သုးကီၣ်ကးဒီး(TNLA)တၢ်ဒုးအပူၤ ၦၤပိ၁်မုၣ်ႇၦၤဖိသၣ်ဘၣ်ဒိဘၣ်ထံးအိၣ်အဂ့ၢ် ယိၤဒိၣ်ဂ့ၢ်၀ီခွဲးယ၁်ကရူၢ်စံး၀ဲ

လါစဲးပထ့ဘၢၣ် ၂၉ သီႇ ၂၀၂၃ နံၣ်ႇ ခ့ၣ်အဲးစံၣ်

လၢယိၤဒိၣ်ကီၢ်စဲၣ်ကလံၤစိး မူၤစဲၤကီၢ်ဆၣ်အပူၤ တၢ်ဒုးကဲထီၣ်လၢသုးကီၣ်ကးဒီးပလီၣ်ဒီကလုာ်တၢ်ထူၣ်ဖျဲးသုးမုၢ်ဒိၣ် (TNLA)အဘၢၣ်စၢၤအခါန့ၣ် ခီဖျိပယီၤသုးခးလီၤကျိဖးဒိၣ်ႇကဘီယူၤဟဲခးလီၤတၢ်အဃိ ကမျၢၢ်ၦၤပိာ်မုၣ်(၃)ဂၤဒီး ၦၤဖိသၣ်မုၣ်(၁)ဘၣ်ဒိ၀ဲဒၣ်အဂ့ၢ်န့ၣ် ယိၤဒိၣ်ဂ့ၢ်၀ီခွဲးယာ်ကရူၢ်(SHRF)ထုးထီၣ်ပာ်ဖျါ တၢ်ကစီၣ် ဖဲမဟါလါစဲးပထ့ဘၢၣ် ၂၈ သီ အနံၤန့ၣ်လီၤႉ

စးထီၣ်ဖဲအပူၤကွံာ်လါစဲးပထ့ဘၢၣ် ၂၀ သီ တုၤလၢလါစဲးပထ့ဘၢၣ် ၂၅ သီ တၢ်ဒုးကဲထီၣ်လၢ(၆)သီအတီၢ်ပူၤ ခီဖျိပယီၤသုးခးလီၤကျိဖးဒိၣ်ႇကဘီယူၤဟဲခးလီၤစၢၤတၢ်အဃိၦၤမုၢ်ၦၢ်အနံၣ်(၄၀)တဂၤဘၣ်၀ဲဒၣ်အခီၣ်ကံၣ်ဒုၣ်ဒီး နါလ့(၅၀)နံၣ်ႇနါစွဲၣ်ဒီးနါအံၤ(၁၇)နံၣ်သ့ၣ်တဖၣ်အံၤဘၣ်ဒိဘၣ်ထံး၀ဲအဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ

လံာ်တၢ်ပာ်ဖျါ ၦၤကတိၤတၢ်ပၢ Ying Leng Harn စံး၀ဲလၢ“သုးကီၣ်ကးလုၢ်သ့ၣ်ခါပတာ်မၤကမၣ်ၦၤဂ့ၢ်၀ီခွဲးယာ် ဒ်အံၤ အိၣ်ဃာ်လၢညါခါလံၤလံၤလံႉခဲအံၤနါက့အိၣ်လီၤႉဘၣ်ဆၣ်သုးဟံးန့ၢ်တၢ်စိတၢ်ကမီၤ၀ံၤလီၢ်ခံလၢပဟီၣ်က၀ီၤပူၤအံၤတၢ်ဒုးကဲထီၣ်တအိၣ်ဘၣ်ဘၣ်ဆၣ်ပထံၣ်လၢအ၀ဲသ့ၣ်ခးလီၤကျိဖးဒိၣ်ဟဲအါထီၣ်မီၤနီၤႉသုးကီၣ်ကးပညိၣ်ကမျၢၢ်ထံဖိကီၢ်ဖိဒီးအတၢ်မၤကမၣ်ဒုးယၤကွီၢ်မ့ၣ်တဖၣ်န့ၣ်ပမၤနီၣ်မၤဃါအီၤခဲလၢာ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ

လၢန့ၣ်အမဲာ်ညါကလုာ်ဒူၣ်ဖီၣ်စုက၀ဲၤကရူၢ်ကရၢလၢအိၣ်ဟီၣ်က၀ီၤကိးဘ့ၣ်ဒဲးအပူၤတဖၣ် လၢသုးမီၤစိရိၤစုတီၤအဖီလာ် တသ့ဖဲအသ့ကဒီသဒၢၦၤဃ့ၢ်မှံဟးဖျိးကမျၢၢ်ထံဖိကီၢ်ဖိတဖၣ်အဂ့ၢ်န့ၣ် အ၀ဲစံးအါထီၣ်၀ဲန့ၣ်လီၤႉ

မူၤစဲၤ၀့ၢ်တကးဘၣ်လၢန့ၣ်အမဲာ်ညါ ပယီၤသုးတြိၤ(၉၉)လၢအနီၣ်ဂံၢ်ကအိၣ်အဂၤ(၄၀)လၢအိၣ်ဆီလီၤသးဖဲ (ဘဲၣ်စါစၤတီၤ)ဒီး(ခူ၀့ၤ)သ၀ီပူၤတဖၣ်အံၤဒီး မၠိၣ်မၣ် ဂၢၤကီၢ်သုးႇ ကီခါ ဂၢၤကီၢ်သုးႇ ပ့စၤ ဂၢၤကီၢ်သုးတဖၣ် ပာ်ဖှိၣ်ထီၣ်သး ကအိၣ်လၢအဂၤ(၁၀၀)ဃၣ်ဃၣ်အံၤ ထီၣ်ဒုး၀ဲ(TNLA)ကရူၢ်လၢအိၣ်ဆီလီၤသးဖဲ(စဲၤလၣ်)သ၀ီမုၢ်ထီၣ် (လွဲၤတ့မ့)အံၤ အဃိ ဖဲန့ၣ်ခံခီခံကပၤတၢ်ဒုးဆူၣ်ထီၣ်၀ဲဒီးတုၤလၢခဲအံၤတစုတၢ်ဒုးဆဲးကဲထီၣ်ဒံး၀ဲအဖၢမုၢ်န့ၣ်လီၤႉ

ခီဖျိခံခီခံကပၤတၢ်ဒုးကဲထီၣ်အဃိ မူၤစဲၤ၀့ၢ် နၣ်မ်ကၣ်သ၀ီကရူၢ်ႇစဲၤလၣ်သ၀ီကရူၢ်ဒီး ၀့နါသ၀ီ လီၢ်က၀ီၤကမျၢၢ် အဂၤ(၇၀၀)ဃၣ်ဃၣ် လဲၤဃ့ၢ်အိၣ်၀ဲလၢ မူၤစဲၤ၀့ၢ် နၣ်မ်စၣ်သ၀ီ တၢ်အိၣ်ဘှံးလီၢ်(စယၣ်), မၤန့ၤသ၀ီ တၢ်အိၣ်ဘှံးလီၢ် (စယၣ်), ပၤခါသ၀ီ သီခါဖၠၣ်ႇ နၣ်မ်ခါ၀့ၢ် ကီတၣ်က၀ီၤဒ့ သီခါဖၠၣ်တဖၣ်အပူၤဒီး ၦၤသ့ၣ်တဖၣ်အံၤလိၣ်ဘၣ်၀ဲ တၢ်အီၣ်တၢ်အီတၢ်ဆီၣ်ထွဲမၤစၢၤအဂ့ၢ်န့ၣ် ယိၤဒိၣ်ဂ့ၢ်၀ီခွဲးယာ်ကရူၢ် စံး၀ဲန့ၣ်လီၤႉ

ဒ်န့ၣ်အသိးဖဲအပူၤကွံာ်လါစဲးပထ့ဘၢၣ် ၂၅ သီ မုၢ်နၤခီ ၁၀း၃၀ ဃၣ်ဃၣ်အဆၢကတီၢ်န့ၣ်စ့ၢ်ကီး သုးကီၣ်ကးနၢ်ဟူ တၢ်ကစီၣ်လၢ(TNLA)ကရူၢ်အိၣ်လၢမူၤစဲၤ၀့ၢ် မီၤတီသ၀ီကရူၢ် မၣ်ဟၤသ၀ီပူၤအဃိ ကဘီယူၤဟဲခးလီၤတၢ်ကအိၣ်လၢ အဘျီ(၁၀)ဃၣ်ဃၣ်ညါအဃိ ကမျၢၢ်ဟံၣ်ဟးဂီၤကအိၣ်လၢ(၅)ဖျၢၣ်ဃၣ်ဃၣ်ညါ အဂ့ၢ်န့ၣ် SHRF လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ