မံၣ်ဒံၣ်ယၢၣ်လၢသ့ၣ်ညါမူဒါ-အိၣ်ဒီးသူးသ့ၣ်လၤကပီၤ ဒီး ပှၤမၤတၢ်ကစီၣ်ဖိလၢသ့ၣ်ညါမူဒါ-အိၣ်ဒီးသူးသ့ၣ်လၤကပီၤ တၢ်တီခိၣ်ရိၣ်မဲ

မံၣ်ဒံၣ်ယၢၣ်လၢသ့ၣ်ညါမူဒါ-အိၣ်ဒီးသူးသ့ၣ်လၤကပီၤ ဒီး ပှၤမၤတၢ်ကစီၣ်ဖိလၢသ့ၣ်ညါမူဒါ-အိၣ်ဒီးသူးသ့ၣ်လၤကပီၤ တၢ်တီခိၣ်ရိၣ်မဲ

(စိၣ်မံၣ်ယၣ်ကၠီၣ်)

(၉-၁-၂၀၂၅)

-(IT) တၢ်ကစီၣ်တၢ်သ့တၢ်ဘၣ်ဂုၤထီၣ်ပသီထီၣ်ချ့သဒံးတပယူၥ်ဃီ

-ပှၤကိးဂၤဒဲးသူ၀ဲလီတဲစိဒီးအ့ထနဲးတၢ်ဆဲးကျိးဆဲးကျၢ

-ထံဒိၣ်ကီၢ်လဲၢ်တနီၤ,ပဒိၣ်ဒီးသုးဂ့ၢ်၀ီ၀ဲၤကျိၤတဖၣ်မ့ၢ်ဂ့ၤ, ပၥ်ခူသူၣ်ပၥ်ကဒၢဃၥ်၀ဲတၢ်ဂ့ၢ်တခါဒီး ဒုးအိၣ်ထီၣ်၀ဲတၢ်ကစီၣ် အယီၤအဘျၣ်ဒီးတၢ်ကစီၣ်အကမၣ်လၢတၢ်ဃါဃုၥ်ဒုးအိၣ်ထီၣ်၀ဲတဖၣ်

-ပှၤကိးဂၤဒဲး ဒုးအိၣ်ထီၣ်ဒုးကဲထီၣ်တၢ်ကစီၣ်အဂ့ၢ်အကျိၤသ့၀ဲအကလုၥ်ကလုၥ်လၢတဂၤဒၣ်၀ဲလၢလီတဲစိပူၤသ့ဒီး ရၤလီၤ၀ဲဒၣ်ဆူစိၣ်ရှၢၣ်မံၣ်ဒံၣ်ယၢၣ်ပူၤတဆီအံၤသ့၀ဲ

-လၢပကဖီၣ်ဂၢၢ်ဃၥ်၀ဲတၢ်ဂ့ၢ်(၄)ထံၣ်အံၤအဂီၢ်တမ့ၢ်တၢ်လၢအညီ၀ဲဘၣ်. တၢ်ကစီၣ်လၢအယီၤအဘျၣ်-တၢ်ကစီၣ်အကမၣ် သ့ၣ်တဖၣ်န့ၣ် ဟံန့ၢ်၀ဲခီၣ်တဃၥ်(၄)ထံၣ်လၢအိၣ်ဖျါတၢ်ဖီခိၣ်အံၤဒီး လၢစဲးကးအတီၢ်ပူၤရၤလီၤအသးချ့သဒံးဆူ ဟီၣ်ခိၣ်ဒီတဘ့ၣ် အပူၤန့ၣ်လီၤ.

-တၢ်လၢတၢ်ကစီၣ်အယီၤအဘျၣ်,အကမၣ်အတၢ်လီၤဘၣ်ယိၣ်အံၤ ပဒိၣ်ဒီးပှၤဘၣ်မူဘၣ်ဒါဘၣ်ထွဲတဖၣ် ပၢၤဃၥ်၀ဲခီဖျိလၢ တၢ်သ့တၢ်ဘၣ်, တၢ်သိၣ်တၢ်သီတၢ်ဘျၢကန့ၢ်အဂီၢ်န့ၣ် ဂုၥ်ကျဲးစၢး၀ဲလၢကျဲအကပၤကပၤန့ၣ်လီၤ. ဘၣ်ဆၣ်လၢတၢ်ကဖီၣ်ဂၢၢ်ဃၥ်၀ဲ ဘၣ်ဃးတၢ်ဒုးအိၣ်ထီၣ်တၢ်ကစီၣ်တၢ်ဂ့ၢ်တၢ်ကျိၤညီညီကဒၣ်ချ့သဒံးဒီး လၢစဲးကးအတီၢ်ပူၤရၤလီၤအသးဆူပှၤအါဂၤအအိၣ်ခီန့ၣ် ကဲ၀ဲဒၣ်တၢ်တၤတၢ်ဖးဒိၣ်ညါဒံးန့ၣ်လီၤ.

-လၢတၢ်အိၣ်သးနီၢ်နီၢ်အပူၤစ့ၢ်ကီး ဒ်သိးတၢ်ကဒုးအိၣ်ထီၣ်တၢ်ကစီၣ်အယီၤအဘျၣ်,တၢ်ကစီၣ်လၢအကမၣ်အံၤအဂီၢ်န့ၣ် တၢ်အိၣ်သးတၢ်ဂ့ၢ်တၢ်ကျိၤအကလုၥ်ကလုၥ်စ့ၢ်ကီး——-လီၤ. နကဒုးအိၣ်ထီၣ် ခိၣ်ဃၢၤန့ဆၢၣ်တၢ်ဘၣ်ယိၣ်လၢအဟဲတုၤအိၣ် ပှၤသ့လၢအတရ့တၢ်ဆၢကတီၢ်ဘၣ်အံၤဘၣ်ဧါ,လၢမုၢ်ကျိၤ၀ဲၤကွၥ်တကပၤစ့ၢ်ကီး နကဒုးအိၣ်ထီၣ်လၢသိအလုၢ်အပှ့ၤဧါ, နကဒုးအိၣ်ထထီၣ်ဘၣ်ဃးတၢ်ဆါဘၣ်ကူဘၣ်ဂၥ်တခါခါဧါ,နကဒုးအိၣ်ထီၣ်ဘၣ်ဃးဒုးယၤဂ့ၢ်၀ီဧါ. လၢမုၢ်ကျိၤ၀ဲၤကွၥ်တကပၤစ့ၢ်ကီးနကဒုးအိၣ်ထီၣ်ဒ်သိအလုၢ်အပှ့ၤဧါ, တၢ်သ့ၣ်တဖၣ်အံၤ နဒုးအိၣ်ထီၣ် ဒ်တၢ်ကွဲးပူတၢ်ဂ့ၢ်တၢ်ကျိၤတခါလၢအအိၣ်ဒီးတၢ်ရဲၣ်လီၤကျဲၤလီၤန့ၣ် နထုးထီၣ်ရၤလီၤအီၤသ့န့ၣ်လီၤ.

ခ့ခါဆၢကတီၢ်ခဲအံၤ ပှၤကိးဂၤဒဲးန့ၣ်အိၣ်ဒီးအလီတဲစိသူ၀ဲဒၣ်(စိၣ်ရှၢၣ်မံၣ်ဒံၣ်ယၢၣ်)တခါခါအဃိ တၢ်ဂ့ၢ်တၢ်ကျိၤတခါခါလၢ အကဲထီၣ်သးလၢပမဲၥ်ညါတဖၣ် လၢလံၥ်ကွဲးမ့ၢ်ဂ့ၤ,တၢ်ဂီၤမ့ၢ်ဂ့ၤ,တၢ်ဂီၤမူမ့ၢ်ဂ့ၤန့ၣ် ပဂုၥ်ကျဲးစၢးတီၣ်ထီၣ်၀ဲဒၣ်လီၤတမ့ၢ်ဧါ. ပှၤတနီၤန့ၣ်ကဲထီၣ်သးဒ်သိးတၢ်သးစဲတခါဒ်သိးအသးစဲ၀ဲဒၣ်ကသံၣ်မူၤဘှီးတခါခါအသိးဒီး ပှၤဒ်န့ၣ်သ့ၣ်တဖၣ်အါဒၣ်တက့ၢ် ရၤလီၤ၀ဲဒၣ်တၢ်ကစီၣ်တၢ်ဂ့ၢ်တၢ်ကျိၤလၢတလီၤတံၢ်လီၤဆဲးသ့ၣ်တဖၣ်န့ၣ်လီၤ.

-အဃိဒ်သိးတၢ်ကမၤလီၢ်မၢ်ကွံၥ် တၢ်ကစီၣ်အယီၤအဘျၣ်-တၢ်ကစီၣ်ကမၣ်အတၢ်လီၤဘၣ်ယိၣ်သ့ၣ်တဖၣ်အံၤအဂီၢ် မူဒါသ့ၣ်တဖၣ် လီၤတီက့ၤ၀ဲဒၣ်လၢမံၣ်ဒံၣ်ယၢၣ်တၢ်ကစီၣ်သန့လၢသ့ၣ်ညါမူဒါ-အိၣ်ဒီးသူးသ့ၣ်လၤကပီၤသ့ၣ်တဖၣ်အလိၤန့ၣ်လီၤ.

ဖဲန့ၣ် ပကဆီၣ်ဖျိးကွံၥ် “တၢ်ကစီၣ်အယီၤအဘျၣ်-တၢ်ကစီၣ်အကမၣ်သ့ၣ်တဖၣ်”လၢတၢ်မနုၤလဲၣ်.မတၤတဖၣ်ကဆီၣ်ဖျိး ကွံၥ်၀ဲလဲၣ်. ကျိၤကျဲလၢနကဆီၣ်ဖျိးထီၣ်ကွံၥ်“တၢ်ကစီၣ်အယီၤအဘျၣ်-တၢ်ကစီၣ်အကမၣ်”အမဲၥ်ညါန့ၣ် နကဘၣ်ဆီၣ်ဖျိးကွံၥ် အီၤလၢ “တၢ်ကစီၣ်တၢ်ဂ့ၢ်တၢ်ကျိၤလၢအမ့ၢ်အတီ”တဖၣ်တပယူၥ်ဃီန့ၣ်လီၤ. ကျိၤကျဲလၢအဂၤတအိၣ်နီခါဘၣ်.

-ပှၤလၢအကဆီၣ်ဖျိးကွံၥ်တၢ်န့ၣ်ကမ့ၢ်မတဂၤသ့ၣ်တဖၣ်လဲၣ်. ကမ့ၢ်၀ဲဒၣ် မံၣ်ဒံၣ်ယၢၣ်ပှၤမၤတၢ်ကစီၣ်ဖိလၢအသ့ၣ်ညါမူဒါ- အိၣ်ဒီးသူးသ့ၣ်လၤကပီၤသ့ၣ်တဖၣ်အံၤ ကဘၣ်တီခိၣ်ရိၣ်မဲ ဆီၣ်ဖျိးထီၣ်ကွံၥ်၀ဲန့ၣ်လီၤ.

အယီၤအဘျၣ်ဒီးအကမၣ်န့ၣ် ပကဘၣ်ဆီၣ်ဖျိးကွံၥ်အီၤလၢအစ့း(စဲၤနီၢ်)ဒီးအဘၣ်န့ၣ်လီၤ. တၢ်လၢတၢ်သ့ၣ်ညါမူဒါဒီးသူၣ်သ့ၣ် လၤကပီၤစံးတၢ်န့ၣ် ပကပတုၥ်အီၤဖဲပပၥ်ဖျါထီၣ်အတၢ်ကစီၣ်အယီၤအဘျၣ်ဒီးတၢ်ကစီၣ်ကမၣ်အခါတသ့ဘၣ် မ့မ့ၢ်တခီ ပကဘၣ်ဆီၣ်ဖျိးကွံၥ်အီၤဒီးတၢ်အဘၣ်(တၢ်မ့ၢ်တၢ်တီ)န့ၣ်လီၤ. တၢ်ကစီၣ်တၢ်ဂ့ၢ်တၢ်ကျိၤလၢအဘၣ်တဖၣ် ကလဲၤတုၤဃီၤ၀ဲဒၣ် ဆူပှၤအါဂၤအမဲၥ်ချံ,အနၢ်ပူၤတကတီၢ်ဃီဒီး တဘျီဃီပကသ့ထိၣ်သတြီၤတၢ်ကစီၣ်အယီၤအဘျၣ်ဒီးအကမၣ်သ့ၣ်တဖၣ်.

-တၢ်သ့ၣ်ညါမူဒါ,တၢ်အိၣ်ဒီးသူးသ့ၣ်လၤကပီၤစံးတၢ်န့ၣ် သ့ပဲၥ်ဖးနီၤဖး၀ဲတၢ်ကစီၣ်အယီၤအဘျၣ်-အကမၣ်သ့ၣ်တဖၣ်ဒီး ပမ့အိၣ်ဆၢထၢၣ်ဟံးဃၥ်ကျၢၤအီၤမး ပပၢၤဃၥ်၀ဲတၢ်သ့ၣ်ညါမူဒါ,တၢ်အိၣ်ဒီးသူးသ့ၣ်လၤကပီၤသ့၀ဲန့ၣ်လီၤ. ပသူၣ်ထီၣ် တၢ်သ့ၣ်ညါမူဒါ,တၢ်အိၣ်ဒီးသူးသ့ၣ်လၤကပီၤမ့န့ၢ်မး တၢ်ကစီၣ်သန့တခါ,မံၣ်ဒံၣ်ယၢၣ်ပှၤမၤတၢ်ကစီၣ်ဖိတဂၤအကံၢ်အစီဒီး အပရၢကဟူထီၣ်လၢအဂ့ၤ(မ့တမ့ၢ်)ပကဒိးန့ၢ်ဘၣ်ပှၤကမျၢၢ်အတၢ်ပၥ်ဂံၢ်ပၥ်ဘါတၢ်နၥ်အီၣ်ပှၤအံၤန့ၣ်လီၤ.

-တၢ်ကစီၣ်လၢတၢ်ကစီၣ်သန့တခါအံၤပၥ်ဖျါထုးထီၣ်ရၤလီၤ၀ဲတဖၣ်,တၢ်ကစီၣ်ဒီးတၢ်ကစီၣ်ထီရီၤလၢအဲးဒံးထၢၣ်- ပှၤမၤတၢ်ကစီၣ် ဖိတဖၣ်အံၤပၥ်ဖျါထီၣ်၀ဲတၢ်ဂ့ၢ်တၢ်ကျိၤတဖၣ်န့ၣ်မ့ၢ်တၢ်လၢအမ့ၢ်အတီအဘၣ်၀ဲန့ၣ်လီၤ.မံၣ်ဒံၣ်ယၢၣ်တၢ်ဘျၢသနူလၢအ၀ဲသ့ၣ်ဖီၣ်ဃၥ်၀ဲအံၤစ့ၢ်ကီး ကမျၢၢ်တဖၣ်ကထံၣ်၀ဲလၢအဘၣ်လိၥ်ဖိးမံန့ၣ်လီၤ.

-တၢ်ကစီၣ်တၢ်သ့တၢ်ဘၣ်လၢပဃုသ့ၣ်ညါအီၤတဖၣ်,တၢ်ကစီၣ်သန့လၢပမၤအီၤတဖၣ်,ပှၤတဂၤလၢ်လၢ်လၢအမ့ပၥ်လုၢ်ပၥ်ပှ့ၤ ပၥ်ကဲအသူးသ့ၣ်လၤကပီၤန့ၣ် တၢ်ဂ့ၢ်ခိၣ်သ့ၣ်(၄)ထံၣ်လၢအိၣ်ဖျါတၢ်ဖီလၥ်အံၤတဖၣ် အလီၢ်အိၣ်လၢပကဘၣ်ဒုးသ့ၣ်ညါ ဆှဲပၠး ကမျၢၢ်သ့ၣ်တဖၣ် န့ၣ်လီၤ.

(၁) တကွဲး,တရၤလီၤပၥ်ဖျါတၢ်ကစီၣ်လၢအတမ့ၢ်တတီ,တၢ်ကစီၣ်လၢတၢ်ဂ့ၢ်တၢ်ကျိၤတလီၤတံၢ်လီၤဆဲးတၢ်ဒုးအိၣ်ထီၣ် အီၤလၢအတဖိးမံတဖၣ်ဘၣ်.

(၂) ကယဲၢ်မ့ၢ်တၢ်ကစီၣ်အယီၤအဘျၣ်,အကမၣ်လၢအရၤလီၤသးတဖျၢၣ်လၢ်လၢ်န့ၣ် လၢတၢ်ဂ့ၢ်တၢ်ကျိၤ,တၢ်သ့တၢ်ဘၣ်အံၤတဆီ ပကဘၣ်ဃိထံသမံသမိးအီၤလၢကျဲအကပၤကပၤဒီး ပကဘၣ်ဆီၣ်ဖျိးကွံၥ်အီၤလၢတၢ်ကစီၣ်တၢ်ဂ့ၢ်တၢ်ကျိၤလၢ အဘၣ်သ့ၣ်တဖၣ် န့ၣ်လီၤ.

(၃) တပၥ်ဖျါထီၣ် တၢ်ကွဲး,တၢ်ဂီၤ(ကးတိ),တၢ်ဂီၤလၢအဒုးကဲထီၣ်တၢ်ဖုၣ်ထံၣ်ဖုၣ်ထီသ့,တၢ်အ့ၣ်လိၥ်ဆိးက့,တၢ်ပဲၥ်ဖးနီၤဖး ကလုၥ်, တၢ်ဘူၣ်တၢ်ဘါ,ဖံးဘ့ၣ်အလွဲၢ်,မုၣ်/ခွါ,ဘီၣ်ဃဲၤ,တၢ်တဲဆါတဲကလံသ့ၣ်တဖၣ်ဘၣ်.

(၄) တၢ်ကစီၣ်တဖျၢၣ်လၢ်လၢ်လၢပတၢ်ကစီၣ်သန့ပၥ်ဖျါထီၣ်၀ဲသ့ၣ်တဖၣ်န့ၣ် တၢ်ပိၥ်ထွဲထီၣ်အခံမ့ဟဲအိၣ်ထီၣ်တမံၤဂ့ၤတမံၤဂ့ၤန့ၣ် ပကဘၣ်အိၣ်ဒီးတၢ်ဟံမူဒါလၢလၢပှဲၤပှဲၤန့ၣ်လီၤ.

လၢန့ၣ်အမဲၥ်ညါတၢ်လၢပကဲထီၣ်ပှၤဟီၣ်ခိၣ်ဖိအံၤ နၤနၤယၤယၤလၢတၢ်ဂ့ၢ်အကလုၥ်အကလုၥ်အဃိ တၢ်တလ့ၤတပျၥ်, တၢ်ကမူၤကမၣ်,တၢ်လီၤဟိလီၤဖျဲၣ်ကဲထီၣ်သးသ့၀ဲန့ၣ်လီၤ. တၢ်တလ့ၤတပျၥ်,တၢ်လီၤဟိလီၤဖျဲၣ်,တၢ်ကမၣ်ဒ်အံၤသ့ၣ်တဖၣ် မ့ဟဲကဲထီၣ်ဘၣ်ဖုးသးစ့ၢ်ကီး ပကဘၣ်ဃ့၀ံသးစူၤက့ၤကမျၢၢ်ထံဖိကီၢ်ဖိန့ၣ်လီၤ. ပကဘၣ်ပၥ်ဖျါထီၣ်တၢ်ဃ့၀ံသးစူၤ. တဘၣ်မ့ၢ်ဃ့၀ံသးစူၤ၀ံၤတၢ်မံၤဒ်န့ၣ်ဘၣ်.
ပတၢ်ကစီၣ်သန့အတၢ်ကမၣ်,တၢ်လီၤဟိလီၤဖျဲၣ်ဒီးတၢ်တလ့ၤတပျၥ်သ့ၣ်တဖၣ်အံၤန့ၣ် မူဒါခိၣ်အဲးဒံးထၢၣ်ကဘၣ်ဟံမူဒါဒီး ကြၢးဃ့၀ံသးစူၤ၀ဲလီၤ.ဒ်န့ၣ်အသိးကယဲၢ်မ့ၢ်တၢ်ကစီၣ်လၢအဟးထီၣ်လၢတၢ်လီၢ်အဂၤတဖၣ်အပူၤစ့ၢ်ကီး ဒိးသန့ၤထီၣ်သးလၢ တၢ်ပိၥ်ထွဲအခံလၢအလီၤဘၣ်သ့လၢပှၤကမျၢၢ်အလိၤအံၤ ပကဘၣ်ခီၣ်ဆၢကဒါက့ၤတဲၥ်တဲၥ်ဖျုဖျုလၢအဆိအချ့န့ၣ်လီၤ. ပကဘၣ်က့ၤဃိထံသမံသမိးက့ၤအီၤ တၢ်အံၤမ့ၢ်အကဲထီၣ်တၢ်ဘၣ်ဒိဘၣ်ထံးလၢ တၢ်အိၣ်ဆူၣ်အိၣ်ချ့အဂီၢ်ဧါ ,မ့ၢ်အကဲထီၣ် တၢ်ဘၣ်ဒိဘၣ်ထံးလၢကျိၣ်စ့တၢ်ထူးတၢ်တီၤခီဧါန့ၣ်လီၤ.

တၢ်ကစီၣ်သန့(မ့တမ့ၢ်)ပှၤမၤတၢ်စီၣ်ဖိလၢအမ့ပၥ်ဖျါထီၣ်၀ဲတၢ်ကစီၣ်အယီၤအဘျၣ်,တၢ်ကစီၣ်အကမၣ်လၢအတကြၢးတဘၣ်၀ဲ မ့အိၣ်ထီၣ်(၃)ဘျီဆူဖီခိၣ်န့ၣ် တၢ်ကစီၣ်မံၣ်ဒံၣ်ယၢၣ်ကရူၢ် ကပဲၥ်ထံနီၤဖးဟ့ၣ်ပလီၢ်ဒီးကဘၣ်ထံၣ်လိၥ်တဲသကိး တၢ်န့ၣ်လီၤ. မ့တမ့ၢ်ဒ်န့ၣ်ဘၣ်မ့ရးထီၣ်ဆူညါကွ့ၢ်ကွ့ၢ်န့ၣ် တၢ်ကပဲၥ်အၢပဲၥ်သီ၀ဲလၢအမ့ၢ်မံၣ်ဒံၣ်ယၢၣ်လၢအတအိၣ်ဒီးသူးသ့ၣ်လၤကပီၤဘၣ် န့ၣ် လီၤ. တၢ်ဂ့ၢ်သ့ၣ်တဖၣ်အံၤမံၣ်ဒံၣ်ယၢၣ်ကရူၢ်ကရၢဒီးမံၣ်ဒံၣ်ယၢၣ်ကီၣ်ကးတဖၣ် ကဘၣ်တၢၣ်ပီၣ်သကိး၀ဲလီၤတံၢ်လီၤဆဲး န့ၣ်လီၤ. ပကြၢးဟံထီၣ်ဖီၣ်ထီၣ်တဲသကိးအီၤဖှံဖှံဖိန့ၣ်လီၤ. ပတကြၢးတဲသကိးအီၤဖှံဖှံလၢတၢ်ဆၢကတီၢ်ချ့သဒံးန့ၣ်ဘၣ်.

တၢ်ကစီၣ်တၢ်ဂ့ၢ်တၢ်ကျိၤတခါမ့ဟးထီၣ်ရၤလီၤသးလံန့ၣ် မ့ၢ်တၢ်ကစီၣ်သန့ဖဲလဲၣ်တခါရၤလီၤ၀ဲလဲၣ်. မ့ၢ်မတဂၤရၤလီၤ၀ဲလဲၣ်. မုၢ်နံၤမုၢ်သီ,တၢ်လီၢ်တၢ်ကျဲ,ဟီၣ်က၀ီၤ တၢ်ဂ့ၢ်တၢ်ကျိၤတၢ်လီၤတံၢ်လီၤမံပၣ်ဃုၥ်စ့ၢ်ဧါ. တၢ်ဂ့ၢ်တၢ်ကျိၤ,တၢ်ဂီၤမူ,တၢ်ဂီၤလၢ အပၣ်ဃုၥ်လၢတၢ်ကစီၣ်တဖျၢၣ်န့ၣ်အပူၤန့ၣ် ပကဘၣ်ဃိထံသမံသမိးအီၤအကပၤကပၤန့ၣ်လီၤ. ပကဆဲးကျိးဆူဟီၣ်က၀ီၤ တၢ်လီၢ်လၢအပၣ်ဃုၥ်၀ဲလၢတၢ်ကစီၣ်ပူၤအံၤတဘျီဃီဒီး ဃိထံသမံသမိးထိၣ်သတြီၤတၢ်ဂ့ၢ်တၢ်ကျိၤအံၤဒီးတၢ်ဂ့ၢ်လၢ အကဲထီၣ်သး အံၤတက့ၢ်.

တၢ်ကစီၣ်အယီၤအဘျၣ်,အကမၣ်လၢတၢ်ဒုးအိၣ်ထီၣ်အီၤလၢအတမ့ၢ်တတီဘၣ်သ့ၣ်တဖၣ်အံၤန့ၣ် ပှၤတဂၤလၢ်လၢ် ဒုးအိၣ်ထီၣ်မၤ၀ဲသ့ တကးဒံးဘၣ်အမဲၥ်ညါ ပဒိၣ်အတၢ်မဲၥ်ချံမ့ၢ်ဂ့ၤ,ကရူၢ်ကရၢအါကလုၥ်ရၤလီၤ၀ဲသ့န့ၣ်လီၤ .ပထံၣ်ဘၣ်လၢ အ၀ဲသ့ၣ်န့ၣ်သူ၀ဲဒၣ် ကျိၣ်စ့, တၢ်သ့တၢ်ဘၣ်,စဲးဖီကဟၣ်တၢ်ဖိတၢ်လံၤ,ပှၤသ့ပှၤဘၣ်နီၣ်ဂံၢ်ဒီး မၤ၀ဲဒ်ပှၤအါဂၤတၢ်ကနၥ်အီၣ် အ၀ဲသ့ၣ်ကအိၣ်န့ၣ်လီၤ. လၢတၢ်ဖံးတၢ်မၤသ့ၣ်တဖၣ်အံၤအကျါန့ၣ်ပထံၣ်ဘၣ်လၢတၢ်ကစီၣ်သန့လၢ အတမ့ၢ်တတီ အတဖိးမံ, ပှၤမၤတၢ်ကစီၣ်ဖိလၢတစဲၤနီၢ်သ့ၣ်တဖၣ်ပၣ်ဃုၥ်၀ဲန့ၣ်လီၤ.

အဲၣ်ဒိးတဲအခီပညီန့ၣ် ပှၤမၤတၢ်ကစီၣ်ဖိလၢ ပဒိၣ်ပပှၢ်, သုး, ပ့ၣ်ဆှါ ကရူၢ်ကရၢဖီၣ်ဂၢၢ်ဃၥ်, ဖီၣ်ပျံၤလၢတၢ်လီၢ်ခံသ့ၣ်တဖၣ် ဒုးအိၣ်ထီၣ် ရၤလီၤတၢ်ကစီၣ်အယီၤအဘျၣ်, တၢ်ကစီၣ်ကမၣ်လၢအကျဲၣ်ကျီးဃၥ်တၢ်ဂ့ၢ်တၢ်ကျိၤဘၣ်န့ၣ် အရၤလီၤချ့သဒံးန့ၢ်ဒံး ပှၤနီၢ်တဂၤထုးထီၣ်ဘိးဘၣ်ရၤလီၤတၢ်ကစီၣ်ကမၣ်သ့ၣ်တဖၣ်န့ၣ်လီၤ. တၢ်ထုးထီၣ်ဘိးဘၣ်ရၤလီၤတၢ်ကစီၣ်အယီၤအဘျၣ်,တၢ်ကစီၣ်ကမၣ်ဒ်အံၤန့ၣ် မ့ၢ်တၢ်လီၤဘၣ်ယိၣ်ဒိၣ် လၢပှၤကမျၢၢ်ထံဖိကီၢ်ဖိအဂီၢ်န့ၣ်လီၤ.

တၢ်ကစီၣ်အယီၤအဘျၣ်-အကမၣ်လၢအအိၣ်၀ဲဒၣ်ဒီး တၢ်ရဲၣ်လီၤကျဲၤတဖၣ်အံၤ ပှၤနီၢ်တဂၤစုၥ်စုၥ်လၢအသူ၀ဲ Social Media အကလုၥ်ကလုၥ်တဖၣ် မ့ၢ်က့ၤ Share, Like တဆီန့ၣ် လီၤဂၥ်ဒ်သိး ပက့ၤရၤလီၤ၀ဲ တၢ်ကစီၣ်အယီၤအဘျၣ်-အကမၣ်တဖၣ်န့ၣ်လီၤ.

အဃိတၢ်ဆီၣ်ဖျိးကွံၥ်တၢ်ကစီၣ်အယီၤအဘျၣ်-အကမၣ်ဒီးတၢ်ရၤလီၤတၢ်ကစီၣ်လၢအမ့ၢ်အတီအဘၣ် တၢ်ဖံးတၢ်မၤအံၤ မ့ၢ်တၢ်ဖံးတၢ်မၤဖးဒိၣ်တခါလၢအရ့ဒိၣ်၀ဲဒိၣ်မးန့ၣ်လီၤ.မ့ၢ်စ့ၢ်ကီးတၢ်မၤဖးဒိၣ်တခါလၢပကဘၣ်အိးထီၣ်ပမဲၥ်ချံ,ပနၢ်ကုန့ၣ်လီၤ. မံၣ်ဒံၣ်ယၢၣ်လၢအသ့ၣ်ညါမူဒါ-အိၣ်ဒီးသူးသ့ၣ်လၤကပီၤဒီး မံၣ်ဒံၣ်ယၢၣ်ပှၤမၤတၢ်ကစီၣ်ဖိလၢအသ့ၣ်ညါမူဒါ-အိၣ်ဒီးသူးသ့ၣ် လၤကပီၤတဖၣ်န့ၣ် တီခိၣ်ရိၣ်မဲဖီၣ်လိၥ်စုမၤသကိးတၢ်ဒီးပှၤအါဂၤန့ၣ်လီၤ. မံၣ်ဒံၣ်ယၢၣ်လၢအသ့ၣ်ညါမူဒါ-အိၣ်ဒီးသူးသ့ၣ် လၤကပီၤတဖၣ် ဒီး မံၣ်ဒံၣ်ယၢၣ်ပှၤမၤတၢ်ကစီၣ်ဖိလၢအသ့ၣ်ညါမူဒါ-အိၣ်ဒီးသူးသ့ၣ်လၤကပီၤတဖၣ်န့ၣ် သဂၢၢ်ဘၣ်၀ဲ တၢ်မၤပျံၤမၤဖုး,တၢ်ကူၣ်တရံးကူၣ်အၢကူၣ်သီဒီး သးသမူတၢ်လီၤဘၣ်ယိၣ်သ့၀ဲကိးဆၢကတီၢ်ဒဲးန့ၣ်လီၤ.