လါမ့ၤ ၁၆ သီႇ ၂၀၂၄ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁) သထူၣ်ကီၢ်ဆၣ်အပူၤ တၢ်လဲၤမၤပိၢ်ဖးထီၣ် တပျဲကျိတိၤ၀ံၤစးထီၣ်လါမ့ၤ ၁၁ သီတုၤလၢ ၁၃ သီလၢသၢသီအတီၢ်ပူၤ ခီဖျိပယီၤသုးခးလီၤကျိဖးဒိၣ်တပယူာ်ဃီ အဃိ လီၢ်က၀ီၤကမျၢၢ်အဂၤ(၄၀၀၀)ဘျဲၣ်ဘၣ်ဃ့ၢ်ထီၣ်၀ဲဒၣ်အဂ့ၢ်န့ၣ် ဒူသထူၣ်ကီၢ်ရ့ၣ် တၢ်ကစီၣ်ထုးထီၣ်ပာ်ဖျါ၀ဲ အသိး သ့ၣ်ညါဘၣ်န့ၣ်လီၤႉ
ဖဲလါမ့ၤ ၁၁ သီအနံၤန့ၣ် တၢ်လဲၤမၤပိၢ်ဖးထီၣ်၀ဲတပျဲတိၤအံၤဒီးဖဲန့ၣ် သုးကီၣ်ကးအမျိာ်သုး(၃၁၄),(ခမရ-၉),(ခလရ-၈) သုး ရ့ၣ်တဖၣ်အံၤခီဖိအျ၀ဲသ့ၣ် ခးလီၤကဒါ၀ဲကျိဖးဒိၣ်ဆူလီၢ်က၀ီၤဒူသ၀ီတဖၣ်အပူၤကိးမုၢ်နံၤမုၢ်နၤ တပယူာ်ဃီအဃိ ဒူသ၀ီလီၢ်က၀ီၤကမျၢၢ်လၢအအိၣ်ဘူးဖဲန့ၣ်သ့ၣ်တဖၣ်ပျံၤတၢ်ဖုးတၢ်ဘၣ်ဃ့ၢ်ထီၣ်ဟးစံၣ်အိၣ်၀ဲဒၣ် လၢတၢ်လီၢ်အဂၤ ဟဲကဲထီၣ်အသးဒ်အံၤလီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဘၣ်ဃးဒီးတၢ်ဂ့ၢ်ကဲထီၣ်သးအံၤန့ၣ်သထူၣ်ကီၢ်ဆၣ် နဲၣ်ရွဲၣ်သဃဲၤ စီၤမိစီၣ်ထဲၣ် စံး၀ဲလၢ“ပကီၢ်ဆၣ်ပူၤဒုဒုၣ်ဒါန့ၣ် ခးတၢ် ထီဘိကွၢ်ဖဲကလီၤတဲာ်လီၤႉပမ့ၢ်တဲလိၤလိၤန့ၣ်အါတက့ၢ်ၦၤကမျၢၢ်န့ၣ်ဘၣ်ဒိဘၣ်ထံးသံထီဘိလီၤႉတၢ်ဒုးမ့ကဲထီၣ်တဘျီလၢ်လၢ်န့ၣ်ဒုၣ်ဒါန့ၣ်ခးကျိအါထီၣ်မီၤနီၤႉကမျၢၢ်ခီန့ၣ်တၢ်ဒုးတၢ်ယၤမ့ကဲထီၣ်န့ၣ်အ၀ဲသ့ၣ်ဘၣ်ဃ့ၢ်မှံဟးဖျိး တနီၤန့ၣ်လဲၤ စံၣ်အိၣ်ဒၣ်လၢဒဲလၢခူပူၤ၀့ၢ်ပူၤႇမုဂါဖါတံၢ်ဟံၣ်အိၣ်တနီၤစ့ၢ်ႉစံၣ်ထီၣ်လၢလာ်တနီၤလၢခိတနီၤလဲၤအိၣ်၀ဲ လၢတဂၤလၢ အကစၢ်ကျီးကစၢ်ဒ်န့ၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤန့ၣ်လီၤႉ
လၢန့ၣ်အမဲာ်ညါတၢ်သၢသီအတီၢ်ပူၤအံၤပယီၤသုးခးလီၤ၀ဲဒၣ်ကျိဖးဒိၣ်အိၣ်၀ဲခဲလၢာ်အဖျၢၣ်(၁၀၀)ဘျဲၣ်ဒီး လၢတၢ်န့ၣ် အဃိဒူသ၀ီလၢအဃ့ၢ်ထီၣ်သ့ၣ်တဖၣ်န့ၣ်မ့ၢ်၀ဲ လါအီၣ်ဃၢၤသ၀ီႇပါအီၣ်ကိသ၀ီႇဒီယွၣ်သ၀ီႇစးတရီႇ စွ့ၣ်ယီၣ်ပၠးႇ ကလီာ်ဃၢၤသ၀ီႇမယါကိႇမံၣ်ကၠီအဲၣ်ဒူသ၀ီသ့ၣ်တဖၣ်ဒီး သ၀ီသ့ၣ်တဖၣ်အံၤဟံၣ်ဒူၣ်ခဲလၢာ်ပာ်ဖှိၣ်အိၣ်၀ဲ (၇၈၇)ဖျၢၣ်ႇ ၦၤနီၣ်ဂံၢ်ခဲလၢာ်အိၣ်၀ဲ(၄၆၄၀)ဂၤအဂ့ၢ်န့ၣ် ကီၢ်ရ့ၣ်တၢ်မၤနီၣ်စရီအပူၤပာ်ဖျါ၀ဲန့ၣ်လီၤႉ
တကးဒံးဘၣ်ခီဖျိကျိဖးဒိၣ်အံၤအဃိကမျၢၢ်သံ၀ဲဒၣ်(၃)ဂၤဒီးဘၣ်ဒိ(၁၅)ဂၤအကျါပၣ်ဃုာ်၀ဲဒၣ်ဖိသၣ်(၅)ဂၤႇ ၦၤမိၢ်ဒၢ(၁)ဂၤဒီးဒ်န့ၣ်အသိးၦၤကမျၢၢ်အဟံၣ်အဃီဃုာ်ဒီးကျီးပူၤတၢ်မုၢ်တၢ်ဘိစ့ၢ်ကီးဟးဂီၤ၀ဲဒၣ်အိၣ်အဂ့ၢ်န့ၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ
လၢန့ၣ်အမဲာ်ညါဒူသ၀ီၦၤကမျၢၢ်လၢအဃ့ၢ်ထီၣ်တဖၣ်အံၤလိၣ်ဘၣ်၀ဲဒၣ်တၢ်အီၣ်တၢ်အီဒီးဆူၣ်ချ့တၢ်ဆီၣ်ထွဲမၤစၢၤ အသိးကမျၢၢ်တနီၤလၢအတဃ့ၢ်ထီၣ်ဘၣ်အိၣ်ခိးကွၢ်အဟံၣ်အဃီအဆၣ်ဖိကီၢ်ဖိတဖၣ်စ့ၢ်ကီးဘၣ်အိၣ်၀ဲဒၣ်လၢတၢ်ပျံၤတၢ်ဖုးပူၤအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါလၢအဂၤတဂၤစ့ၢ်ကီး စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤႉ
“ဖဲတိၤလီၤၦီၢ်၀ံၤဘျီန့ၣ်ဒူသ၀ီလၢအိၣ်ဘူးတပျဲတိၤတဖၣ်န့ၣ်ၦၤကမျၢၢ်န့ၣ်အိၣ်လၢအဟံၣ်အဃီတဘူၣ်လၢၤဘၣ်မီၤနီၤႉ ဒုၣ်ဒါသၢဒူၣ်အံၤခးလီၤကျိဖးဒိၣ်အဃိၦၤကမျၢၢ်ဘၣ်စံၣ်မှံဟးဖျိးလၢကစၢၢ်ခိၣ်ကစၢၢ်လာ်လၢခူလၢ၀့ၢ်ႉ မ့ဘၣ်တဲန့ၣ် တၢ်အီၣ်တၢ်န့ၣ်တၢ်ကီတၢ်ခဲအိၣ်ႉတၢ်ပျံၤတၢ်ဖုးဒၢးအါထီၣ်ဒိၣ်ဒိၣ်ႉစွ့ၣ်ယီၣ်ပၠးကရူၢ်န့ၣ်သ၀ီ(၆)ဖျၢၣ် ဃၣ်ဃၣ်န့ၣ် ဘၣ်စံၣ်မှံဟးဖျိးမီၤႉၦၤအိၣ်တ့ၢ်လၢသ၀ီပူၤန့ၣ်အိၣ်စှၤလီၤအ၀ဲသ့ၣ်နါက့အိၣ်၀ဲဒူဒူန့ၣ်အိၣ်၀ဲတဘူၣ်စ့ၢ်ဘၣ်ႉအထိၣ်ဖိဆီဖိတဖၣ်န့ၣ်ဟဲက့ၤဒုးအီၣ်၀ဲအဆၣ်ကွၢ်ထွဲ၀ဲ၀ံၤဘျီန့ၣ်လၢအ၀ဲသ့ၣ်တၢ်ဘံၣ်တၢ်ဘၢလီၢ်န့ၣ်က့ၤထီၣ်၀ဲလီၤ” အဂ့ၢ်န့ၣ် စံး၀ဲန့ၣ်လီၤႉ
သထူၣ်ကီၢ်ဆၣ်ပူၤ စးထီၣ်တၢ်လဲၤမၤပိၢ်ဖးထီၣ်တပျဲကျိတိၤ၀ံၤလီၢ်ခံတုၤလၢခဲအံၤတစု ပယီၤသုးခးလီၤကျိဖးဒိၣ်ဒီး ဒ်န့ၣ်အသိးဒုးယၤတၢ်ဖ့ၣ်စၢဆဲးကဲထီၣ်၀ဲဒၣ်လၢဟီၣ်က၀ီၤတၢ်ပၢၢ်ဆၢသုးကရူၢ်ဒီး ပယီၤသုးအဘၢၣ်စၢၤအိၣ်၀ဲကိးမုၢ်နံၤဒဲး ဃၣ်ဃၣ်အဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲအသိးသ့ၣ်ညါဘၣ်န့ၣ်လီၤႉ
