လါအီးကထိဘၢၣ် ၁၀ သီႇ ၂၀၂၃ နံၣ်ႇ ခ့ၣ်အဲးစံၣ်
လၢတနီသရံၣ်ကီၢ်ခီဒိၣ် ဘျံးဒ၀ဲၢ်ကီၢ်ရ့ၣ် မုၢ်ထီၣ်ကလံၤထံးဟီၣ်က၀ီၤအပူၤ ဖဲလါအီးကထိဘၢၣ် ၇ သီအနံၤ သုးခိၣ်အဲၣ်ခွံတီခိၣ်ရိၣ်မဲကီၢ်သူလ့ၤသုးမုၢ်ဒိၣ်(KTLA)အတၢ်လဲၤဒွဲၣ်အူအီၣ်စၢၢ်ထးတၢ်ဖံးတၢ်မၤလီၢ်တၢ်ဂ့ၢ်အံၤ တဘၣ်ဃးဒီးအ၀ဲသ့ၣ်တၢ်ကရၢကရိဘၣ်အဂ့ၢ်န့ၣ် ခ့ၣ်အဲၣ်ယူၣ် ဘျံးဒ၀ဲကီၢ်ရ့ၣ်(သုးက့ ၄)တကပၤစံး၀ဲန့ၣ်လီၤႉ
(ဖိလၣ်)စၢၢ်ထးတၢ်ဖံးတၢ်မၤလီၢ်အံၤလၢအအိၣ်ဒီးသုးကီၣ်ကးတၢ်ပျဲတၢ်မၤအီၤလၢ(ခ့ၣ်အဲၣ်ယူၣ်)ဟီၣ်က၀ီၤပူၤ ကအိၣ်လၢ ၂ နံၣ်ဃၣ်ဃၣ်လံဒီး တၢ်ဖံးတၢ်မၤအံၤတၢ်ဘၣ်ထွဲဒီးခ့ၣ်အဲၣ်ယူၣ်တအိၣ်နီတမံၤဘၣ်အသိး တန့ၢ်ဘၣ်တၢ်ဘျုးအဖှိၣ် နီတမံၤဘၣ်အဂ့ၢ်န့ၣ် ခ့ၣ်အဲၣ်ယူၣ် ဘျံးဒ၀ဲၢ်ကီၢ်ရ့ၣ် နဲၣ်ရွဲၣ် ပဒိၣ်စီၤအဲၣ်နၤ စံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“တၢ်ဘၣ်ထွဲဒီးၦၤတအိၣ်နီတမံၤဘၣ်ႉအိၣ်ဒၣ်တၢ်ဃု(စိးစွဲ)ၦၤႇတၢ်ဟးတဲဟးဂီၤၦၤတၢ်ဃုတၢ်ကမဲၤ ကမီၤတဖၣ်န့ၣ်လီၤႉဒ်သိးကမျၢၢ်တဖၣ်ကနၢ်ပၢၢ်ကမၣ်ကထံၣ်ကမၣ်ၦၤလီၤႉအဃိန့ၣ်မ့ၢ်တၢ်တခါလၢတၢ်ထံၣ်ကမၣ် လိာ်သးဖးဒိၣ်တခါညါႉစၢၢ်ထးတဖျၢၣ်န့ၣ်ဘၣ်ဃးဒီးပယီၤအတၢ်ဟ့ၣ်တၢ်ပျဲမ့ၢ်၀ဲဒၣ်တရူးဒီးပယီၤမၤသကိးတၢ်လီၤႉတၢ်ဘၣ်ထွဲဒီးခ့ၣ်အဲၣ်ယူၣ်ကရၢတၢ်ဟ့ၣ်တၢ်ပျဲတအိၣ်နီတမံၤဘၣ်ႉတန့ၢ်ဘၣ်စ့ၢ်ကီးတၢ်ဘၣ်ဘျုးနီတမံၤဘၣ်”အဂ့ၢ်န့ၣ် စံး၀ဲန့ၣ်လီၤႉ
စၢၢ်ထးတၢ်ဖံးတၢ်မၤလီၢ်အံၤအိၣ်ဆီလီၤသးလၢဟ့ၤဒါသ၀ီကရူၢ် ဖိၣ်လဲၣ်သ၀ီပူၤဒီး တၢ်ဖံးတၢ်မၤလီၢ်အံၤ ဘၣ်တၢ်ပာ်ဖှိၣ် မၤသကိးအီၤလၢပယီၤသုးဒီးခ့ၣ်အဲၣ်ယူၣ်ခိၣ်နၢ်တနီၤဒီး တၢ်အဘျုးအဖှိၣ်လၢ အန့ၢ်သ့ၣ်တဖၣ်အ၀ဲသ့ၣ်ဟ့ၣ်နီၤလီၤသး တကးဒံးဘၣ်အမဲာ်ညါခီဖျိစၢၢ်ထးတၢ်ဖံးတၢ်မၤလီၢ်အံၤအဃိထံကျိထံကွာ် ကတာ်ထီ၀ဲဒီး ခီဖျိကဲထီၣ်တၢ်ကီတၢ်ခဲလၢ ကမျၢၢ်အဖီခိၣ်အဃိဘၣ်တၢ်နုာ်လီၤဒွဲၣ်အူအီၣ်ကွံာ်၀ဲဒ်အံၤလီၤအဂ့ၢ်န့ၣ် သုးခိၣ်အဲၣ်ခွံ စံး၀ဲလၢအ၀ဲသ့ၣ်ကရူၢ်(KTLA) ထုးထီၣ်ရၤလီၤတၢ်ဂီၤမူအပူၤန့ၣ်လီၤႉ
စၢၢ်ထးတၢ်ဖံးတၢ်မၤလီၢ်အံၤဒိးန့ၢ်ဘၣ်အခွဲးလၢကခူၣ်၀ဲစးထီၣ်(၂၀၁၉)တုၤလၢ(၂၀၃၀)နံၣ်အတီၢ်ပူၤညါဒီး ဘၣ်ဆၣ် ခီဖျိဟီၣ်က၀ီၤတၢ်အိၣ်သးအဃိစးထီၣ်ဖဲအပူၤကွံာ်(၂၀၂၂)နံၣ်လၢာ်န့ၣ် ခီပနံၣ်ၦၤဘၣ်မူဘၣ်ဒါတဖၣ်သုးလီၢ်သုကျဲ ကယီကယီဒီးဘၣ်ပတုာ်ကွံာ်တၢ်ဖံးတၢ်တၢ်မၤအံၤအဂ့ၢ်န့ၣ် လီၢ်က၀ီၤကမျၢၢ်စံး၀ဲအသိးသ့ၣ်ညါဘၣ်န့ၣ်လီၤႉ
လၢန့ၣ်အမဲာ်ညါလၢၢ်ဒီးဟီၣ်လၢတၢ်ခူၣ်ဟးထီၣ်အီၤသ့ၣ်တဖၣ်အံၤအဃိထံကျိလၢအိၣ်မုၢ်ထီၣ်ဟီၣ်က၀ီၤပူၤတဖၣ် ဟးဂီၤဒီးတကးဒံးဘၣ်အမဲာ်ညါတၢ်စူၤခါအတီၢ်ပူၤတၢ်ဖံးအီၣ်မၤအီၣ်လီၢ်ကျီးဒီးတိၤသ့ၣ်တဖၣ်ဟးဂီၤ၀ဲဒၣ်အဂ့ၢ်န့ၣ် လီၢ်က၀ီၤကမျၢၢ်တဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်ဒ်အံၤန့ၣ်လီၤႉ
အ၀ဲစံး၀ဲလၢ“ထံကျိဟးဂီၤန့ၣ်တမ့ၢ်ခဲအံၤဘၣ်ဟးဂီၤလၢညါလံၤလံၤလံႉအစးထီၣ်ဟးဂီၤခဲအံၤန့ၣ်လၢကစၢၢ်ဒိၣ်ထံခံတကပၤန့ၣ်မီၤနီၤႉမ့၀ံၤဖဲအပူၤကွံာ်တဘျီန့ၣ်မုၢ်ထီၣ်ဟီၣ်က၀ီၤန့ၣ်ထံဒိၣ်ထီၣ်ႉတိၤဟးဂီၤန့ၣ်တမ့ၢ်တၢ်စူၤဒိၣ်တလၢအဃိဘၣ်ႉသုးဟံးန့ၢ်တၢ်စိတၢ်ကမီၤ၀ံၤလီၢ်ခံန့ၣ်အ၀ဲသ့ၣ်စးထီၣ်ခူၣ်၀ဲဒၣ်စၢၢ်ထးအံၤပၢၢ်တုၤလၢထံဒုထီၣ်ႉအဃိထံန့ၢ်လီၤ ယွၤတဒ်သိး လၢညါခါလၢၤဘၣ်အဃိထံကျိကၢၢ်ကပၤဟီၣ်ခိၣ်လာ်ဘျီပၢၢ်တုၤလၢတိၤန့ၣ်အဲးထီၣ်အသး”အဂ့ၢ်န့ၣ် စံး၀ဲန့ၣ်လီၤႉ
ဒ်န့ၣ်အသိးဖဲတနံၣ်အံၤလါယူၤအခါစ့ၢ်ကီး(KTLA)လဲၤဒွဲၣ်အူအီၣ်၀ဲ ကစၢၢ်ဒိၣ်ကီၢ်ဆၣ် ဖီတီသ၀ီ ထံလီမ့ၣ်အူတၢ်တိၤကျဲၤလီၢ်လံၤ တၢ်သူၣ်ထီၣ်ႇစဲးဖီကဟၣ်ဒီးသိလ့ၣ်ဘျၢၣ်ဟီၣ်ခိၣ်သ့ၣ်တဖၣ်ဒံးအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ
