ပယီၤသုးခးလီၤကျိဖးဒိၣ်လၢကၠဲးဒိ၀့ၢ်ပူၤအဃိ ဖိသၣ်သံတဂၤဒီးဘၣ်ဒိနးနးကျံၤကျံၤတဂၤ

လါမ့ၤ ၂၄ သီႇ ၂၀၂၃ နံၣ်ႇ ခ့ၣ်အဲးစံၣ်

လၢကညီကီၢ်စဲၣ် နိၣ်တကီကီၢ်ဆၣ်အပူၤ ဖဲလါမ့ၤ ၂၃ သီ မုၢ်ဃ့ၢ်လီၤ ၂ နၣ်ရံၣ်ဃၣ်ဃၣ်အဆၢကတီၢ်န့ၣ် ခီဖျိပယီၤသုးခးလီၤကျိဖးဒိၣ်ဆူကၠဲးဒိ၀့ၢ်ပူၤအဃိ ဘၣ်၀ဲကၠဲးဒိ(က၀ီၤဒ့ ၁)ၦၤဖိသၣ်ခံဂၤဒီး ဖဲန့ၣ်သံ(၁)ဂၤႇ ဘၣ်ဒိနးနးကျံၤကျံၤ(၁)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ခီဖျိကၠဲးဒိပယီၤသုး(ဗျူဟာကုန်း)အံၤခးလီၤကျိဖးဒိၣ်ဆူကၠဲးဒိ၀့ၢ်ပူၤကအိၣ်လၢအဖျၢၣ်(၁၀)ဃၣ်ဃၣ်ညါအဃိ ဘၣ်၀ဲဒၣ်ဟံၣ်တဖျၢၣ်ဃီအပူၤၦၤဒီပုၢ်၀ဲၢ်ခွါခံဂၤအံၤဒီးမ့မ့ၢ်အ၀ဲၢ်ခွါတဂၤန့ၣ်သံ၀ဲတဘျီဃီဒီးအပုၢ်ခီန့ၣ်ဘၣ်ဒိဘၣ်ထံးတၢ်လဲၤဆှၢအီၤဆူတၢ်ဆါဟံၣ်တၢ်ဘၣ်ယိၣ်အိၣ်၀ဲအဂ့ၢ်န့ၣ် ကၠဲးဒိကမျၢၢ်လၢတအဲၣ်ဒိးပာ်ဖျါအမံၤတဂၤ စံး၀ဲဒ်အံၤန့ၣ်လီၤႉ

“ဖဲအံၤတၢ်ဒုးကဲထီၣ်တအိၣ်ဘၣ်ႉဘၣ်ဆၣ်မ့ၢ်ၦၤလဲၤခးအ၀ဲသ့ၣ်ဧါပတသ့ၣ်ညါဘၣ်ႉအ၀ဲသ့ၣ်အိၣ်လၢ(ဗျူဟာကုန်း) ခးလီၤတၢ်လၢကၠဲးဒိ၀့ၢ်ပူၤႇခးလီၤ၀ဲန့ၣ်ကအိၣ်လၢအဖျၢၣ်(၁၀)ဃၣ်ဃၣ်ညါႉဘၣ်၀ဲဒၣ်(က၀ီၤဒ့ ၁)ၦၤဖိသၣ်ခံဂၤႉ ၦၤဖိသၣ်လၢအသံကွံာ်တဂၤန့ၣ်ဘၣ်၀ဲဒၣ်အချၢဃံဖျိသဂၢၢ်ထီၣ်၀ဲအကိာ်ဘိဒီးသံ၀ဲတဘျီဃီဖဲန့ၣ်လီၤႉမ့မ့ၢ်လၢအပုၢ်ခီန့ၣ်အဘၣ်ဖဲလဲၣ်တတီၤလဲၣ်ဒုပတသ့ၣ်ညါဘၣ်ႉၦၤလဲၤဆှၢအီၤလၢတၢ်ဆါဟံၣ်ႉတၢ်ဘၣ်ယိၣ်အိၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲလါမ့ၤ ၂၄ သီအနံၤန့ၣ်လီၤႉ

ၦၤဖိသၣ်ခံဂၤလၢအဘၣ်ဒီးကျိဖးဒိၣ်အံၤန့ၣ်မ့ၢ်၀ဲစီၤသါနဲၤအူ(၁၅)နံၣ်ဒီးအပုၢ်ခွါမီၤစါအူ(၈)နံၣ်သ့ၣ်တဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ခီဖျိပယီၤသုးခးလီၤနါစိၤကျိဖးဒိၣ်အဃိကၠဲးဒိ၀့ၢ်(က၀ီၤဒ့)ပူၤဟံၣ်တနီၤဟးဂီၤ၀ဲအိၣ်အသိး ဘျီၣ်တၢ်သူၣ်ထီၣ်ဟးဂီၤ၀ဲစ့ၢ်ကီးတဖျၢၣ်အဂ့ၢ်န့ၣ် ကၠဲးဒိကမျၢၢ်တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ

တချုးပယီၤသုးခးလီၤကျိဖးဒိၣ်ကဲထီၣ်သးဒံးဘၣ်အခါန့ၣ်ဖဲဂီၤခီအဆၢကတီၢ်ကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA)သုးပာ်ဖှိၣ်နုာ်လီၤဒွဲၣ်အူအီၣ်ကွံာ်၀ဲကၠဲးဒိ၀့ၢ်မုၢ်ထီၣ်ကလံၤထံး(ကၠီၣ်ထၣ်)ပယီၤသုးကလၢၤပယီၤသုးႇပၢၤကီၢ်တအိၣ်လၢအပူၤအံၤဒီးဖဲန့ၣ်၀ံၤလီၢ်ခံပယီၤသုးစးထီၣ်ခးလီၤကျိဖးဒိၣ်ဆူကၠဲးဒိ၀့ၢ်ပူၤဒ်အံၤလီၤအဂ့ၢ်န့ၣ် ကမျၢၢ်လၢအိၣ်၀့ၢ်ပူၤတဖၣ် စံး၀ဲန့ၣ်လီၤႉ