လါအီကူး ၂၅ သီႇ ၂၀၂၃ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၃)ဟီၣ်က၀ီၤ ချၢၣ်လွံၢ်ထူၣ်ကီၢ်ရ့ၣ် မူကီၢ်ဆၣ်အပူၤ ခီဖျိပယီၤ သုးနုာ်လီၤဒွဲၣ်အူအီၣ်သ၀ီပူၤၦၤဟံၣ်ၦၤဃီအဃိ(၃)နွံအတီၢ်ပူၤ ဟံၣ်အူအီၣ်ဟးဂီၤ၀ဲ(၁၂၁)ဖျၢၣ်အဂ့ၢ်န့ၣ် ခ့ၣ်အဲၣ်ယူၣ် လီၢ်ခၢၣ်သးထုးထီၣ်ပာ်ဖျါ၀ဲဖဲမဟါလါအီကူး ၂၄ သီအနံၤန့ၣ်လီၤႉ
ဖဲအပူၤကွံာ်တလါအံၤလါအီကူး ၉ သီ ဂီၤခီ ၅ နၣ်ရံၣ်ဃၣ်ဃၣ်အဆၢကတီၢ် လၢအီၣ်ကၠၤအ့သ၀ီကပၤ တၢ်ဒုးကဲထီၣ်၀ဲလၢ ပယီၤသုးခီၣ်ချ့သုးရ့ၣ်(ခမရ–၅)ဒီးကညီကလုာ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်(၈) စုတီၤဖီလာ် သုးပာ်ဖှိၣ် အဘၢၣ်စၢၤဒီးဖဲန့ၣ်၀ံၤလီၢ်ခံပယီၤသုးနုာ်လီၤဒွဲၣ်အူအီၣ်၀ဲ(အီၣ်ကၠၤအ့)သ၀ီပူၤဟံၣ်(၂၆)ဖျၢၣ် အဂ့ၢ်န့ၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ
ဖဲအပူၤကွံာ်လါယူၤလံ ၁၈ သီအခါစ့ၢ်ကီး ပယီၤသုးနုာ်လီၤ၀ဲလၢခ့ၣ်အဲၣ်ယူၣ်(သုးက့ ၃)မူကီၢ်ဆၣ်တၢ်ပၢဟီၣ်က၀ီၤ (နီၤကိ)သ၀ီပူၤဒီး ဖဲန့ၣ်ဒွဲၣ်အူအီၣ်ကွံာ်၀ဲကမျၢၢ်အဟံၣ်(၂၇)ဖျၢၣ်ႇဘုဖီ(၁၆)ဖျၢၣ်ႇဒဲ(၁၁)ဖျၢၣ်ဃုာ်ဒီး တၢ်လၢအဂုၤအဂၤ သ့ၣ်တဖၣ်အဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါပူၤအသိး သ့ၣ်ညါဘၣ်န့ၣ်လီၤႉ
ဒ်န့ၣ်အသိးဖဲအပူၤကွံာ်လါယူၤလံ ၁၉ သီအခါစ့ၢ်ကီး တၢ်ဒုးကဲထီၣ်၀ဲလၢပယီၤသုးခီၣ်သုးရ့ၣ်(ခလရ–၂၆၄), ခီၣ်ချ့သုးရ့ၣ်(ခမရ–၃၀၇),(ခမရ-၄၃၉),(ခမရ–၃၅၀),ဘၠူၣ်စီထံႇပၢၤကီၢ်သုးဒီး ကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA) သုးရ့ၣ်(၉)သုးပာ်ဖှိၣ်အဘၢၣ်စၢၤဒီးတၢ်ဒုးကဲထီၣ်၀ံၤလီၢ်ခံ ပယီၤသုအံၤ နုာ်လီၤဒွဲၣ်အူအီၣ်ကဒီး၀ဲ(နီၤကိ)သ၀ီပူၤ ဟံၣ်(၂၇)ဖျၢၣ်ဒီး (နၤစၣ်)သ၀ီ ဟံၣ်(၆၈)ဖျၢၣ်အဂ့ၢ်န့ၣ် ခ့ၣ်အဲၣ်ယူၣ် အလံာ်တၢ်ပာ်ဖျါအပူၤ ပာ်ဖျါ၀ဲန့ၣ် လီၤႉ
ပယီၤသုးနုာ်လီၤဒွဲၣ်အူအီၣ်ကမျၢၢ်အဟံၣ်အဃီအဃိဟံၣ်ဃီဟးဂီၤအနီၣ်ဂံၢ်စရီခီန့ၣ်တၢ်ပာ်ဖျါ၀ဲအိၣ်ဘၣ်ဆၣ် မ့မ့ၢ်လၢကမျၢၢ်လၢအဘၣ်ဃ့ၣ်မှံဟးဖျိးအနီၣ်ဂံၢ်ခီန့ၣ်တၢ်ပာ်ဖျါ၀ဲတအိၣ်ဘၣ်န့ၣ်လီၤႉ
