Home Hotnews မၠဲၣ်ကၠံငူၣ်ၦၤလီၢ်အိၣ်ကမှံဖိတီၣ်ဖျါထီၣ်၀ဲလၢအဲၣ်ဒိးက့ၤအိၣ်လၢအကစၢ်ဒူသ၀ီတၢ်လီၢ်တၢ်ကျဲ

မၠဲၣ်ကၠံငူၣ်ၦၤလီၢ်အိၣ်ကမှံဖိတီၣ်ဖျါထီၣ်၀ဲလၢအဲၣ်ဒိးက့ၤအိၣ်လၢအကစၢ်ဒူသ၀ီတၢ်လီၢ်တၢ်ကျဲ

154
0
Photo-KIC

လါယူၤ ၁၂ သီႇ ၂၀၂၃ နံၣ်ႇ ခ့ၣ်အဲးစံၣ်

ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၅)ဟီၣ်က၀ီၤ မုၢ်တြီၢ်ကီၢ်ရ့ၣ်ပူၤ ကမျၢၢ်လၢအလဲၤဃ့ၢ်အိၣ်ကဒုသး ဖဲမၠဲၣ်ကၠံငူၣ်လီၢ်အိၣ်ကမှံလီၢ်သ့ၣ်တဖၣ်အံၤ အဲၣ်ဒိးက့ၤအိၣ်လၢအကစၢ်ဒူသ၀ီတၢ်လီၢ်တၢ်ကျဲလံန့ၣ် တီၣ်ဖျါထီၣ်၀ဲဖဲလါယူၤ ၁၀ သီ လၢခ့ၣ်အဲၣ်ယူၣ်(ဖၣ်အၣ်ကီၢ်ရ့ၣ်)ၦၤဘၣ်မူဘၣ်ဒါမၤ၀ဲတၢ်ထံၣ်လိာ်အိၣ်သကိးဒီး ၦၤလီၢ်အိၣ်ကမှံဖိတၢ်ရဲၣ်တၢ်ကျဲၤပူၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ခီဖျိတၢ်ဒုးကဲထီၣ်လၢဖၣ်ပူၣ်ဟီၣ်က၀ီၤပူၤအဃိလီၢ်က၀ီၤကမျၢၢ်လၢအလဲၤဃ့ၢ်အိၣ်ကဒုသးဖဲမၠဲၣ်ကၠံငူၣ်လီၢ်အိၣ်ကဒုလီၢ်အံၤၦၤနီၣ်ဂံၢ်အိၣ်၀ဲလၢအကထိညါအသိး တကီၢ်ခါခဲအံၤစ့ၢ်ကီးခီဖျိဟဲဃ့ၢ်အါထီၣ်ကဒီးအိၣ်ဒီဒူၣ်ညါဒီး ဟီၣ်က၀ီၤပူၤတၢ်မုာ်တၢ်ခုၣ်မ့အိၣ်န့ၣ်အဲၣ်ဒိးက့ၤအိၣ်ကဒါလၢကစၢ်ဒူသ၀ီတၢ်လီၢ်တၢ်ကျဲအဂ့ၢ်န့ၣ် အ၀ဲသ့ၣ်တီၣ်ဖျါထီၣ်၀ဲဖဲ တၢ်ထံၣ်လိာ်အိၣ်သကိးတၢ်ရဲၣ်တၢ်ကျဲၤပူၤန့ၣ်လီၤႉ

ၦၤလီၢ်အိၣ်ကမှံပိာ်မုၣ်တဂၤစံး၀ဲလၢ“ပအဲၣ်ဒိးဃ့ထီၣ်ကီၢ်ရ့ၣ်ခိၣ်လၢမ့သ့န့ၣ်ကပတုာ်ကွံာ်တၢ်ဒုးတၢ်ယၤဒီးဘှါဆှဲက့ၤအီၤလၢစီၤနီၢ်ခိၣ်မီၤနီၤႉပဟဲအိၣ်ဖဲအံၤဒုဒ်သုသ့ၣ်ညါအသိးလီၤနဖံးအီၣ်မၤအီၣ်တၢ်တသ့နီတမံၤဘၣ်ႉဟီၣ်က၀ီၤပူၤတၢ်မ့မုာ်မ့ခုၣ်ထီၣ်န့ၣ်ပအဲၣ်ဒိးက့ၤအိၣ်လၢပကစၢ်ဒူသ၀ီလီၤႉမ့မ့ၢ်လၢပကစၢ်သ၀ီခီန့ၣ်ပဖံးအီၣ်မၤအီၣ်တၢ်သ့မီၤနီၤ”အဂ့ၢ်န့ၣ် စံးလီၤ၀ဲလၢတၢ်ထံၣ်လိာ်အိၣ်သကိးတၢ်ရဲၣ်တၢ်ကျဲၤပူၤန့ၣ်လီၤႉ

ကမျၢၢ်ၦၤဃ့ၢ်မှံဟးဖျိးလၢအဟဲအိၣ်ကဒုသးဖဲမၠဲၣ်ကၠံငူၣ်လီၢ်ကဒုလီၢ်သ့ၣ်တဖၣ်အံၤမ့ၢ်ၦၤသ့ၣ်တဖၣ်လၢအိၣ်ဟဲလၢခ့ၣ်အဲၣ်ယူၣ်(သုးက့ ၅)တၢ်ပၢဟီၣ်က၀ီၤတဖၣ်အပူၤဒီးစးထီၣ်ဖဲမဟိန့ၣ်ခီဖျိတၢ်ဒုးကဲထီၣ်လၢဟီၣ်က၀ီၤပူၤအဃိ အ၀ဲသ့ၣ်လဲၤအိၣ်ဆိ၀ဲလၢအဘူးအတံၢ်ဟံၣ်ႇဟဲအိၣ်ကဒုသးဖဲမၠဲၣ်ကၠံငူၣ်ၦၤလီၢ်အိၣ်ကဒုလီၢ်လီၢ်လံၤအံၤန့ၣ်လီၤႉဒီးၦၤသ့ၣ်တဖၣ်အံၤဒိးသန့ၤထီၣ်သးအိၣ်ဆၢထၢၣ်၀ဲလၢတၢ်မၤဘူၣ်ကစၢ်ဒီးတၢ်ဘူၣ်တၢ်ဘါခိၣ်နၢ်အတၢ်ဆီၣ်ထွဲမၤစၢၤသ့ၣ်တဖၣ်အံၤလီၤအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲအသိးသ့ၣ်ညါဘၣ်န့ၣ်လီၤႉ

ကမျၢၢ်ၦၤဃ့ၢ်မှံဟးဖျိးလၢအအိၣ်ဖဲမၠဲၣ်ကၠံငူၣ်လီၢ်အိၣ်ကဒုလီၢ်သ့ၣ်တဖၣ်အံၤလၢအ၀ဲသ့ၣ်ဟီၣ်က၀ီၤတနီၤအပူၤန့ၣ် တၢ်ဒုးတၢ်ယၤကဲထီၣ်တအိၣ်လၢၤ၀ဲဘၣ်ဆၣ်ႇခီဖျိတၢ်ဒိးလီၤဃာ်မ့ၣ်ပိၢ်အိၣ်ဒံးအဃိအ၀ဲသ့ၣ်က့ၤအိၣ်လၢသ၀ီတဘူၣ်ဒံးဘၣ်ဒီးဆၢမုၢ်လၢ်၀ဲလၢၦၤကမၤဆှဲကွံာ်ဟီၣ်လာ်မ့ၣ်ပိၢ်သ့ၣ်တဖၣ်အံၤအဂ့ၢ်န့ၣ် ၦၤလီၢ်အိၣ်ကမှံပိာ်မုၣ်လၢအဂၤတဂၤ စ့ၢ်ကီး တီၣ်ဖျါထီၣ်၀ဲဒ်အံၤန့ၣ်လီၤႉ

အ၀ဲစံး၀ဲလၢ“ပဟဲအိၣ်ဖဲအံၤပဖံးအီၣ်မၤအီၣ်တၢ်တသ့နီတမံၤဘၣ်ႉယဲဒၣ်နါက့ယခီၣ်တဂ့ၤဘၣ်ႉယ၀ၤနါက့ၦၤခးကမၣ်အီၤဒီး(စနဲးဖၢး)ကျိအဃိသံလံႉခဲအံၤယဒံၣ်ယဖိတဖၣ်န့ၣ်လဲၤထီၣ်မၤတၢ်လၢယိၤကီၢ်မီၤနီၤႉပအဲၣ်ဒိးက့ၤအိၣ်လၢပသ၀ီဘၣ်ဆၣ်ခီဖျိၦၤဒိးလီၤဃာ်ဟီၣ်လာ်မ့ၣ်ပိၢ်အိၣ်အဃိပက့ၤအိၣ်တဘူၣ်ဘၣ်ႉမ့သ့မ့ဘၣ်န့ၣ်ပဆၢမုၢ်လၢ်လၢၦၤကမၤဆှဲကွံာ်မ့ၣ်ပိၢ်တဖၣ်အံၤမီၤနီၤ”အဂ့ၢ်န့ၣ် စံး၀ဲန့ၣ်လီၤႉ

တၢ်ထံၣ်လိာ်သးဒီးကမျၢၢ်ၦၤလီၢ်အိၣ်ကမှံတၢ်ရဲၣ်တၢ်ကျဲၤဘျီ၀ဲအံၤန့ၣ်(ခ့ၣ်အဲၣ်ယူၣ်)ဖၣ်အၣ်ကီၢ်ရ့ၣ်ခိၣ် ပဒိၣ်စီၤအီၤမီၤအ့ဒီး ကီၢ်ရ့ၣ်ႇသုးက့ခိၣ်နၢ်တနီၤဃုာ်ဒီးသုးခိးကီၢ်ဆၢ(BGF)ခိၣ်နၢ်ႇ လီၢ်က၀ီၤဒူသ၀ီၦၤဘၣ်မူဘၣ်ဒါ တကးဒံးဘၣ်ကမျၢၢ်ၦၤဃ့ၢ်မှံဟဖျိးခဲလၢာ်ဟဲထီၣ်၀ဲအဂၤ(၅၀၀)ဃၣ်ဃၣ်န့ၣ်လီၤႉ