လါအ့ဖြ့ၣ် ၁၆ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူပျၥ်ယၥ်ကီၢ်ရ့ၣ်(သုးက့ ၆)ကြုၢ်တုကီၢ်ဆၣ်အပူၤ ဖဲမဟါတါလီၤခံသီတသီအနံၤ ခီဖျိပယီၤသုးကဘီယူၤလဲၤခးလီၤတၢ်လၢကါနံၤသ၀ီပူၤ သီခါဖၠၣ်ကရၢၢ်ပူၤအဃိ ကမျၢၢ်သံ(၆)ဂၤအကျါ ပၣ်ဃုၥ်၀ဲဖိသၣ်(၃)ဂၤ အဂ့ၢ်န့ၣ် ကညီတၢ်ဆီၣ်ထွဲမၤစၢၤတၢ်မုၥ်တၢ်ခုၣ်ပှၥ်ဘျးစဲကရူၢ်(KPSN)ထုးထီၣ်ပၥ်ဖျါ၀ဲဖဲတနံၤအံၤန့ၣ်လီၤ.
ဖဲမဟါလါအ့ဖြ့ၣ် ၁၅ သီ မုၢ်ဃ့ၢ်လီၤအဆၢကတီၢ်န့ၣ် တၢ်ဒုးကဲထီၣ်တအိၣ်သုးကီၣ်ကးအကဘီယူၤပညိၣ်လဲၤတ့ၢ်လီၤ၀ဲမ့ၣ်ပိၢ် (၅၀၀)ပီၣ် ၂ ဖျၢၣ်လၢကါနံၤသီခါဖၠၣ်ကရၢၢ်ပူၤအဖီခိၣ် တၢ်သံတၢ်ပှၢ်တၢ်ဘၣ်ဒိဘၣ်ထံး,တၢ်ဟးဂူၥ်ဟးဂီၤဘၣ်ဟဲကဲထီၣ်၀ဲ ဒိၣ်ဒိၣ် မုၢ်မုၢ်ဒ်အံၤန့ၣ်လီၤ.
ခီဖျိလၢကဘီယူၤအံၤအဃိ ကမျၢၢ်သံ(၆)ဂၤအမဲညါ ကမျၢၢ်ဘၣ်ဒိဘၣ်ထံး၀ဲခဲလၢၥ်(၁၆)ဂၤဒီးဖဲန့ၣ်အကျါပၣ်ဃုၥ်၀ဲ သီခါ(၃)ပါဒီး တပွဲ(၈)ပါ အဂ့ၢ်န့ၣ် (KPSN)လံၥ်တၢ်ပၥ်ဖျါအပူၤ စံး၀ဲန့ၣ်လီၤ.
ဒ်န့ၣ်အသိးတၢ်ကဲထီၣ်သး၀ံၤဖဲတနံၤအံၤလါအ့ဖြ့ၣ် ၁၆ သီဂီၤခီအဆၢကတီၢ်န့ၣ်စ့ၢ်ကီး ပယီၤသုးကဘီယူၤလဲၤခးလီၤတၢ်လၢ ကီးတရံး-ကြုၢ်တုကျဲဘၢၣ်စၢၤ လ့တဲၤ(လေးတိုင်)သဝီ သီခါဖၠၣ်အဃိ သီခါဖၠၣ်တၢ်သူၣ်ထီၣ်အခိၣ်ဒီးအကပိၤကပၤလီၤပှီၢ် ဘၣ်ဒိဘၣ်ထံး ဟးဂီၤ၀ဲဘၣ်ဆၣ် ကမျၢၢ်တၢ်သံတၢ်ဘၣ်ဒိဘၣ်ထံးတအိၣ်၀ဲဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
စးထီၣ်ဖဲလါအ့ဖြ့ၣ် ၁၄ သီအနံၤန့ၣ် ပယီၤသုးလၢအိၣ်ဆီလီၤသးဖဲငါတဲၤ(ငါးတိုင်)သ၀ီ ကၠိကရၢၢ်ပူၤအံၤတဖၣ် ဟီၣ်က၀ီၤ တၢ်ပၢၢ်ဆၢသုးပၥ်ဖှိကရူၢ်နုၥ်လီၤခး၀ဲဒီး ဖဲန့ၣ်တၢ်ဒုးကဲထီၣ်၀ဲလၢခံခီခံကပၤအဘၢၣ်စၢၤန့ၣ်လီၤ.ခီဖျိတၢ်ဒုးကဲထီၣ်အဃိ ပယီၤသုးကလၢၤလၢအိၣ်ဘူးဖဲန့ၣ်တဖၣ်ခးလီၤစိ၀ဲကျိဖးဒိၣ်,ကဘီယူၤစ့ၢ်ကီးဟဲခးလီၤတၢ်တပယူၥ်ဃီလၢတၢ်ကဲထီၣ်သးအခိၣ် အဃၢၤန့ၣ်အဃိ ကမျၢၢ်တဖၣ်ဘၣ်ဃ့ၢ် ထီၣ်ဒံး၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးဖဲလါအ့ဖြ့ၣ် ၁၃ သီ အနံၤန့ၣ်စ့ၢ်ကီး ပယီၤသုး(ခမရ-၅၄၆)ခးလီၤကျိဖးဒိၣ်လီၤတဲၥ်ပိၢ်ဖးထီၣ်လၢကီၣ်၀ါလဲၢ်သ၀ီပူၤအဃိ ဖိသၣ်ပိၥ်ခွါဖိ(၁၅)နံၣ်တဂၤဒီး ဖိသၣ်မုၣ်ဖိ(၁၈)နံၣ်တဂၤ ဘၣ်ဒိဘၣ်ထံးကဲထီၣ်တ့ၢ်အသးဒံးအဂ့ၢ်န့ၣ် (KPSN)စံး၀ဲန့ၣ်လီၤ.
သုးကီၣ်ကးအံၤဆၢကတီၢ်ဖဲတါလီၤအကတီၢ်ကိးမုၢ်ဒဲးဃၣ်ဃၣ်န့ၣ်တမ့ၢ်ထဲလၢခ့ၣ်အဲၣ်ယူၣ်တၢ်ပၢဟီၣ်က၀ီၤအပူၤဘၣ် မ့မ့ၢ်တခီကလုၥ်ဒူၣ်ဖီၣ်စုက၀ဲၤကရူၢ်ကရၢတၢ်လီၢ်လၢအဂၤတဖၣ်စ့ၢ်ကီးသူ၀ဲကျိဖးဒိၣ်ခးလီၤတၢ်ဒီးကဘီယူၤအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤ.