လါစဲးပထ့ဘၢၣ် ၁ သီႇ ၂၀၂၃ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၃)တၢ်ပၢဟီၣ်က၀ီၤ ချၢၣ်လွံၢ်ထူၣ်ကီၢ်ရ့ၣ် ဆီထံးကီၢ်ဆၣ် ပၠ့ၤယ့ၤကၠံသ၀ီပူၤ ဖဲလါအပူၤကွံာ်လါအီကူး ၂၉ သီအနံၤ ခီဖျိပယီၤသုးခးလီၤကျိဖးဒိၣ်လီၤတဲာ်ပိၢ်ဖးထီၣ်လၢဟံၣ်တဖျၢၣ် အခိၣ်အဃိ ၦၤဒီဖိမိၢ်(၂)ဂၤသံ၀ဲဒီးဟံၣ်ဖိဃီဖိဒူၣ်ထၢပူၤဘၣ်ဒိ၀ဲ(၃)ဂၤအဂ့ၢ်န့ၣ် သ့ၣ်ညါဘၣ်လၢ ဟီၣ်က၀ီၤဂံၢ်ခီၣ်ထံး တၢ်ကစီၣ် အအိၣ်န့ၣ်လီၤႉ
ပယီၤသုးခီၣ်သုးရ့ၣ်(ခလရ–၂၆၄)လၢအိၣ်ဆီလီၤသးဖဲ(ပ့ၤစလိၣ်)သ၀ီပူၤတဖၣ်အံၤ ခီဖျိအ၀ဲသ့ၣ်ခးလီၤ(၁၂၀ မမ) ကျိဖးဒိၣ် ၃ ဘျီညါအဃိ ၦၤဖိသၣ်မုၣ်ဖိ(၇)နံၣ်တဂၤဒီးအမိသံ၀ဲဒၣ်ဒီးအဟံၣ်ဖိဃီဖိဒူၣ်ထၢပူၤလၢအဂၤစ့ၢ်ကီးဘၣ်ဒိ ဘၣ်ထံး၀ဲအဂ့ၢ်န့ၣ် ခ့ၣ်အဲၣ်ယူၣ်–လီၢ်ခၢၣ်သးထုးထီၣ်ပာ်ဖျါ၀ဲဖဲလါအီကူး ၃၀ သီအနံၤန့ၣ်လီၤႉ
“ကျိဖးဒိၣ်န့ၣ်လီၤတဲာ်၀ဲလၢၦၤဟံၣ်တဖျၢၣ်န့ၣ်အခိၣ်ႇဟံၣ်တဖျၢၣ်န့ၣ်အဟံၣ်ဖိဃီဖိအိၣ်ခဲလၢာ်(၅)ဂၤႉမ့မ့ၢ်လၢၦၤဖိသၣ်ပိာ်မုၣ်တဂၤခီန့ၣ်ဘၣ်၀ဲဒၣ်အခိၣ်သံတဘျီဃီဖဲန့ၣ်လီၤႉမ့မ့ၢ်လၢအမိခီန့ၣ်ဘၣ်၀ဲဒၣ်အယီၢ်ဒ့ႇအလဲၤတုၤလၢတၢ်ဆါဟံၣ်မးအသံမီၤနီၤႉပယီၤသုးန့ၣ်ကွၢ်လၢအအဲၣ်ဒိးခးလီၤ၀ဲန့ၣ်ခးလီၤ၀ဲကိးမုၢ်နံၤဒဲးလီၤႉတၢ်ဒုးနါက့ကဲထီၣ်မၢ်မၢ်လီၤႉ ခဲအံၤ(ပၠ့ၤယ့ၤကၠံ)သ၀ီဖိတဖၣ်န့ၣ်တအိၣ်လၢသ၀ီပူၤလၢၤဘၣ်စံၣ်လၢာ်လံ”အဂ့ၢ်န့ၣ် ဆီထံး၀့ၢ် ကမျၢၢ်ပိာ်မုၣ်တဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲလါအီကူး ၃၀ သီ အနံၤန့ၣ်လီၤႉ
တကးဒံးဘၣ်အမဲာ်ညါခီဖျိကျိဖးဒိၣ်အဃိ(ပၠ့ၤယ့ၤကၠံ)သ၀ီပူၤကမျၢၢ်အဟံၣ်ဟးဂီၤ၀ဲ(၅)ဖျၢၣ်အဂ့ၢ်န့ၣ် ခ့ၣ်အဲၣ်ယူၣ် လံာ်တၢ်ပာ်ဖျါပူၤအသိး သ့ၣ်ညါဘၣ်န့ၣ်လီၤႉ
ဒ်န့ၣ်အသိးဖဲအပူၤကွံာ်လါအီကူး ၂၈ သီ ဂီၤခီအဆၢကတီၢ်စ့ၢ်ကီး ခီဖျိပယီၤသုး(ခလရ–၂၆၄)အံၤ ခးလီၤကျိဖးဒိၣ်ဆူ ဆီထံးကီၢ်ဆၣ် ခၠိၤအ့သ၀ီႇ၀ဲၣ်ခၠဲသ၀ီႇယ့ၤတွ့ကိသ၀ီႇကၠီကိသ၀ီပူၤကအိၣ်လၢအဘျီ(၁၀)ဃၣ်ဃၣ် ညါအဃိ ယ့ၤတွ့ကိသ၀ီပူၤ ဟံၣ်ဟးဂီၤ၀ဲ(၁)ဖျၢၣ်ဒံးအဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါပူၤပာ်ဖျါ၀ဲန့ၣ်လီၤႉ
ဒ်န့ၣ်အသိးလၢခ့ၣ်အဲၣ်ယူၣ်တၢ်ပၢဟီၣ်က၀ီၤ မူကီၢ်ဆၣ်အပူၤ ဖဲလါအီကူး ၂၉ သီဟါခီအဆၢကတီၢ် ခီဖျိပယီၤသုး ခးလီၤကျိဖးဒိၣ်ဆူ(လဲၣ်တၣ်ကၠံ)သ၀ီပူၤအဃိ ၦၤပိာ်ခွါ(၂၇)နံၣ်တဂၤဘၣ်ဒိဒံး၀ဲအဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါပူၤ ပာ်ဖျါ၀ဲန့ၣ်လီၤႉ
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤ ချၢၣ်လွံၢ်ထူၣ်ကီၢ်ရ့ၣ် ကီၢ်ဆၣ်(၃)ဘ့ၣ်လၢာ်အပူၤ ခီဖျိပယီၤသုးကျိၤနုာ်လီၤတၢ်ဒုးကဲထီၣ်တလီၢ်လီၢ်ဒီးကဘီယူၤဟဲခးလီၤတၢ်ႇပယီၤသုးခးလီၤကျိဖးဒိၣ်,ဖီၣ်မၤသံကမျၢၢ် ထံဖိကီၢ်ဖိအဃိလီၢ်က၀ီၤကမျၢၢ်လၢကအလီၢ်ဘၣ်ဃ့ၢ်မှံဟးဖျိး၀ဲအဂ့ၢ်န့ၣ် ကညီၦၤဂ့ၢ်၀ီတၢ်ကရၢကရိလၢအမၤစၢၤ ၦၤဃ့ၣ်မှံဟးဖျိးတဖၣ်စံး၀ဲန့ၣ်လီၤႉ
