လါအ့ဖြ့ၣ် ၂၄သီ, ၂၀၂၅နံၣ်,ခ့ၣ်အဲးစံၣ်,
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့(၆)ဒူပျၥ်ယၥ်ကီၢ်ရ့ၣ်, ကြုၢ်တုကီၢ်ဆၣ်ဟီၣ်ကဝီၤအပူၤ,သုးကီၣ်ကးခးလီၤကျိဖးဒိၣ်တ့ၢ်လီၤမ့ၣ်ပိၢ်ဒီးကဘီယူၤတဘျီဃီအဃိဝၣ်ကးသဝီကၠိတၢ်သူၣ်ထီၣ်(၁)ဖျၢၣ်,ဟံၣ်(၃)ဖျၢၣ်ဘၣ်ဟးဂီၤဝဲဒီးကမျၢၢ်လီၢ်ကဝီၤဖိဘၣ်ဒိဘၣ်ထံးဝဲ(၁)ဂၤအဂ့ၢ်,ဟီၣ်ကဝီၤပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
ဝၣ်ကၣ်သဝီအပူၤမဟါလါအ့ဖြ့ၣ်(၂၃)သီမုၢ်နၤခီ(၈)နၣ်ရံၣ်ဘျဲၣ်အဆၢကတီၢ်သုးကီၣ်ကးကဘီယူၤတ့ၢ်လီၤဝဲမ့ၣ်ပိၢ်(၃)ဖျၢၣ်ဒီးခးလီၤစ့ၢ်ကီးဝဲကျိဖးဒိၣ်(၂)ဖျၢၣ်အိၣ်ဝဲအဂ့ၢ်,သ့ၣ်ညါဘၣ်ဒ်လီၢ်ကဝီၤပှၤဘၣ်မူဘၣ်ဒါတဖၣ်စံးဝဲဒၣ်အသိးန့ၣ်လီၤ.
ဘၣ်ဃးဒီးသုးကီၣ်ကးကဘီယူၤတ့ၢ်လီၤမ့ၣ်ပိၢ်ဒီးခးလီၤဝဲကျိဖးဒိၣ်လၢဝၣ်ကးသဝီကဲထီၣ်သးအဖီခိၣ်,ကြုၢ်တုကီၢ်ဆၣ်ခိၣ်ပဒိၣ်မါကၠၣ်ညိၣ်စံးဘၣ်ခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤ.
“၀ၣ်ကးသဝီန့ၣ်မနၤန့ၣ်ကဘီယူၤတ့ၢ်လီၤမ့ၣ်ပိၢ်တၢ်သၢဖျၢၣ်,ခးလီၤကျိဖးဒိၣ်တခီ(၂)ဖျၢၣ်န့ၣ်လီၤ.ကဘီယူၤတ့ၢ်လီၤမ့ၣ်ပိၢ်ဒီးခးလီၤတၢ်အဖီခိၣ်လီၤတဲၥ်ဝဲဖဲလၢဝၣ်ကးတၢ်မၤလိဒီးကၠိသရၣ်မုၣ်ဝဲၤဒၢးတၢ်လီၢ်အပူၤအသိး,လီၤတဲၥ်လၢကျဲမုၢ်အဆဲလၥ်တဖၣ်န့ၣ်စ့ၢ်ကီးဘၣ်ဒိဝဲကမျၢၢ်ဟံၣ်(၃)ဖျၢၣ်ဃုၥ်ဒီးလီၢ်ကဝီၤပိၥ်ခွါလၢအအီၣ်မ့ၤဖဲဟံၣ်လီၢ်ခံအခါတဂၤန့ၣ်လီၤ”အဂ့ၢ်စံးဝဲဒၣ်န့ၣ်လီၤ.
ဝၣ်ကးသဝီကမျၢၢ်လီၢ်ကဝီၤဖိလၢအဘၣ်ဒိဝဲတဂၤအံၤမ့ၢ်ဝဲမီၤမိ,သးနံၣ်(၄၀)ဘျဲၣ်ဒီးခီဖျိဘၣ်ဒိဘၣ်ထံးဝဲဒီတဂၤအဃိ,တၢ်ဆှၢဝဲအီၤဆူဟီၣ်ကဝီၤအပူၤတၢ်ဆါဟံၣ်ဖဲအဘူးအဂ့ၢ်,ကြုၢ်တုကီၢ်ဆၣ်ပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါမဟါသုးကီၣ်ကးခးကဘီယူၤတ့ၢ်လီၤမ့ၣ်ပိၢ်(၃)ဖျၢၣ်အကျါ,ပိၢ်ဖးထီၣ်ဝဲ(၂)ဖျၢၣ်ဒီးမ့ၣ်ပိၢ်လၢတပိၢ်ဖးထီၣ်ဒံးဘၣ်အိၣ်ဒံးဝဲဒၣ်(၁)ဖျၢၣ်ဒံးအဂ့ၢ်,ကြုၢ်တုကီၢ်ဆၣ်ပှၤဘၣ်မူဘၣ်ဒါတဖၣ်စံးဝဲဒၣ်စ့ၢ်ကီးန့ၣ်လီၤ.
တတကီၢ်ဃီ,ကီးတရံးဒီးကြုၢ်တုဝ့ၢ်ဟီၣ်ကဝီၤအပူၤတကီၢ်ခါခဲအံၤတၢ်ဒုးဆူၣ်ဝဲလၢသုးကီၣ်ကးဒီးတၢ်ပၢၢ်ဆၢသုးပၥ်ဖှိၣ်ကရူၢ်အဘၢၣ်စၢၤဒီးသုးကီၣ်ကးအံၤမၤဝဲကဘီယူၤတၢ်ဒုးပညိၣ်ခးလီၤဝဲကမျၢၢ်လီၢ်ကဝီၤဖိတဖၣ်အိၣ်ဝဲအဖီခိၣ်,စးထီၣ်ဖဲလါအ့ဖြ့ၣ်(၁၅)သီတုၤလၢတုၤလၢအသီ(၂၄)သီအနံၤအပူၤကမျၢၢ်လီၢ်ကဝီၤဖိဘၣ်ဒိဘၣ်ထံးအိၣ်ဝဲအဂၤ(၄၀)ဘျဲၣ်လံဒီးဘၣ်သံဝဲအဂၤ(၂၀)ဘျဲၣ်လံအဂ့ၢ်သ့ၣ်ညါဘၣ်န့ၣ်လီၤ.
ဒ်န့ၣ်အသိး,ဝၣ်ကးသဝီတၢ်မၤလိကၠိလၢသုးကီၣ်ကးလဲၤတ့ၢ်လီၤဝဲမ့ၣ်ပိၢ်အံၤအပူၤကွံၥ်တၢ်ပၥ်ဝဲပှၤဃ့ၢ်တၢ်ဒုးလီၢ်အိၣ်ကမှံဖိအိၣ်ဝဲဘၣ်ဆၣ်,ဟီၣ်ကဝီၤပူၤတၢ်ဒုးဆူၣ်ထီၣ်ဒီးသုးကီၣ်ကးပညိၣ်ခးလီၤဝဲတၢ်လၢကၠိ,သီခါဖၠၣ်,တၢ်ဆါဟံၣ်တၢ်လီၢ်တဖၣ်အပူၤအိၣ်ဝဲအဖီခိၣ်တၢ်သုးကွံၥ်ဆိလီၢ်အိၣ်ကမှံဖိတဖၣ်လီၢ်ကျဲဒီးဒူသဝီဖိတဖၣ်စ့ၢ်ကီးဃ့ၢ်ထီၣ်အိၣ်ကဒုဆိဝဲအသးအဂ့ၢ်,သ့ၣ်ညါဘၣ်ဒ်ဟီၣ်ကဝီၤပှၤဘၣ်မူဘၣ်ဒါတဖၣ်စံးဝဲအသိးန့ၣ်လီၤ.
