ခီဖျိ(KTV)ဒီးတၢ်တၤကျိၣ်တၤစ့လီၢ်အိၣ်လၢဒံၤမီၣ်စိၤၦၤလီၢ်အိၣ်ကဒုလီၢ်ကပၤအဃိ ကမျၢၢ်ၦၤဃ့ၢ်မှံဟးဖျိးတဖၣ် ဘၣ်ကိၢ်ဘၣ်ဂီၤတၢ်

လါအီးကထိဘၢၣ် ၃၁ သီႇ ၂၀၂၃ နံၣ်ႇ ခ့ၣ်အဲးစံၣ်

လၢကရ့ၣ်နံၣ်ကီၢ်စဲၣ် ဒံၤမီၣ်စိၤကီၢ်ဆၣ်မုၢ်နုာ် ၦၤလီၢ်အိၣ်ကမှံလီၢ်ကပၤန့ၣ် ခီဖျိၦၤအိးထီၣ်(KTV)ဒီး တၢ်ဂဲၤလိာ်ကွဲတၢ်တၤ ကျိၣ်တၤစ့လီၢ်ဟဲအါထီၣ်အဃိ ကမျၢၢ်ၦၤဃ့ၢ်မှံဟးဖျိးတဖၣ်ဘၣ်ယိၣ်၀ဲလၢၦၤတဟဲမၤစၢၤ အ၀ဲသ့ၣ်လၢၤဘၣ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်တဖၣ်အအိၣ်န့ၣ်လီၤႉ

လၢကရ့ၣ်နံၣ်ကီၢ်စဲၣ်အပူၤ သုးဟံးန့ၢ်တၢ်စိတၢ်ကမီၤ၀ံၤလီၢ်ခံတၢ်ဒုးကဲထီၣ်၀ဲလၢခံခီခံကပၤအဘၢၣ်စၢၤအဃိ အါဒၣ်တက့ၢ်ၦၤကမျၢၢ်တဖၣ်ဘၣ်လဲၤစံၣ်အိၣ်၀ဲလၢဒံၤမီၣ်စိၤကီၢ်ဆၣ်မုၢ်နုာ် ခိခိၣ်ၦၢ်လၢ်ကျါဒီးဒ်န့ၣ်အသိး ဟီၣ်က၀ီၤဖဲန့ၣ်အပူၤခီဖျိပယီၤသုးခးလီၤကျိဖးဒိၣ်တလီၢ်လီၢ်အဃိ ကမျၢၢ်အဟံၣ်အဃီဟးဂူာ်ဟးဂီၤအိၣ်၀ဲဒၣ် န့ၣ်လီၤႉ

တၢ်တၤကျိၣ်တၤစ့လီၢ်ဒီး(KTV)သ့ၣ်တဖၣ်အံၤသုးဟံးန့ၢ်တၢ်စိတၢ်ကမီၤကန့ၢ်တနံၣ်အတီၢ်ပူၤအခါအိၣ်ထဲစှၤကိာ်ဖိဒံးလီၤဒီးဘၣ်ဆၣ်စးထီၣ်ဖဲအပူၤကွံာ်စှၤလါအခါန့ၣ်တၢ်တၤကျိၣ်တၤစ့လီၢ်သ့ၣ်တဖၣ်အံၤဟဲအါထီၣ်၀ဲဒၣ်န့ၣ်လီၤႉ ခီဖျိတၢ်လီၢ်အံၤ အိၣ်ဘူး၀ဲဒီးၦၤလီၢ်အိၣ်ကမှံတၢ်လီၢ်အဃိဘၣ်ယိၣ်လၢၦၤဟဲဆီၣ်ထွဲမၤစၢၤတၢ်လၢဒံၤမီၣ်စိၤမုၢ်နုာ်တကပၤအံၤ တအိၣ်လၢၤဘၣ် အဂ့ၢ်န့ၣ် လီၢ်က၀ီၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ

ၦၤဃ့ၢ်မှံဟးဖျိးပိာ်မုၣ်တဂၤစံး၀ဲလၢ“(ဘံၣ်လံၣ်ယဲၣ်)ခူၣ်ႇၦၤဒိဖဲလီၢ်(ဖဲ၀ဲ)တၢ်တၤကိၣ်တၤစ့ဟဲအါထီၣ်ႉပထံၣ်ဘၣ်လၢ ၦၤလီၢ်အိၣ်ကမှံလီၢ်ကပိၤကပၤအံၤၦၤအိးထီၣ်(KTV)အဃိပဘၣ်ယိၣ်လၢၦၤဟဲဆီၣ်ထွဲမၤစၢၤၦၤတအိၣ်ဘၣ်မီၤနီၤႉ ၦၤလဲၤဂဲၤလိာ်ကွဲဖဲန့ၣ်သ့ၣ်တဖၣ်န့ၣ်တမ့ၢ်ၦၤဃ့ၢ်မှံဟးဖျိးဖိတဖၣ်ဘၣ်ႉၦၤဃ့ၢ်မှံဟးဖျိးအိၣ်ဖဲအံၤတဖၣ်ကနဲကအီၣ်ဘၣ်မ့ၤအဂီၢ်န့ၣ်ဖးနးလံႉသုးဟံးန့ၢ်တၢ်စိတၢ်ကမီၤကန့ၢ်တနံၣ်ဒံးအခါန့ၣ်တၢ်တၤကျိၣ်တၤစ့လီၢ်တအိၣ်ထဲထဲအံၤညါဘၣ်ႇဖဲတၢ်ခံလါသၢလါအတီၢ်ပူၤအံၤဟဲနးဒိၣ်ထီၣ်မီၤနီၤ”အဂ့ၢ်န့ၣ် စံး၀ဲန့ၣ်လီၤႉ

ဘၣ်ဃးတၢ်တၤကျိၣ်တၤစ့လီၢ်ဒီး(KTV)တဖၣ်အံၤမ့ၢ်မတဂၤႇမ့ၢ်မနုၤတၢ်ကရၢကရိဟံမူဒါအိးထီၣ်၀ဲလဲၣ်န့ၣ် တၢ်တသ့ၣ်ညါ၀ဲဘၣ်ဒီးဘၣ်ဆၣ်တၢ်အိးထီၣ်၀ဲဒၣ်တၢ်တၤကျိၣ်တၤစ့လီၢ်သ့ၣ်တဖၣ်အံၤလၢကျိဖးဒိၣ်လီၤတဲာ် တအိၣ်ဘၣ်အလီၢ်လၢကစၢၢ်ကစူးအဂ့ၢ်န့ၣ် လီၢ်က၀ီၤကမျၢၢ်စံး၀ဲအသိးသ့ၣ်ညါဘၣ်န့ၣ်လီၤႉ

လီၢ်က၀ီၤကမျၢၢ်တဂၤစံး၀ဲလၢ“တၢ်တၤကျိၣ်တၤစ့လီၢ်န့ၣ်တမ့ၢ်အ၀ဲသ့ၣ်မၤ၀ဲဖျါဖျါဘၣ်ႉမ့မ့ၢ်လၢ(KTV)န့ၣ် အိၣ်ဖဲ ၦၤလီၢ်အိၣ်ကမှံလီၢ်ကပၤအံၤ(၂)ခါညါႉတၢ်က့ၣ်နၢ်စ့ၢ်ကီးအိၣ်အသိးတဘျီတခီၣ်န့ၣ်သိလ့ၣ်ဟဲဖဲ(KTV)တဖၣ်အံၤ တပာ်သိလ့ၣ်လၢကျဲကပၤမူၤမူၤနီၢ်နီၢ်ဘၣ်ဘျီဟးထီၣ်လ့ၢ်လိၤတမုာ်ဘၣ်ႉမ့မ့ၢ်ၦၤလီၢ်အိၣ်ကဒုကမံးတံာ်ခီန့ၣ် အဟးကျးထီၣ်လံာ်ႇဆှၢလံာ်လၢမုၢ်နၤခီန့ၣ်ကဘၣ်ပံး(KTV)အဆၢကတီၢ်ဖဲန့ၣ်ဒ်န့ၣ်ဒုအိၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

လၢန့ၣ်အမဲာ်ညါခီဖျိသုးမီၤစိရိၤအပၢတၢ်ပြးလဲၤတရံးအသးတန့ၢ်ဂ့ၤဂ့ၤလၢၤဘၣ်အဃိလၢမုၢ်နုာ်လီၢ်က၀ီၤတနီၤအပူၤန့ၣ် ၦၤစိာ်ကျိဂုာ်ဆူၣ်တၢ်ဟးတမျာ်တၢ်ဒီးၦၤသူၦၤၦ့ၤဆါသူကသံၣ်မူၤဘှီးအိၣ်၀ဲအဂ့ၢ်န့ၣ် ကရ့ၣ်နံၣ်ဟီၣ်က၀ီၤ တၢ်ကစီၣ်ထုးထီၣ်ပာ်ဖျါ၀ဲဒီးလီၢ်က၀ီၤကမျၢၢ်စံး၀ဲအသိး သ့ၣ်ညါဘၣ်န့ၣ်လီၤႉ

လၢကလဲၤဆူၦၤလီၢ်အိၣ်ကမှံလီၢ်အံၤအဂီၢ်စ့ၢ်ကီးခီဖျိကျဲတၢ်ဟးထီၣ်က့ၤလီၤကီခဲအဃိဖဲၦၤမၤစၢၤတၢ်ဖိလဲၤတတုၤဘၣ် အဆၢကတီၢ်န့ၣ်ၦၤဃ့ၢ်မှံဟးဖျိးကမျၢၢ်တဖၣ်တနီၤန့ၣ်ဘၣ်သူၣ်အီၣ်ဘုလၢအနီၢ်ကစၢ်စ့ၢ်ကီးအိၣ်၀ဲအသိး တၢ်စူၤခါအခါ ခီဖျိထံလုၢ်ဘၢဘုဘုတဖၣ်ဟးဂီၤအဃိတၢ်ကီတၢ်ခဲအိၣ်ထီၣ်လၢတၢ်အီၣ်တၢ်အီတကပၤန့ၣ်လီၤႉ