Home တၢ်ကစီၣ် ပယီၤသုးဒွဲၣ်အူအီၣ်တီအူကီၢ်ရ့ၣ်ပူၤကမျၢၢ်အဟံၣ် ၂၅ ဖျၢၣ်ႇ လီၢ်က၀ီၤၦၤကမျၢၢ်ဘၣ်ဃ့ၢ်ထီၣ်

ပယီၤသုးဒွဲၣ်အူအီၣ်တီအူကီၢ်ရ့ၣ်ပူၤကမျၢၢ်အဟံၣ် ၂၅ ဖျၢၣ်ႇ လီၢ်က၀ီၤၦၤကမျၢၢ်ဘၣ်ဃ့ၢ်ထီၣ်

219
0
Photo: CJ

လါနိၣ်၀့ဘၢၣ် ၁၅ သီႇ ၂၀၂၃ နံၣ်ႇ ခ့ၣ်အဲးစံၣ်

ဖဲအပူၤကွံာ်လါနိၣ်၀့ဘၢၣ် ၁၂ သီအနံၤ လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ တီအူကီၢ်ရ့ၣ်(သုးက့ ၂) ဟီၣ်က၀ီၤ ကယါပၠိခၠီသ၀ီအပူၤ တၢ်ဒုးကဲထီၣ်လၢပယီၤသုးဒီးတၢ်ပၢၢ်ဆၢသုးကရူၢ်အဘၢၣ်စၢၤဒီး တၢ်ဒုးကဲထီၣ်၀ံၤလီၢ်ခံ ပယီၤသုးဒွဲၣ်အူအီၣ်ၦၤကမျၢၢ်အဟံၣ်(၂၅)ဖျၢၣ်ဒီးၦၤကမျၢၢ်ဃ့ၢ်ထီၣ်၀ဲအဂ့ၢ်န့ၣ် သ့ၣ်ညါဘၣ်လၢ ဟီၣ်က၀ီၤဂံၢ်ခီၣ်ထံး တၢ်ကစီၣ် အအိၣ်န့ၣ်လီၤႉ

ပယီၤသုးကျိၤသုးပာ်ဖှိၣ်လၢအိၣ်တီအူ-သၣ်တီၣ်ကျဲ (၅)တၢၣ် ဒီး (၇)တၢၣ်သုးကလၢၤတဖၣ်အံၤ ဖဲအ၀ဲသ့ၣ်နုာ်လီၤ လၢကယါပၠိခၠီသ၀ီကပၤအခါန့ၣ်တၢ်ဘၣ်သဂၢၢ်ခးလိာ်သးကဲထီၣ်၀ဲဒီးလၢန့ၣ်အမဲာ်ညါပယီၤသုးအံၤလိာ်ဘၢလိာ်ကွီၢ် ၦၤသ၀ီဖိတဖၣ်လၢအတူၢ်လိာ်ဃာ်၀ဲဒၣ်တၢ်ဒီသဒၢကမျၢၢ်သုး(PDF)အဃိဒွဲၣ်အူအီၣ်ကွံာ်၀ဲၦၤကမျၢၢ်အဟံၣ်ဒ်အံၤလီၤ အဂ့ၢ်န့ၣ် လီၢ်က၀ီၤၦၤကမျၢၢ်တဖၣ်စံး၀ဲန့ၣ်လီၤႉ

လီၢ်က၀ီၤကမျၢၢ်တဂၤစံး၀ဲလၢ“တၢ်ခးလိာ်သးကဲထီၣ်န့ၣ်ဖဲသ၀ီကပၤအံၤလီၤႉပယီၤသုးဒွဲၣ်အူအီၣ်ၦၤသ၀ီဖိအဟံၣ်ႉ တၢ်မ့ကဲထီၣ်သးဖဲသ၀ီကပၤလံန့ၣ်ပယီၤသုးဒွဲၣ်အူအီၣ်ၦၤဟံၣ်လီၤႉၦၤဘၣ်ဒိဘၣ်ထံးဒုတအိၣ်ဘၣ်ႉၦၤသ၀ီဖိခီဒု ဟးသုးလီၢ်သုးကျဲလၢတၢ်လီၢ်အဂၤလံ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲမဟါလါနိၣ်၀့ဘၢၣ် ၁၄ သီ အနံၤန့ၣ်လီၤႉ

တၢ်ဒုးကဲထီၣ်ဘျီ၀ဲအံၤအဆၢကတီၢ်ပယီၤသုးရ့ၣ်လၢအအိၣ်(၇)တၢၣ်တဖၣ်အံၤခးလီၤကျိဖးဒိၣ်ဒီး ဘၣ်ဆၣ် လီၢ်က၀ီၤၦၤကမျၢၢ်ဘၣ်ဒိဘၣ်ထံးတအိၣ်ဘၣ်အဂ့ၢ်န့ၣ် ကမျၢၢ်စံး၀ဲန့ၣ်လီၤႉ

ဘၣ်ဆၣ်ခီဖျိတၢ်ဒုးကဲထီၣ်အဃိကယါပၠိခၠီသ၀ီႇရှါပၠိခၠီသ၀ီဒီးယ့ၤစ့ကိသ၀ီ ၦၤကမျၢၢ်တစှၤန့ၢ်အဂၤ(၃၀၀)ဃ့ၢ်ထီၣ် ၀ဲဒီး ၦၤလၢလၢအဃ့ၢ်ထီၣ်တဖၣ်အံၤတၢ်အိၣ်ဖှိၣ်သရၣ်ၦၤဘၣ်မူဘၣ်ဒါဒီးၦၤကမျၢၢ်လၢအိၣ်တၢ်ခိၣ်တၢ်ဃၢၤဖဲန့ၣ်တဖၣ် ဆီၣ်ထွဲမၤစၢၤဃာ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ

Photo: CJ

လၢန့ၣ်အမဲာ်ညါလၢကလဲၤမၤစၢၤၦၤဃ့ၢ်မှံဟးဖျိးတဖၣ်အံၤအဂီၢ် သၣ်တီၣ်ကၠံကီၢ်ဆၣ်ပူၤ ခီဖျိပယီၤသုး ပျဲၦၤစိာ်ထီၣ် စိာ်လီၤတၢ်အီၣ်တၢ်အီလၢအိၣ်ဒီးတၢ်ပနီၣ်အဃိတၢ်ကီတၢ်ခဲအိၣ်လၢကလဲၤမၤစၢၤၦၤဃ့ၢ်မှံဟးဖျိး အဂ့ၢ်န့ၣ် ကမျၢၢ်လၢအမၤစၢၤၦၤဃ့ၢ်မှံဟးဖျိးလၢအဂၤတဂၤစ့ၢ်ကီးစံး၀ဲန့ၣ်လီၤႉ

အ၀ဲစံး၀ဲလၢ“လီလီစဲၤခဲအံၤဘၣ်လၢပဟးလူၤထၢၦၤနီၣ်ဂံၢ်စရီအဃိပတသ့ၣ်ညါလီၤတံၢ်ဒံးဘၣ်ႉပသကိးအိၣ်လၢတၢ်ချၢ တဖၣ်မၤဘူၣ်လီၤမၤစၢၤ၀ဲအဃိပက့ၤမၤစၢၤကဒါအ၀ဲသ့ၣ်လီၤႉပကလဲၤလၢသၣ်တီၣ်တကပၤခီဒၢးတဘၣ်ဂီၢ်ဘၣ်ႉ မ့မ့ၢ်ၦၤကညီခီန့ၣ်လ့ၢ်ထီၣ်လ့ၢ်လိၤတဘၣ်နီမံၤဘၣ်ႉမ့မ့ၢ်လၢဟုသးႇသိႇညၣ်အုၣ်တဖၣ်ခီန့ၣ်ပယီၤသုးတြီဃာ်၀ဲအဃိ ပလဲၤစိာ်တညီဘၣ်ႉပကဘၣ်လဲၤလၢတၢ်လီၢ်အဂၤတကပၤမးလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤႉ

တကီၢ်ခါခဲအံၤပယီၤသုးဟးဆီလီၤခူသူၣ်သးလၢကယါပၠိခၠီသ၀ီခိၣ်သ၀ီဃၢၤ၀း၀းတရံးဒီး ဖဲလါနိၣ်၀့ဘၢၣ် ၁၃ သီ အနံၤစ့ၢ်ကီး တၢ်ဒုးကဲထီၣ်ကဒီး၀ဲလၢပယီၤသုးဒီးတၢ်ပၢၢ်ဆၢသုးကရူၢ်အဘၢၣ်စၢၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဒ်န့ၣ်အသိးဖဲအပူၤကွံာ်လါစဲးပထ့ဘၢၣ် ၁၄ သီအနံၤစ့ၢ်ကီး ပယီၤသုးနုာ်လီၤ၀ဲလၢကယါပၠိခၠီသ၀ီႇရှါပၠိခၠီသ၀ီပူၤဒီး ဒွဲၣ်အူအီၣ်ကွံာ်၀ဲၦၤကမျၢၢ်အဟံၣ်(၁၁)ဖျၢၣ် တကးဒံးဘၣ်ဖီၣ်၀ဲဒၣ်ၦၤသ၀ီဖိ(၂)ဂၤအဃိ ၦၤကမျၢၢ်တဖၣ်ဃ့ၢ်ထီၣ် ၀ဲဒၣ်န့ၣ်လီၤႉ