ပယီၤသုးခးလီၤကျိဖးဒိၣ်အဃိ ကမျၢၢ်ဘၣ်ဒိ(၅)အကျါပၣ်ဃု၁်၀ဲသီခါသၢပါ

လါမ့ၤ ၂၈ သီႇ ၂၀၂၃ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၁)တၢ်ပၢဟီၣ်က၀ီၤ ဒူသထူၣ်ကီၢ်ရ့ၣ် ဘံလ့ကီၢ်ဆၣ်အပူၤ ဖဲလါမ့ၤ ၂၇ သီ ဂီၤခီအဆၢကတီၢ် ခီဖျိပယီၤသုးခးလီၤကျိဖးဒိၣ်လီၤတဲာ်ပိၢ်ဖးထီၣ်လၢ (ရွှေရောင်ပြ)ကရူၢ် အ၀့ကၠံသ၀ီ သီခါဖၠၣ်ကရၢၢ်ပူၤအဃိ ကမျၢၢ်ဘၣ်ဒိ(၅)ဂၤအကျါပၣ်ဃုာ်၀ဲသီခါ(၃)ပါအဂ့ၢ်န့ၣ် သ့ၣ်ညါဘၣ်လၢဂံၢ်ခီၣ်ထံး ၦၤဟ့ၣ်တၢ်ကစီၣ်ဖိတဖၣ်အအိၣ်န့ၣ်လီၤႉ

ဖဲလါမ့ၤ ၂၇ သီ ဂီၤခီ ၉း၃၀ အဆၢကတီၢ် ပယီၤသုးကျိဖးဒိၣ်သုးရ့ၣ်(၃၁၄)လၢအိၣ်ဆီလီၤသးဖဲ (ရွှေရောင်ပြ)ကရူၢ် ထံဖိညၣ်လံၣ်သ၀ီပူၤတဖၣ်အံၤ ခးလီၤကျိဖးဒိၣ်(၂)ဖျၢၣ်လီၤတဲာ်ပိၢ်ဖးထီၣ်လၢ(အ၀င်းကြီး) သီခါဖၠၣ်ကရၢၢ်ပူၤအဃိ သီခါ(၃)ပါဒီးကမျၢၢ်ခံဂၤဘၣ်ဒိဘၣ်ထံး၀ဲအဂ့ၢ်န့ၣ် ခ့ၣ်အဲၣ်ယူၣ်(သုးက့ ၁) ၦၤဘၣ်မူဘၣ်ဒါ စံး၀ဲန့ၣ်လီၤႉ

အ၀ဲစံး၀ဲလၢ“ကျိဖးဒိၣ်သုးခးလီၤ(၈၀ မမ)ကျိဖးဒိၣ်ခံဖျၢၣ်ႉအလီၤတဲာ်ပိၢ်ဖးထီၣ်လၢသီခါဖၠၣ်ကရၢၢ်ပူၤႉ လီၤတဲာ်ဘျီဘၣ်၀ဲၦၤကညီန့ၣ်ႉတၢ်ဘၣ်ယိၣ်ဒုတအိၣ်အါအါဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

လၢန့ၣ်အမဲာ်ညါတချုးပယီၤသုးခးလီၤကျိဖးဒိၣ်ဒံးဘၣ်ဖဲတၢ်တနံၤန့ၣ်ဂီၤခီ ၈ နၣ်ရံၣ်အဆၢကတီၢ်န့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်(၂)ရ့ၣ်ပာ်ဖှိၣ်ထီၣ်သး လဲၤခး၀ဲပယီၤသုးလၢနုာ်လီၤအိၣ် ဖဲ၀့ၢ်တကူၣ်–မီၣ်လမၠဲၣ်ကျဲကပၤအံၤလၢဒြိ၀ံၤလီၢ်ခံန့ၣ် ပယီၤသုးရ့ၣ်၀ဲအံၤက့ၤခးလီၤကဒါကျိဖးဒိၣ်ဒ်အံၤလီၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ

ဒ်န့ၣ်အသိးဖဲအပူၤကွံာ်လါမ့ၤ ၂၃ သီအခါစ့ၢ်ကီး ပယီၤသုးကျိဖးဒိၣ်သုးရ့ၣ်၀ဲအံၤခးလီၤကျိဖးဒိၣ်ဆူ (ရွှေရောင်ပြ)သ၀ီပူၤ အဃိ လီၢ်က၀ီၤကမျၢၢ်အဆၣ်ဖိကီၢ်ဖိသံဒီးတၢ်ဘၣ်ဒိဘၣ်ထံးအိၣ်၀ဲအသိး သ၀ီဖိတဖၣ်စ့ၢ်ကီးဘၣ်ဃ့ၢ်ထီၣ်ဒံး၀ဲအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ

ဒ်န့ၣ်အသိးဖဲတနံၣ်အံၤ(၂၀၂၃)လါမးရှးအခါစ့ၢ်ကီး ပယီၤသုးကျိဖးဒိၣ်သုးရ့ၣ်(၃၁၄)ဃုာ်ဒီး(ခမရ–၉)ႇ (ခမရ–၃၁၄)ႇ (ခလရ–၈)ႇ(ခလရ–၂၄)ဒီး(အမရ–၄၀၂)သုးရ့ၣ်သ့ၣ်တဖၣ်အံၤပညိၣ်ခးလီၤကျိဖးဒိၣ်လိၤလိၤဆူ ခ့ၣ်အဲၣ်ယူၣ်(သုးက့ ၁)တၢ်ပၢဟီၣ်က၀ီၤဒူသ၀ီတဖၣ်ပူၤဒီးဖီၣ်ကမျၢၢ်လၢတၢ်ဂ့ၢ်တအိၣ်နီတမံၤတကးဒံးဘၣ် လုၢ်သ့ၣ်ခါပတာ်ၦၤဂ့ၢ်၀ီခွဲးယာ်သ့ၣ်တဖၣ်အဂ့ၢ်န့ၣ် ခ့ၣ်အဲၣ်ယူၣ်–ဒူသထူၣ်ကီၢ်ရ့ၣ် ထုးထီၣ်ပာ်ဖျါ၀ဲအသိး သ့ၣ်ညါဘၣ် န့ၣ်လီၤႉ