ဒူသထူၣ်ကီၢ်ရ့ၣ်ပူၤ တၢ်ပ၁်ပနီၣ်အ့ကၢၣ်(၃)ကထိဘျဲၣ်တၢ်လီၢ်တခါလၢပျဲပူၤတၢ်မံၤလ၁်ဆၣ်ဖိကီၢ်ဖိသ့ၣ်ၦၢ်

လါအီကူး ၂ သီႇ ၂၀၂၃ နံၣ်ႇ ခ့ၣ်အဲးစံၣ်

ဒ်သိးတၢ်ဒီသဒၢတၢ်ဂုၤထီၣ်ပသီထီၣ်တၢ်တိာ်ကျဲၤဖးဒိၣ်လၢအမၤဟးဂီၤန့ဆၢၣ်တၢ်အိၣ်ယၢၤတဖၣ်အံၤအဂီၢ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်အပူၤ သ့ၣ်ၦၢ်လၢအအ့ကၢၣ်အိၣ်(၃)ကထိဘျဲၣ်အံၤ တၢ်ဆၢတဲာ်ပာ်ပနီၣ်၀ဲလၢအမ့ၢ်ပျဲပူၤတၢ်မံၤလာ်ဆၣ်ဖိကီၢ်ဖိသ့ၣ်ၦၢ်အံၤဖဲအပူၤကွံာ်လါယူၤလံ ၂၈ သီ တၢ်ရဲၣ်တၢ်ကျဲၤပူၤ အဂ့ၢ်န့ၣ် သ့ၣ်ညါဘၣ်န့ၣ်လီၤႉ

တၢ်မံၤလာ်ဆၣ်ဖိကီၢ်ဖိသ့ၣ်ၦၢ်၀ဲအံၤတၢ်ပာ်ပနီၣ်၀ဲအမံၤလၢဒပျဲပူၤတၢ်မံၤလာ်ဆၣ်ဖိကီၢ်ဖိသ့ၣ်ၦၢ်ဒဒီးသ့ၣ်ၦၢ်အံၤ အိၣ်၀ဲဒၣ်လၢ(ခ့ၣ်အဲၣ်ယူၣ်)ကၠဲးထိၣ်ကီၢ်ဆၣ်ဒီးဘံလ့ကီၢ်ဆၣ်ဘၢၣ်စၢၤန့ၣ်လီၤႉဒီးတၢ်လီၢ်အံၤအလဲၢ်အထီအိၣ်၀ဲ(၃၃၆၀) အ့ကၢၣ်ဃၣ်ဃၣ်အဂ့ၢ်န့ၣ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ သ့ၣ်ၦၢ်၀ဲၤကျိၤ ထုးထီၣ်ပာ်ဖျါ၀ဲန့ၣ်လီၤႉ

လၢတၢ်ကဒီသဒၢက့ၤန့ဆၢၣ်တၢ်မူတ၀ၢသ့ၣ်တဖၣ်အံၤအဂီၢ်န့ၣ်(ခ့ၣ်အဲၣ်ယူၣ်)သ့ၣ်ၦၢ်၀ဲၤကျိၤအံၤအိၣ်ဃာ်ဒီးကျဲသနူအဃိ ဖဲအပူၤကွံာ်(၂၀၁၇)အခါ တၢ်စးထီၣ်မၤ၀ဲတၢ်ဃုသ့ၣ်ညါလၢဒူသထူၣ်ကီၢ်ရ့ၣ် ထံသိခံသ့ၣ်ၦၢ်ဟီၣ်က၀ီၤအပူၤ န့ၣ်လီၤႉလၢတၢ်ဃုသ့ၣ်ညါအံၤအဖီခိၣ်တၢ်ထံၣ်န့ၢ်၀ဲန့ဆၢၣ်တၢ်မူတ၀ၢတဖၣ်ဒ်အမ့ၢ်သ့ၣ်ၦၢ်၀ၣ်ၦၢ်ႇဆၣ်ဖိကီၢ်ဖိတၢ်မံၤလာ်သ့ၣ်တဖၣ်အဃိဒ်သိးတၢ်ကဒီသဒၢလီၤက့ၤခိၣ်ဃၢၤန့ဆၢၣ်တၢ်အိၣ်ယၢၤႇဆၣ်ဖိကီၢ်ဖိလၢအကၤဒီးအစၢၤဘူးကလီၤတူာ်သ့ၣ်တဖၣ်အံၤအဂီၢ်ဘၣ်တၢ်ကပာ်ပနီၣ်၀ဲဒ်အံၤလီၤအဂ့ၢ်န့ၣ် ခ့ၣ်အဲၣ်ယူၣ်သ့ၣ်ၦၢ်၀ဲၤကျိၤ လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ

ပျဲပူၤတၢ်မံၤလာ်ဆၣ်ဖိကီၢ်ဖိသ့ၣ်ၦၢ်အံၤအိၣ်၀ဲဒၣ်လၢ(ခ့ၣ်အဲၣ်ယူၣ်)တၢ်ပၢဟီၣ်က၀ီၤပူၤဒီးလၢပျဲပူၤတၢ်မံၤလာ်ဆၣ်ဖိ ကီၢ်ဖိသ့ၣ်တဖၣ်အကျါမ့ၢ်သ့ၣ်ၦၢ်တဘ့ၣ်လၢအအ့ရံယၢၣ်အံၣ်ကတၢၢ်တခါဒီး မ့ၢ်စ့ၢ်ကီးသ့ၣ်ၦၢ်တဘ့ၣ်လၢအိၣ် (ခ့ၣ်အဲၣ်ယူၣ်)ဒူသထူၣ်ကီၢ်ရ့ၣ်ပူၤအဂ့ၢ်န့ၣ် ခ့ၣ်အဲၣ်ယူၣ်သ့ၣ်ၦၢ်၀ဲၤကျိၤခိၣ် ပဒိၣ်မါဘးထိ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

အ၀ဲစံး၀ဲလၢ“တၢ်လၢသ့ၣ်ၦၢ်န့ၣ်ဒ်ဒိၣ်ဒ်လဲၢ်န့ၣ်ဂ့ၤလၢတၢ်မံၤလာ်ဆၣ်ဖိကီၢ်ဖိအဂီၢ်လီၤႉမ့ဘၣ်တဲလၢကီၢ်ရ့ၣ်ပူၤအံၤ သ့ၣ်ၦၢ်၀ဲအံၤအဆံးကတၢၢ်လီၤႉခီဖျိဟီၣ်က၀ီၤတၢ်အိၣ်သးအဃိသ့ၣ်ၦၢ်တဖၣ်အံၤၦၤတ့ထီၣ်ဟံၣ်တ့ထီၣ်ဃီႇကဲထီၣ်က့ၤတၢ်ဖံးအီၣ်မၤအီၣ်ကျီးႇရီဘၢၣ်ကျီးမီၤနီၤႉခီဖျိတၢ်အိၣ်သးတဖၣ်အဃိအ၀ဲသ့ၣ်ပာ်ပနီၣ်၀ဲန့ၢ်ခဲအံၤလီၤအဃိ အလဲၢ်အထီ လီၤစှၤ ၀ဲမီၤနီၤႉတၢ်ပာ်ပနီၣ်ပျဲပူၤတၢ်မံၤလာ်ဆၣ်ဖိကီၢ်ဖိသ့ၣ်ၦၢ်ဒ်အံၤအဘျုးအိၣ်၀ဲလၢကီၢ်သူလ့ၤ ဟီၣ်က၀ီၤအဂီၢ်မီၤနီၤ”အဂ့ၢ်န့ၣ် စံး၀ဲန့ၣ်လီၤႉ

လၢခ့ၣ်အဲၣ်ယူၣ်တၢ်ပၢဟီၣ်က၀ီၤတဖၣ်အပူၤပျဲပူၤဆၣ်ဖိကီၢ်ဖိသ့ၣ်ၦၢ်လၢအဒိၣ်အလဲၢ်အါကတၢၢ်န့ၣ်အိၣ်၀ဲဒၣ်လၢ ခ့ၣ်အဲၣ်ယူၣ် ဘျံးဒ၀ဲၢ်ကီၢ်ရ့ၣ် ကစၢၢ်ဒိၣ်ကီၢ်ဆၣ်ပူၤဒီးအအ့ရံယၢၣ်အဒိၣ်အလဲၢ်အိၣ်၀ဲ(၁၃၀၀၀၀)ဒီး ပျဲပူၤတၢ်မံၤလာ် ဆၣ်ဖိကီၢ်ဖိသ့ၣ်ၦၢ်လၢအအ့ရံယၢၣ်အဒိၣ်ခံခါတခါန့ၣ်မ့ၢ်၀ဲ ဒူပျာ်ယာ်ကီၢ်ရ့ၣ် မဲၢ်ကသး သ့ၣ်ၦၢ်ဒီး အအ့ရံယၢၢ်အဒိၣ်အလဲၢ် အိၣ်၀ဲ(၁)ကလီၢ်ခိၣ်ဃၢၤအဂ့ၢ်န့ၣ် ခ့ၣ်အဲၣ်ယူၣ် သ့ၣ်ၦၢ် တၢ်မၤနီၣ်စရီအသိး သ့ၣ်ညါဘၣ်န့ၣ် လီၤႉ

ပျဲပူၤတၢ်မံၤလာ်ဆၣ်ဖိကီၢ်ဖိသ့ၣ်ၦၢ်လၢတၢ်ပာ်ပနီၣ်လီၤ၀ဲခဲအံၤန့ၣ်ကီၢ်ရ့ၣ်အပတီၢ်ပာ်ပနီၣ်၀ဲဒံးလီၤအဃိ တၢ်ကဘၣ်တီၣ်ဖျါထီၣ်အီၤလၢလီၢ်ခၢၣ်သးဒံးဒီး(လီၢ်ခၢၣ်သး)ကဘၣ်ပာ်ဂၢၢ်ပာ်ကျၢၤပာ်ပနီၣ်ဒံး၀ဲအဂ့ၢ်န့ၣ် သ့ၣ်ၦၢ်၀ဲၤကျိၤခိၣ် ပဒိၣ်မါဘးထိ စံး၀ဲန့ၣ်လီၤႉ

လၢကကဲထီၣ်ပျဲပူၤတၢ်မံၤလာ်ဆၣ်ဖိကီၢ်ဖိသ့ၣ်ၦၢ်အံၤအဂီၢ်န့ၣ် ခ့ၣ်အဲၣ်ယူၣ်သ့ၣ်ၦၢ်၀ဲၤကျိၤႇကညီခိၣ်ဃၢၤန့ဆၢၣ်ဒီး ၦာ်ဟူးဂဲၤၦာ်ဘျးစဲ(KESAN)ႇဒူသထူၣ်ကီၢ်ရ့ၣ်ၦၤဘၣ်မူဘၣ်ဒါႇဒူသ၀ီခိၣ်နၢ်ဒီးကမျၢၢ်တဖၣ်ပာ်ဖှိၣ်ထီၣ်သးမၤ၀ဲတၢ်ဃုသ့ၣ်ညါအံၤန့ၣ်လီၤႉလၢသ့ၣ်ၦၢ်၀ဲအံၤအပူၤန့ၣ်ခိၣ်ဃၢၤန့ဆၢၣ်တၢ်အိၣ်ယၢၤႇဆၣ်ဖိကီၢ်ဖိလၢအကၤဒီးအစၢၤဘူးကလီၤတူာ်သ့ၣ်တဖၣ်လၢအမ့ၢ်တၤဘီနၢၤႇခ့ကၠံၣ်ပိၣ်ႇခ့ဘှ့ဒီးတၢ်မံၤလာ်ဆၣ်ဖိကီၢ်ဖိလၢအဂၤသ့ၣ်တဖၣ်အိၣ်၀ဲဒီးတၢ်မံၤလာ်ဆၣ်ဖိကီၢ်ဖိအိၣ်၀ဲခဲလၢာ်အကလုာ်(၂၀)အဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ

ထံသီခံပျဲပူၤတၢ်မံၤလာ်ဆၣ်ဖိကီၢ်ဖိသ့ၣ်ၦၢ်ဟီၣ်က၀ီၤအခိၣ်အဃၢၤန့ၣ်ဒူသ၀ီပာ်ဖှိၣ်ခဲလၢာ်အိၣ်၀ဲအဖျၢၣ်(၁၀)ဒီး တချုးတၢ်တပာ်ပနီၣ်ပျဲပူၤတၢ်မံၤလာ်သ့ၣ်ၦၢ်ဒံးဘၣ်အခါန့ၣ်တၢ်ဃုသ့ၣ်ညါမၤနီၣ်မၤဃါလီၢ်က၀ီၤအတၢ်လုၢ်အီၣ်နီၢ်ခိသး သမူႇလီၢ်က၀ီၤမုၢ်ကျိၤ၀ဲၤကွာ်ႇတၢ်အိၣ်ဆူၣ်အိၣ်ချ့ႇတၢ်ကူၣ်ဘၣ်ကူၣ်သ့ဒီးတၢ်တၢၣ်ပီၣ်တဲသကိးဘၣ်ထွဲတၢ်သိၣ် တၢ်သီတၢ်ဘျၢလၢလီၢ်က၀ီၤဖိတဖၣ်အဂီၢ်လၢတၢ်သူန့ဆၢၣ်တၢ်အိၣ်ယၢၤဖဲထံသိခံၦၢ်ဟီၣ်က၀ီၤပူၤတဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ကီၢ်ရ့ၣ်(၇)ဘ့ၣ်အပူၤ တၢ်မံၤလာ်ဆၣ်ဖိကီၢ်ဖိအဟီၣ်က၀ီၤပျံၤကွီၤ အိၣ်၀ဲ(၁၅)ဘ့ၣ်ဒီး သ့ၣ်ၦၢ်ပျံၤကွီၤအိၣ်၀ဲခဲလၢာ်အဘ့ၣ်(၈၀)အဂ့ၢ်န့ၣ် သ့ၣ်ၦၢ်၀ဲၤကျိၤအတၢ်မၤနီၣ်အသိး သ့ၣ်ညါဘၣ် န့ၣ်လီၤႉ