တၢ်တဘၣ်တီၣ်ပယီၤသုးဒီးတၢ်ဖိတၢ်လံၤလၢအဘၣ်ထွဲပယီၤသုးတဖၣ်လၢသိလ့ၣ်ပူၤဘၣ်အဂ့ၢ် KNU ထုးထီၣ်ပာ်ဖျါ

လါယူၤ ၁၂ သီႇ ၂၀၂၃ နံၣ်ႇ ခ့ၣ်အဲးစံၣ်

လၢမီၣ်လမၠဲၣ်ႇမူၣ်ဒိၤႇသရိာ်၀ါ(သၤဖၠူၤစယၣ်),ယ့ႇဘျံးဒ၀ဲၢ်(နီၣ်ဂံၢ် ၈)ကျဲမုၢ်ခိၣ်ဒီတကျိၤန့ၣ် သိလ့ၣ်လၢအဟးထီၣ်က့ၤလီၤ တဖၣ် တဘၣ်တီၣ်ပယီၤသုးဒီးတၢ်ဖိတၢ်လံၤလၢအဘၣ်ဃးဒီးပယီၤသုးတဖၣ်ဘၣ်အဂ့ၢ်န့ၣ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၆) သုးရ့ၣ်(၂၇)၀ဲၤလီၢ်ခိၣ်သ့ၣ် ထုးထီၣ်ပာ်ဖျါတၢ်ကလုၢ် ဖဲလါယူၤ ၁၀ သီအနံၤ န့ၣ်လီၤႉ

စးထီၣ်ဖဲတလါအံၤလါယူၤ ၁၅ သီန့ၣ် သိလ့ၣ်လၢအဟးထီၣ်က့ၤလီၤဖဲမီၣ်လမၠဲၣ်ႇမူၣ်ဒိၤႇသၤဖၠူၤစယၣ်ႇယ့ႇဘျံးဒ၀ဲၢ် (နီၣ်ဂံၢ် ၈)ကျဲဒီတကျိၤအံၤတဖၣ် ခ့ၣ်အဲၣ်ယူၣ်(သုးရ့ၣ်–၂၇)အၦၤမ့ကိးပတုာ်သိလ့ၣ်သမံသမိး၀ဲန့ၣ် သိလ့ၣ်တဖၣ် ကအိၣ်ပတုာ်ဒိးသမံသမိးသးဂ့ၤဂ့ၤအဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ

လၢန့ၣ်အမဲာ်ညါလၢသိလ့ၣ်အပူၤတၢ်တဘၣ်တီၣ်၀ဲပယီၤသုးဒီးတၢ်ဖိတၢ်လံၤလၢအဘၣ်ဃးပယီၤသုးတဖၣ်ဘၣ်ႇ ကမျၢၢ်ထံဖိကီၢ်ဖိလၢအဟးထီၣ်က့ၤလီၤတဖၣ်အံၤတဘၣ်ဒိးဃုာ်သိလ့ၣ်ဒီးပယီၤသုးဘၣ်ဒီး ကလုာ်ဒူၣ်ဖီၣ်စုက၀ဲၤကရူၢ်ကရၢလၢအဂၤတဖၣ်စ့ၢ်ကီးမ့ကိးသမံသမိး၀ဲန့ၣ်ကတူၢ်ဒိးသမံသမိးသးဂ့ၤဂ့ၤအဂ့ၢ်န့ၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ

တကီၢ်ခါခဲအံၤစ့ၢ်ကီးအ၀ဲသ့ၣ်ကရူၢ်အံၤစးထီၣ်မၤ၀ဲဒုးယၤတၢ်ဟူးတၢ်ဂဲၤလၢ(နီၣ်ဂံၢ် ၈)ကျဲမုၢ်ခိၣ်ဒီတကျိၤအံၤလံ အဃိ ဒ်သိးကမျၢၢ်တၢ်ဘၣ်ဒိဘၣ်ထံးသုတအိၣ်ထီၣ်တဂ့ၤအဂီၢ်န့ၣ် ဘၣ်ထုးထီၣ်၀ဲတၢ်ကလုၢ်ဒ်အံၤလီၤအဂ့ၢ်န့ၣ် စံး၀ဲန့ၣ်လီၤႉ

လၢန့ၣ်အမဲာ်ညါတၢ်ကလုၢ်လၢတၢ်ထုးထီၣ်ဟ့ၣ်ပလီၢ်၀ဲအံၤၦၤလၢအမ့တလူၤပိာ်မၤထွဲ၀ဲဘၣ်တဖၣ် တၢ်ဂ့ၢ်မ့ဟဲကဲထီၣ်သးတမံၤမံၤန့ၣ်တမ့ၢ်လၢအ၀ဲသ့ၣ်ကဟံးမူဒါဘှါဆှဲ၀ဲဘၣ်အဂ့ၢ်န့ၣ် (KNLA)သုးရ့ၣ် ၂၇ လံာ်တၢ်ပာ်ဖျါ အပူၤ စံး၀ဲန့ၣ်လီၤႉ