လါအ့ဖြ့ၣ် ၇ သီ, ၂၀၂၅ နံၣ်, ခ့ၣ်အဲးစံၣ်
ကညီပိၥ်မုၣ်ကရၢ(KWO)နံၣ်ဆဲးဆၢပှဲၤထီၣ်(၄၀)၀ီတ၀ီလၢအလီၤဘၣ်၀ဲဖဲမဟါလါအ့ဖြ့ၣ် ၅ သီအနံၤအံၤ တၢ်ရဲၣ်တၢ်ကျဲၤအပူၤ တၢ်ဟ့ၣ်လၤကပီၤ၀ဲပိၥ်မုၣ်ခိၣ်နၢ်(၅၇)ဂၤအဟူးဂဲၤပၥ်ဖှိၣ်မၤသကိးတၢ်လၢတၢ်ကရၢကရိပူၤအံၤတဖၣ်န့ၣ်လီၤ.
ကညီပိၥ်မုၣ်ခိၣ်နၢ်လၢအဘၣ်တၢ်ဟ့ၣ်လၤကပီၤအီၤတဖၣ်န့ၣ် မ့ၢ်ပိၥ်မုၣ်ကရၢခိၣ်နၢ်,ပှၤမၤသကိးတၢ်ဖိလၢအမၤတ့ၢ် တၢ်မၤ(၁၀)နံၣ် ဆူဖီခိၣ် (၄၉)ဂၤဒီး ပှၤတ၀ၢပိၥ်မုၣ်ခိၣ်နၢ်လၢအဂၤ(၈)ဂၤပၥ်ဖှိၣ်ခဲလၢၥ်(၅၇)ဂၤလၢအဟ့ၣ်လီၤသးဟူးဂဲၤမၤတၢ်လၢနံၣ်ယံၤ လါအါ တဖၣ် အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဘၣ်ဃးတၢ်ဟ့ၣ်လၤကပီၤကညီပိၥ်မုၣ်ခိၣ်နၢ်အဂ့ၢ်အံၤန့ၣ် (KWO)ကရၢခိၣ် နီၢ်ကညီဖီ စံး၀ဲလၢ“ပဟ့ၣ်လၤကပီၤ၀ဲ ကညီပိၥ်မုၣ် ကရၢခိၣ်နၢ်လၢအမၤသကိးတၢ်န့ၢ်အနံၣ်(၃၀) မ့ၢ်ဂ့ၤ, (၂၅)နံၣ်ဆူဖီခိၣ်မ့ၢ်ဂ့ၤ, (၂၀)နံၣ်ဆူဖီခိၣ်, (၁၅)နံၣ်ဆူဖီခိၣ် ဒီး(၁၀)နံၣ်ဆူဖီခိၣ် သ့ၣ်တဖၣ်လီၤ.ဒ်န့ၣ်အသိးပဟ့ၣ်၀ဲဒၣ်တၢ် လၤကပီၤတၢ်ပၥ်ပနီၣ်၀ဲပှၤတ၀ၢပိၥ်မုၣ်ခိၣ်နၢ်(၈)ဂၤ. အ၀ဲသ့ၣ်န့ၣ်မၤတၢ်အကပၤကပၤ မၤတၢ်နံၣ်ယံၤလါယံၤနါက့အ၀ဲသ့ၣ်န့ၣ်တၢ်သ့ၣ်ညါပၥ်ပနီၣ်အီၤဘၣ်.အဃိန့ၣ်ပသ့ၣ်ညါပၥ်ပနီၣ်အီၤလၢမုၢ်တနံၤညါအံၤဒီး ပဟ့ၣ်အီၤ တၢ်လၤကပီၤတၢ်စံးဘျုးစံးဖှိၣ်သ့ၣ်တဖၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်- ကညီတၢ်ကစီၣ်န့ၣ်လီၤ.
ပှၤတ၀ၢပိၥ်မုၣ်ခိၣ်နၢ်(၈)ဂၤလၢဒိးန့ၢ်ဘၣ်တၢ်လၤကပီၤသ့ၣ်တဖၣ်န့ၣ်မ့ၢ်၀ဲ ပိၥ်မုၣ်ခိၣ်နၢ်သ့ၣ်တဖၣ်လၢဟူးဂဲၤဖံးတၢ်လၢ ကီၢ်ရ့ၣ်ဒီးဒဲက၀ီၤပူၤဘၣ်ဃး ဆူၣ်ချ့,ကူၣ်သ့,ပှၤဂ့ၢ်၀ီ,ပှၤဟ့ၣ်ကူၣ်ဟ့ၣ်ဖးတၢ်တကပၤသ့ၣ်တဖၣ်န့ၣ်လီၤ.
တကးဒံးဘၣ်တၢ်ဟ့ၣ်လၤကပီၤကညီပိၥ်မုၣ်ခိၣ်နၢ်(၅၇)ဂၤအမဲၥ်ညါတၢ်ဟ့ၣ်ဃုၥ်စ့ၢ်ကီး၀ဲတၢ်စံးဘျုးတၢ်ပၥ်ပနီၣ်ဆူ ပှၤနီၢ်တဂၤဒီး တၢ်ကရၢကရိမၤသကိးတၢ်(၅၄)ဒူၣ်န့ၣ်လီၤ.
ကရူၢ်ကရၢ(၅၄)ဖုလၢအဒိးန့ၢ်ဘၣ်တၢ်စံးဘျုးပၥ်ပနီၣ်အကျါန့ၣ် ပၣ်ဃုၥ်စ့ၢ်ကီး ခ့ၣ်အဲးစံၣ်-ကညီတၢ်ကစီၣ်လၢအဟူး ဂဲၤဖံးမၤ တၢ်လၢတၢ်ကစီၣ်သန့တကပၤန့ၣ်လီၤ.ဘၣ်ဃးတၢ်ဒိးန့ၢ်ဘၣ်တၢ်ပၥ်ပနီၣ်အံၤန့ၣ် ခ့ၣ်အဲးစံၣ် အဲးဒံးထၢၣ် နါဖီၣ်ဂ့ၤ စံး၀ဲလၢ “ကညီပိၥ်မုၣ်ကရၢအမုၢ်နံၤပှဲၤထီၣ်အနံၣ်(၄၀)တၢ်ရဲၣ်တၢ်ကျဲၤန့ၣ်ပ၀ဲခ့ၣ်အဲးစံၣ်-ကညီတၢ်ကစီၣ်၀ဲၤလီၢ်န့ၣ်တသ့ဖဲအသ့ပမၤသ ကိးတၢ်အဖီခိၣ်န့ၣ်(KWO)ပၥ်ပနီၣ်ပှၤလၢတၢ်စံးဘျုးစံးဖှိၣ်အဃိယပၥ်ကဖၢလၢယသးလၢ(ခ့ၣ်အဲးစံၣ်)ပှၤမၤသကိးတၢ်ဖိခဲလၢၥ်အဂီၢ်လီၤ.ပမၤသကိးတၢ်လၢပှၤတ၀ၢပူၤအံၤယသးမုၥ်သးခုဒိၣ်မးလီၤ.မ့၀ံၤပှၤတ၀ၢပူၤန့ၣ်ပအိၣ်လီၤလီၤဆီဆီတသ့ဘၣ်.ပကဘၣ်မၤသကိးတၢ်လၢသနၢၣ်ဒၣ်၀ဲလီၤ”အဂ့ၢ်န့ၣ် စံး၀ဲန့ၣ်လီၤ.
ဒ်န့ၣ်အသိးကညီပိၥ်မုၣ်ကရၢအံၤလၢနံၣ်(၄၀)အတီၢ်ပူၤ မ့ဘၣ်ထိၣ်သတြီၤအပူၤကွံၥ်ဒီးခဲအံၤန့ၣ် ဘၣ်ဃးတၢ်ဆီၣ်တံၢ်မၤနၢၤ, တၢ်ထံၣ်ဆံးသ့ၣ်တဖၣ်ဆံးလီၤစှၤလီၤ၀ဲအသိး တၢ်ဖံးတၢ်မၤစ့ၢ်ကီးအဂံၢ်ဆူၣ်ထီၣ်အါန့ၢ်အလီၢ်အဖီခိၣ်မ့ၢ်တၢ်မၤနၢၤဖးဒိၣ်တခါ အဂ့ၢ်န့ၣ် နီၢ်ကညီဖီ စံးအါထီၣ်၀ဲ န့ၣ်လီၤ.
“ပကွၢ်ကဒါကညီပိၥ်မုၣ်ကရၢအတၢ်စံၣ်စိၤတဲစိၤန့ၣ်ပှၤလၢဒုးအိၣ်ထီၣ်န့ၢ်ပှၤန့ၢ်မ့ၢ်ဒၣ်ပိၥ်ခွါလီၤ.တကးဒံးဘၣ်လၢကီၢ်ရ့ၣ်တဘျုးဘ့ၣ် အပူၤပှၤလၢတီခိၣ်ရိၣ်မဲတၢ်ကဲကရၢခိၣ်န့ၣ်မ့ၢ်ဒၣ်ပိၥ်ခွါလီၤ.ဘၣ်ဆၣ်ခဲအံၤန့ၣ်ပိၥ်မုၣ်သ့ၣ်တဖၣ်န့ၣ်တီခိၣ်ရိၣ်မဲလီၤကစၢ်သးသ့. တကးဒံးဘၣ်ပတၢ်ကရၢကရိန့ၣ်အဂံၢ်အဘါဆူၣ်ထီၣ်ခီဖျိပဟ့ၣ်တၢ်သ့ၣ်ညါနၢ်ပၢၢ်တၢ်မၤလိမၤဒိးသ့ၣ်တဖၣ်အဃိန့ၣ် ပိၥ်မုၣ်ခိၣ်နၢ် တဖၣ်နၢ်ပၢၢ်အါထီၣ်က့ၤတၢ်.တီခိၣ်ရိၣ်မဲတၢ်ပၣ်ဃုၥ်က့ၤလၢပှၤတ၀ၢကိးပူၤ.ဒီးပတၢ်ကရၢကရိအံၤတကယၤမျးကယၤန့ၣ်ပှၤလၢတီခိၣ်ရိၣ်မဲတၢ်န့ၣ်မ့ၢ်ဒၣ်ပိၥ်မုၣ်လီၤ.ပမ့ကွၢ်အပူၤကွံၥ်ပိၥ်မုၣ်လၢတူၢ်ဘၣ်တၢ်ဆီၣ်တံၢ်မၤနၢၤ,တၢ်ထံၣ်ဆံးလၢပိၥ်မုၣ်အဖီခိၣ်န့ၣ်လီၤစှၤဖးဒိၣ်.အဃိနံၣ်(၄၀)အတီၢ်ပူၤအံၤပမ့ကွၢ်ကဒါက့ၤန့ၣ်မ့ၢ်တၢ်မၤနၢၤဖးဒိၣ်တခါ.”အဂ့ၢ်န့ၣ် စံး၀ဲန့ၣ်လီၤ.
ကညီပိၥ်မုၣ်ကရၢနံၣ်ဆဲးဆၢလၢဘၣ်တၢ်မၤအိၤဘျီ၀ဲအံၤန့ၣ် တၢ်ပၥ်ဖှိၣ်မၤလၤကပီၤ၀ဲဖဲခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ မုၢ်တြီၢ်ကီၢ်ရ့ၣ် (သုးက့ ၅)တၢ်လီၢ်တတီၤအပူၤဒီး တၢ်ရဲၣ်တၢ်ကျဲၤအပူၤခိၣ်နၢ်ကတိၤဟ့ၣ်ဂံၢ်ဟ့ၣ်ဘါလီၤတၢ်, တၢ်ဒုးနဲၣ်ဖျါထီၣ် တၢ်ဂီၤမူဘၣ်ဃးကညီပိၥ်မုၣ်ကရၢနံၣ်(၄၀)တၢ်လဲၤကျဲအဂ့ၢ်,တကးဒံးဘၣ်အိၣ်ဃုၥ်စ့ၢ်ကီး၀ဲတၢ်စံၣ်ကျံၣ်,တၢ်ဂဲၤကလံၣ်ဒိ,ကၠိဖိတၢ်သး၀ံၣ်, ကညီပိၥ်မုၣ်ကရၢခိၣ်နၢ်ဒီးပှၤမၤသကိးတၢ်ခဲလၢၥ်တၢ်သး၀ံၣ်ဒီး တၢ်ဟ့ၣ်လီၤ၀ဲတၢ်ပနီၣ်ဆူပိၥ်မုၣ်ခိၣ်နၢ်,ကရူၢ်ကရၢလၢ အဒိးန့ၢ်ဘၣ်တၢ်လၤကပီၤ,တၢ်စံးဘျုးစံးဖှိၣ်တၢ်ပနီၣ်တဖၣ်အံၤအစုပူၤန့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ လီၢ်ခၢၣ်သးထီဘိကမံးတံၥ်ခိၣ်နၢ်လၢအမ့ၢ် ပဒိၣ်နီၢ်ဒါဒါ, ပဒိၣ်နီၢ်မၠဲၤဖိ, ပဒိၣ်နီၢ်မဲၤရံၤထ့, ကညီဒီကလုၥ်တၢ်ထူၣ်ဖျဲး သုးမုၢ်ဒိၣ်(KNLA)သုးရိၣ်မဲခိၣ်ကျၢၢ်-၂ သုးခိၣ်ကျၢၢ်စိ စီၤဘီကၠီၤဟဲ ,(သုးက့ ၅)သုးက့ခိၣ် သုးခိၣ်ကျၢၢ်ဖိ စီၤဂံၢ်နွံ, ပိၥ်မုၣ်ကရၢခိၣ်နၢ်ပှၤမၤသကိးတၢ်ဖိ, ကရူၢ်ကရၢခိၣ်နၢ်ဘၣ်ထွဲလၢအဂၤဃုၥ်ဒီးကမျၢၢ်ပၥ်ဖှိၣ်ဟဲထီၣ်၀ဲ (၅၀၀) ခိၣ်ဃၢၤန့ၣ်လီၤ.
