လါယူၤ ၁၃ သီႇ ၂၀၂၃ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ကီၢ်သူလ့ၤတၢ်ပၢဟီၣ်က၀ီၤအပူၤ တလါအံၤလါယူၤတၢတနွံအတီၢ်ပူၤန့ၣ် သုးမီၤစိရိၤကဘီယူၤဟဲခးလီၤတၢ်အိၣ်၀ဲ(၃)ဘျီအဂ့ၢ်န့ၣ် ကီၢ်ပယီၤတၢ်မၤနီၣ်ၦၤဂ့ၢ်၀ီခွဲးယာ်ၦာ်ဘျးစဲ(ND-Burma) ထုးထီၣ်ပာ်ဖျါ၀ဲဖဲလါယူၤ ၈ သီအနံၤန့ၣ်လီၤႉ
ဖဲတလါအံၤလါယူၤ ၂ သီ ဂီၤခီအဆၢကတီၢ်န့ၣ် လၢခ့ၣ်အဲၣ်ယူၣ်(သုးက့ ၆) ဒူပျာ်ယာ်ကီၢ်ရ့ၣ် နိၣ်တကီကီၢ်ဆၣ်အပူၤ တၢ်ဒုးကဲထီၣ်၀ဲလၢတၢ်ပၢၢ်ဆၢသုးပာ်ဖှိၣ်ဒီးပယီၤသုးအဘၢၣ်စၢၤ၀ံၤလီၢ်ခံ သုးမီၤစိရိၤကဘီယူၤဟဲခးလီၤတၢ်တဘျီႇ ဒီးဖဲတၢ်တနံၤန့ၣ် ဂီၤခီအဆၢကတီၢ် ကဘီယူၤဟဲခးလီၤကဒီးတၢ်လၢ ကီးတရံးကီၢ်ဆၣ်(ဆံဖလား)သ၀ီ ကၠိကရၢၢ်ပူၤ တဘျီအဃိ ကၠိဟးဂီၤ၀ဲဒီးဟံၣ်ဟးဂီၤ၀ဲ(၄)ဖျၢၣ်အဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
ဖဲန့ၣ်၀ံၤလီၢ်ခံဖဲလါယူၤ ၆ သီအနံၤစ့ၢ်ကီးန့ၣ် ပယီၤသုးကလၢၤ(၅)ဖျၢၣ်လၢအိၣ်ခ့ၣ်အဲၣ်ယူၣ်(သုးက့ ၃) ချၢၣ်လွံၢ်ထူၣ်ကီၢ်ရ့ၣ် နၣ်သၤကွ့၀့ၢ်ကပၤအံၤတဖၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ် နုာ်လီၤခး၀ဲ၀ံၤလီၢ်ခံ သုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်တဘျီအဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
ခီဖျိသုးမီၤစိရိၤကဘီယူၤဟဲခးလီၤတၢ်အဃိတနွံအတီၢ်ပူၤန့ၣ်လၢကီၢ်သူလ့ၤဟီၣ်က၀ီၤအပူၤ လီၢ်က၀ီၤကမျၢၢ်သံဘၣ်ဒိဘၣ်ထံးဒီးဟံၣ်ဃီတၢ်သူၣ်ထီၣ်ဟးဂူာ်ဟးဂီၤအိၣ်၀ဲန့ၣ်လီၤႉဘၣ်ဃးတၢ်အိၣ်ခိးကွၢ်ထၢဖှိၣ်မၤနီၣ်မၤဃါသုးမီၤစိရိၤအတၢ်မၤကမၣ်ၦၤဂ့ၢ်၀ီခွဲးယာ်အတၢ်ပညိၣ်အံၤ (နွေဦးမော်ကွန်း) အၦၤနဲၣ်တၢ် စံး၀ဲဒ်အံၤ န့ၣ်လီၤႉ
အ၀ဲစံး၀ဲလၢ“ပအိၣ်ခိးကွၢ်မၤနီၣ်မၤဃါပယီၤသုးအတၢ်မၤကမၣ်ၦၤဂ့ၢ်၀ီခွဲးယာ်လၢ(အီၤလါ)ပူၤဒီးတၢ်ဂ့ၢ်တၢ်ကျိၤလၢအကဲထီၣ်သးတၢ်အုၣ်သးတဖၣ်အံၤပပာ်ဃာ်အီၤလၢတၢ်မၤနီၣ်မၤဃါလံာ်ပူၤမီၤနီၤႉဒ်သိးၦၤလၢအမၤကမၣ်တၢ်သ့ၣ်တဖၣ်အံၤကသ့ဟံမူဒါလၢၦၤဘၣ်တူၢ်ဘၣ်ကီၤတၢ်ဘၣ်ဖိတဖၣ်အံၤအဖီခိၣ်အဂီၢ်န့ၣ်ပထၢဖှိၣ်ဃာ်တၢ်ဂ့ၢ်တၢ်ကျိၤတဖၣ်လီၤ” အဂ့ၢ်န့ၣ် စံး၀ဲန့ၣ်လီၤႉ
ဒ်(ND-Burma)အတၢ်မၤနီၣ်မၤဃါပူၤအသိးန့ၣ်ဖဲအပူၤကွံာ်တနွံအတီၢ်ပူၤန့ၣ် ကီၢ်သူလ့ၤဟီၣ်က၀ီၤဃုာ်ဒီး ယိၤဒိၣ်ကီၢ်စဲၣ်အပူၤနၣ်သုးမီၤစိရိၤကဘီယူၤဟဲခးလီၤတၢ်အိၣ်၀ဲ(၂)ဘျီအသိး လၢ(စကဲ)ဒီးမါတလ့တကပၤန့ၣ်စ့ၢ်ကီး ပယီၤသုးဖီၣ်သူ၀ဲလီၢ်က၀ီၤကမျၢၢ်အဂၤ(၇၀)ဘျဲၣ်ဒ်တၢ်ဒီသဒၢစုက၀ဲၤ အသိး အဂ့ၢ်န့ၣ်ပာ်ဖျါ၀ဲန့ၣ်လီၤႉ
ဒ်န့ၣ်အသိးလၢ၀့ၢ်တကူၣ်ကီၢ်ခီဒိၣ် ထီတထူၣ်ကီၢ်ဆၣ်အပူၤစ့ၢ်ကီး သုးမီၤစိရိၤစုတီၤဖီလာ်(ပျူစောထီး)ဖီၣ်မၤသံ၀ဲ ၦၤပိာ်မုၣ်(၂)ဂၤအသိး လၢမါတလ့ကီၢ်ခီဒိၣ် စ့ၣ်ကူ၀့ၢ်ပူၤန့ၣ် ပယီၤသုးဒွဲၣ်အူအီၣ်၀ဲၦၤပိာ်မုၣ်(၁)ဂၤစ့ၢ်ကီးအဂ့ၢ်န့ၣ် (ND-Burma) လံာ်တၢ်ပာ်ဖျါအပူၤ စံး၀ဲန့ၣ်လီၤႉ
ဖဲအပူၤကွံာ်တနွံအတီၢ်ပူၤန့ၣ်ခီဖျိပယီၤသုးခးလီၤကျိဖးဒိၣ်ကျိဖိတပယူာ်ဃီအဃိ ကီၢ်ပယီၤဒီတဘ့ၣ်အပူၤ ကီၢ်စဲၣ်(၃)ဘ့ၣ်ဒီး ကီၢ်ခီဒိၣ်(၅)ဘ့ၣ်အပူၤန့ၣ် ကမျၢၢ်ထံဖိကီၢ်ဖိဃုာ်ဒီးၦၤဖိဒံဖိသၣ်သံ၀ဲ(၃)ဂၤဒီး ဘၣ်ဒိ၀ဲ(၁၈)ဂၤ အဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
