တၢ်နု၁်လီၤခးပယီၤသုးဒီးဘၠူၣ်စီထံသုးပ၁်ဖှိၣ်အသုးကလၢၤ ပယီၤသုးတကပၤသံ ၃ ဂၤအဂ့ၢ် LLPDF ထုးထီၣ်ပ၁်ဖျါ

လါအီးကထိဘၢၣ် ၉ သီႇ ၂၀၂၃ နံၣ်ႇ ခ့ၣ်အဲးစံၣ်

လၢတနီသရံၣ်ကီၢ်ခီဒိၣ် ဘျံးဒ၀ဲၢ်ကီၢ်ရ့ၣ် လီလိကီၢ်ဆၣ်အပူၤ လီလိတၢ်ဒီသဒၢကမျၢၢ်သုး(LLPDF)သုးပာ်ဖှိၣ် နုာ်လီၤခး၀ဲပယီၤသုးဒီးဘၠူၣ်စီထံအသုးကလၢၤတၢ်လီၢ်တခါဒီး ဖဲန့ၣ်ပယီၤသုးတကပၤသံ၀ဲဒၣ် ၃ ဂၤအဂ့ၢ်န့ၣ် (LLPDF)ထုးထီၣ်ပာ်ဖျါ၀ဲန့ၣ်လီၤႉ

ဖဲတလါအံၤလါအီးကထိဘၢၣ် ၄ သီအနံၤ ပယီၤသုးဒီးဘၠူၣ်စီထံသုးပာ်ဖှိၣ်သုးကလၢၤလၢအိၣ်လီလိကီၢ်ဆၣ် ကၠီၣ်နံၤမီၤသ၀ီအပူၤအံၤ လီလိတၢ်ဒီသဒၢကမျၢၢ်သုး(LLPDF),(နွေဦးပြောက်ကျား)ကရူၢ်, တၢ်ဒီသဒၢကမျၢၢ်သုးမုၢ်ဒိၣ် ဘျံးဒ၀ဲၢ်ကီၢ်ရ့ၣ် သုးရ့ၣ်(၁)ပာ်ဖှိၣ်ထီၣ်သးနုာ်လီၤခး၀ဲလၢပျီပူၤဒီးလဲၤတ့ၢ်လီၤ၀ဲဒြိမ့ၣ်ပိၢ် ခံခါလၢာ်န့ၣ်လီၤႉ

(LLPDF)ၦၤဘၣ်မူဘၣ်ဒါစံး၀ဲလၢ“မ့မ့ၢ်ပ၀ဲဒၣ်တကပၤဒုတၢ်ဘၣ်ဒိဘၣ်ထံးတအိၣ်ဘၣ်ႉပနုာ်လီၤခးအ၀ဲသ့ၣ်န့ၣ် လၢပျီပူၤနါက့ပခးႇလၢဒြိနါက့ပလဲၤတ့ၢ်လီၤပမၤခံခါလၢာ်လီၤႉမ့မ့ၢ်လၢပယီၤသုးတကပၤန့ၣ်သံ ၃ ဂၤႇ ဘၣ်ဒိနးနး ၅ ဂၤ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

ဖဲခံခီခံကပၤတၢ်ဒုးကဲထီၣ်အခါန့ၣ်ကတံာ်တာ်၀ဲ(၃)နၣ်ရံၣ်ဃၣ်ဃၣ်ဒီး ပယီၤသုးလၢအဘၣ်ဒိဘၣ်ထံးသ့ၣ်တဖၣ် တၢ်က့ၤစိာ်၀ဲဒီးချံအဂ့ၢ်န့ၣ် (LLPDF)ၦၤဘၣ်မူဘၣ်ဒါတဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ

ပယီၤသုးကလၢၤ၀ဲအံၤအိၣ်ဘူး၀ဲဒီးပီၣ်လဲၣ်ကၢၢ်နံၤႇအိၣ်ဘူး၀ဲဒၣ်ဒီးထံသုးချံတကးဒံးဘၣ်အမဲာ်ညါ ခီဖျိပယီၤသုးအိၣ်ခးစိလီၤတၢ်လၢ(မဲၤခရိၤ၀့ၣ်)ကစၢၢ်ခိၣ်အဃိ ဘၣ်ဂုၤကဒါလီၢ်ခံအဂ့ၢ်န့ၣ် သ့ၣ်ညါဘၣ်န့ၣ်လီၤႉ

လၢန့ၣ်အမဲာ်ညါတၢ်ဆၢကတီၢ်စ့ၢ်ကီးကတုၤဃီၤလၢတၢ်ယီၤထီၣ်လီၤအဃိကမျၢၢ်တဖၣ်ကအိၣ်လၢတၢ်ပလီၢ်ပဒီပူၤ ဒီးမ့နၢ်ဟူတၢ်ခးလိာ်သးသီၣ်န့ၣ်ကအိၣ်တဂၤလၢကစၢ်ဟံၣ်ႇအိၣ်လၢတၢ်ဘံၣ်တၢ်ဘၢလီၢ်အဂ့ၢ်န့ၣ် (LLPDF)ဟ့ၣ်ပလီၢ် ၀ဲဒၣ်န့ၣ်လီၤႉ