးရှးတလါအတီၢ်ပူၤ ပယီၤသုးႇသုးခိးကီၢ်ဆၢ(BGF)ဒီး(KNLA)အဘၢၣ်စၢၤတၢ်ဒုးကဲထီၣ်၀ဲ(၁၉၀)ဘျီဒီး ဖဲန့ၣ်ပယီၤသုးတကပၤသံ၀ဲ(၉၂)ဂၤဒီးဘၣ်ဒိ(၄၅)ဂၤအဂ့ၢ်န့ၣ် ခ့ၣ်အဲၣ်ယူၣ်(သုးက့ ၅)လံာ်တၢ်ပာ်အပူၤ ပာ်ဖျါ၀ဲန့ၣ်လီၤႉ
တၢ်ဒုးကဲထီၣ်တလါအတီၢ်ပူၤအံၤမ့မ့ၢ်(KNLA)တကပၤဘၣ်ဟ့ၣ်လီၤကွံာ်အသးသမူ(၄)ဂၤဒီးဘၣ်ဒိ၀ဲ(၁၄)ဂၤန့ၣ်လီၤႉ ဒ်န့ၣ်အသိးပယီၤသုးသံတဖၣ်အကျါပၣ်ဃုာ်၀ဲသုးခိၣ်ဂီၢ်ဂ့ၢ်(၁)ဂၤဒီးသုးစကီၤ(၂)ဂၤအဂ့ၢ်န့ၣ် လံာ်တၢ်ပာ်ဖျါပူၤပာ်ဖျါ၀ဲန့ၣ်လီၤႉ
ဒ်နၣ်အသိးဖဲလါမးရှး ၂၈ သီအနံၤ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ် လဲၤထီၣ်မၤန့ၢ်၀ဲမဲၤခါထၣ် ပယီၤသုးကလၢၤလၢအိၣ်ဃိၣ်လိာ်ကျိကၢၢ်နံၤအံၤဒီး ဖဲန့ၣ်ပယီၤသုးတကပၤသံ၀ဲ(၁၆)ဂၤႇဘၣ်ဒိ(၇)ဂၤဒီး မၤန့ၢ်၀ဲကျိချံၦာ်သၣ်အါအါဂီၢ်ဂီၢ်န့ၣ်လီၤႉ
တၢ်ဒုးကဲထီၣ်လၢလါမးရှးအတီၢ်ပူၤန့ၣ်(KNLA)မၤဟးဂီၤ၀ဲပယီၤသုးအသိလ့ၣ်(၃)ခိၣ်ႇဆဲးကဲးတခိၣ်ဒီး ပယီၤသုးကဘီယူၤဟဲတ့ၢ်လီၤမ့ၣ်ပိၢ်(၁၆)ဖျၢၣ်ႇတကးဒံးဘၣ်ခးလီၤကျိဖးဒိၣ်(၁၄၂)ဖျၢၣ်ဆူလီၢ်က၀ီၤကမျၢၢ်ဒူသ၀ီတၢ်ဖံးအီၣ်မၤအီၣ်လီၢ်အဃိ ကမျၢၢ်သံ(၁)ဂၤဒီးဘၣ်ဒိ၀ဲ(၅)ဂၤအဂ့ၢ်န့ၣ် ခ့ၣ်အဲၣ်ယူၣ် မုၢ်တြီၢ်တၢ်ကစီၣ် ထုးထီၣ်ပာ်ဖျါ၀ဲအသိး သ့ၣ်ညါဘၣ်န့ၣ်လီၤႉ
