ကညီကီၢ်စဲၣ်ပူၤပယီၤသုးဖီၣ်(Without)သိလ့ၣ်ဟဲအါထီၣ်အဃိ ကမျၢၢ်ဟးထီၣ်က့ၤလီၤကီခဲထီၣ်

လါယူၤ ၁၃ သီႇ ၂၀၂၃ နံၣ်ႇ ခ့ၣ်အဲးစံၣ်

လၢကညီကီၢ်စဲၣ် ဖၣ်အၣ်၀့ၢ်ပူၤတကးဒံးဘၣ်ကီၢ်ဆၣ်လၢအဂၤတဖၣ်စ့ၢ်ကီး စှၤသီအတီၢ်ပူၤအံၤ ခီဖျိပယီၤသုးဖီၣ်(Without)သိလ့ၣ်လၢလံာ်လဲၢ်တအိၣ်ဘၣ်ဟဲအါထီၣ်အဃိ ဟးထီၣ်က့ၤလီၤကီခဲထီၣ်၀ဲအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ

အပူၤကွံာ်လၢညါန့ၣ်ပယီၤသုးဖီၣ်သိလ့ၣ်လၢအလံာ်လဲၢ်တအိၣ်ဘၣ်အံၤအါလၢဖၣ်အၣ်၀့ၢ်ပူၤလီၤဒီးဘၣ်ဆၣ် ခဲအံၤလၢကီးတရံးႇလူၢ်ပျဲၢ်ဒီးမၠၣ်၀တံၣ်ကီၢ်ဆၣ်တဖၣ်န့ၣ်စ့ၢ်ကီးအ၀ဲသ့ၣ်ဖီၣ်ဟံ၀ဲအရ့ဟဲအါထီၣ်အဃိ ကမျၢၢ်လၢအိၣ်ခိခိၣ်ဒူသ၀ီပူၤတဖၣ်တၢ်ကီတၢ်ခဲအိၣ်ထီၣ်လၢကလဲၤၦ့ၤပနံာ်တၢ်ဖိတၢ်လံၤလၢ၀့ၢ်ပူၤအဂ့ၢ်န့ၣ် ကီးတရံးကမျၢၢ်တဂၤ စံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“အ၀ဲသ့ၣ်သမံသမိး၀ဲသိလ့ၣ်လံာ်ႇၦၤနီသိလ့ၣ်ဖိကစၢ်ႉမ့တအိၣ်ဘၣ်န့ၣ်မ့ၢ်အ၀ဲသ့ၣ်အသ့ကွံာ်၀ဲဧါႇကဒိတၢ်၀ဲဧါန့ၣ်ယသ့ၣ်ညါတလီၤတံၢ်ဒံးဘၣ်ႉမ့အိၣ်လၢ၀့ၢ်ပူၤဟးထီၣ်ခီန့ၣ်အ၀ဲသ့ၣ်တသမံသမိး၀ဲအါအါဘၣ်ႉမ့အိၣ်လၢ(လဲၤ၀ၣ်)ဟဲက့ၤနုာ်လီၤလၢကီးတရံးန့ၣ်မၢၦၤကုၣ်ထီၣ်ဆဲးကဲးပိပူၤႇသိလ့ၣ်မတၤခဲလၢာ်လီၤႉမ့မ့ၢ်ခဲအံၤခီန့ၣ်တမ့ၢ်ဒ်န့ၣ်လၢာ်ဘၣ်သံကွၢ်၀ဲမ့ၢ်သိလ့ၣ်လံာ်လဲၢ်အိၣ်ဧါတအိၣ်ဧါဒ်န့ၣ်တထံၣ်ဃီလီၤႉယဲယသိလ့ၣ်န့ၣ်အကဲ၀ဲဒၣ်(Without)အဃိယလဲၤလၢ၀့ၢ်ပူၤတဘူၣ်လၢၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ

လီၢ်က၀ီၤကမျၢၢ်လၢအိၣ်ကညီကီၢ်စဲၣ်ဟီၣ်က၀ီၤပူၤတဖၣ်အါဒၣ်တက့ၢ်န့ၣ်အ၀ဲသ့ၣ်သူ၀ဲဒၣ်(Without)သိလ့ၣ်လၢအိၣ်ဟဲလၢမၠၣ်၀တံၣ်ကီၢ်ဆၢအံၤလီၤဒီးခီဖျိပယီၤသုးဟးဖီၣ်သိလ့ၣ်လၢအလံာ်လဲၢ်တအိၣ်ဘၣ်ဒ်အံၤဟဲအါထီၣ်အဃိ တၢ်ကီတၢ်ခဲအိၣ်လၢကလဲၤက့ၤဖံးမၤအီၣ်တၢ်အဂ့ၢ်န့ၣ် လီၢ်က၀ီၤကမျၢၢ်လၢအနီ(Without)သိလ့ၣ်တဂၤ စံး၀ဲန့ၣ်လီၤႉ

“လၢမၠၣ်၀တံၣ်ႇကီးတရံးနါက့နဘၣ်ဟးထီၣ်က့ၤလီၤလၢတၢ်ပလီၢ်ပဒီပူၤလီၤႉလၢဖၣ်အၣ်နါက့က့ၤတဘူၣ်ဘၣ်ႉနဘၣ်က့ၤတရံးကျဲလၢတန့ခၠါ–လူၢ်ပျဲၢ်တကပၤန့ၣ်မီၤနီၤႉ နမ့လဲၤလၢဖၣ်အၣ်တကပၤန့ၣ်အ၀ဲသ့ၣ်ခိးသမံသမိးဖီၣ်သိလ့ၣ်ႇ သ့ကွံာ်၀ဲဃ့အီၣ်လိး၀ဲႇကထၢနုာ်၀ဲလၢဃိာ်ပူၤအဃိလၢၦၤနီသိလ့ၣ်ဖိတဖၣ်အဂီၢ်န့ၣ်တဘၣ်ဂီၢ်ဘၣ်မီၤနီၤႉၦၤလၢအအိၣ်ဒီးလံာ်လဲၢ်တဖၣ်န့ၣ်ဒုကိညၢ်၀ဲႉၦၤလၢအသိလ့ၣ်လံာ်တအိၣ်ဘၣ်တဖၣ်န့ၣ်ဟးထီၣ်က့ၤလီၤဖံးအီၣ်မၤအီၣ်တဘၣ်ဂီၢ်လၢၤဘၣ်”အဂ့ၢ်န့ၣ် စံး၀ဲန့ၣ်လီၤႉ

အပူၤကွံာ်လၢညါန့ၣ်ပယီၤသုးခိးဖီၣ်သမံသမိးသိလ့ၣ်လၢလံာ်လဲၢ်တအိၣ်ဘၣ်သ့ၣ်တဖၣ်အံၤလၢကျဲဖးဒ့ကျဲကစူးလီၤ ဘၣ်ဆၣ်တကီၢ်ခါခဲအံၤအိၣ်ခိးဖီၣ်၀ဲပၢၢ်တုၤလၢကျဲမုၢ်ခိၣ်ႇက၀ီၤဒ့ပူၤႇၦၤဟံၣ်မဲာ်ညါညါအဂ့ၢ်န့ၣ် သ့ၣ်ညါဘၣ်န့ၣ်လီၤႉ

လၢန့ၣ်အမဲာ်ညါကညီကီၢ်စဲၣ်အပူၤ(Without)သိလ့ၣ်လၢအဟးထီၣ်က့ၤတဖၣ်တနီၤန့ၣ်အ၀ဲသ့ၣ်မၤဃာ်၀ဲဒီး ဖီၣ်စုက၀ဲၤကရူၢ်ကရၢအလံာ်အလဲၢ်အိၣ်၀ဲဘၣ်ဆၣ်တကီၢ်ခါခဲအံၤကရူၢ်ကရၢအလံာ်လဲၢ်တဖၣ်အံၤတၢ်အုၣ်ကီၤတအိၣ်၀ဲနီတမံၤလၢၤဘၣ်အဂ့ၢ်န့ၣ် ၦၤနီသိလ့ၣ်ဖိတဖၣ်စံး၀ဲန့ၣ်လီၤႉ

ခီဖျိပယီၤသုးဖီၣ်(Without)သိလ့ၣ်ဒ်အံၤအဃိဖၣ်အၣ်၀့ၢ်တကးဒံးဘၣ်အမဲာ်ညါလၢမၠၣ်၀တံၣ်ႇကီးတရံး၀့ၢ်ပူၤစ့ၢ်ကီး (Without)သိလ့ၣ်ဟးထီၣ်က့ၤလီၤတအိၣ်အါအါလၢၤဘၣ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ