ဟီၣ်က၀ီၤပူၤတၢ်အိၣ်သးတဂၢၢ်တကျၢၤဒံးဘၣ်အဃိနၣ်သၤကွ့လီၢ်က၀ီၤကမျၢၢ်တနီၤတက့ၤဘၣ်လၢအဟံၣ်ဒံးဘၣ်

လါဒံၣ်စ့ဘၢၣ် ၁၉ သီႇ ၂၀၂၃ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၃)ဟီၣ်က၀ီၤ ချၢၣ်လွံၢ်ထူၣ်ကီၢ်ရ့ၣ် လၢၢ်ဒိၣ်ကီၢ်ဆၣ် နၣ်သၤကွ့၀့ၢ်ပူၤ ဖဲလါဒံၣ်စ့ဘၢၣ်တၢတနွံအတီၢ်ပူၤအခါန့ၣ် တၢ်ဒုးကဲထီၣ်၀ဲလၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ဒီး ပယီၤသုးအဘၢၣ်စၢၤဒီးခဲအံၤခီဖျိဟီၣ်က၀ီၤတၢ်အိၣ်သတဂၢၢ်တကျၢၤဒံးဘၣ်အဃိ တုၤလၢခဲအံၤၦၤကမျၢၢ်တနီၤ တက့ၤဘၣ်လၢအဟံၣ်ဒံးဘၣ်အဂ့ၢ်န့ၣ် သ့ၣ်ညါဘၣ်လၢကမျၢၢ်တဖၣ်အအိၣ်န့ၣ်လီၤႉ

ဖဲအပူၤကွံာ်လါဒံၣ်စ့ဘၢၣ် ၅ သီအနံၤန့ၣ် တၢ်ပၢၢ်ဆၢသုးပာ်ဖှိၣ်နု၁်လီၤခး၀ဲဒၣ်နၣ်သၤကွ့ပၢၤကီၢ်၀ဲၤလီၢ်ဒီး တၢ်လီၢ်လၢပယီၤသုးအိၣ်ဆီလီၤသးအလီၢ်တနီၤအံၤဒီး ဖဲန့ၣ်ခီဖျိပယီၤသုးက့ၤခးလီၤကဒါကျိဖးဒိၣ်အဃိ နၣ်သၤကွ့ ၦၤကမျၢၢ်တဖၣ်ဃ့ၢ်ထီၣ်၀ဲဒီးတုၤလၢခဲအံၤၦၤကမျၢၢ်တနီၤတက့ၤဘၣ်လၢအဟံၣ်ဒံးဘၣ်အဂ့ၢ်န့ၣ် လီၢ်က၀ီၤကမျၢၢ် ပိာ်မုၣ်တဂၤ စံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“တၢ်ဒုးမ့ကဲထီၣ်ကဘီယူၤဟဲအဃိ(တၢ်ပၢၢ်ဆၢသုးကရူၢ်)မၢပဟးပလဲာ်ဆိသးမီၤနီၤႉဘၣ်ယိၣ်၀ဲလၢတၢ်ဘၣ်ဒိဘၣ်ထံးကအိၣ်အဃိဖဲတၢ်တနံၤန့ၣ်ပဟးပလဲာ်သးလီၤႉနီၢ်တနံၤဘျီၦၤဟဲခးကဒီးပၢၤကီၢ်၀ဲၤလီၢ်ဒံးႉ ခဲအံၤတၢ်အိၣ်သး ဂၢၢ်လံဘၣ်ဆၣ်ၦၤက့ၤတဘူၣ်ဒံးဘၣ်န့ၣ်အိၣ်ဒံးႉတနီၤခီန့ၣ်လဲၤလဲၤက့ၤက့ၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

စးထီၣ်ဖဲတလါအံၤလါဒံၣ်စ့ဘၢၣ် ၁၃ သီတုၤလၢ ၁၆ သီန့ၣ် ပယီၤသုးခးလီၤကျိဖးဒိၣ်အဖျၢၣ်(၆၀)ဘျဲၣ်ဆူ လၢၢ်ဒိၣ်ကီၢ်ဆၣ် သ၀ီတစှၤန့ၢ်အဖျၢၣ်(၁၀)လၢအပၣ်ဃုာ်၀ဲသမ့ၤအ့ကိသ၀ီႇကၠ့ၣ်ကွ့ႇခၠီၣ်သဲစူၣ်ႇအလဲၤသ၀ီပူၤအံၤ အဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သးထုးထီၣ်ပာ်ဖျါ၀ဲဖဲလါဒံၣ်စ့ဘၢၣ် ၁၇ သီ အနံၤ န့ၣ်လီၤႉ

ခီဖျိပယီၤသုးခးလီၤကျိဖးဒိၣ်ဆူသ၀ီပူၤအဃိနၣ်သၤကွ့ကမျၢၢ်ဃုာ်ဒီးၦၤကမျၢၢ်လၢအဂၤဘၣ်ဃ့ၢ်ထီၣ်၀ဲအါအါဂီၢ်ဂီၢ် ဒီးတကီၢ်ခါခဲအံၤၦၤကမျၢၢ်လၢအဃ့ၢ်ထီၣ်တဖၣ်အီၣ်အီအိၣ်ဆိး၀ဲဒၣ်လၢအကစၢ်တၢ်ရဲၣ်တၢ်ကျဲၤလီၤအဂ့ၢ်န့ၣ် လီၢ်က၀ီၤၦၤကမျၢၢ်စံး၀ဲန့ၣ်လီၤႉ

လီၢ်က၀ီၤကမျၢၢ်တဂၤစံး၀ဲလၢ“ၦၤလၢအဃ့ၢ်ထီၣ်ခဲအံၤတဖၣ်ဒီးၦၤလၢအဟးပလဲာ်သးတဖၣ်အံၤအ၀ဲသ့ၣ် ဟးစံၣ်အိၣ်ဒၣ်လၢအကစၢ်တၢ်ရဲၣ်တၢ်ကျဲၤလီၤႉလီၢ်က၀ီၤတၢ်ကရၢကရိနါက့ကမၤစၢၤဖှိၣ်၀ဲဒ်လဲၣ်ႉပဘၣ်အိၣ်ဘၣ်အီၣ်နါစိၤဒ်အံၤလီၤမီၤနီၤႉ၀ဲဒၣ်နါက့ပအိၣ်ဒ်အံၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

ဒ်(၂၀၁၄)သုးကီၣ်ကးထုးထီၣ်ပာ်ဖျါ၀ဲဖးဖီမုၢ်ၦၤနီၣ်ဂံၢ်စရီအသိးန့ၣ်နၣ်သၤကွ့၀့ၢ်ပူၤအံၤၦၤနီၣ်ဂံၢ်အိၣ်၀ဲ(၉၀၀၀)ဃၣ်ဃၣ်ဒီးဖဲအပူၤကွံာ်လါယူၤအခါခီဖျိ(KNLA)နုာ်လီၤခး၀ဲသုးကီၣ်ကးအသုးကလၢၤအံၤအဃိၦၤနီၣ်ဂံၢ်တ၀ာ်ဘျဲၣ် ဘၣ်ဃ့ၢ်ထီၣ် ၀ဲဒၣ်အဂ့ၢ်န့ၣ် စံး၀ဲန့ၣ်လီၤႉ

ဒ်န့ၣ်အသိးလၢလၢၢ်ဒိၣ်ကီၢ်ဆၣ်အပူၤ(၄)သီအတီၢ်ပူၤတၢ်ဒုးကဲထီၣ်အခါခီဖျိပယီၤသုးခးလီၤကျိဖးဒိၣ်အဃိ ၦၤကမျၢၣ်သံဒၣ်(၄)ဂၤအကျါပၣ်ဃု၁်၀ဲပိာ်မုၣ်တဂၤဒီးဒ်န့ၣ်အသိးဘၣ်ဒိဘၣ်ထံး(၄)ဂၤအကျါပၣ်ဃုာ်၀ဲဖိသၣ်တဂၤ အဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပာ်ဖျါ၀ဲဖဲလါဒံၣ်စ့ဘၢၣ် ၁၇ သီအနံၤန့ၣ်လီၤႉ