လါဖ့ၤဘြူၤအါရံၤ ၃ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁) ကၠဲးထိၣ်ကီၢ်ဆၣ်အပူၤ တနံၤဃီအတီၢ်ပူၤ ခီဖျိပယီၤသုးခးလီၤ ကျိဖးဒိၣ်ဒီး ပျၢ်လီၤ၀ဲဒြိတ့ၢ်လီၤ၀ဲမ့ၣ်ပိၢ်အဃိ တနံၤဃီအတီၢ်ပူၤ ပှၤကမျၢၢ်သံ(၁)ဒီးဘၣ်ဒိ၀ဲ(၉)ဂၤအဂ့ၢ်န့ၣ် သ့ၣ်ညါဘၣ်လၢ ကီၢ်ရ့ၣ်ပှၤဘၣ်မူဘၣ်ဒါအအိၣ်န့ၣ်လီၤ.
ကၠဲးထိၣ်ကီၢ်ဆၣ်ပူၤ ဖဲလါဖ့ၤဘြူၤအါရံၤ ၁ သီ ဂီၤခီ ၇း၃၀ ဘျဲၣ်အဆၢကတီၢ်န့ၣ် ပယီၤသုး(၃၁၀)အမျိၥ်သုး ခးလီၤကျိဖးဒိၣ် တဖျၢၣ် လီၤတဲၥ်ပိၢ်ဖးထီၣ်၀ဲလၢခရၢၢ်ကရူၢ် ရီဘၢၣ်ကျီးပူၤအဃိ ဘၣ်ဒိ၀ဲပှၤမၤရီဘၢၣ်ဖိ(၂)ဂၤန့ၣ်လီၤ.
တကတီၢ်ဃီဖဲ ၁၁း၃၀ မံးနံးအဆၢကတီၢ်စ့ၢ်ကီး ပယီၤသုးခီၣ်ချ့သုးရ့ၣ်(ခမရ-၂၀၇)သုးရ့ၣ် ပျၢ်လီၤ၀ဲဒြိမ့ၣ်ပိၢ်လီၤတဲၥ်ပိၢ်ဖး ထီၣ်ကဒီး၀ဲလၢခရၢၢ်ကရူၢ် သိခွးသ၀ီကျဲကပၤအဃိ ဘၣ်ဒိဘၣ်ထံး၀ဲကိၤမၠိထိ(၂၅)နံၣ်,မီၤနဲနဲ(၁၇)နံၣ်,မီၤခဲၤ(၄၅)နံၣ်, အီၤသူၤ၀့(၃၁)နံၣ်သ့ၣ်တဖၣ်အံၤတကးဒံးဘၣ်အမဲၥ်ညါဟံၣ်စ့ၢ်ကီးဟးဂီၤ၀ဲ(၁)ဖျၢၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးမၤကဒီးဖဲဟါခီ ၅ နၣ်ရံၣ်ဃၣ်ဃၣ်အဆၢကတီၢ်န့ၣ် ပယီၤသုး(ခမရ-၂၀၇)အံၤပျၢ်လီၤကဒီးဒြိလဲၤတ့ၢ်လီၤ ကဒီး၀ဲမ့ၣ်ပိၢ်(၂)ဖျၢၣ်အဃိ အီၤစ့ၤအူ(၂၃)နံၣ်အံၤ မ့ၣ်ပိၢ်အက့အခီဘၣ်၀ဲဒၣ်အခိၣ်အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲန့ၣ်လီၤ.
လၢန့ၣ်အမဲၥ်ညါတၢ်တနံၤဃီဖဲလါဖ့ၤဘြူၤအါရံၤ ၁ သီအနံၤစ့ၢ်ကီး ပယီၤသုးခီၣ်ချ့သုးရ့ၣ်(ခမရ-၃)သုးရ့ၣ်အံၤခီဖျိဟီၣ်က၀ီၤ တၢ်ပၢၢ်ဆၢ သုးကရူၢ်လဲၤခးစဲးပြဲး၀ဲအဃိ ဖဲဂီၤခီ ၁၀ နၣ်ရံၣ်အဆၢကတီၢ်န့ၣ် ပယီၤသုးခီၣ်သုးရ့ၣ်(ခလရ-၈)ခးလီၤကျိဖးဒိၣ် (၁၅)ဖျၢၣ်, ခီၣ်ချ့သုးရ့ၣ်(ခမရ-၃)စ့ၢ်ကီးခးလီၤကျိဖးဒိၣ်(၁၃)ဖျၢၣ် အဃိ ဒီၤသါနူၣ်(၆၂)နံၣ်အံၤသံ၀ဲဒီး အူတူၣ်လူၣ်(၅၃)နံၣ်, ဒီၤစၤဒၤမိ(၄၂)နံၣ် သ့ၣ်တဖၣ်အံၤဘၣ်ဒိဘၣ်ထံးတကးဒံးဘၣ်ဟံၣ်ဟးဂီၤတဖျၢၣ်,ကျီၢ်သံ(၂)ဒု,ဘၣ်ဒိ(၁)ဒုဒီးထိးသံ၀ဲဒၣ်(၅)ဒု အဂ့ၢ်န့ၣ် သ့ၣ်ညါဘၣ် န့ၣ်လီၤ.
ဒူသထူၣ်ကီၢ်ရ့ၣ်ဟီၣ်က၀ီၤအပူၤ စးထီၣ်ဖဲအပူၤကွံၥ်လါယနူၤအါရံၤထီၣ်န့ၣ် ပယီၤသုးခးလီၤကျိဖးဒိၣ်တကးဒံးဘၣ် သူ၀ဲကဘီယူၤဒြိမ့ၣ်ပိၢ်၀ံၤ ပျၢ်လီၤဒြိဟးတ့ၢ်လီၤမ့ၣ်ပိၢ်တလီၢ်လီၢ်အဃိ ကမျၢၢ်သံဘၣ်ဒိဘၣ်ထံးတကးဒံးဘၣ်အမဲၥ်ညါ ဟံၣ်တၢ်သူၣ်ထီၣ်,တၢ်ဖံးအီၣ်မၤအီၣ်လီၢ်ကျီးပူၤတၢ်မုၢ်တၢ်ဘိဃုၥ်ဒီးဆၣ်ဖိကီၢ်ဖိသ့ၣ်တဖၣ်သံဘၣ်ဒိဘၣ်ထံးဟးဂီၤကဲထီၣ်သး ခဲအံၤခဲအံၤအဂ့ၢ်န့ၣ် သ့ၣ်ညါန့ၣ်လီၤ.
