လါအ့ဖြ့ၣ် ၂၂ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကီၢ်သူလ့ၤတၢ်ပၢချၢၣ်လွံၢ်ထူၣ်ကီၢ်ရ့ၣ်(သုးက့-၃)ဟီၣ်ကဝီၤလၢၢ်ဒိၣ်ကီၢ်ဆၣ်အပူၤတကီၢ်ခါအခဲအံၤန့ၣ်ခီဖျိပယီၤသုး ကီၣ်ကးဟဲထီၣ်ဟူးဂဲၤမၤဝဲဒုးယၤတၢ်ဟူးတၢ်ဂဲၤလၢခီၣ်သုးတကပၤတန့ၢ်ဘၣ်ဒီးဟူးဂဲၤမၤလၢကလံၤကျါကဘီယူၤတၢ်ဟဲခးလီၤတၢ်အဃိဘၣ်ဟးဂီၤကွံၥ်ကဒီးဝဲတၢ်ဘူၣ်တၢ်ဘါတၢ်သူၣ်ထီၣ်လၢအမ့ၢ်(ကံၣ်လၣ်သး)သီခါဖၠၣ်တၢ်သူၣ်ထီၣ်ခဲလၢၥ်ဃၣ်ဃၣ်အဂ့ၢ်လၢၢ်ဒိၣ်အပှၤဘၣ်မူဘၣ်ဒါစံးဝဲန့ၣ်လီၤ.
ခီဖျိပယီၤသုးကီၣ်ကးအံၤဖဲအပူၤကွံၥ်လါအ့ဖြ့ၣ်အသီ(၂၀)အနံၤန့ၣ်ဟဲခးလီၤတၢ်ဒီးကဘီယူၤဒုးသုးဖဲလၢၢ်ဒိၣ်ကီၢ်ဆၣ်(ကံၣ်လၣ်သး)သီခါဖၠၣ်အလီၢ်အဃိသီခါဖၠၣ်တၢ်သူၣ်ထီၣ်ခဲလၢၥ်ဃၣ်ဃၣ်ဘၣ်ဟးဂီၤကွံၥ်ဝဲခီဖျိပယီၤသုးအံၤတၢ်သ့ၣ်ညါဘၣ်လၢကဟဲထီၣ်ဟူးဂဲၤမၤဝဲဒုးယၤလၢခီၣ်သုးတကပၤတပၢၤလၢၤဘၣ်အဃိဟူးဂဲၤဟဲခးလီၤတၢ်လၢကလံၤကျါတပယူၥ်ဃီလီၤအဂ့ၢ်န့ၣ်လၢၢ်ဒိၣ်ကီၢ်ဆၣ်အပှၤကတိၤတၢ်ပၢပဒိၣ်စီၤဝါမုၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ.
“ပယီၤသုးဟဲခးတၢ်တဝီညါအံၤန့ၣ်တၢ်ဘၣ်ဒိဘၣ်ထံးဒုတအိၣ်ဘၣ်. အိၣ်ဝဲဒၣ်လၢခးလီၤဝဲတၢတဖျၢၣ်ဖဲ(ကံၣ်လၣ်သး)သီခါဖၠၣ်တၢ် သူၣ်ထီၣ်ဒီးဘၣ်ဟးဂီၤကွံၥ်တၢ်သူၣ်ထီၣ်ခဲလၢၥ်ဃၣ်ဃၣ်န့ၣ်ပတဲသ့လီၤ. မ့မ့ၢ်လၢခံဖျၢၣ်တဖျၢၣ်န့ၣ်လီၤဝဲဒၣ်ဖဲ(ကံၣ်လၣ်သး)တၢ် လီၢ်ပကိးလၢ(ထံမိၢ်ဂံၥ်ထၣ်)ပၢၤကီၢ်သုးကလၢၤကပၤန့ၣ်လီၤ. တၢ်ဘၣ်ဒိဘၣ်ထံးဒုတအိၣ်ဘၣ်. မ့မ့ၢ်ဒုၣ်ဒါတၢ်ဟူးတၢ်ဂဲၤလၢခီၣ်ကျဲ န့ၣ်လ့တက့ၤဟဲနုၥ်လီၤဝဲတန့ၢ်ဘၣ်. ဒုၣ်ဒါန့ၣ်မ့ၢ်တခးကျိဖးဒိၣ်န့ၣ်,ဟဲခးလီၤတၢ်ဒီးကဘီယူၤလီၤ. ပယီၤသုးအံၤတၢ်လီၢ်လၢအဲၣ်ဒိး ခးဝဲန့ၣ်ခးလီၤဝဲဒၣ်လီၤ.” အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
လၢန့ၣ်အမဲၥ်ညါပယီၤသုးကီၣ်ကးကဘီယူၤဒုးသုးဟဲခးလီၤတၢ်ဘျီဝဲအံၤခးလီၤဝဲဖဲ(ကံၣ်လၣ်သး)သီခါဖၠၣ်အလီၢ်န့ၣ်ခံဖျၢၣ်ဒီးတကးဒံးဘၣ်ခးလီၤစ့ၢ်ကီးဝဲဖဲ(ထံမိၢ်ဂံၥ်ထၣ်)သဝီကညီဒီကလုၥ်ပၢၤကီၢ်သုးတၢ်လီၢ်အကပၤအဂ့ၢ်သ့ၣ်ညါဘၣ်အသိးမ့မ့ၢ်လၢပှၤကညီတၢ်ဘၣ်ဒိဘၣ်ထံးတခီတအိၣ်ဘၣ်ဒီးအိၣ်ဒၣ်ဘၣ်ဟးဂီၤကွံၥ်ဝဲ(ကံၣ်လၣ်သး)သီခါဖၠၣ်တၢ်သူၣ်ထီၣ်အဂ့ၢ်န့ၣ်သ့ၣ်ညါဘၣ်န့ၣ်လီၤ.
ကံၣ်လၣ်သးသီခါဖၠၣ်တၢ်လီၢ်အံၤမ့ၢ်လၢအိၣ်စီစုယံၥ်ဝဲဒၣ်ဒီးကမျၢၢ်ဒူသဝီတၢ်လီၢ်တၢ်ကျဲၤအကဲၣ်(၁၀၀၀)ဃၣ်ဃၣ်အဃိကမျၢၢ်တၢ်ဘၣ်ဒိဘၣ်ထံးတအိၣ်ဝဲဘၣ်ဆၣ်သနါက့ကမျၢၢ်သ့ၣ်တဖၣ်အံၤစးထီၣ်လၢသုးမီၤစိရိၤဟံးဆူၣ်န့ၢ်တၢ်စိတၢ်ကမီၤအခါလံၤလံၤဒီးတုၤအခဲအံၤန့ၣ်ဘၣ်အိၣ်လၢတၢ်ပျံၤတၢ်ဖုး,တၢ်ဘၣ်ယိၣ်ဘၣ်ဘှီအပူၤထီဘိလီၤအဂ့ၢ်န့ၣ်ပဒိၣ်စီၤဝါမုၢ်စံးအါထီၣ်ဝဲဒၣ်စ့ၢ်ကီးန့ၣ်လီၤ.
ဒ်န့ၣ်အသိး(ကံၣ်လၣ်သး)ဟီၣ်ကဝီၤတၢ်လီၢ်အပူၤအပူၤကွံၥ်သုးကီၣ်ကးဟဲခးလီၤတ့ၢ်ဝဲတဘျီအိၣ်ဝဲဒီးဖဲမဟါလါမးၡး(၂၄)သီအနံၤလၢဝ့ၢ်ဒီခိၣ်သဝီဒီးလ့ၣ်ပ့ၣ်သဝီအဘၢၣ်စၢၤဖဲသီခါဒီးပှၤသဝီဖိတနီၤတ့ထီၣ်ဘှီထီၣ်ဝဲတိၥ်အဆၢကတီၢ်ခီဖျိပယီၤသုးကဘီယူၤဒုးသုးဟဲခးလီၤဝဲတၢ်အဃိသီခါတပါအစုဘၣ်တူၥ်ကွံၥ်ဝဲတကပၤဒီးဘၣ်ဒိစ့ၢ်ကီးပှၤသဝီဖိတဂၤအဂ့ၢ်သ့ၣ်ညါဘၣ်လၢလၢၢ်ဒိၣ်ပှၤဘၣ်မူဘၣ်ဒါအအိၣ်န့ၣ်လီၤ.
