ပယီၤသုးနု၁်လီၤအိၣ်ဆီလီၤသးလၢ သၣ်တီၣ်ကၠံ နီၢ်ဘုၣ်ဘီကစၢၢ်ခိၣ်

လါအီးကထိဘၢၣ် ၁၀ သီႇ ၂၀၂၃ နံၣ်ႇ ခ့ၣ်အဲးစံၣ်

စးထီၣ်ဖဲလါအီးကထိဘၢၣ်ထီၣ် ၇ သီတုၤလၢခဲအံၤန့ၣ် ပယီၤသုးနုာ်လီၤအိၣ်ဆီလီၤသးလၢကညီကီၢ်စဲၣ် သၣ်တီၣ်ကၠံကီၢ်ဆၣ် နီၢ်ဘုၣ်ဘီကစၢၢ်ခိၣ် ဟဲစိာ်ဃုာ်၀ဲကျိဖးဒိၣ်ႇကျိဖိတဖၣ်အဂ့ၢ်န့ၣ် လီၢ်က၀ီၤကမျၢၢ်စံး၀ဲအသိး သ့ၣ်ညါဘၣ်န့ၣ်လီၤႉ

ခီဖျိတၢ်ဖီခိၣ်တၢ်ကလုၢ်လီၤအဃိပယီၤသုးလၢအိၣ်ဆီလီၤသးဖဲသၣ်တီၣ်ကၠံ၀့ၢ် ဘယ့ၣ်နီၤသုးကလၢၤတဖၣ်အံၤ အ၀ဲသ့ၣ်ဟဲထီၣ်စိာ်ဃုာ်၀ဲကျိဖးဒိၣ်ႇကျိဖိဟဲအိၣ်ဆီလီၤသးလၢနီၢ်ဘုၣ်ဘီကစၢၢ်ခိၣ်အဂ့ၢ်န့ၣ် လီၢ်က၀ီၤၦၤပိာ်မုာ် တဂၤစံး၀ဲဒ်အံၤန့ၣ်လီၤႉ

“တဲ၀ဲလၢတၢ်ကလုၢ်လီၤမီၤနီၤႉတုၤလၢခဲအံၤအ၀ဲသ့ၣ်တက့ၤလီၤဒံးဘၣ်ႉအ၀ဲသ့ၣ်လဲၤဟဲစိာ်ဃုာ်ကျိဖးဒိၣ်ႉ မ့ခး၀ဲဒၢးခး၀ဲသ့ႇမ့တခး၀ဲဒၣ်ဒၢးတခး၀ဲဘၣ်န့ၣ်ႉၦၤမ့တလဲၤစးထီၣ်အ၀ဲသ့ၣ်နီတဂၤဘၣ်ဒုတဘၣ်တၢ်နီတမံၤဘၣ်ႉ တၢ်အိၣ်ဖှိၣ်သရၣ်လဲၤတဲသကိးတၢ်ဒီးပယီၤသုးႇတဲ၀ဲလၢတဘၣ်မၤလၢ၀့ၢ်ပူၤဘၣ်ဒ်န့ၣ်မီၤနီၤႉခဲအံၤယဆိမိၣ်ကအိၣ်ဒံးလၢနီၢ်ဘုၣ်ဘီတၢ်ထုကဖၣ်အလီၢ်န့ၣ်လီၤႉကဟးအိၣ်လၢတၢ်လီၢ်အဂၤဒုတၢ်လီၢ်တအိၣ်နီတတီၤဘၣ်”အဂ့ၢ်န့ၣ် စံး၀ဲန့ၣ်လီၤႉ

ခီဖျိပယီၤသုးနုာ်လီၤအိၣ်ဆီလီၤသးလၢနီၢ်ဘုၣ်ဘီကစၢၢ်ခိၣ်အဃိၦၤကမျၢၢ်လၢအလဲၤထီၣ်ဟးကသုၣ်ကသီ စံၣ်ထီၣ်စံၣ်လီၤဖဲန့ၣ်သ့ၣ်တဖၣ်တနီၤန့ၣ်လဲၤထီၣ်ဘါတၢ်တအိၣ်လၢၤဘၣ်အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ

လီၢ်က၀ီၤကမျၢၢ်ၦၤပိာ်မုၣ်တဂၤစံး၀ဲလၢ“သုးဟံးန့ၢ်တၢ်စိတၢ်ကမီၤ၀ံၤဖဲတၢ်ကိၢ်ခါအခါန့ၣ် ၦၤအိၣ်လၢတီအူႇ ၀့ၢ်တကူၣ်တကပၤန့ၣ်ဟဲဟးကသုၣ်အိၣ်ဒံးတစဲးတမွဲးဒံးႉပယီၤသုးမ့အိၣ်ဒုမတၤတဂၤမးလဲၤတဘူၣ်ဘၣ်ႉ လၢကစၢၢ်ခိၣ်န့ၣ်ခီဖျိအိၣ်ဒီးတၢ်ထုကဖၣ်လီၢ်ႇၦၤမၤဃာ်ဒၢးခါလၢၦၤတမှံၤကဟဲအိၣ်ဘှံးအိၣ်သါအဂီၢ်အဃိ အ၀ဲသ့ၣ်အိၣ်၀ဲယံၤယံၤသ့လီၤ”အဂ့ၢ်န့ၣ် စံး၀ဲန့ၣ်လီၤႉ

နီၢ်ဘုၣ်ဘီကစၢၢ်အံၤအိၣ်ဆီလီၤသးလၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၂)ဟီၣ်က၀ီၤ တီအူကီၢ်ရ့ၣ်ပူၤဒီး မ့ၢ်တၢ်လီၢ်တခါလၢအမံၤဟူသၣ်ဖျါႇအအိၣ်ဖျါဒီးခိၣ်ဃၢၤန့ဆၢၣ်တၢ်ဃံတၢ်လၤအဃိ ကလုာ်ဒူၣ်တၢ်ဘူၣ်တၢ်ဘါ တၢ်စူၢ်တၢ်နာ်အကလုာ်ကလုာ်ဟဲဟးကသုၣ်၀ဲအါးဒီးနီၢ်ဘုၣ်ဘီကစၢၢ်အံၤအိၣ်စီၤစုၤ၀ဲဒီးတီအူ၀့ၢ်အတၢၣ်(၃၀)န့ၣ်လီၤႉ

နီၢ်ဘုၣ်ဘီကစၢၢ်အံၤအထီအိၣ်၀ဲအပ့ၣ်လွံၢ်ကထိဘျဲၣ်ဒီးစးထီၣ်လၢကစၢၢ်ခီၣ်ထံးတုၤလၢကစၢၢ်ခိၣ်န့ၣ် ဃီသွါအထီအိၣ်၀ဲအပ့ၣ်(ယဲၢ်ကယၤ)ဘျဲၣ်န့ၣ်လီၤႉ ဒ်န့ၣ်အသိးနီၢ်ဘုၣ်ဘီကစၢၢ်အံၤ လၢသၣ်တီၣ်ကၠံ၀့ၢ်ပူၤ မ့ၢ်တၢ်လီၢ်လၢ အမံၤဟူသၣ်ဖျါတခါဒီးတချုးသုးဟံးန့ၢ်တၢ်စိတၢ်ကမီၤဒံးဘၣ်အခါန့ၣ်ၦၤအိၣ်ဟဲဟးကသုၣ် ဟဲဟးလိာ်ကွဲလၢ တၢ်လီၢ်အံၤ အိၣ်၀ဲဒၣ်အါမးန့ၣ်လီၤႉ

သုးဟံးန့ၢ်တၢ်စိတၢ်ကမီၤ၀ံၤလီၢ်ခံလၢဟီၣ်က၀ီၤဖဲန့ၣ်အပူၤခီဖျိတၢ်ဒုးကဲထီၣ်အဃိၦၤဟဲဟးကသုၣ်လၢ နီၢ်ဘုၣ်ဘီကစၢၢ်ခိၣ်တအိၣ်အါအါလၢၤဘၣ်ဒီးလၢ၀့ၢ်ပူၤစ့ၢ်ကီးတၢ်ပိၢ်ဖးထီၣ်ကဲထီၣ်အိၣ်၀ဲအဂ့ၢ်န့ၣ် ဟီၣ်က၀ီၤဂံၢ်ခီၣ်ထံး တၢ်ကစီၣ်စံး၀ဲအသိး သ့ၣ်ညါဘၣ်န့ၣ်လီၤႉ

ဖဲအပူၤကွံာ်(၂၀၂၂)လါနိၣ်၀့ဘၢၣ်အခါစ့ၢ်ကီး ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ် လဲၤထီၣ်ခး၀ဲ သၣ်တီၣ်ကၠံ၀့ၢ်လီၢ်လံၤ ဘယ့ၣ်နီၤသုးကလၢၤအံၤဒီး ခီဖျိပယီၤသုးတကပၤသံဘၣ်ဒိဘၣ်ထံးအါအဖီခိၣ် ပယီၤသုးက့ၤခးလီၤကျိဖးဒိၣ်ကျိဖိအဃိ လီၢ်က၀ီၤၦၤကမျၢၢ်ဘၣ်ဃ့ၢ်ထီၣ်ဒံး၀ဲဒၣ်န့ၣ်လီၤႉ