လါအ့ဖြ့ၣ် ၁၈သီ, ၂၀၂၅နံၣ်, ခ့ၣ်အဲးစံၣ်,
ကီၢ်ကၠီၣ်တဲၣ်-ကညီကီၢ်စဲၣ်ကီၢ်ဆၢ,ကၠီးခဲးဟီၣ်ကဝီၤ ကၠါဖၠၣ်ပှၤမၤတၢ်ဖိ(၂၇၇)လၢ ဒ့ၣ်မိၣ်ကရ့ၣ်စံၣ်တၢ်ဘၣ်ဘျုးကညီသုးမုၢ်ဒိၣ်(DKBA)မၤထူၣ်ဖျဲးထီၣ်ဒီးပၥ်ကီၤအီၤသ့ၣ်တဖၣ် တနံၤန့ၣ်တၢ်ဆှၢက့ၤအဝဲသ့ၣ်ဆူ ရၤမတံဝ့ၢ်သုးကီၣ်ကးအပှၤဘၣ်မူဘၣ်ဒါအစုပူၤလံအဂ့ၢ် (DKBA)အပှၤဘၣ်မူဘၣ်ဒါစံးဝဲဒၣ်န့ၣ်လီၤ.
ထံဂုၤကီၢ်ဂၤကၠါဖၠၣ်ပှၤမၤတၢ်ဖိလၢတၢ်ဆှၢဝဲဆူရၤမတံသုးကီၣ်ကးအစုပူၤတဖၣ်အံၤမ့ၢ်ဝဲပှၤလၢအပၥ်ဖျါထီၣ်တ့ၢ်အသးဖဲအပူၤကွံၥ်အလါအ့ဖြ့ၣ်(၁၃)အနံၤတဖၣ်ဒီးဒ်သုးကီၣ်ကးအတၢ်ရဲၣ်တၢ်ကျဲၤအသိးတၢ်ဆှၢလီၤက့ၤအဝဲသ့ၣ်တဖၣ်ဆူသုးကီၣ်ကးအစုပူၤအဂ့ၢ်,ဒံၣ်မိၣ်ကရ့ၣ်စံၣ်တၢ်ဘၣ်ဘျူးကညီသုးမုၢ်ဒိၣ်(DKBA)သုးရိၢ်မဲခိၣ်ကျၢၢ်(၂)သုးခိၣ်ကျၢၢ်စိစီၤရွှ့ၣ်ဝၣ်စံးဘၣ် ခ့ၣ်အဲးစံၣ်-ကညီတၢ်ကစီၣ် ဒ်အံၤန့ၣ်လီၤ.
“တနံၤအံၤကၠီးခဲးပှၤဘၣ်မူဘၣ်ဒါသုးက့(၁)သုးက့ခိၣ်သုးခိၣ်စဲကၠီၣ်လၣ်ဆှၢဝဲပှၤသူဖံးဖိအဂၤ(၂၇၇)ဂၤဆူရၤမတံပယီၤသုးပဒိၣ်ပှၤဘၣ်မူဘၣ်ဒါအစုပူၤန့ၣ်အဝဲပၥ်ဖျါထီၣ်ယၤန့ၣ်လီၤ.ဆှၢဝဲဆူရၤမတံသုးပဒိၣ်ပှၤဘၣ်မူဘၣ်ဒါစုပူၤဒံးလီၤ.တမ့ၢ်လၢရၤမတံမဲၢ်ဆီးတိၤနီၣ်ဂံၢ်(၁)နီၣ်ဂံၢ်(၂)ဘၣ်.ပှၤလၢတၢ်ဆှၢအီၤသ့ၣ်တဖၣ်အံၤန့ၣ်မ့ၢ်ဒၣ်ပှၤလၢအပူၤကွံၥ်စှၤကိၥ်သီပၥ်ဖျါထီၣ်သး(ဆၣ်ဒၣ်ပၠၣ်)သ့ၣ်တဖၣ်လီၤ.ခီဖျိအဝဲသ့ၣ်အိၣ်ဝဲခံလါသၢလါအိၣ်ဝဲတကဲပၥ်ဖျါထီၣ်အသးအဃိန့ၣ်,ပယီၤသုးပဒိၣ်အပှၤဆဲးကျၢလီၤသုးခိၣ်စဲကၠီၣ်လၣ်ဝံၤတဲလိၥ်သးလၢတါလီၤဝံၤဆှၢဆူအဝဲသ့ၣ်အစုပူၤအဃိတနံၤအံၤတၢ်ဆှၢအဝဲသ့ၣ်တဖၣ်လီၤ”အဂ့ၢ်စံးဝဲဒၣ်န့ၣ်လီၤ.
ကၠါဖၠၣ်ထံဂုၤကီၢ်ဂၤပှၤမၤတၢ်ဖိလၢတၢ်ဆှၢဝဲဆူရၤမတံဝ့ၢ်သုးကီၣ်ကးအပှၤဘၣ်မူဘၣ်ဒါစုပူၤတဖၣ်အံၤပၥ်ဖှိၣ်ခဲလၢၥ်အိၣ်ဝဲလၢထံကီၢ်(၉)ဘ့ၣ်အဂ့ၢ်,(DKBA)ပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
ဒီးအဝဲသ့ၣ်တဖၣ်အံၤမ့ၢ်ဝဲပှၤ(ETHIOPIA,CAMEROOM,RWANDA,NIGERIA,SIERRA-LEONE,MALAWI,ZIMBABWE,BURUNDI,VIETNAM)ထံဖိကီၢ်ဖိတဖၣ်အဂ့ၢ်,သ့ၣ်ညါဘၣ်န့ၣ်လီၤ.
ထံဂုၤကီၢ်ဂၤပှၤကၠါဖၠၣ်ပှၤမၤတၢ်ဖိသ့ၣ်တဖၣ်အံၤတၢ်မၤပူၤဖျဲးထီၣ်ကွံၥ်ဝဲဝံၤအလီၢ်ခံ(DKBA)ပှၤဘၣ်မူဘၣ်ဒါတဖၣ်ကွၢ်ထွဲကဟုကယၥ်ပၥ်ဝဲဒီးအဝဲသ့ၣ်တဖၣ်အံၤဒ်သိးကက့ၤဘၣ်ဝဲလၢအနီၢ်ကစၢ်ထံကီၢ်လၢအဆိအချ့အဂီၢ်,ဃ့ထီၣ်ဝဲတၢ်မၤစၢၤလၢတၢ်ကစီၣ်သန့တဖၣ်ဒီးပၥ်ဖျါထီၣ်ဝဲအသးဖဲအပူၤကွံၥ်လါအ့ဖြ့ၣ်(၁၃)သီအနံၤအဂ့ၢ်သ့ၣ်ညါဘၣ်န့ၣ်လီၤ.
ဒီးခီဖျိအဝဲသ့ၣ်တဖၣ်ပၥ်ဖျါထီၣ်သးအဖီခိၣ်,သုးကီၣ်ကးပှၤဘၣ်မူဘၣ်ဒါတဖၣ်အံၤဆဲးကျိးဆဲးကျၢဝဲ(DKBA)ပှၤဘၣ်မူဘၣ်ဒါတဖၣ်လၢကဆှၢဃီၤပှၤသ့ၣ်တဖၣ်အံၤဆူအဝဲသ့ၣ်အစုပူၤတဆီဝံၤကဆှၢခီက့ၤဝဲဆူကၠီၣ်တဲၣ်တကပၤအဂ့ၢ်,သ့ၣ်ညါဘၣ်န့ၣ်လီၤ.
