ပယီၤသုးလၢအဟဲထီၣ်သ့ၣ်ကါညံၣ်နီၣ်တဖၣ်တၢ်ခိးခးလၢကျဲအဃိ(၁၀)သီအတီၢ်ပူၤသံ(၂၀)ဂၤႇဘၣ်ဒိအါအါဂီၢ်ဂီၢ်

လါအ့ဖြ့ၣ် ၄ သီႇ ၂၀၂၄ နံၣ်ႇ ခ့ၣ်အဲးစံၣ်

လၢကညီကီၢ်စဲၣ် ဒူပျာ်ယာ်ကီၢ်ရ့ၣ် ကီးတရံးကီၢ်ဆၣ် မၠၣ်၀တံၣ်၀့ၢ်ကပၤ ပယီၤသုးလၢအကဟဲထီၣ်(စစ်ကူ)လၢ သ့ၣ်ကါညံၣ်နီၣ်တဖၣ်အံၤ ခီဖျိတၢ်ခိးအ၀ဲသ့ၣ်လၢကျဲပူၤအဃိ လၢ(၁၀)သီအတီၢ်ပူၤ သံ၀ဲဒၣ်(၂၀)ဂၤဒီး ဘၣ်ဒိဘၣ်ထံး ၀ဲဒၣ်အါအါဂီၢ်ဂီၢ်အဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သးထုးထီၣ်ပာ်ဖျါ၀ဲဖဲလါအ့ဖြ့ၣ် ၂ သီအနံၤန့ၣ်လီၤႉ

ပယီၤသုးအံၤလၢကဟဲထီၣ်မၤန့ၢ်ကဒါက့ၤမၠၣ်၀တံၣ် သ့ၣ်ကါညံၣ်နီၣ်(၃၅၅)သုးကလၢၤလၢတၢ်ပၢၢ်ဆၢသုးပာ်ဖှိၣ် ထီၣ်မၤန့ၢ်၀ဲအံၤအဂီၢ်န့ၣ် စးထီၣ်လါမးရှး ၁၅ သီ တုၤလၢ ၂၅ သီ လၢ(၁၀)သီအတီၢ်ပူၤ ခီဖျိပယီၤသုးလၢ အဟဲထီၣ်(စစ်ကူ)တဖၣ်အံၤ (KNLA)တၢ်ပၢၢ်ဆၢသုးပာ်ဖှိၣ်ခိးခးအ၀ဲသ့ၣ်လၢကျဲပူၤတၢ်ဒ့ၣ်စၢၤအဃိ ပယီၤသုးသံ ဘၣ်ဒိဘၣ်ထံးကဲထီၣ်အသးအါအါဂီၢ်ဂီၢ်ဒ်အံၤလီၤအဂ့ၢ်န့ၣ် ခ့ၣ်အဲၣ်ယူၣ် စံး၀ဲန့ၣ်လီၤႉ

ဒ်ခ့ၣ်အဲၣ်ယူၣ်လံာ်တၢ်ပာ်ဖျါအပူၤပာ်ဖျါ၀ဲအသိးန့ၣ် ပယီၤသုးလၢအဟဲထီၣ်(စစ်ကူ)လၢတၢ်ပၢၢ်ဆၢသုးကရူၢ်ခိးခး၀ဲ သ့ၣ်တဖၣ်အံၤန့ၣ်မ့ၢ်၀ဲ(ခလရ-၉၇)သုးရ့ၣ်ႇ(ခမရ-၁၀၂),(၁၁၈),(၅၄၆)ဒီး(၃၅၆)သုးရ့ၣ်အၦၤသ့ၣ်တဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

လၢ(၁၀)သီအတီၢ်ပူၤဖဲတၢ်ဒုးကဲထီၣ်လၢခံခီခံကပၤအဘၢၣ်စၢၤအခါခီဖျိပယီၤသုးခးလီၤကျိဖးဒိၣ်ႇကဘီယူၤဟဲခးလီၤတၢ်အဃိကမျၢၢ်သံ(၁)ဂၤႇဘၣ်ဒိ၀ဲဒၣ်(၃)ဂၤဒီးၦၤကမျၢၢ်အဟံၣ်အဃီဟးဂူာ်ဟးဂီၤအိၣ်၀ဲဒၣ်တနီၤအဂ့ၢ်န့ၣ် လံာ်တၢ်ပာ်ဖျါ အပူၤ ပာ်ဖျါ၀ဲန့ၣ်လီၤႉ

ဒ်န့ၣ်အသိးလၢတၢ်ခးလိာ်သးကဲထီၣ်အတီၢ်ပူၤအံၤမ့မ့ၢ်လၢ(KNLA)တၢ်ပၢၢ်ဆၢသုးပာ်ဖှိၣ်တကပၤန့ၣ် ဘၣ်ဟ့ၣ်လီၤကွံာ် အသးသမူ(၁)ဂၤဒီးဘၣ်ဒိ၀ဲဒၣ်(၄)ဂၤအဂ့ၢ်န့ၣ် ခ့ၣ်အဲၣ်ယူၣ် စံး၀ဲန့ၣ်လီၤႉ

လၢန့ၣ်အမဲာ်ညါဆၢကတီၢ်အပူၤန့ၣ်တၢ်ပၢၢ်ဆၢသုးပာ်ဖှိၣ်မၤန့ၢ်၀ဲ MA-1, MA-2, MA-3, MAS, MA-5, 38 mm ကျိသ့ၣ် တဖၣ်ခဲလၢာ်(၉)ခိၣ်ဒီး စုကွံာ်မ့ၣ်ပိၢ်(၂၂)ဖျၢၣ်ႇ MA, MA-5 ကျိဒၢခဲလၢာ်(၄၃)ခါႇ 5.56, 7.62, 38 mm အချံ (၆၀၀၀)ဘျဲၣ်ဃုာ်ဒီးကျိချံၦာ်သၣ်ႇသုးတၢ်ဖိတၢ်လံၤလၢအဂၤသ့ၣ်တဖၣ်အါအါဂီၢ်ဂီၢ်အဂ့ၢ်န့ၣ် သ့ၣ်ညါဘၣ် န့ၣ်လီၤႉ

စးထီၣ်ဖဲအပူၤကွံာ်လါမးရှး (KNLA)တၢ်ပၢၢ်ဆၢသုးပာ်ဖှိၣ်ထီၣ်၀ဲ မၠၣ်၀တံၣ် သ့ၣ်ကါညံၣ်နီၣ် ပယီၤသုးခီၣ်ချ့ သုးရ့ၣ် (ခမရ-၃၅၅),(၃၅၆)ဒီးပၢၤကီၢ်၀ဲၤလီၢ်န့ၢ်၀ံၤလီၢ်န့ၣ် တၢ်ဒုးဆဲးဆူၣ်ထီၣ်၀ဲလၢခံခီခံကပၤအဘၢၣ်စၢၤ တုၤလၢခဲအံၤ တစုဒီးတကးဒံးဘၣ်အမဲာ်ညါပယီၤသုးကဘီယူၤဟဲခးလီၤတၢ်ႇပယီၤသုးခးလီၤကဒါကျိဖးဒိၣ်လၢ ဒူသ၀ီလၢအိၣ်ဘူး ဖဲတၢ်ခိၣ်တၢ်ဃၢၤ၀ဲန့ၣ်ကအိၣ်လၢကိးမုၢ်နံၤဃၣ်ဃၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ