လါယူၤ ၂၁ သီႇ၂၀၁၉ နံၣ်ႇန့ၣ်နီၣ်
ၦၤမၤတၢ်ဖိလၢဟဲနုာ်လီၤမၤတၢ်လၢကီၢ်ကၠီၣ်တဲၣ်အပူၤ လၢအတဖိးသဲစးတဖၣ် ကလီၤစှၤအဂီၢ် ထံကီၢ်ခံဘ့ၣ် ကပာ်ဖှိၣ်မၤ သကိးတၢ်ဒီးကဖီၣ်ဟံးန့ၢ်၀ဲ ၦၤလၢအမၤကၤၦၤကညီတဖၣ်ႇ တ့န့ၢ်လံာ်ခီကီၢ် (Passport Visa) အယီာ်အဘျၣ်တဖၣ်အံၤ အရ့အဂ့ၢ် ကညီကီၢ်စဲၣ်ႇ ရၤမတံကီၢ်ဆၣ် ၦၤထီဒါတၢ်ကူလဲၢ်မၤကၤၦၤကညီကရူၢ်ပၢၤကီၢ်ခိၣ်(၂)ယဲ၀့အီၣ်စံး၀ဲန့ၣ်လီၤ.
တၢ်မၤ၀ဲတၢ်အိၣ်ဖှိၣ် (၇)ဘျီတဘျီ ဘၣ်ဃးတၢ်ထီဒါ၀ဲၦၤကူၣ်လဲၢ်မၤကၤၦၤကညီဂ့ၢ်၀ီတၢ်အိၣ်ဖှိၣ် ဖဲလါယူၤ ၂၁သီႇ ဖဲ၀့ၢ်ရၤမတံႇ က၀ီၤဒ့ ၄ မၠးစဲၣ်ဒံၣ်ဖီကရၢၢ် (City Home)ဘျီၣ်အပူၤကတီၢ် ပၢၤကီၢ်ခိၣ်(၂)စံးလီၤ၀ဲဒ်အံၤန့ၣ်လီၤ.
ပၢၤကီၢ်ခိၣ်(၂)ယဲန့ၣ်၀့အီၣ်စံး၀ဲလၢ“ၦၤလဲၤမၤတၢ်လၢတဖိးသဲစးဘၣ်တဖၣ် လၢကီၢ်ကၠီၣ်တဲၣ်အပူၤ တၢ်ဖီၣ်ထၢနုာ်လီၤ ဆူ ဃိာ်ပူၤအိၣ်၀ဲဒီဒူၣ်အသိး ၦၤလၢအမၢလဲၤမၤတၢ်လၢ တဖိးသဲစးဘၣ်ဒီး တၢ်မၤကစၢ်တဖၣ်အံၤတၢ်ကဟံးအီၤအရ့လိၣ်စ့ၢ်ကီးလီၤႉ အ၀ဲန့ၣ်မး တၢ်ကူၣ်လဲၢ်မၤတၢ်လၢအတဖိးသဲစးဘၣ်ကစှၤလီၤ၀ဲဒီး ၦၤမၤကၤတၢ်တဖၣ်ႇ ၦၤမၤန့ၢ် (Visa) အယီာ်အဘျၣ်တဖၣ် အဲၣ်ဒိးလၢ ထံကီၢ်ခံဘ့ၣ် ကဖီၣ်ဟံးန့ၢ်အရ့လီၤႉ”အဂ့ၢ် စံး၀ဲဒၣ်လီၤ.
လၢန့ၢ်အမဲာ်ညါ ၦၤမၤတၢ်ဖိတနီၤ လဲၤမၤတၢ်မၤ ဒ်ထံကီၢ်ခံဘ့ၣ် တၢ်အၢၣ်လီၤလံာ်အုၣ်ကီၤ (MOU)သနူအသိး ဘၣ်ဆၣ် တဒိးန့ၢ်ဘၣ်တၢ်မၤဘၣ်ဒီး ဘၣ်ဟဲက့ၤကဒါက့ၤအိၣ်အသိး တဒိးန့ၢ်ဘၣ်တၢ်မၤအဘူးအလဲတဖၣ်အိၣ် နၢ်ဟူဘၣ်အီၤလီၤႉ တၢ်ဂ့ၢ်၀ဲန့ၣ်တဖၣ် ကီၢ်ကၠီၣ်တဲၣ်တကပၤကဃုသ့ၣ်ညါအီၤ၀ံၤ ကြၢးရဲၣ်ကျဲၤအီၤအဂ့ၢ်ပၢၤကီၢ်ခိၣ်(၂)ယဲန့ၣ်၀့အီၣ်တဲအါထီၣ် ၀ဲန့ၣ်လီၤ.
လၢတၢ်တဲသကိးဒ်န့ၣ်အဖီခိၣ် ကီၢ်ကၠီၣ်တဲၣ်တကပၤခၢၣ်စးလၢဟဲထီၣ်တဖၣ် စံးဆၢက့ၤ၀ဲလၢ မ့မ့ၢ်လၢ ကီၢ်ကၠီၣ်တဲၣ်တၢ်ထီဒါၦၤကူလဲၢ်မၤကၤၦၤကညီတကပၤ မ့ၢ်ဒၣ်ဟ့ၣ်မၤစၢၤ၀ဲၦၤလၢ အဘၣ်တၢ်ကူလဲၢ်မၤကၤတဖၣ်အံၤ၀ံၤ ကဆှၢကဒါက့ၤလၢနီၢ်ကစၢ်လီၢ်ကျဲန့ၣ်မ့ၢ်တၢ်ပညိၣ်ခိၣ်သ့ၣ်ဒီးတၢ်မၤသ့ၣ်တဖၣ်အံၤ အ၀ဲသ့ၣ် မၤသကိးတၢ်ဒီး ကီၢ်ကၠီၣ်တဲၣ်(DSI-The Department of Special Investigation –INGOs)ကရူၢ်သ့ၣ်တဖၣ်အဂ့ၢ်ႇ ကီၢ်ကၠီၣ်တဲၣ်အပူၤ ဖီၣ်ဟံးန့ၢ်၀ဲၦၤမၤ(Visa)အယီာ်အဘျၣ်တဖၣ်အိၣ်၀ဲအဂ့ၢ် က့ၤတဲရှဲလဲကဒါက့ၤ၀ဲန့ၣ်လီၤ.
ကီၢ်ကၠီၣ်တဲၣ် ၦၤဃုန့ၢ်တၢ်ဖံးတၢ်မၤ၀ဲၤကျိၤ (Mr.Kriwut Tantikaed)စံး၀ဲ“ကီၢ်ပယီၤပူၤ ၦၤဟဲမၤတၢ်ဒ်(MOU)သနူအသိးတဖၣ် လၢကီၢ်ကၠီၣ်အပူၤ ဒ်လံာ်တၢ်အၢၣ်လီၤအီလီၤအသိး မ့ၢ်တဒိးန့ၢ်တၢ်မၤဘၣ်ဒီး လၢအသီ ၃၀အတီၢ်ပူၤ လိၣ်လၢကဘၣ်ဆီ တလဲတၢ်မၤကစၢ်န့ၣ်လီၤႉ အသီ (၃၀) အတီၢ်ပူၤ မ့ၢ်တဆီတလဲတၢ်မၤကစၢ်လၢအသီဘၣ်န့ၣ် ကဘၣ်က့ၤလၢကီၢ်ပယီၤ၀ံၤ ဟဲက့ၤနုာ် လီၤလၢအသီန့ၣ်လီၤႉ ကီၢ်ပယီၤၦၤမၤတၢ်ဖိအဂီၢ် တၢ်ကီတၢ်ခဲမ့ၢ်အိၣ်ထီၣ်တခီ လဲၤဃ့တၢ်မၤစၢၤသ့လၢကီၢ်ကၠီၣ်တဲၣ် ၦၤဟီၣ်ခိၣ်ဖိ တၢ်ဂုၤထီၣ်ပသီထီၣ်ဒီး တၢ်ဘံၣ်တၢ်ဘၢ၀ဲၤကျိၤအအိၣ်သ့န့ၣ်လီၤ” အဂ့ၢ် စံးလီၤ၀ဲဖဲတၢ်အိၣ်ဖှိၣ်အပူၤန့ၣ်လီၤ.
တၢ်မၤ၀ဲ(၇)ဘျီတဘျီ တၢ်အိၣ်ဖှိၣ်အံၤအပူၤ ကီၢ်ပယီၤတကပၤရၤမတံ တၢ်ထီဒါတၢ်ကူလဲၢ်မၤကၤၦၤကညီၦၤပၢၤလီၢ်ဆ့ၣ်နီၤကီၢ်ရ့ၣ် ပၢၤကီၢ်ခိၣ်(၂)ကၠံမၠိသဲၣ်ႇ ရၤမတံကီၢ်ရ့ၣ်ပၢၤကီၢ်ကရူၢ် တၢ်ထီဒါ တၢ်ကူလဲၢ်မၤကၤၦၤကညီပၢၤကီၢ်ခိၣ်(၂)ယဲန့ၣ် ၀့အီၣ်တီခိၣ်ရိၣ် မဲ၀ဲဃုာ်ဒီး၀ဲၤကျိၤဘၣ်မူဘၣ်ဒါတဖၣ်ႇ ကီၢ်ကၠီၣ်တဲၣ်တကပၤ (တးခ်)ကီၢ်ရ့ၣ်တၢ်ထီဒါၦၤကူလဲၢ်မၤကၤၦၤ ကညီၦၤပၢၤလီၢ်ဆ့ၣ်နီၤ (Mr.Chutadech meejan) တီခိၣ်ရိၣ်မဲ၀ဲဒီး ၀ဲၤကျိၤဘၣ်မူဘၣ်ဒါတဖၣ်ခဲလၢာ်ၦၤ နီၣ်ဂံၢ် (၅၀) ဃၣ်ဃၣ် ဟဲထီၣ်၀ဲလီၤ.
တၢ်အိၣ်ဖှိၣ်၀ဲန့ၣ်အပူၤ တၢ်တဲသကိး၀ဲဘၣ်ဃးထံကီၢ်ခံဘ့ၣ် တၢ်ကူၣ်လဲၢ်မၤကၤၦၤကညီဟဲကဲထီၣ်အသးတဖၣ်ႇ တကီၢ်ခါ တၢ်ကီ တၢ်ခဲလၢသဂၢၢ်ဘၣ်တဖၣ်ႇ ကီၢ်ဆၢၦၤကူလဲၢ်မၤကၤတၢ်တဖၣ်အံၤ ထံကီၢ်ခံဘ့ၣ် ကဖီၣ်န့ၢ်သကိးဒီး ၦၤလၢတၢ်ဖီၣ်န့ၢ်အီၤတဖၣ် တၢ်ကက့ၤဟ့ၣ်လီၤကဒါက့ၤလၢထံကီၢ် ဘၣ်မူဘၣ်ဒါဒီး ၦၤလၢဘၣ်တၢ်ကူလဲၢ်မၤကၤသ့ၣ်တဖၣ် တၢ်ကက့ၤဟ့ၣ်လီၤကဒါက့ၤလၢထံကီၢ်ဘၣ်မူဘၣ်ဒါသ့ၣ်တဖၣ်အဂ့ၢ်န့ၣ် သ့ၣ်ညါဘၣ်လီၤ.
