လါမးရှး ၂၅ သီႇ ၂၀၂၄ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ် ဒူသထူၣ်ကီၢ်ရ့ၣ် ဘံလ့ကီၢ်ဆၣ်အပူၤ ဖဲလါမးရှး ၂၃ သီ မုၢ်နၤခီအဆၢကတီၢ်န့ၣ် ခီဖျိကဘီယူၤ ဟဲခးလီၤတၢ်လၢဃီဖိပျဲၢ်သ၀ီပူၤအဃိ တၢ်သူၣ်ထီၣ်ဟးဂီၤ၀ဲဒၣ်(၁၇)ဖျၢၣ်အကျါပၣ်ဃုာ်၀ဲကၠိတၢ်သူၣ်ထီၣ်(၃)ဖျၢၣ်ဒီး သ၀ီဖိဘၣ်ဒိ၀ဲဒၣ်တဂၤအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲန့ၣ်လီၤႉ
ဖဲမုၢ်နၤခီ ၁၀း၀၀ ဘျဲၣ်အဆၢကတီၢ်န့ၣ် ပယီၤသုးကဘီယူၤဟဲခးလီၤတၢ်(၃)ဘျီ ခးလီၤ၀ဲကျိဖးဒိၣ်ကျိဖိ (၁၂)ဖျၢၣ်ဆူ ဃီဖိပျဲၢ်သ၀ီပူၤဒီးလၢတၢ်န့ၣ်အဃိ ကီၢ်သူလ့ၤတီၤခၢၣ်သးကၠိတၢ်သူၣ်ထီၣ်ဃုာ်ဒီးဟံၣ်ဃီတၢ်သူၣ်ထီၣ် ဟးဂီၤတကးဒံးဘၣ် ဘၣ်ဒိဘၣ်ထံး၀ဲဒၣ်တံကဲၤ(၅၆)နံၣ် အစုထွဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဘၣ်ဃးကဘီယူၤဟဲခးလီၤတၢ်လၢဃီဖျိပျဲၢ်သ၀ီပူၤအံၤန့ၣ် ဒူသထူၣ်ကီၢ်ရ့ၣ်ခိၣ် ပဒိၣ်စီၤစိမၠ့ၣ် စံး၀ဲလၢ “ဘၣ်မနုၤအဟဲခး လီၤ၀ဲန့ၣ်ပတဲတဘၣ်ဘၣ်ႉဖဲအံၤတၢ်ဒုးတၢ်ယၤကဲထီၣ်တအိၣ်နီမံၤဘၣ်ႉကဘီယူၤန့ၣ်အိၣ်ဟဲလၢမီၤဘံၣ်တကပၤမီၤနီၤႉဖဲ ၁၀း၂၀ န့ၣ်ဟဲတ့ၢ်လီၤမ့ၣ်ပိၢ် ၂ ဖျၢၣ်ႉ ဖဲ ၁၀း၃၅ န့ၣ်ဟဲတ့ၢ်လီၤကဒီး၀ဲ ၄ ဖျၢၣ်ႉ ၁၀း၃၉ န့ၣ်ကွံာ်လီၤကဒီး၀ဲ(၆)ဖျၢၣ် ဟဲကွံာ်လီၤ၀ဲဒၣ်ဖဲဃီဖိပျဲၢ်သ၀ီန့ၣ်လီၤမီၤနီၤႉတီၤခၢၣ်သးကၠိဟးဂီၤတဖျၢၣ်ႇကၠိလၢ အဘၣ်ဟးဂီၤလၢကျိချံ ၦာ်သၣ်ချံန့ၣ် (၂)ဖျၢၣ်ႉၦၤသ၀ီဖိန့ၣ်ဘၣ်ဒိတဂၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤႉ
ကဘီယူၤဟဲခးလီၤတၢ်လၢဃီဖျိပျဲၢ်သ၀ီပူၤဘျီ၀ဲအံၤန့ၣ်တ့ၢ်လီၤ၀ဲကျိဖးဒိၣ်(၅)ဖျၢၣ်ႇကျိဖိ(၇)ဖျၢၣ်ဒီး လီၤတဲာ်ပိၢ်ဖးထီၣ်၀ဲ လၢကၠိကရၢၢ်ပူၤ(၃)ဖျၢၣ်ႇလၢသ၀ီပူၤ(၉)ဖျၢၣ်န့ၣ်လီၤႉ ဘၣ်ဆၣ်ကျိဖိဒီးကျိဖးဒိၣ်(၉)ဖျၢၣ်လၢ အလီၤတဲာ်လၢသ၀ီပူၤ တဖၣ်အံၤအကျါ တပိၢ်ဖးထီၣ်ဒံးဘၣ်အိၣ်၀ဲ(၃)ဖျၢၣ်အဂ့ၢ်န့ၣ် ခ့ၣ်အဲၣ်ယူၣ် စံး၀ဲအသိး သ့ၣ်ညါဘၣ်န့ၣ်လီၤႉ
ခီဖျိလၢကဘီယူၤဟဲခးလီၤတၢ်ဒ်အံၤအဃိဘၣ်ဟးဂီၤ၀ဲဒၣ်ကၠိတၢ်သူၣ်ထီၣ်တီၤဒၢး(၃)ဖျၢၣ်ႇ ဟံၣ်(၁၁)ဖျၢၣ်ႇ သီခါဖၠၣ်တၢ်သူၣ်ထီၣ်(၂)ဖျၢၣ်ဒီးစဲးဂံာ်နံၣ်သိထံတၢ်သူၣ်ထီၣ်(၁)ဖျၢၣ် ခဲလၢာ်ဟးဂီၤ၀ဲဒၣ်(၁၂)ဖျၢၣ် အဂ့ၢ်န့ၣ် သ့ၣ်ညါဘၣ် န့ၣ်လီၤႉ
ဒ်န့ၣ်အသိးကဘီယူၤဟဲခးလီၤတၢ်၀ံၤလီၢ်ခံတကီၢ်ခါခဲအံၤဃီဖိပျဲၢ်သ၀ီဃုာ်ဒီးထံခၠံၣ်ဘီသ၀ီဖိခဲလၢာ်ဃၣ်ဃၣ် အိၣ်လၢသ၀ီပူၤတဘူၣ်လၢၤဘၣ်ဃ့ၢ်ထီၣ်ဟးအိၣ်၀ဲလၢတၢ်လီၢ်အဂၤအဂ့ၢ်န့ၣ် ဒူသထူၣ်ကီၢ်ရ့ၣ်ခိၣ် ပဒိၣ် စီၤစိမၠ့ၣ် စံးအါထီၣ်၀ဲန့ၣ်လီၤႉ
အ၀ဲစံး၀ဲလၢ“ကဘီယူၤဟဲကွံာ်လီၤတၢ်၀ံၤဘျီန့ၣ်ဃီဖိပျဲၢ်သ၀ီဒီးထံခၠံၣ်ဘီသ၀ီဖိဒုအိၣ်လၢသ၀ီပူၤတဘူၣ်လၢၤဘၣ် စံၣ်ထီၣ်အိၣ်လၢတၢ်ချၢမံၤခိၣ်ၦၢ်ကျါလၢထံခံလၢာ်လံႉအ၀ဲသ့ၣ်ဘၣ်ယိၣ်၀ဲလၢၦၤကဟဲကွံာ်လီၤကဒီးတၢ်လၢခံတဘျီကဒီးဒ်န့ၣ်ႉဒုၣ်ဒါန့ၣ်ခဲအံၤတပာ်၀ဲဒၣ်တၢ်ခးပနီၣ်လၢၦၤဖီၣ်စုက၀ဲၤဖိလၢၤဘၣ်ႉပာ်၀ဲဒၣ်တၢ်ခးပနီၣ်လၢဒူဖိသ၀ီဖိႇ တၢ်ဘူၣ်တၢ်ဘါလီၢ်ကျဲႇ ထံဖိကီၢ်ဖိလၢဆီၣ်ထွဲ၀ဲဒၣ်တၢ်ပၢၢ်ဆၢတဖၣ်န့ၣ်ပာ်၀ဲဒၣ်လၢအဒုၣ်အဒါလီၤ”အဂ့ၢ်န့ၣ် စံး၀ဲ န့ၣ်လီၤႉ
တချုးလၢပယီၤသုးကဘီယူၤဟဲခးလီၤတၢ်လၢဃီဖိပျဲၢ်သ၀ီပူၤဒံးဘၣ်အခါအပူၤကွံာ်တသီခံသီအတီၢ်ပူၤန့ၣ် ကဘီယူၤဟဲဆှၣ်တၢ်တလီၢ်လီၢ်ဒီးဟဲဆှၣ်တၢ်ဖဲန့ၣ်၀ံၤလီၢ်ခံဟဲခးလီၤ၀ဲတၢ်ကဲထီၣ်သးဒ်အံၤလီၤအဂ့ၢ်န့ၣ် သ့ၣ်ညါဘၣ် န့ၣ်လီၤႉ
