လါအမ့ၤ ၈သီႇ ၂၀၂၄နံၣ်ႇ ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ သုးက့(၄) ဘျံးဒ၀ဲၢ်ကီၢ်ရ့ၣ်ႇ ကစၢၢ်ဒိၣ်ကီၢ်ဆၣ်ႇ သုးရ့ၣ်(၁၂)ဟီၣ်က၀ီၤ ပဲၤသ၀ီပယီၤသုးကလၢၤအံၤ(KNLA)ဒီးသုးပာ်ဖှိၣ်ထီၣ်မၤန့ၢ်ကွံာ်၀ဲဖဲတဂီၤအံၤ(၈)နၣ်ရံၣ်ဘျဲၣ်အဆၢကတီၢ်ဒီးတၢ်ဖီၣ်မူဒံးန့ၢ်ဃုာ်ဒီးပယီၤသုးအဂၤ(၂၀)ဘျဲၣ်အဂ့ၢ်အဂ့ၢ်သ့ၣ်ညါဘၣ်လၢ (KNLA)သုးရ့ၣ်(၂၇)အၦၤဘၣ်မူဘၣ်ဒါအအိၣ်န့ၣ်လီၤႉ
ပဲၤသ၀ီပယီၤသုးကလၢၤအံၤ (KNLA)တီခိၣ်ရိၣ်မဲတၢ်ပၢၢ်ဆၢသုးပာ်ဖှိၣ်စးထီၣ် ထီၣ်ဒုး၀ဲလၢလါအမ့ၤ(၅)အနံၤအခါဒီး(၃)သီ၀ံၤအလီၢ်ခံဖဲတဂီၤအံၤန့ၣ်တၢ်ထီၣ်မၤန့ၢ်ကွံာ်အီၤအဂ့ၢ်(KNLA)သုးရ့ၣ်(၂၇)ႇသုးရ့ၣ်(၁၂)အသုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ် သုးခိၣ်မူဂ့ၤစံးဘၣ်၀ဲ ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤႉ
အ၀ဲစံး၀ဲလၢ“ပစးထီၣ်န့ၣ်လၢ(၅)သီနံၤႉသုးကလၢၤ၀ဲန့ၣ်ကိး၀ဲလၢ ပဒဲၣ်(ပဲၤ)သုးလၢၤႉအသံန့ၣ်ၦၤထံၣ်(၄)ဂၤႇဖီၣ်မူဒံးန့ၢ်(၂၂)ဂၤႇဃ့ၢ်ဖျိးလၢတၢ်ချၢ(၄)ဂၤန့ၣ်လီၤႉ”အဂ့ၢ်စံး၀ဲဒၣ်န့ၣ်လီၤႉ
လၢန့ၣ်အမဲာ်ညါပယီၤသုးကလၢၤ၀ဲအံၤန့ၣ်ဒ်အ၀ဲသ့ၣ်ဒိးန့ၢ်ဘၣ်တၢ်ကစီၣ်အသိးၦၤနီၣ်ဂံၢ်အိၣ်၀ဲ(၃၈)ဂၤဒီးမ့ၢ်အသုးထံးမနုာ်သ့ၣ်တဖၣ်လဲၣ်န့ၣ်တၢ်မၤလီၤတံၢ်အီၤအဖၢမုၢ်အသိး တၢ်ဖီၣ်မူဒံးန့ၢ်အကျါအ၀ဲသ့ၣ်ခိၣ်နၢ်ဒိၣ်ထီမ့ၢ်ဂ့ၤႇတၢ်မၤန့ၢ်တၢ်စုက၀ဲၤမနုာ်သ့ၣ်တဖၣ်လဲၣ်န့ၣ် တၢ်မၤလီၤတံၢ်အီၤအဖၢမုၢ်အဂ့ၢ် သုးဒိၣ်ဂီၢ်ဂ့ၢ် စီၤမူဂ့ၤတဲအါထီၣ်၀ဲဒၣ်စ့ၢ်ကီးန့ၣ်လီၤႉ
လၢတၢ်ထီၣ်မၤန့ၢ်၀ဲပဲသ၀ီပယီၤသုးကလၢၤဘျီ၀ဲအံၤန့ၣ်(KNLA)သုးရ့ၣ်(၁၂)ႇသုးရ့ၣ်(၂၇)ဒီးကမျၢၢ်တၢ်ဒီသဒၢသုး(PDF)သုးပာ်ဖှိၣ်တဖၣ်ပၣ်ဃုာ်၀ဲဒၣ်အဂ့ၢ်သ့ၣ်ညါဘၣ်အသိးခီဖျိတၢ်ထီၣ်ဒုးအ၀ဲသ့ၣ်သုးကလၢၤဒ်အံၤအဃိ သုးကီၣ်ကးအကဘီယူၤဟဲတ့ၢ်ခးလီၤတၢ်(၃)သီအတီၢ်ပူၤအဂ့ၢ်သ့ၣ်ညါဘၣ်လၢတၢ်ပၢၢ်ဆၢသုးပာ်ဖှိၣ်အၦၤဘၣ်မူဘၣ်ဒါအအိၣ်န့ၣ်လီၤႉ
