လါအီးကထိဘၢၣ် ၂၃သီ, ၂၀၂၄နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်,ကညီဒီကလုၥ်စၢဖှိၣ်ကရၢ,သုးက့(၇)ဖၣ်အၣ်ကီၢ်ရ့ၣ်ဟီၣ်ကဝီၤအပူၤ,မဟါလါအီးကထိဘၢၣ်(၂၂)သီအနံၤဂီၤခီအဆၢကတီၢ်,တၢ်ခးလီၤဒိးကညီတၢ်ထူၣ်ဖျဲးသုးမုၢ်ဒိၣ်(KNLA)လီၢ်ခၢၣ်သးသုးဝဲၤလီၢ်ခိၣ်သ့ၣ်ခိၣ်ဃၢၤဒီးဒြိဝံၤအလီၢ်ခံ,ဖၣ်အၣ်လူၢ်ပျဲၢ်ကျဲဒီတဘိအပူၤသုးကီၣ်ကးဒီးအသုးပၥ်ဖှိၣ်တဖၣ်မၤဃံးထီၣ်ဝဲတၢ်ဘံၣ်တၢ်ဘၢအဂ့ၢ်,လီၢ်ကဝီၤဖိတဖၣ်စံးဝဲန့ၣ်လီၤ.
ဖၣ်အၣ်ဒီးလူၢ်ပျဲၢ်ဝ့ၢ်ကျဲမုၢ်ဒီတဘိအဖီခိၣ်သုးကီၣ်ကးအသုးဖိသံၣ်ဖိဃုၥ်ဒီးသုးခိးကီၢ်ဆၢ(BGF)ပၥ်ဖှိၣ်သးပၥ်လီၤဝဲတၢ်ဘံၣ်တၢ်ဘၢဒီးသမံသမိးဝဲတၢ်အါထီၣ်အဂ့ၢ်,လီၢ်ကဝီၤကမျၢၢ်တဂၤစံးတ့ၢ်ဝဲဖဲမဟါဒ်အံၤန့ၣ်လီၤ.
အဝဲစံးဝဲလၢ“လူၢ်ပျဲၢ်ဖၣ်အၣ်ကျဲဒီတဘိ,တၢ်ပၥ်လီၤတၢ်ဘံၣ်တၢ်ဘၢလီၤ.ဝ့ၢ်နုၥ်လီၤကျဲခိၣ်ထိးတၢ်သမံသမိးတြဲၤတဖၣ်အပူၤပှၤခိးတၢ်အါမး.ပၥ်လီၤဝဲကျဲတၢ်ဘံၣ်တၢ်ဘၢအသိး,ပၥ်ခူသူၣ်သးမၤဝဲတၢ်ဘံၣ်တၢ်ဘၢအိၣ်စ့ၢ်ကီးလီၤ.ပှၤခိးတၢ်တဖၣ်န့ၣ်မ့ၢ်ဝဲ()ပယီၤသုး,ပယီၤပၢၤကီၢ်တဖၣ်လီၤ.ကိးပတုၥ်ဝဲသိလ့ၣ်,ဆဲးကဲးလၢအလဲၤခီဖဲန့ၣ်တဖၣ်ခဲလၢၥ်ဝံၤသမံသမိးဝဲအလီတဲစိ,ထၢၣ်တဖၣ်န့ၣ်လီၤ”အဂ့ၢ်စံးဝဲန့ၣ်လီၤ.
မဟါလါအီးကထိဘၢၣ်(၂၂)သီအနံၤဂီၤခီ(၁၀)နၣ်ရံၣ်ဘျဲၣ်အဆၢကတီၢ်တၢ်ခးလီၤဝဲ(Kamikaze Drone)တကလုၥ်အံၤ(၄)ဖျၢၣ်လၢ()သုးဝဲၤလီၢ်ခိၣ်သ့ၣ်တၢ်လီၢ်တၢ်ကျဲအပူၤအဃိ,(KNLA)အပှၤဘၣ်ဒိဝဲတဂၤဒီးတၢ်သူၣ်ထီၣ်တဖၣ်ဘၣ်ဟးဂီၤဝဲဒၣ်န့ၣ်လီၤ.
ဒီးတချူးဖဲတၢ်ခးလီၤဒြိဒံးဘၣ်အဆၢကတီၢ်သုးကီၣ်ကးအခိၣ်နၢ်ဒိၣ်ထီတဂၤဟဲဝဲသုးခိးကီၢ်ဆၢ(BGF)အခိၣ်(သုးခိၣ်ဒိၣ်စိ)စီၤခၠံၣ်သူၣ်အိၣ်ဆိးတၢ်လီၢ်လူၢ်ပျဲၢ်ကီၢ်ဆၣ်ဆူကၠၤအ့သဝီအတကပၤအပူၤအိၣ်ဝဲအဃိ,ပၥ်လီၤဝဲတၢ်ဘံၣ်တၢ်ဘၢဒ်အံၤလီၤအဂ့ၢ်လီၢ်ကဝီၤပှၤဟ့ၣ်တၢ်ကစီၣ်ဖိတဂၤပဲၥ်ဖးနီၤဖးစံးဝဲန့ၣ်လီၤ.
တကတီၢ်ဃီ,မဟါလါအီးကထိဘၢၣ်(၂၂)သီအနံၤအပူၤသုးကီၣ်ကးအံၤ,ခးလီၤဝဲဒြိလၢလူၢ်ပျဲၢ်ကီၢ်ဆၣ်အပူၤ(KNLA)တြဲၤတၢ်ဘံၣ်တၢ်ဘၢတဖၣ်အပူၤအိၣ်ဝဲအဂ့ၢ်,လီၢ်ကဝီၤပှၤဟ့ၣ်တၢ်ကစီၣ်ဖိတဖၣ်စံးစ့ၢ်ကီးဝဲဒၣ်န့ၣ်လီၤ.
ဒ်န့ၣ်အသိး,တၢ်ခးလီၤဒြိဆူ(KNLA)လီၢ်ခၢၣ်သးသုးဝဲၤလီၢ်ခိၣ်သ့ၣ်တၢ်လီၢ်တဖၣ်အပူၤဝံၤအလီၢ်ခံ,ဟီၣ်ကဝီၤကျဲတဖၣ်အပူၤ(KNLA)ပၥ်လီၤတၢ်ဘံၣ်တၢ်ဘၢအိၣ်ဝဲဒီးလီၢ်ကဝီၤဖိတဖၣ်ဘၣ်ဃ့ၢ်ထီၣ်ဝဲကဒုဝဲအသးအိၣ်ဝဲအဂ့ၢ်သ့ၣ်ညါဘၣ်န့ၣ်လီၤ