လါအ့ဖြ့ၣ် ၂၄ သီႇ ၂၀၂၄ နံၣ်ႇ ခ့ၣ်အဲးစံၣ်
ခ့ၣ်အဲၣ်ယူၣ်-ကီၢ်သူလ့ၤတၢ်ပၢဒူပျာ်ယာ်ကီၢ်ရ့ၣ်သုးက့(၆)ဟီၣ်က၀ီၤအပူၤဖဲလါအ့ဖြ့ၣ်(၂၃)သီဂီၤခီအဆၢက တီၢ်န့ၣ်ပယီၤသုးကီၣ်ကးကဘီယူၤဒုးသုးဟဲတ့ၢ်လီၤမ့ၢ်ပိၢ်လၢ၀ီၢ်ရ့ၣ်ကီၢ်ဆၣ်၀ဲၤဒၢးဒီး(ယွၤသီၣ်ထၣ်)တၢ်မၤလိကၠိအပူၤအဂ့ၢ်သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ
ဖဲမဟါဂီၤခီ(၉)နၣ်ရံၣ်ဘျဲၣ်အဆၢကတီၢ်န့ၣ်မ့ၢ်လၢပယီၤသုးကဘီယူၤဟဲတ့ၢ်လီၤမ့ၣ်ပိၢ်အဃိဘၣ်ဟးဂီၤကွံာ်၀ဲ၀ီၢ်ရ့ၣ်ကီၢ်ဆၣ်ဟီၣ်က၀ီၤအပူၤ(ယွၤသီၣ်ထၣ်)တၢ်မၤလိကၠိတီၤဒၢး(၃)ဖျၢၣ်အသိးဖဲဂီၤခီ(၁၁)နၣ်ရံၣ်ခိၣ်ဃၢၤအတီၢ်ပူၤန့ၣ်ဟဲတ့ၢ်လီၤကဒီးမ့ၣ်ပိၢ်လၢ(ဖါပြး)သ၀ီအဃၢၤခ့ၣ်အဲၣ်ယူၣ်၀ီၢ်ရ့ၣ်ကီၢ်ဆၣ်၀ဲၤဒၢးဟီၣ်က၀ီၤအဃိဘၣ်ဟးဂီၤကွံာ်၀ဲဘျီၣ်တၢ်သူၣ်ထီၣ်တဖျၢၣ်အဂ့ၢ်သ့ၣ်ညါဘၣ်န့ၣ်လီၤႉ
လီၢ်က၀ီၤဖိတဂၤစံး၀ဲလၢ “တၢ်ဒုးတၢ်ယာ်တအိၣ်နီၤတမံၤဘၣ်ႉ အ၀ဲသ့ၣ်ဟဲတ့ၢ်လီၤမ့ၣ်ပိၢ်ဒ်အံၤလီၤမီၤႉ တၢ် လၢပယီၤသုးဟဲတ့ၢ်လီၤမ့ၣ်ပိၢ်ခံတီၤန့ၣ်တဘူးလိာ်သးဘၣ်ႉ ပသ့ၣ်ညါဘၣ်န့ၣ်တၢ်လီၢ်ခံတီၢ်လီၤႉ တၢ်သူၣ် ထီၣ်န့ၣ်တၢ်ဘၣ်ဒိဘၣ်ထံးအိၣ်၀ဲအါလီၤႉ မ့မ့ၢ်ၦၤကမျၢၢ်ဒုတၢ်ဘၣ်ဒိဘၣ်ထံးတအိၣ်ဘၣ်အဃိန့ၣ်ကိၢ်ညါဒံးႉ တၢ်လီၢ်လၢအိၣ်တ့ၢ်န့ၣ်ဘၣ်သ့ၣ်သ့ၣ်ကခးဒုကခး၀ဲလီၤႉ မ့ၢ်ကျိဖးဒိၣ်ဧါႇ ဟဲတ့ၢ်လီၤမ့ၣ်ပိၢ်ကလုၢ်သီၣ်ဧါတ သ့ၣ်ညါဘၣ်ႉ အကလုၢ်ဒုသီၣ်ဖးဒိၣ်ညါႉ နၢ်ဟူသီၣ်၀ဲ(၈)ထံၣ်မီၤနီၤ” အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်က စီၣ်န့ၣ်လီၤႉ
တကီၢ်ခါခဲအံၤမ့ၢ်၀ဲ(ဖါပြး)သ၀ီမၤလၤမၤကပီၤ၀ဲတနံၣ်တဘျီဃိၣ်ဧိၤ၀ၣ်ဧိၤအဆၢကတီၢ်အသိးတၢ်လီၢ်တၢ်ကျဲၤလၢပယီၤသုးကီၣ်ကးဟဲတ့ၢ်လီၤမ့ၣ်ပိၢ်အံၤန့ၣ်ခီဖျိဘူး၀ဲဒီးတၢ်မၤလၤကပီၤ၀ဲဘူးဧိၤပွဲဧိၤတၢ်လီၢ်အဃိၦၤကမျၢၢ်လၢဟဲထီၣ်ဘူးဧိၤပွဲဧိၤသ့ၣ်တဖၣ်ဘၣ်ဃ့ၢ်အိၣ်ကဒုသးအဂ့ၢ်ဒူသ၀ီဖိသ့ၣ်တဖၣ်စံး၀ဲန့ၣ်လီၤႉ
လၢန့ၣ်အမဲာ်ညါ၀ီၢ်ရ့ၣ်ကီၢ်ဆၣ်ဟီၣ်က၀ီၤအပူၤသုးကီၣ်ကးတကပၤဟးဆှၣ်ကွၢ်တၢ်ဒီးကဘီယူၤဒုးသုးအိၣ်၀ဲကိးနံၤဒဲးဃၣ်ဃၣ်အသိးဖဲတနံၤအံၤဟါခီစ့ၢ်ကီးဟဲဆှၣ်ကွၢ်တၢ်အိၣ်ဒံး၀ဲအဂ့ၢ်သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ
ဒ်န့ၣ်အသိးခ့ၣ်အဲၣ်ယူၣ်-ဒူသထူၣ်ကီၢ်ရ့ၣ်ဖၣ်အၣ်ကီၢ်ဆၣ်ဟီၣ်က၀ီၤအပူၤဖဲပူၤကွံာ်လါအ့ဖြ့ၣ်(၂၀)သီအနံၤ န့ၣ်စ့ၢ်ကီးပယီၤသုးကီၣ်ကးအံၤတၢ်ဒုးတၢ်ယာ်ကဲထီၣ်သးတအိၣ်ဘၣ်ဘၣ်ဆၣ်ဟဲတ့ၢ်လီၤမ့ၣ်ပိၢ်ဒီးကဘီယူၤဖဲ(ထံၤနူ)သ၀ီအသီခါဖၠၣ်ကရၢၢ်ပူၤအဃိဘၣ်ဒိဒံး၀ဲဒၣ်ၦၤလီၢ်က၀ီၤဖိ(၂)ဂၤအဂ့ၢ်သ့ၣ်ညါဘၣ်န့ၣ်လီၤႉ
