လါအီကူး ၁၅ သီႇ ၂၀၂၃ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၃)တၢ်ပၢဟီၣ်က၀ီၤ ချၢၣ်လွံၢ်ထူၣ်ကီၢ်ရ့ၣ် လၢၢ်ဒိၣ်ကီၢ်ဆၣ်အပူၤ ဖဲလါအီကူး ၁၃ သီ ဟါခီအဆၢကတီၢ် ခီဖျိပယီၤသုးခးလီၤကျိဖးဒိၣ်အဃိ ပဲသီၤသ၀ီပူၤ ဘၣ်သံ၀ဲၦၤဖိသၣ် အနံၣ်(၁၀)ဘျဲၣ် ၂ ဂၤဒီး ဘၣ်ဒိ၀ဲ(၂)ဂၤအဂ့ၢ်န့ၣ် လီၢ်က၀ီၤကမျၢၢ်စံး၀ဲအသိးသ့ၣ်ညါဘၣ်န့ၣ်လီၤႉ
ဖဲလါအီကူး ၁၃ သီ ဟါခီအဆၢကတီၢ် ခီဖျိပယီၤသုးခးလီၤကျိဖးဒိၣ်လၢတၢ်ဂ့ၢ်တအိၣ်နီတမံၤဘၣ် လီၤတဲာ်ပိၢ်ဖးထီၣ်လၢ (ပဲသီၤ)သ၀ီပူၤ ဟံၣ်တဖျၢၣ်လၢအမၤလိၦၤကၠိဖိအံၤအဃိ ၦၤဖိသၣ်လၢအဟဲမၤလိတၢ်(၂)ဂၤ သံ၀ဲတဘျီဃီအသိး ၦၤကၠိဖိအမိတဂၤဒီးၦၤဖိသၣ်လၢအဂၤတဂၤစ့ၢ်ကီးဘၣ်ဒိဘၣ်ထံး၀ဲအဂ့ၢ်န့ၣ် လၢၢ်ဒိၣ်ကမျၢၢ်တဂၤ စံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“ဒ်သိးၦၤဖိဒံဖိသၣ်တဖၣ်အံၤသုတယံၤထီၣ်ဒီးတၢ်မၤလိတဂ့ၤအဂီၢ်န့ၣ်ၦၤမၤလိန့ၢ်အ၀ဲသ့ၣ်လံာ်လၢ ကတီၢ်ဘၢၣ်စၢၤအံၤမီၤနီၤႉဖဲၦၤမၤလိလံာ်အခါကျိဖးဒိၣ်လီၤတဲာ်လၢဟံၣ်လၢအမၤလိၦၤဖိသၣ်လံာ်တဖျၢၣ်န့ၣ်အဖီခိၣ် မီၤနီၤႉၦၤဖိသၣ်ခံဂၤန့ၣ်သံတဘျီဃီဖဲန့ၣ်လီၤႉၦၤဖိသၣ်လၢအသံအမိဒီးၦၤဖိသၣ်လၢအဂၤတဂၤဘၣ်ဒိစ့ၢ်လီၤ”အဂ့ၢ်န့ၣ် စံး၀ဲန့ၣ်လီၤႉ
လၢ(ပဲသီၤ)သ၀ီပူၤအံၤန့ၣ်ၦၤကညီကလုာ်ဒီးၦၤပယီၤကလုာ်ဒူၣ်အိၣ်ဆိး၀ဲဒီးခီဖျိပယီၤသုးခးလီၤကျိဖးဒိၣ်အဃိ သ၀ီအံၤဃုာ်ဒီးသ၀ီလၢအိၣ်ထံကျိမုၢ်ထီၣ်တကပၤန့ၣ်လီၢ်က၀ီၤကမျၢၢ်တဖၣ်ဘၣ်သုးလီၢ်သုးကျဲအဃိ လၢတၢ်အိၣ်မူ တၢ်အိၣ်ဆၢထၢၣ်အဂီၢ်တၢ်အုၣ်ကီၤတအိၣ်၀ဲဘၣ်ဒီးတၢ်ဘံၣ်တၢ်ဘၢစ့ၢ်ကီးတအိၣ်၀ဲဘၣ်အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ် လီၤႉ
လီၢ်က၀ီၤပိာ်မုၣ်လၢအဂၤတဂၤစ့ၢ်ကီးစံး၀ဲလၢ“ဖဲမဂီၤန့ၣ်ကျိဖးဒိၣ်လီၤတဲာ်ဒံးလၢ(မဲၣ်မယါ)သ၀ီပူၤန့ၣ်ဒံးႉ ခးလီၤ၀ဲလၢ(ပဲသီၤ)သ၀ီတကပၤန့ၣ်၀ံၤခးလီၤကဒါ၀ဲလၢ(မဲၣ်မယါ)သ၀ီလၢဂီၤဂီၤသီသီမီၤနီၤႉ တသီခံသီအတီၢ်ပူၤ အံၤနါက့ ကဘီယူၤဟဲဆှၣ်တၢ်ဒီယုၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲမဟါလါအီကူး ၁၄ သီ အနံၤ န့ၣ်လီၤႉ
ဒ်န့ၣ်အသိးဖဲအပူၤကွံာ်လါယူၤလံအခါလၢ(ခ့ၣ်အဲၣ်ယူၣ်)ချၢၣ်လွံၢ်ထူၣ်ကီၢ်ရ့ၣ်အပူၤခီဖျိပယီၤသုးခးလီၤကျိဖးဒိၣ် ကအိၣ်လၢအဖျၢၣ်(၃၀၀)ဃၣ်ဃၣ်ညါအဃိလီၢ်က၀ီၤကမျၢၢ်ဘၣ်ဒိအဂၤ(၁၀)အကျါပၣ်ဃုာ်၀ဲၦၤကၠိဖိပိာ်ခွါ(၁၈)နံၣ် ဒီး (၁၂)နံၣ် ၂ ဂၤအသိး ခီဖျိပယီၤသုးဖီၣ်မၤသံ၀ဲအဃိ ကမျၢၢ်သံ၀ဲ(၅)ဂၤဒံးအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲ ဖဲလါအီကူး ၁၁ သီအနံၤ န့ၣ်လီၤႉ
လၢခ့ၣ်အဲၣ်ယူၣ်တၢ်ပၢဟီၣ်က၀ီၤတဖၣ်အပူၤပယီၤသုးကဘီယူၤဟဲခးလီၤတၢ်တကးဒံးဘၣ်လၢပျီပူၤစ့ၢ်ကီး တၢ်ဒုးကဲထီၣ်အဃိကၠိတၢ်သူၣ်ထီၣ်ႇဟံၣ်ဃီႇတၢ်ဘူၣ်တၢ်ဘါတၢ်သူၣ်ထီၣ်ဟးဂီၤ၀ဲအါမးဒီးခီဖျိၦၤဘၣ်ဃ့ၢ်မှံဟးဖျိးအဃိ ၦၤဖိဒံဖိသၣ်သ့ၣ်တဖၣ်အံၤတမၤလိဘၣ်တၢ်လၢၤဘၣ်အဂ့ၢ်န့ၣ် ကညီဂ့ၢ်၀ီခွဲးယာ်ကရူၢ်(KHRG) စံးဘၣ် ခ့ၣ်အဲးစံၣ်–ကညီတၢ်ကစီၣ်ဖဲလါအီကူး ၆ သီအနံၤ န့ၣ်လီၤႉ
