သထူၣ်ကီၢ်ဆၣ်ပူၤ ကမျၢၢ်လၢအဃ့ၢ်ထီၣ်တဖၣ်လိၣ်ဘၣ်အီၣ်အီအိၣ်ဆိးကသံၣ်ကသီတၢ်ဆီၣ်ထွဲမၤစၢၤအဂ့ၢ် ၦၤဘၣ်မူဘၣ်ဒါစံး၀ဲ

လါမ့ၤ ၂၁ သီႇ ၂၀၂၄ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁) သထူၣ်ကီၢ်ဆၣ်အပူၤ တပျဲကျိတိၤတၢ်ဂ့ၢ်ပိာ်ထွဲအဃိ လီၢ်က၀ီၤကမျၢၢ်လၢ အဃ့ၢ်ထီၣ်သ့ၣ်တဖၣ်တကီၢ်ခါခဲအံၤလိၣ်ဘၣ်၀ဲဒၣ်တၢ်အီၣ်တၢ်အီႇအိၣ်ဆိးလီၢ်ကျဲဒီးကသံၣ်ကသီတၢ်ဆီၣ်ထွဲ မၤစၢၤသ့ၣ်တဖၣ်အဂ့ၢ်န့ၣ် ကီၢ်ရ့ၣ်ၦၤဘၣ်မူဘၣ်ဒါစံး၀ဲအသိးသ့ၣ်ညါဘၣ်န့ၣ်လီၤႉ

ဖဲအပူၤကွံာ်လါမ့ၤ ၁၁ သီအနံၤန့ၣ် တၢ်လဲၤမၤပိၢ်ဖးထီၣ်၀ဲတပျဲကျိတိၤအံၤဒီး ဖဲန့ၣ်ခီဖျိပယီၤသုးလၢအိၣ်ဘူးဖဲန့ၣ် သ့ၣ်တဖၣ်ခးလီၤကဒါကျိဖးဒိၣ်ဆူဒူသ၀ီပူၤကိးမုၢ်ဒဲးအဃိ စွ့ၣ်ယီၣ်ပၠးကရူၢ်ကမျၢၢ်အဂၤ(၄၀၀၀)ဘျဲၣ်လၢအဃ့ၢ်ထီၣ် တဖၣ်အံၤလဲၤစံၣ်အိၣ်၀ဲလၢပှၤဒူပှၤသ၀ီ,ကစၢၢ်ကလိကျါတကးဒံးဘၣ်ခဲအံၤလိၣ်ဘၣ်၀ဲအီၣ်အီအိၣ်ဆိးလီၢ်ကျဲဒီးကသံၣ် ကသီတၢ်ဆီၣ်ထွဲမၤစၢၤအဂ့ၢ်န့ၣ် ဒူသထူၣ်ကီၢ်ရ့ၣ် ၦၤကတိၤတၢ်ပၢ ပဒိၣ်စီၤအ့နဲၤ စံး၀ဲဒ်အံၤန့ၣ်လီၤႉ

“ၦၤကမျၢၢ်လၢအဃ့ၢ်ထီၣ်တဖၣ်ခဲအံၤန့ၣ်အီၣ်ဒၣ်အနီၢ်ကစၢ်တရံးလီၤႉလၢအဂၤဒုတၢ်ဆီၣ်ထွဲမၤစၢၤတအိၣ်နီမံၤဒံးဘၣ်ႉအဃိအ၀ဲသ့ၣ်ကွၢ်ဆၢၣ်မဲာ်ဘၣ်အိၣ်ဆိးလီၢ်ကျဲႇတၢ်အီၣ်တၢ်အီတၢ်ကီတၢ်ခဲဒီးကသံၣ်ကသီလၢတၢ်အိၣ်ဆူၣ်အိၣ်ချ့ အဂီၢ်ႉတၢ်သ့ၣ်တဖၣ်န့ၣ်ဘၣ်ကွၢ်ဆၢၣ်မဲာ်၀ဲဒၣ်ထီဘိလီၤႉတနီၤခီန့ၣ်ဟးဃ့ၢ်အိၣ်ကဒု၀ဲဒၣ်လၢၦၤဒူၦၤသ၀ီႇၦၤဟံၣ်ၦၤ ဃီအဃိကီခဲဘၣ်အီၤစ့ၢ်ႉတနီၤခီဒုဟးအိၣ်ကဒုလၢသီခါဖၠၣ်ႇတနီၤခီဒုစံၣ်အိၣ်လၢမံၤခိၣ်ၦၢ်ကျါႇထံနာ်ထံခံအိၣ်ႉ ခဲအံၤမူခိၣ်စူၤပၠးဘျီကွၢ်ဆၢၣ်မဲာ်ဘၣ်၀ဲအိၣ်ဆိးလီၢ်ကျဲႇတၢ်အီၣ်တၢ်အီဒိၣ်ဒိၣ်မုၢ်မုၢ်လီၤႉ”အဂ့ၢ်န့ၣ် စံးဘၣ်ခ့ၣ်အဲးစံၣ်- ကညီတၢ်ကစီၣ် န့ၣ်လီၤႉ

လၢန့ၣ်အမဲာ်ညါတကီၢ်ခါခဲအံၤခီဖျိပယီၤသုးသ့ၣ်တဖၣ်အံၤခးလီၤဒံးကျိဖးဒိၣ်ဆူသ၀ီပူၤတပယူာ်ဃီအဃိ ဒူသ၀ီကမျၢၢ်လၢအဃ့ၢ်ထီၣ်သ့ၣ်တဖၣ်တုၤလၢခဲအံၤက့ၤအိၣ်လၢအဟံၣ်အဃီတဘူၣ်ဒံးဘၣ်အဂ့ၢ်န့ၣ် ပဒိၣ် စီၤအ့နဲၤ စံးအါထီၣ်၀ဲန့ၣ်လီၤႉ

“ဖဲတိၤလီၤၦီၢ်၀ံၤအလီၢ်ခံၦၤကမျၢၢ်လၢအဃ့ၢ်ထီၣ်တဖၣ်န့ၣ်ဟဲက့ၤအိၣ်တအိၣ်နီတဂၤဒံးဘၣ်ႉဘၣ်မနုၤအဃိလဲၣ်န့ၣ် ခဲအံၤန့ၣ်ပယီၤသုး(၃၁၄),(ခမရ-၉)ဒီး(ခလရ-၈)သ့ၣ်တဖၣ်န့ၣ်ခးလီၤကျိဖးဒိၣ်ကိးမုၢ်နံၤကိးမုၢ်ဆါအဃိ ဟဲက့ၤအိၣ်၀ဲ တဘူၣ်နီဂၤဒံးဘၣ်ႉခဲအံၤသုးမီၤစိရိၤတဖုအံၤခးလီၤကျိဖးဒိၣ်ဖဲတီၤယၤကရူၢ်ႇစွ့ၣ်ယီၣ်ပၠးကရူၢ်ႇ၀ံရီကရူၢ်ႇတကးဒံးဘၣ်န့ၣ်ခးစိ၀ဲဒၣ်ဆူတရဲၢ်ခံကရူၢ်ႇတမီၤဒီးႇနီၣ်ကတိးကရူၢ်သ့ၣ်တဖၣ်အပူၤႉခးစိကျိဖးဒိၣ်အဃိဒူဖိသ၀ီဖိတဖၣ် ဘၣ်အိၣ်လၢ တၢ်ပျံၤတၢ်ဖုးတၢ်ဘၣ်ယိၣ်ဘၣ်ဘှီထီဘိလီၤ”အဂ့ၢ်န့ၣ် စံး၀ဲန့ၣ်လီၤႉ

လီၢ်က၀ီၤကမျၢၢ်လၢအဃ့ၢ်ထီၣ်အဂၤလွံၢ်ကထိဘျဲၣ်သ့ၣ်တဖၣ်အံၤန့ၣ်မ့ၢ်၀ဲလါအီၣ်ဃၢၤသ၀ီႇပါအီၣ်ကိႇဒီယွၣ်ႇ စးရီသ၀ီႇကလီာ်ဃၢၤႇမယါကိသ၀ီဒီးမံၣ်ကၠီအဲၣ်သ၀ီသ့ၣ်တဖၣ်ဒီး သ၀ီသ့ၣ်တဖၣ်အံၤဟံၣ်ခိၣ်ပာ်ဖှိၣ်အိၣ်၀ဲ (၇၈၇)ဖျၢၣ်ႇၦၤနီၣ်ဂံၢ်ခဲလၢာ်အိၣ်၀ဲ(၄၆၄၀)ဂၤအဂ့ၢ်န့ၣ် ဒူသထူၣ်ကီၢ်ရ့ၣ်တၢ်မၤနီၣ်စရီပူၤအသိးသ့ၣ်ညါဘၣ်န့ၣ်လီၤႉ

ဒ်န့ၣ်အသိးဖဲလါမ့ၤ ၁၈ သီအနံၤစ့ၢ်ကီး ခီဖျိပယီၤသုး(ခမရ-၉)ခးလီၤကျိဖးဒိၣ် ၅ ဖျၢၣ် လီၤတဲာ်ပိၢ်ဖးထီၣ်လၢ နိၣ်ဖးထီသ၀ီဃၢၤ(၃)ဖျၢၣ်ႇသိအ့ၤစူၣ်သ၀ီပူၤ(၂)ဖျၢၣ်အဃိ ကျိဖးဒိၣ်အက့အခီဘၣ်ဒိဘၣ်ထံး၀ဲၦၤကမျၢၢ်(၃)ဂၤ ဖဲန့ၣ်အကျါပၣ်ဃုာ်ဖိသၣ်ဆံး(၄)နံၣ်တဂၤအဂ့ၢ်န့ၣ် ဒူသထူၣ်ကီၢ်ရ့ၣ် တၢ်ကစီၣ်ထုးထီၣ်ပာ်ဖျါ ၀ဲဖဲမဟါလါမ့ၤ ၂၀ သီ အနံၤန့ၣ်လီၤႉ

စးထီၣ်ဖဲတၢ်လဲၤမၤပိၢ်ဖးထီၣ်သထူၣ်ကီၢ်ဆၣ်ပူၤ တပျဲကျိတိၤ၀ံၤလီၢ်ခံ ပယီၤသုးအသုးရ့ၣ်လၢအိၣ်ဖျါတၢ်ဖီခိၣ် သ့ၣ်တဖၣ်အံၤ ခးလီၤကဒါကျိဖးဒိၣ်ဆူဒူသ၀ီလၢအိၣ်တၢ်ခိၣ်တၢ်ဃၢၤဖဲန့ၣ်တဖၣ်အပူၤကိးမုၢ်နံၤဒဲး တုၤလၢခဲအံၤ တစုအဃိၦၤကမျၢၢ်သံႇဘၣ်ဒိဘၣ်ထံးကဲထီၣ်သးတလီၢ်လီၢ်အမဲာ်ညါဟံၣ်ဃီတၢ်သူၣ်ထီၣ်ႇတၢ်ထူၣ်တၢ်ဘိစ့ၢ်ကီး ဘၣ်ဒိဘၣ်ထံးဟးဂီၤ၀ဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ